2 पतरस 1:12 - Walangi

¹² तोउं त, बेशक तुस अन्हि बोकी जाणते, होर जे सच्चे वचने शिक्षा तुसी मेओ असी, तेस पुठ पक्के भोई गो असे, तोउं बि अउं तुसी इन्हि बोकी के चेता दिआण जे हमेशा तेयार रेहन्ता।

2 पतरस 1:12 Iomraidhean Croise

प्रतिनिधि 16:5

ईं कर कइ हर जगाई सतसंग विश्वास अन्तर पक्के भुन्ते गे त रोज रोज विश्वासी बि बधते गे।

फिलिप्पी 3:1

त में भाई त भेणिओं! खुशी मनान्ते रेह किस कि अस परमेश्वरे भिन्थ। जे जे बोक मेईं पेहले तुसी जे बोलो थी तोउं बि तस घड़ी घड़ी लिखुण जे अउं कोई परवाह ना कता, किस कि तेन्के बेलि तुं विश्वास सही सलामत रेहन्ता।

कुलोसी 1:5

तुं विश्वास त परेम इ हरालता कि स्वर्ग पुठ जे अशुश तुसी जे असी, तस पुठ तुसी जब्बर उम्मीद रखो असी, जेसे बारे तुसी खुश खबरी बेलि शुणो थिउ।

कुलोसी 2:7

त तस पुठ अपु विश्वास सीरी के ईं टडी कइ बस घिए त तसे ज्ञान अन्तर बधीण दिए। जीं तुसी शिचो असु तीं कते-कुते विश्वास अन्तर पक्के भोई घिए त परमेश्वरे जब्बर धन्यवाद दिए।

1 तिमुथि 4:6

बे कोईया, अगर तु विश्वासी भाई भेणि जे इन्हि बोकी के चेता दिआन्ता रेहन्ता त तु यीशु मसीहे बधिआ सेवक बणता। त विश्वासे वचन त जे खरी शिक्षा तेईं अभेईं तकर मनो असी, तेन्हि बोकी बइ तें लालन-पालन भुन्ता रेहन्ता।

2 तिमुथि 1:6

इस बझई जुए अउं तोउ चेता दिआन्ता की परमेश्वरे जे वर में हतेउ रखणे बेलि तोउ मेओ थिआ, तस सुसुर उरतीण-बरतीण दिए।

इब्रानी 10:32

पर तुस तेन्हि दिनि याद करे, जपल तुसी पेहले फेरि परमेश्वरे सच्चाई पता लगा, त तुस सुआ दुख तकलीफ सेही कइ बि विश्वास अन्तर खरे पक्के भोई बिशे।

इब्रानी 13:9

तोउं त, होरे होरे अजीब प्रवचन शुण कइ यीशु पुठ विश्वास करण छड़ न दिए। खरु ई असु कि परमेश्वरे कृपाई बेलि हें मन ताकत मेओ लौती, ना कि खाणे पीणे चीजी के बेलि, किस कि खाणे पीणे नियम मानणे बाड़ी के तेन्हि नियमे बेलि कुछ फायदा न भुआ।

1 पतरस 5:10

परमेश्वर सोब दाह दयाई करणे बाड़ा भो, त तेन तुस मसीहे बेलि अपु अमर सुखे हेस्सेदार बणुण जे भिहो असे। तुं थोड़ी टेमे लिए दुख सीढ़ण केआं पता, से अपफ तुसी सिद्ध, विश्वास अन्तर पक्का त ताकतवर बणान्ता।

1 पतरस 5:12

मेईं ई दुई चोउर अखर सिलवानुस केईआं लिखाए। अउं तस यकीन लेएक भाई समझता। त मेईं तुसी हिम्मत देण जे त ई बताण जे लिखो असु कि तुस जे दुख सीढ़ते, तेस पुठ सच्चे परमेश्वरे दाह असी। त तुस परमेश्वरे दाह अन्तर पक्के भोई बिशे।

2 पतरस 1:13

त जपल तकर अउं डेरे ईं मेओ जिसम अन्तर असा, तपल तकर इन्हि बोकी के बेलि तुसी खबरदार कता रेहन्ता। ईं करण मोउं खरु लगतु।

2 पतरस 1:15

तोउं त, अउं तीं कोशिश कता, ताकि में डेरा छुटुण केआं पता बि तुस अन्हि सोबी बोकी याद कइ बटियेल।

2 पतरस 3:1

ए ट्यारेओ! अब अउं तुसी जे ई दोकी चिट्ठि लिखण लगो असा। त एन्हि अन्तर अउं तुसी याद दिआई कइ हिम्मत देन्ता कि तुस अपु मन शुचा रखे।

2 पतरस 3:17

तोउं त, ए ट्यारेओ! किस कि तुसी इन्हि बोकी के बारे पेहलाई पता लग गो असा, त तुस चौकाने बिशे, ताकि बेधर्मी के गलती अन्तर फस कइ विश्वास केईआं ना भटकियेल, होर अपु विश्वास खतम ना करियेल।

1 यूहन्ना 2:21

मेईं तुसी जे तोउं नेईं लिखो कि तुस सच्चाई ना जाणते। पर तोउं लिखो असु कि तेस जाणते। होर तुसी ई बि पता असा कि सच्चाई अन्तरा कदी झूठ ना निस्तु।

2 यूहन्ना 1:2

अस तुसी जोई परेम कते किस कि से सच्चाई हमेशा हें अन्तर भुन्ति त हमेशा हें सात रेहन्ती।

यहूदा 1:17

पर ए ट्यारेओ, तुसी से बोके याद रखीण, जे हें प्रभु यीशु मसीहे प्रतिनिधि तुसी जे पेहलाई बोल गो असे।

यहूदा 1:3

ए ट्यारेओ! में मन अन्तर त ती चह थी कि अउं तुसी जे परमेश्वरे असी बचाणे बारे लिखुं, जेस अन्तर अस सोब मी कइ हेस्सेदार असे। पर अब मोउं ई जरूरी लगतु कि तुसी हिम्मत दिउं कि तुस कीं कइ अपु तेस विश्वासे रक्षा करियेल, जे विश्वास परमेश्वरे सोबी शुचे मेह्‍णु कें धे यके लिंगि दुतो असा।

यहूदा 1:5

तुसी ए सोब बोके पेहलाई केआं सुसुर पता असी। तोउं बि, अभेईं अउं तुसी इन्हि बोकी के चेता दिआण चहन्ता कि बेशक प्रभु पूरे इस्राएले मेह्‍णु मिस्र देशे गुलामी केआं छुड़के, तोउं बि जेन्हि तेस पुठ विश्वास ना किआ, से सोब खतम कइ छड़े।