2 पतरस 1:6 - Walangi

⁶ होर परमेश्वरे इच्छा जाण कइ अपु अपफ वश अन्तर रखण जे त अपु अपफ वश अन्तर रख कइ लाह रखणे जब्बर कोशिश करे। लाह रखते रखते परमेश्वरे भक्ति करणे कोशिश करे।

2 पतरस 1:6 Iomraidhean Croise

लूका 21:19

तुस ई सोब सेही कइ अपु जीवन बचान्ते।”

लूका 8:15

पर कुछ मेह्‍णु तेस खरी जिमि ईं असे। से परमेश्वरे वचन मन लाई कइ शुणते त तेन्हि पुठ टिगि बिश्ते। त तेन्हि पुठ खरा फल लगता।”

प्रतिनिधि 24:25

जपल पौलुसे दानधर्म जोई जीणे, समोझि कइ बिशणे त एणे बाड़े न्याय बारे बोलुण लगो थिआ, त फेलिक्से डर कइ पौलुस जे बोलु, “अभेईं त तु गा; टेम मेईंयाल त अउं तोउ दुबारी भिआन्ता।”

रोमी 15:4

किस कि धरमे कताब अन्तर जे बि बोक पेहलाई लिखि गो असी, से हें शिक्षाई लिए लिखिए असी, ताकि तेसे बेलि अस लाह जोई दुख सीढ़ बटते, त तसे हिम्मते बेलिए असी उम्मीद मेई सकती।

रोमी 2:7

परमेश्वर तेन्के धे अमर जीवन देन्ता, जे लाह रख कइ खरु कम कते रेहन्ते, ताकि तेन्हि जे परमेश्वर खरु बोलियाल, इज्जत दियेल, होर से तस जुए हमेशा बिशियेल।

रोमी 8:25

पर अस तेस चीजी उम्मीद कते, जे असी अपल तकर मेओरी नेईं। तोउं त असी तस मेण तकर लाह रख कइ भाड़ बिशुण एन्तु।

1 कुरिन्थ 9:25

हर कोई खिलाड़ी ईनाम जीत कइ इज्जत पाण जे सम्हाई कुछ पुठ परहेज रखता। पर से इज्जत मुक घेन्ति। अस त तेस लिए परहेज रखते, ताकि असी से इज्जत मेईंयाल जे कदी ना खतम भुन्ति।

2 कुरिन्थ 6:4

बल्कि कष्ट अन्तर, भुंजुण अन्तर, गरीबी अन्तर, दुख त शोक अन्तर अस ईं हरालणे कोशिश कते कि अस परमेश्वरे सेवक भो।

गलाती 5:23

अस अपु इच्छा नोउएं गुणे वश अन्तर रखते त सम्हाई जेईं अराम जुए धरान्ते। इन्हि कमी के खिलाफ कोई नियम नेईं।

कुलोसी 1:11

अस इ बि प्रार्थना कते कि परमेश्वरे बोडी ताकती बेलि तुस ईं ताकतवर बणे कि कष्ट अन्तर बि सुआ धीरज त बोडी खुशी जुए तेस सीढ़ बटियेल।

1 थेस्सलु 1:3

त हें परमपिता परमेश्वरे सम्हाणि तुस विश्वास अन्तर जे कम कते, परेम जुओई जे मेहनत कते त हें प्रभु यीशु मसीह पुठ जे तुं पक्की उम्मीद असी, तस याद कते।

2 थेस्सलु 1:4

तोउं त अस अपफ परमेश्वरे सतसंग अन्तर तुं बारे रोभ किढ़ते, किस कि सुआ भुंजाणे पता बि तुसी अपु विश्वास त लाह छड़ ना दिता।

2 थेस्सलु 3:5

प्रभु तुं मन अन्तर परमेश्वरे परेम त यीशु मसीहे सीढ़णे शक्ति बधाए।

1 तिमुथि 2:10

किस कि जे जिल्हाणु परमेश्वर मानती तस ए करण जचतु।

1 तिमुथि 2:2

परमेश्वरे सम्हाणि राजा त होरे मोटे अधिकारी जे बि प्रार्थना करे, ताकि अस सुख शान्ति जुए परमेश्वर पुठ विश्वास कर कइ त पूरी इज्जत जुए जी बटियेल।

1 तिमुथि 3:16

होर एथ अन्तर कोई शक नेईं कि हें विश्वासे नियोको बोक सुआ बोडी असी: यीशु मसीह मनख बण कइ जमा, शुची आत्माई तस धर्मी बोलु, तेन स्वर्गेदूती दर्शण दिते, त तेस बारे पूरी धरती पुठ प्रचार भुआ, धरती पुठ सुआ मेह्‍णु तेस पुठ विश्वास किआ, त परमेश्वर बोडी महिमा जुए तस स्वर्ग जे घिन गा।

1 तिमुथि 6:11

पर ए परमेश्वरे मनखा, तिमुथियुसा! तु इन्हि सोबी बोकी केआं दूरु बिश त धरम, भक्ति, विश्वास, परेम, धीरज त अपफ घटाई कइ बिशुण जे अपु पूरी ताकत ला।

1 तिमुथि 6:3

हें प्रभु यीशु मसीहे बोके त शिक्षा परमेश्वरे इच्छाई हेसाब जुओई असी। त जे मेह्‍णु तस खरी शिक्षा छड़ दी कइ गलत शिक्षा देन्ता,

1 तिमुथि 6:6

पर जे अपु कमाई पुठ खुश भोई कइ परमेश्वरे भक्ति कता, तसे सोबी केआं मोटी कमाई असी।

2 तिमुथि 3:5

से परमेश्वरे भक्ति करणे ढंग त कते, पर तसे शक्ति ना मानते। तेन्हि केआं दूरे बिश।

तीतुस 1:1

में ट्यारे तीतुस, परमेश्वरे गुलाम त यीशु मसीहे प्रतिनिधि अउं पौलुस तोउ जे नमस्कार कता। परमेश्वरे अउं लंघो असा ताकि तसे चुणो मेह्‍णु बुच विश्वासे बारे प्रचार करुं त तेन्हि सच्चाई शिचालुण, जेसे बेलि तेन्हि पता लगियाल कि परमेश्वर मनी कइ कीं जीण।

तीतुस 1:8

पर से सेवा पाणि करणे बाड़े, भलाई करणे बाड़े, खरे, न्यायी, समोझि कइ बिशणे बाड़े त शुचा लौते।

तीतुस 2:2

मतलब कि स्याणे मड़दी जे बोल कि से अपु चेता अन्तर, इज्जत जुए, समोझि कइ बिशे। होर अपु विश्वास, परेम त दुख सेहणे अन्तर होरी जे नमूना बणे।

इब्रानी 10:36

तुसी लाह रखण जरूरी असा ताकि तुस परमेश्वरे इच्छा पूरी कर बटियेल त तुसी तसे जुबानी फल मेईंयाल।

इब्रानी 12:1

त किस कि बदेई के ईं हें चोहरो कना एन्हि मेह्‍णु के उगाही के अत हुसुड़ा लगो असा, त एईए, असी हर यक तेन्हि लुन्जयारी बोके त पाप, जे असी अराम जोई अपु जाल अन्तर फसान्ते, तेन्हि दूर फटाई छते। होर यीशु मसीह पुठ ध्यान लाई कइ, लाह जोई तेस दौड़ अन्तर दौड़ते, जेस अन्तर असी दौड़ुण असु।

इब्रानी 6:12

होर तुस नकम्मे ना, बल्कि तेन्हि मेह्‍णु के ईं भुन्ते जे सुआ लाह रख कइ विश्वासे बेलि परमेश्वरे सोब जुबान पूरी भुन्ति हेरियेल।

इब्रानी 6:15

पर केहि टेम तकर लाह रख कइ अखिर अन्तर अब्राहमे परमेश्वरे जुबान पूरी भुण काई।

2 पतरस 1:3

जीवन जीण जे त परमेश्वरे भक्ति करण जे जे कुछ बि असी लौतु, परमेश्वरे अपु शक्ति बेलि से सोब हें धे दुतो असु। परमेश्वर बोडा त सुआ खरा भुणे बझई जोई अस भिहो असे। असी तसे पता असा, तोउं त ई सोब असी मेई गो असु।

2 पतरस 3:11

त किस कि ए सोब चीजे ईं भुई कइ खतम भुणे बाड़ी असी, त तुं चाल चलण त जीण की भुण लौता? जरूर शुचा त परमेश्वरे भक्ति बइ भरिए लौता।

प्र. बोके 1:9

अउं यूहन्ना, विश्वास अन्तर तुं भाई त मसीह यीशु लिए दुख सीढ़ण अन्तर तुं ईं हेस्सेदार असा। होर तुं ईं परमेश्वरे राज्ये वारिस भुणे उम्मीद रखो असी। अउं परमेश्वरे वचन त यीशु मसीहे बारे उगाही देणे बझई जोई पतमस नओएं यक टापु अन्तर कैद थिआ।

प्र. बोके 13:10

जेस कैद अन्तर घेण असु, से कैद अन्तर घेन्ता। जेस तलवारी बइ मरण असु, से तलवारी बइ जरूर मरता। एस बोक अन्तर शुचे मेह्‍णु के लाह रखण त विश्वास कते रेहण जरूरी असु।

प्र. बोके 14:12

एसे मतलब भुआ ई कि जे परमेश्वरे केहणा मानते त यीशु पुठ विश्वास कते, तेन्हि शुचे मेह्‍णु लाह रखणे जरूरत असी।

प्र. बोके 2:2

अउं तुं कम, तुं मेहनत, त तुं लाह रखुंण जाणता। होर ईं बि जाणता कि तुस कीं बुरे मेह्‍णु हेरी ना बटता। त तुसी से सोब परख कइ झूठे कइ छड़े, जे अपफ जे प्रतिनिधि त बोते, पर असे नउ।