1 पतरस 2:12 - Walangi

¹² होरे परमेश्वर ना मानणे बाड़े मेह्‍णु के बुच तुं चाल चलण ईं खरा लौता भो कि जेन्हि जेन्हि बोकी अन्तर से तुसी कुकर्मी मान कइ बदनाम कते, से तुं खरे कम हेर कइ परमेश्वरे एणे रोज तसे गुणगान करियेल।

1 पतरस 2:12 Iomraidhean Croise

मत्ती 10:25

चेले गुरु जोई त नौखरे मालिक जोई बराबर भुणे ईं रज्जि असु। जपल तेन्हि गीहे मालिक जे ‘शैतान’ बोलु त तसे गीहे बाड़ी जे की न बोते?”

मत्ती 5:11

धन्य भुन्ते तुस जपल मेह्‍णु में बझई जोई तुं बेज्जती कते, तुसी भुंजान्ते त झूठ बोल कइ तुं बारे हर यक बुरी बोक कते।”

मत्ती 5:16

तिहांणि अपु चमक बि सोबी मेह्‍णु के सामणि चमकाए कि से तुं खरे कम हेर कइ तुं बोउए गुणगान कते, जे स्वर्ग अन्तर असा।”

मत्ती 9:8

ईं हेर कइ मेह्‍णु डर गे त परमेश्वरे गुणगान करण लगे कि परमेश्वरे तेन्के बुच यक ईं ताकतवर मेह्‍णु लंघो असा।

लूका 1:68

इस्राएले प्रभु परमेश्वरे गुणगान करे। किस कि तेन अपु मेह्‍णु पुठ कृपादृष्टि किओ असी त से छुड़को असे।

लूका 19:44

त तुसी त तुं गभुर जे यरुशलेम शेहर अन्तर असे, तेन्हि मार छते त तुं शेहरे घोड़ी पुठ घोड़े बि बिशुण ना देन्ते; किस कि तुसी इस टेम जिखेईं तुसी पुठ परमेश्वरे कृपा भो थी से ना पिछाणी।”

लूका 6:22

“धन्य भुन्ते तुस, जपल मेह्‍णु मनखे कोईये बझई जुए तुसी जोई बैर कते, त तुसी बखरे छते त तुं बेज्जती कते, होर तुं बुराई कर कइ तुं नओं बदनाम कते।

यूहन्ना 13:31

जपल से बाहर घेई गा त यीशु बोलु, “अभेईं अउं जे मनखे कुआ असा, कत बोडा असा, परमेश्वर तस हरालणे बाड़ा असा। त परमेश्वर बोडा असा से मनखे कुआ हरालणे बाड़ा असा।

प्रतिनिधि 15:14

शमौन पतरसे असी बताउ कि कीं कइ परमेश्वरे शुरुवाती दिनि अन्तर गैर यहूदी मेह्‍णु के बुछ अपु टज बणाण जे कृपा किओ असी।

प्रतिनिधि 24:13

एन्हि त तुं समाणि जे सोबी इलजाम मोउं पुठ लओ असे, से बि साबित कइ ना बटते।

प्रतिनिधि 25:7

जपल से आ त यरुशलेम शेहर केआं अओ यहूदी मेह्‍णु तसे बियेर बइ खड़ी गे त सुआ झुठी झुठी इलजाम लाण लगे, जे तेन्हि अपफ साबित कइ ना बटे।

प्रतिनिधि 28:22

हें इच्छा थी कि मसीहे बती बारे अस तुं मुंह केआं ईं शुणुण। होर असी पता असा कि हर जगाई एस बती विरोध भुण लगो असा।”

रोमी 12:17

बुराई बंटि केसे जोई बुराई न करे। तस कम करे जेसे बेलि सोबी मेह्‍णु के भलाई भुन्ति।

रोमी 13:13

असी तीं जीण, जीं अस दिसाई हंटते। ना कि मौजमस्ति कर कइ, न प्याकड़ बण कइ, न नाजायज रिश्ता बणाई कइ त बेशर्मी कम कर कइ, होर न कुटीण मडीण त जड़ कइ।

रोमी 14:18

अगर तुस एसे ईं मसीहे सेवा कते, त परमेश्वर तुसी जुए खुश भुन्ता, होर मेह्‍णु तुं इज्जत कते।

रोमी 15:9

होर से गैर यहूदी मेह्‍णु पुठ परमेश्वरे दाहे बझई जोई बि आ, ताकि से बि परमेश्वरे महिमा करियेल, जीं धरमे कताब अन्तर राजा दाऊदे लिखो असु, “ए प्रभु, तोउं त अउं हर यक जाति मेह्‍णु के बुछ तें धन्यवाद कता, त तें नओएं भजन लान्ता।”

1 कुरिन्थ 14:25

किस कि तसे मन अन्तर की चलो असु से सोब बाहर एई घेन्तु। तोउं, से उटेऊ बिश कइ परमेश्वरे भक्ति कता त मन छता कि सच्चे, परमेश्वर तुं बुच असा।

2 कुरिन्थ 1:12

अस इस बोकी पुठ रोभ किढ़ बटते त हें अन्तरात्मा बि इ उगाह देन्ती कि असी पूरी सच्चाई जुए, शुची जिन्‍दगी जीओ असी, खास कर तुं सामणि। ए असी मेह्‍णु दुतो ज्ञाने बेलि नेईं किओ, बल्कि परमेश्वर केआं भुओ कृपादृष्टि बेलि।

2 कुरिन्थ 13:7

अस परमेश्वर जे प्रार्थना करण लगो असे कि तुस पाप कर कइ असी प्रतिनिधि भुणे ताकत साबित करणे लिए मजबूर ना करे। बल्कि तुस सोब कुछ सुसुर करे, बेशक तसे बेलि असी अपु प्रतिनिधि भुणे ताकत हरालणे कोई मौका ना मेईंयाल।

2 कुरिन्थ 8:21

किस कि अस तेस कम करण जे कष्ट उठाण लगो असे जे कम ना सद प्रभु खुश कता, बल्कि मेह्‍णु बि सही लगतु।

इफिसुस 2:3

अस बि पेहले अपु अपु जिसमे इच्छाई जुए जीन्तेथ त अपु मन मर्जी कतेथ त होरे मेह्‍णु ईं हें गुण भुणे बझई जुए असी बि परमेश्वर केआं सज्जा मेण बाड़ी थी।

इफिसुस 4:22

अपु पेहलकण चाल चलणे बारे तुसी शिचो असु कि जे पुराणे गुण, गलत इच्छाई बेलि खराब भोई गो असे, तस छड़ दिए।

फिलिप्पी 1:27

पर जीं बि भोल, तुस तीं जीण दिए जीं मसीहे खुश खबरी मानणे बाड़े जीन्ते। तोउं चहे अउं एई कइ तुसी जोई मिआल या तुसी केईं दूर भोई घियाल, अउं तु बारे ईं शुणता कि तुस विश्वास अन्तर बसी कइ, यक मन भोई कइ जे खुश खबरी विरोध कते तेन्हि जे तेसे सच्चाई उगाह देन्ते, जेस पुठ अस विश्वास कते।

फिलिप्पी 4:8

त में ट्यारे भाई त भेणिओं! अउं चहन्ता कि जे कुछ बि सच्चाई असी, इज्जतदार असे, सही असे, शुचा त अब्बल असे, जे जे बि खरे असे त तारीफ लेएक असे, तुस तसे बारे सोचते रिहे।

1 थेस्सलु 4:12

इ करणे बेलि तुस होरे मेह्‍णु सम्हाणि बधिआ जिन्‍दगी काट बटते त तुं कोई घटी ना भोल।

1 तिमुथि 2:2

परमेश्वरे सम्हाणि राजा त होरे मोटे अधिकारी जे बि प्रार्थना करे, ताकि अस सुख शान्ति जुए परमेश्वर पुठ विश्वास कर कइ त पूरी इज्जत जुए जी बटियेल।

1 तिमुथि 4:12

तु परमेश्वरे वचन अन्तर, तें चाल चलण अन्तर, परेम त विश्वास अन्तर होर शुचे विचार अन्तर सम्हाई विश्वासी जे नमूना बण, ताकि तें कम उमरी बझई जुए कोई तें बोक अणशुणि ना करे, पर सोब पूरा मन लाई कइ शुणे।

इब्रानी 13:18

अस जाणते कि हें अन्तरात्मा साफ असी। होर अस हर यक बोक अन्तर इज्जत जोई जिन्‍दगी जीण चहन्ते। त हें लिए प्रार्थना कते रिहे।

इब्रानी 13:5

होर तुं मन अन्तर केसे चीजी लाछ न लौती। जे किछ बि तुसी केईं असु तेस अन्तर खुश बिशे, किस कि परमेश्वरे अपफ बोलो असु, “अउं तुसी कदी छड़ ना देन्ता, होर ना तुसी कदी बिसरीन्‍ता।”

याकूब 3:13

तुसी अन्तर बुद्धिमान त समझदार कोउं असा? अगर कोई ईं असा त से अपु अब्बल जीणे बेलि त अपफ घटाई कइ बुद्धि जुए कम कर कइ हरालिण दिए।

1 पतरस 2:15

किस कि परमेश्वर इच्छा ई भो कि तुस भले कम कर कइ मुर्खी के मुर्खे बोक बन्न करे।

1 पतरस 3:16

होर अपु अपु अन्तरात्मा साफ रखे, ताकि जे मसीह अन्तर तुं खरे चाल चलणे बेज्जती कते, तुसी भुंजान्ते टेम लजियेल।

1 पतरस 4:11

अगर तुसी बोक करणे वरदान मेओ असा त परमेश्वरे वचने प्रचार करे। अगर तुसी होरी के सेवा करणे वरदान मेओ असा त परमेश्वर दुतो ताकते बेलि सेवा करे, ताकि सोबी बोकी अन्तर यीशु मसीह बेलिए, परमेश्वर सुआ इज्जत मेईंयेल। सुआ इज्जत त सम्हाई अधिकार जुग जुगे लिए तसेरी भो। आमीन।

2 पतरस 3:11

त किस कि ए सोब चीजे ईं भुई कइ खतम भुणे बाड़ी असी, त तुं चाल चलण त जीण की भुण लौता? जरूर शुचा त परमेश्वरे भक्ति बइ भरिए लौता।