1 तिमुथि 1:4 - Walangi

⁴ त तु मेह्‍णु समझा कि जेन्हि स्याणी के कथा त नामुकणे ऊड़ी बही खाता बेलि झगड़ा-भेड़ा भुन्ता, तस पुठ मन ना लाए। किस कि ए सोब बोके परमेश्वरे योजनाई हेसाब जुओई नेईं, जे विश्वासे बेलि कम कता।

1 तिमुथि 1:4 Iomraidhean Croise

2 कुरिन्थ 1:12

अस इस बोकी पुठ रोभ किढ़ बटते त हें अन्तरात्मा बि इ उगाह देन्ती कि असी पूरी सच्चाई जुए, शुची जिन्‍दगी जीओ असी, खास कर तुं सामणि। ए असी मेह्‍णु दुतो ज्ञाने बेलि नेईं किओ, बल्कि परमेश्वर केआं भुओ कृपादृष्टि बेलि।

इफिसुस 3:2

तुसी जरूर पता भोल कि तुं भलाई लिए परमेश्वरे दाह करणे खबर तुसी बुच प्रचार करणे जिम्मा मोउं मेओ असा।

1 तिमुथि 3:16

होर एथ अन्तर कोई शक नेईं कि हें विश्वासे नियोको बोक सुआ बोडी असी: यीशु मसीह मनख बण कइ जमा, शुची आत्माई तस धर्मी बोलु, तेन स्वर्गेदूती दर्शण दिते, त तेस बारे पूरी धरती पुठ प्रचार भुआ, धरती पुठ सुआ मेह्‍णु तेस पुठ विश्वास किआ, त परमेश्वर बोडी महिमा जुए तस स्वर्ग जे घिन गा।

1 तिमुथि 4:7

पर बेधर्मी बोकी त स्याणी जिल्हाणु के मन गढ़त कथाई केआं दूर बिश, होर जीं यक खिलाड़ी कसरत कते रेहन्ता, तीं तु बि परमेश्वरे भक्ति अन्तर जीण जे पूरा कोशिश कते रेह।

1 तिमुथि 6:11

पर ए परमेश्वरे मनखा, तिमुथियुसा! तु इन्हि सोबी बोकी केआं दूरु बिश त धरम, भक्ति, विश्वास, परेम, धीरज त अपफ घटाई कइ बिशुण जे अपु पूरी ताकत ला।

1 तिमुथि 6:20

त ए तिमुथियुसा! जे सच्चा वचन तेन्धे दुतो असे, तेन्हि सही सलामत रख कइ मेह्‍णु शिचालिण दे; त जे शिक्षा परमेश्वरे इच्छाई खिलाफ असी, तेस केआं त जुठी बोकी बेहेस केआं बि दूर बिश।

2 तिमुथि 2:14

बे कोईया! सोब विश्वासी जे इन्हि बोकी के बारे चेता दिआन्ता रेह। त परमेश्वरे सम्हाणि जड़कइ कइ बोल कि कुछ शब्दे मतलब जुओई अपफ बुछ झगड़ा भेएड़ा ना करे, किस कि इन्के बेलि कोई फायदा ना भुन्ता। बल्कि जे एन्हि शुणते तेन्के विश्वास खतम भोई घेन्ता।

2 तिमुथि 2:22

तोउं त में कुआ, जे पापे कम जवान मेह्‍णु करण चहन्ते, तेस केआं दूर बिश त जे शुचे मन जुए परमेश्वरे सेवा कते, तेन्हि जुए मी कइ परमेश्वरे नजर अन्तर अब्बल जीणे, तसे यकीन लेएक भुणे त होरी जे परेमे करणे, होर उई मी कइ बिशुण जे जीं तीं कोशिश कर।

2 तिमुथि 2:23

पर बेमतलबी त बेअक्ले बेहेस केआं दूर बिश, किस कि तोउ त पता असा कि एन्के बेलि झगड़े भेएड़ा भुन्ता।

2 तिमुथि 4:4

से खरी शिक्षा अणशुणि कइ छते त मन गढ़त बोके त कथाई कन लाई कइ शुणते।

तीतुस 1:1

में ट्यारे तीतुस, परमेश्वरे गुलाम त यीशु मसीहे प्रतिनिधि अउं पौलुस तोउ जे नमस्कार कता। परमेश्वरे अउं लंघो असा ताकि तसे चुणो मेह्‍णु बुच विश्वासे बारे प्रचार करुं त तेन्हि सच्चाई शिचालुण, जेसे बेलि तेन्हि पता लगियाल कि परमेश्वर मनी कइ कीं जीण।

तीतुस 1:14

होर यहूदी के से बेह्‌लि कथाई जे त सच्चाई छड़ देण बाड़े तेन्हि मेह्‍णु के निआंग जे कोई ध्यान ना दे।

तीतुस 3:9

पर बेमतलब बेहेस केआं, त ऊड़ी बही खाता, मडीण झगड़ीण त नियमे बारे झगड़े केआं दूर बिश, किस कि से सोब खाली त बेकार असु।

इब्रानी 13:9

तोउं त, होरे होरे अजीब प्रवचन शुण कइ यीशु पुठ विश्वास करण छड़ न दिए। खरु ई असु कि परमेश्वरे कृपाई बेलि हें मन ताकत मेओ लौती, ना कि खाणे पीणे चीजी के बेलि, किस कि खाणे पीणे नियम मानणे बाड़ी के तेन्हि नियमे बेलि कुछ फायदा न भुआ।

2 पतरस 1:16

जपल असी तुसी जे हें प्रभु यीशु मसीहे शक्ति त एणे खुश खबरी शुणाओ थी, त से चलाकी जोई बड़ाओ मेह्‍णु के कथा न थी, पर असी अपफ अपु टीरी बइ हेरो थी कि से कत ताकतवर असा।