1 तिमुथि 2:1 - Walangi

¹ सोबी केआं पेहले अभेईं अउं तुसी जे हथ जोड़ कइ बोता कि परमेश्वरे सम्हाणि सोबी मेह्‍णु जे छनेअरे, विनती, प्रार्थना, त धन्यवाद करे।

1 तिमुथि 2:1 Iomraidhean Croise

प्रतिनिधि 17:30

“तोउं बि परमेश्वरे पेहलकण जमाने मेह्‍णु के मुर्खे कमी पुठ ध्यान न दिता, पर अब तसे निआंग ईं असी कि हर जगाई मेह्‍णु अपु अपु मन बदलाए।

रोमी 1:8

सोबी केआं पेहले त अउं तुं सोबी के लिए यीशु मसीहे बेलिए अपु परमेश्वरे धन्यवाद कता, किस कि मसीह पुठ तुं विश्वासे बारे पूरे धरती पुठ बोके भुण लगो असी।

रोमी 6:17

पर परमेश्वरे धन्यवाद लौता भो कि तुस जे पेहले पापे गुलाम थिए, अब पूरे मन जुए तेस शिच मानणे बाड़े बण गे, जे तुसी मेओ थी।

1 कुरिन्थ 15:3

तोउं त मेईं सेईंए समाचार जे सोबी केआं खास असा, तुसी केईं पुजाई छड़ा, जे मोउं केईं पुजो थिआ। से समाचार ई थिआ कि धरमे कताबे हेसाब जोई यीशु मसीह हें पापी के लिए मर गा।

2 कुरिन्थ 8:6

तोउं त असी बि तीतुसे छनेअरे किउ कि जीं तेन तुं बुछ ई खरु कम करणे शुरुवात कइ छो असी, तीं तस पूरा बि करे।

इफिसुस 3:13

तुसी जे, जे कष्ट अउं सेहन्ता, एसेरी बेलि तुं फायदा भुन्ता। त अउं हथ जोड़ता कि तुस अपु हिम्मत ना छड़े।

इफिसुस 5:20

सम्हाई चीजे बारे, हर बेले हें प्रभु यीशु मसीह नओं पुठ परमपिता परमेश्वर जे धन्यवाद दिए।

इफिसुस 6:18

हर बेले, हर चीजी लिए शुची आत्मा बेलि प्रार्थना, दुआ कते रिहे। हेरी बिशे त होरे शुचे मेह्‍णु जे लगातार दुआ कते रिहे।

फिलिप्पी 1:3

ए ट्यारे! जपल बि मोउं तुं याद एन्ती, अउं हर बेले अपु परमेश्वरे धन्यवाद कता। किस कि जिखेईं केआं खड़ी तुसी यीशु मसीह बारे खुश खबरी शुणो असी, तसे प्रचार करण अन्तर तुसी में साथ दुतो असा। तोउं त, अउं बोडे खुशी जुए याद कर कइ तुसी जे हर बेले प्रार्थना कता।

फिलिप्पी 4:6

केसे बोक पुठ बि स्यापा ना करे। बल्कि हर यक हाल पुठ धन्यवाद जुए परमेश्वर अगर प्रार्थना त विनती करे।

1 थेस्सलु 3:12

त प्रभु ईं कराल कि जीं अस तुसी जोई परेम कते, तीं तुस बि ना सद अपफ जुओई, बल्कि होरी जोई बि परेम करे त परेम अन्तर बधते घिए।

2 थेस्सलु 1:3

ए भाई त भेणिओं! असी हर वकत तुं लिए परमेश्वरे धन्यवाद करण चहिए, किस कि तुं विश्वास सुसुर बधण लगोरा असा त तुं सम्हाई के अपफ बीची परेम बि सुआ पक्का भुणे लगोरा असा। त असी परमेश्वरे धन्यवाद करण बणता।

1 तिमुथि 2:4

परमेश्वर ईं चहन्ता कि सोबी मेह्‍णु तसे सच्चाई सुसुर पता लगियाल त से सम्हाई बच घियेल।

1 तिमुथि 5:5

जेस विधवा केईं कोई मदत करणे बाड़ा नेईं त यकदम अकेली असी, से परमेश्वर भाड़ती त अपु जरूरते लिए भ्यागे ब्यादि परमेश्वर जे विनती प्रार्थना कती रेहन्ती।

2 तिमुथि 2:24

प्रभु सेवक फर्तुआटा ना लौता, पर सोबी जुए नरमी कइ बिशणे बाड़ा, खरा शिचालणे बाड़ा त सुआ सीढ़णे बाड़ा लौता।

तीतुस 2:11

किस कि परमेश्वरे कृपादृष्टि भुओ असी, जेसे बेलि सोब मेह्‍णु बच घियेल।

तीतुस 3:2

केसे जे बदनाम ना करे, होर ना झगड़ा करे। पर सोबी अब्बल गुण जुए सम्हाई मेह्‍णु जुए बिशे।

इब्रानी 6:11

त अस चहन्ते कि तुस सोब अखिर तकर बोडे जोश जुए तिहांणि कते रिहे, ताकि तुस जे उम्मीद करण लगो असे, से तुसी मेई घियेल।

याकूब 5:16

तोउं त तुस यकी होरी सामणि अपु पाप मनीण दिए, त यक होरी जे प्रार्थना करे, जेसे बेलि तुस सोब ठीक भोई घियेल। धर्मी मेह्‍णु प्रार्थना सुआ ताकतदार त असरदार भुन्ति।