ତୀତସ 3:5 - New Testament in Pengo Parja Language

⁵ ଆପେଙ୍ଗ୍ ଦରମ୍ କାମାୟ୍ କିତାପ୍‌ନା ଇଞ୍ଜି, ହେୱାନ୍ ମାଙ୍ଗେଙ୍ଗ୍ ମା ପାପ୍‌ନି ଦଣ୍ଡ୍‌ତାଙ୍ଗ୍ ଉଦାର୍ କିଦ୍‌ୱାତାନ୍‌ନା, ମାତର୍ ତା ଦୟାତାଙ୍ଗ୍ ହେୱାନ୍ ମାଙ୍ଗେଙ୍ଗ୍ ଉଦାର୍ କିତ୍‌ତାନ୍‌ନା। ଈଶ୍ୱର ମାଙ୍ଗେଙ୍ଗ୍ ପୁନି ଜିବୁନ୍ ହିତ୍‌ତାନ୍‌ନା। ହେୱାନ୍ ମା ପାପ୍ ମାବେତାଙ୍ଗ୍ ଦେହା କିତ୍‌ତାନ୍‌ନା ଆରେ ପୁନି ବାବ୍‌ରେ ଜିବୁନ୍ କାଟିକିନି କାଜିଙ୍ଗ୍ ସାଇଜ କିତ୍‌ତାନ୍‌ନା। ହେୱାନ୍ ମାଙ୍ଗେଙ୍ଗ୍ ପବିତ୍ର ଆତ୍ମା ହିଜି ଇଦାଙ୍ଗ୍ ୱେଚ୍‌ଚାତାନ୍‌ନା।

ତୀତସ 3:5 Iomraidhean Croise

ମାତିଉ 3:11

“ଏପେଙ୍ଗ୍ ପାପ୍ କାମାୟ୍ ପିସ୍ତି ମାପୃତାକେ ୱାତିଲେ ଆନେଙ୍ଗ୍ ମିଙ୍ଗେଙ୍ଗ୍ ଏଜୁକାଙ୍ଗ୍ ଡୁବନ୍ ହିଦ୍‌ନାଙ୍ଗା, ମାତର୍ ନା ପାଚେ ଇନେର୍ ୱାନାନା, ହେୱାନ୍ ନା ତାକେତାଙ୍ଗ୍ ବେସି ସାକ୍ତିକାଟାକାନ୍। ଆନେଙ୍ଗ୍ ଚାକର୍ ଲେକେ ଆଜି ତା କାଲ୍‌ନି ପାଣ୍ଡାୟ୍ ଆସ୍ତେଙ୍ଗ୍ ପା ସାମାନ୍ ଆକାୟ୍। ହେୱାନ୍ ମିଙ୍ଗେଙ୍ଗ୍ ପବିତ୍ର ଆତ୍ମା ଆରେ ନାଣିତାଙ୍ଗ୍ ଡୁବନ୍ ହିଦ୍‌ନାନ୍।

ଲୁକ ଲେକିକିତି ଜିସୁ କ୍ରିସ୍ଟତି ନେକ୍ରିକାବୁର୍‌ 1:50

ଇମ୍‌ଣାକାର୍ ହେୱାନିଙ୍ଗ୍ ସନ୍‌ମାନ୍ କିନାର୍। ହେୱାନିଙ୍ଗ୍ ତା ନାତି ନିର୍‌ପୁତିତାଙ୍ଗ୍ ଦୟା କିଦ୍‌ନାନ୍।

ଲୁକ ଲେକିକିତି ଜିସୁ କ୍ରିସ୍ଟତି ନେକ୍ରିକାବୁର୍‌ 1:54

ମା ଆକଦାଦିର୍ ହିତି କାତାତିଙ୍ଗ୍ ମାନ୍ତ ବାବିକିତାନ୍, ଆରେ ହେୱାନ୍ ତା ହେବାକିନି ଇସ୍ରାଏଲ ଜାତିନି ମାନାୟାରିଙ୍ଗ୍ ସାଇଜ କିଦେଙ୍ଗ୍ ୱାତାନ୍।

ଲୁକ ଲେକିକିତି ଜିସୁ କ୍ରିସ୍ଟତି ନେକ୍ରିକାବୁର୍‌ 1:72

ହେୱାନ୍ ମା ଆକଦାଦିର୍ ହୁଦାଙ୍ଗ୍ କିଜିମାଚି ପାର୍ମାଣ୍‌ତିଙ୍ଗ୍ ମାନ୍ତ ଏତୁକିଜି ହେୱାନ୍ ମା ଆକଦାଦିରିଙ୍ଗ୍ ଦୟା କିତାନ୍‌ନା।

ଲୁକ ଲେକିକିତି ଜିସୁ କ୍ରିସ୍ଟତି ନେକ୍ରିକାବୁର୍‌ 1:78

ଈଶ୍ୱର ମାଙ୍ଗେଙ୍ଗ୍ ଇଲେକେ ସାଇଜ କିଦ୍‌ନାନ୍, ଇନେସ୍‌କି ଈଶ୍ୱର ମାଙ୍ଗେଙ୍ଗ୍ ଦୟା କିତ୍‌ତାନ୍‌ନା। ଇଦାଙ୍ଗ୍ କାଜିଙ୍ଗ୍ ୱେଡ଼ା ଇନେସ୍ କିଜି ନିଙ୍ଗ୍‌ନାତ୍ ହେଲେକେ ସରଗ୍‌ତାଙ୍ଗ୍ ରକ୍ଷାକିଦ୍ନାକାନ୍‌ ୱାନାନ୍।

ରୋମିୟ 11:14

ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ଉପାୟ୍ କିନାଙ୍ଗା ଯେ, ବିନ୍‌ଜାତିନି ମାନାୟାର୍ ଇନେସ୍‌ଲେକେ ଉଦାର୍ ପାୟାଆତାର୍, ହେୱାର୍ ପା ମା ଯିହୁଦି ଜାତିନି କେତେକ୍ ମାନାୟ୍ ଈଶ୍ୱରତାକେ ମାନ୍‌ବାଦ୍‌ଲାୟ୍ କିଜି ଉଦାର୍ ପାୟା ଆଏର୍।

ରୋମିୟ 11:6

ଆରେ ହେୱାର୍ ଯଦି ଈଶ୍ୱର ଦୟା କାଜିଙ୍ଗ୍ ଉଦାର୍ ପାୟାଆନାର୍‌, ଲାଗିଙ୍ଗ୍ ହେଦାଙ୍ଗ୍ ତା ହାର୍ କାମାୟ୍ କିତି କାଜିଙ୍ଗ୍ ଆକାୟ୍। ଯଦି ହେଲେକେ ଆନାତ୍ ଲାଗିଙ୍ଗ୍ ଈଶ୍ୱରତି ଦୟା ଆରେ ଦୟା ଆକାୟ୍, ମାତର୍ ହେୱାର୍ କାମାୟ୍ କାଜିଙ୍ଗ୍ ଆନାତ୍।

ରୋମିୟ 12:2

ଏପେଙ୍ଗ୍ ଇ ପୁର୍ତିନି ମାନାୟାର୍ ବ୍ୟବହାର୍ କିନିଲେକେ କିମାଟ୍, ମାତର୍ ଈଶ୍ୱର ମି ମାନ୍ତି ବାବ୍‌ନାତିଙ୍ଗ୍ ବାଦ୍‌ଲାୟ୍ କିଜି ପୁନି ମାନାୟ୍ ଲେକେ କିଦେନ୍, ଆରେ ଏପେଙ୍ଗ୍ ହାର୍ ବାବ୍‌ନା ବାବିକିଦେଙ୍ଗ୍ ଆଡ୍‌ନାଦେର୍। ଲାଗିଙ୍ଗ୍ ଏପେଙ୍ଗ୍ ଈଶ୍ୱର ଇଚାକିତି କାମାୟ୍ ୱିଜୁତିଙ୍ଗ୍ ପୁଞ୍ଜେଙ୍ଗ୍ ଆଡ୍‌ନାଦେର୍ ଆରେ ହେଲେକେ କିନାଦେର୍। ଆରେ ଏପେଙ୍ଗ୍ ପୁନାଦେର୍ ଯେ, ହେୱାନ୍ ହାର୍ କି, ଟିକ୍ ଆରେ ୱାରି କିନିଲେକେ କାମାୟ୍ କିଦେଙ୍ଗ୍ ଇଚା କିନାନା।

ରୋମିୟ 3:20

ଇନେସ୍‌କି ଇଲେକେ ଇମ୍‌ଣି ମାନାୟ୍ ପା ହିଲେନ୍ ଯେ, ନିୟମ୍‌ତିଙ୍ଗ୍ ମାନିକିଜି ଈଶ୍ୱର ଆଗେ ଟିକ୍ ମାନାୟ୍ ଆତାନ୍‌ନା, ଆସେଙ୍ଗ୍ ଏଚେକ୍ ଈଶ୍ୱର ଦରମ୍ ସାସ୍ତର୍‌ତିଙ୍ଗ୍ ପୁଚିସ୍, ହେ ଏଚେକ୍ ପାପ୍‌ନି ବିଷୟରେ ପୁନାସ୍।

ରୋମିୟ 3:28

ଈଶ୍ୱର ମାଙ୍ଗେଙ୍ଗ୍ ତା ଟିକ୍ ମାନାୟ୍ କିତ୍‌ତାନ୍‌ନା, ଆରେ ଆପେଙ୍ଗ୍ ନିୟମ୍‌ତିଙ୍ଗ୍ ମାନିକିତି କାଜିଙ୍ଗ୍ ଆକାୟ୍।

ରୋମିୟ 4:5

ମାତର୍ ମାନାୟାର୍ ତା କାମାୟ୍ କାଜିଙ୍ଗ୍ ଦରମ୍ ମାନାୟ୍ ଆୱାତାର୍‌ମା, ମାତର୍ ତା ପାର୍ତି କାଜିଙ୍ଗ୍ ଦରମ୍ ମାନାୟ୍ ଆତାର୍‌ନା।

ରୋମିୟ 9:11

ମାତର୍ ହେୱାର୍ ଜନମ୍ ଆୱି ଆଗେ, ହାର୍ କି କରାପ୍ ଗଟାଆୱି ଆଗେ ହେ କଗ୍‌ଲେ ଈଶ୍ୱରତାଙ୍ଗ୍ ର କାବୁର୍ ୱେନ୍‌ଞ୍ଜି ମାଚାତ୍ ହେ କାବୁର୍ ପୁନିକିନାତା ଯେ, ମାଦି ହାର୍ କି କରାପ୍ କାମାୟ୍ କାଜିଙ୍ଗ୍ ଆକାୟ୍, ମାତର୍ ଈଶ୍ୱର ଜାର୍ ଇଚା ଆନୁସାରେ ବାଚିକିନାନ୍।

ରୋମିୟ 9:16

ଲାଗିଙ୍ଗ୍, ଈଶ୍ୱର ଇନେରିଙ୍ଗ୍ ବାଚିକିନାନ୍ ତାଙ୍ଗେଙ୍ଗ୍ ହେୱାନ୍ ଦୟା କିନାନ୍, ଲାଗିଙ୍ଗ୍ ଆସେଙ୍ଗ୍ ଜାର୍ ଇଚାତାଙ୍ଗ୍ କି କଷ୍ଟ କାମାୟ୍ କିଜି ହେଦାଙ୍ଗ୍ ପାୟା ଆଉତ୍, ଇନେସ୍‌କି ଈଶ୍ୱର ଇନେରିଙ୍ଗ୍ ବାଚିକିନାନ୍ ତାଙ୍ଗେଙ୍ଗ୍ ନେ ହେୱାନ୍ ଦୟା କିନାନ୍।

ରୋମିୟ 9:30

ବିନ୍‌ଜାତିନି ମାନାୟାର୍ ନିଜେ ଈଶ୍ୱର ଆଗେ ଦରମ୍ ମାନାୟ୍ ଆଦେଙ୍ଗ୍ ଉପାୟ୍ କିଉରା, ମାତର୍ ଈଶ୍ୱର ହେୱାରିଙ୍ଗ୍ ତା ଆଗେ ଦରମ୍ ମାନାୟ୍ କିତାନ୍‌ନା, ଇନେସ୍‌କି ହେୱାର୍ ତାଙ୍ଗେଙ୍ଗ୍ ପାର୍ତିକିନାରା।

୧ କରନ୍ତିୟ 6:11

ମି ବିତ୍ରେ କେତ୍‌ଜାଣ୍ ମାଚାର୍ ଯେ, ହେୱାର୍ ଇଲେକେ କାମାୟ୍ କିଜି ମାଚାର୍। ମାତର୍ ଈଶ୍ୱର ନଙ୍ଗୟ୍ ମି ପାପ୍‌ତିଙ୍ଗ୍ ନୁସ୍‌ଦାତାନ୍‌ନା, ଆରେ ଏପେଙ୍ଗ୍ ହେବେତାଙ୍ଗ୍ ବିନେ ଆତାଦେର୍‌ନା। ଏପେଙ୍ଗ୍ ଈଶ୍ୱର ଆଗେ ଟିକ୍ ଲକ୍ ଆତାଦେର୍‌ନା, ଇନେସ୍‌କି ମା ଈଶ୍ୱର ମେହି ମାପୃ ଯୀଶୁ ଖ୍ରୀଷ୍ଟ ଆରେ ପବିତ୍ର ଆତ୍ମା ଇନାକା ମି କାଜିଙ୍ଗ୍ କିତିକ୍‌ନା।

ଗାଲାତିୟ 2:16

ମାତର୍ ଆପେଙ୍ଗ୍ ପୁନାପ୍ ଯେ ରକାନ୍ ମାନାୟ୍ ଯୀଶୁ ଖ୍ରୀଷ୍ଟତାକେ ପାର୍ତି କିଜି ଈଶ୍ୱର ଲାଗାୟ୍ ଦରମ୍ ମାନାୟ୍ ଇଞ୍ଜି ଗାଣାକିୟା ଆନାନ୍, ମୋଶା ଲେକିକିତି ନିୟମ୍ ସାସ୍ତର୍‌ତାଙ୍ଗ୍ ଆକାୟ୍। ହେଦାଙ୍ଗ୍ କାଜିଙ୍ଗ୍ ଖ୍ରୀଷ୍ଟତାକେ ଆପେଙ୍ଗ୍ ପାର୍ତିକିତି କାଜିଙ୍ଗ୍, ଆସେଙ୍ଗ୍ ନଙ୍ଗୟ୍ ଈଶ୍ୱର ଲାଗାୟ୍ ଦରମ୍ ମାନାୟ୍ ଇଞ୍ଜି ଗାଣାକିୟା ଆନାସ୍‌, ମୋଶା ଲେକିକିତି ନିୟମ୍ ସାସ୍ତର୍‌ତିଙ୍ଗ୍ ମାନିକିନି କାଜିଙ୍ଗ୍ ଆକାୟ୍। ଇନେସ୍‌କି ରକାନ୍ ପା ନିୟମ୍ ସାସ୍ତର୍ ମାନିକିଜି ଈଶ୍ୱର ଲାଗାୟ୍ ଦରମ୍ ମାନାୟ୍ ଆଦେଙ୍ଗ୍ ଆଡୁନ୍।”

ଏପିସିୟ 2:4

ମାତର୍ ଈଶ୍ୱର ମାଙ୍ଗେଙ୍ଗ୍ ବେସି ଲାଡ୍ କିଦ୍‌ନି କାଜିଙ୍ଗ୍ ଆରେ ହେୱାନ୍ ବେସି ଦୟା ଆତି କାଜିଙ୍ଗ୍,

ଏପିସିୟ 4:23

ନଙ୍ଗୟ୍ ପବିତ୍ର ଆତ୍ମା ମି ଚିନ୍ତା ଆରେ ବାବ୍‌ନାତିଙ୍ଗ୍ ପୁନାକା କିଦେତ୍।

ଏପିସିୟ 5:26

ଇନେସ୍ ହେୱାନ୍ ମଣ୍ଡ୍‌ଲିତିଙ୍ଗ୍ ପବିତ୍ର କିଦେଙ୍ଗ୍ ଆଡ୍‌ନାନ୍। ହେୱାନ୍ ଈଶ୍ୱର କାତା ଆରେ ଏଜୁଙ୍ଗ୍‌ତାଙ୍ଗ୍ ଇଦାଙ୍ଗ୍ ସପା କିତାନ୍‌ନା।

କଲସିୟ 3:10

ଆରେ ଏପେଙ୍ଗ୍ ପୁନି ଗୁଣ୍‌ତିଙ୍ଗ୍ ଆସ୍ତାଦେର୍‌ନା। ଉବ୍‌ଜାଣ୍ କିତି ଈଶ୍ୱର ବିଷୟରେ ଏପେଙ୍ଗ୍ ଇନେସ୍ ପୁରା ଜ୍ଞାନ୍ ପାୟାଆନାଦେର୍, ହେଦାଙ୍ଗ୍ କାଜିଙ୍ଗ୍ ହେୱାନ୍ ପୁନି ଗୁଣ୍‌ତିଙ୍ଗ୍ ତା ଲେକେନେ ଚଞ୍ଜ୍‌ଞ୍ଜେଙ୍ଗ୍‌ ରହ୍‌ନାନା।

୨ ତିମଥି 1:9

ହେୱାନ୍ ମାଙ୍ଗେଙ୍ଗ୍ ଉଦାର୍ କିତ୍‌ତାନ୍‌ନା ଆରେ ପବିତ୍ର ଜିବୁନ୍ କାଟିକିନି କାଜିଙ୍ଗ୍ ମାଙ୍ଗେଙ୍ଗ୍ କୁକ୍ତାତାନ୍‌ନା। ଆସେଙ୍ଗ୍ ହାର୍ଦି କାମାୟ୍ କିନି କାଜିଙ୍ଗ୍ ହେୱାନ୍ ମାଙ୍ଗେଙ୍ଗ୍ ବାଚି କିଦ୍‌ୱାତାନ୍‌ନା, ମାତର୍ ତା ଜାର୍ ଜଜ୍‌ନା ଆରେ ଦୟା କାଜିଙ୍ଗ୍ କିତ୍‌ତାନ୍‌ନା। ଈଶ୍ୱର ଇ ପୁର୍ତିତିଙ୍ଗ୍ ରହ୍‌ନି ଆଗେ ନେ, ଯୀଶୁ ଖ୍ରୀଷ୍ଟ ମା କାଜିଙ୍ଗ୍ ଇ ପୁର୍ତିତାକେ ହାଃନି କାଜିଙ୍ଗ୍ ହେୱାନ୍ ଜଜ୍‌ନା କିଜି ଦୟା ଚଚ୍‌ଚାତାନ୍‌ନା।

ତୀତସ 3:4

ଇ ଲେକେ ଆତିସ୍‌ପା ଈଶ୍ୱର ମା ଉଦାର୍ କିଦ୍‌ନାକାନ୍ ତା ଦୟା ଆରେ ଲାଡ୍ ମାଙ୍ଗେଙ୍ଗ୍ ଚଚ୍‌ଚାତାନ୍।

ଏବ୍ରି 10:22

ଖ୍ରୀଷ୍ଟ ତା ନେତେର୍ ତିର୍‌ପିସ୍, ମା ଗରବ୍‌ନି ଦସ୍‌ତିଙ୍ଗ୍ ଦେହା କିତାନ୍‌ନା, ହାର୍ଦି ଏଜୁଙ୍ଗ୍‌ତାଙ୍ଗ୍ ମା ଗାଗାଡ଼୍‌ତିଙ୍ଗ୍ ସପା କିଜି ମାଙ୍ଗେଙ୍ଗ୍ ରେଡି କିତାନ୍‌ନା। ଲାଗିଙ୍ଗ୍ ୱାଡ ଆସେଙ୍ଗ୍ ନଙ୍ଗୟ୍ ହାର୍ଦି ମାନ୍‌ତାଙ୍ଗ୍ ଆରେ ଷ୍ଟ୍ରଙ୍ଗ୍ ପାର୍ତିତାଙ୍ଗ୍ ଈଶ୍ୱର ଲାଗାୟ୍ ହାନାସ୍।

ଏବ୍ରି 4:16

ଲାଗିଙ୍ଗ୍ ମା ଦୟା ମାନି ଈଶ୍ୱରନି ସିଂହାସନ୍ ଲାଗାୟ୍ ସାହାସ୍ ହୁଦାଙ୍ଗ୍ ହାନାସ୍। ଈଶ୍ୱର ମାଙ୍ଗେଙ୍ଗ୍ ଦୟା ଆରେ ଆଶ୍ରିବାଦ୍ କିଦ୍‌ନାନ୍ ଆରେ ମା ଦର୍‌କାର୍ ଆତିହିଙ୍ଗ୍ ହେୱାନ୍ ମାଙ୍ଗେଙ୍ଗ୍ ସାଇଜ କିଦ୍‌ନାନ୍।

ଏବ୍ରି 6:6

ହେୱାର୍ ଯଦି ଈଶ୍ୱରତାଙ୍ଗ୍ ଅଲ୍‌ଗା ହାଜ୍‌ଦିଙ୍ଗ୍ ହାନାର୍, ଲାଗିଙ୍ଗ୍ ହେୱାରିଙ୍ଗ୍ ଆରେରଗ ଲେଉଟାଇ କିଜି ତାସି ୱାଦେଙ୍ଗ୍ ବେସି କଷ୍ଟ ଆନାତ୍। ଇନେସ୍‌କି ହେୱାର୍ ଈଶ୍ୱର ମେହିତିଙ୍ଗ୍ ଆରେରଗ କୃଶକାଟ୍‌ତାକେ ଅହ୍‌ନାରା ଆରେ ହେୱାର୍ ମାନାୟାର୍ ମୁମ୍‌ଦ ଖ୍ରୀଷ୍ଟଙ୍ଗ୍ ଅପ୍‌ମାନ୍ କିନାରା।

୧ ପିତର 1:3

ମା ମାପୃ ଯୀଶୁ ଖ୍ରୀଷ୍ଟ ଆବା ଈଶ୍ୱରତିଙ୍ଗ୍ ଜୟ୍-ଜୟ୍ ଆୟେତ୍, ଈଶ୍ୱର ମାଙ୍ଗେଙ୍ଗ୍ ବେସି ଦୟାକିଜି ମାନ୍‌ଞ୍ଚି କାଜିଙ୍ଗ୍ ହେୱାନ୍ ମାଙ୍ଗେଙ୍ଗ୍ ପୁନି ଜିବୁନ୍ ହିତ୍‌ତାନ୍। ଇନେସ୍‌କି ଈଶ୍ୱର ଯୀଶୁ ଖ୍ରୀଷ୍ଟଙ୍ଗ୍ ହାଃତିତାଙ୍ଗ୍ ଆରେରଗ ଜିବୁନ୍ କିଜି ନିକ୍‌ଚି ମାଚାନ୍, ଆରେ ହେୱାନ୍ ମାଙ୍ଗେଙ୍ଗ୍ ସାହାସ୍ ହୁଦାଙ୍ଗ୍ ଜିନି କାଜିଙ୍ଗ୍ ସାଇଜ କିତ୍‌ତାନ୍‌ନା। ହେଦାଙ୍ଗ୍ କାଜିଙ୍ଗ୍ ଆସେଙ୍ଗ୍ ହେୱାନ୍ କିଜିମାଚି ପାର୍ମାଣ୍‌ତିଙ୍ଗ୍ ପାୟାଆନି କାଜିଙ୍ଗ୍ ଆପେଙ୍ଗ୍ ଆହା କିନାପା।

୧ ପିତର 2:10

ହସିୟ ଭବିଷ୍ୟତ୍‌ବକ୍ତା ମି ବିଷୟରେ ଇଲେକେ ୱେଚ୍‌ଚାନ୍‌ନା, “ଏପେଙ୍ଗ୍ ଆଗେ ଈଶ୍ୱର ଲକ୍ ଆୱାଦାଙ୍ଗ୍ ମାଚାଦେର୍, ମାତର୍ ନଙ୍ଗୟ୍ ଈଶ୍ୱର ମିଙ୍ଗେଙ୍ଗ୍ ତା ଲକ୍ କିତ୍‌ତାନ୍‌ନା। ଈଶ୍ୱର ଆଗେ ମିଙ୍ଗେଙ୍ଗ୍ ଦୟା କିଦ୍‌ୱାଦାଙ୍ଗ୍ ମାନ୍‌ଞ୍ଚାନ୍, ମାତର୍ ନଙ୍ଗୟ୍ ଈଶ୍ୱର ମିଙ୍ଗେଙ୍ଗ୍ ଦୟା କିତ୍‌ତାନ୍‌ନା।”

୧ ପିତର 3:21

ହେୱାର୍ ଆଗେ ଉଦାର୍ ପାୟାଆତାକା, ହେଦାଙ୍ଗ୍ ନଙ୍ଗୟ୍ ଇଲେକେ ଅର୍ତ ହିନାତା ଏଚେପାଦ୍ନା ଆସେଙ୍ଗ୍ ଡୁବନ୍ ଅନାସ୍‌ ଆସେଙ୍ଗ୍ ଉଦାର୍ ପାୟାଆନାସ୍‌। ଆସେଙ୍ଗ୍ ଇମ୍‌ଣି ଏଜୁକାଙ୍ଗ୍ ଡୁବନ୍ ଆନାସ୍ ହେଦାଙ୍ଗ୍ ଗାଗାଡ଼୍‌ନି ପାପ୍‌ତିଙ୍ଗ୍ ନୁଜୁତ୍, ମାତର୍ ଆସେଙ୍ଗ୍ ଈଶ୍ୱରତିଙ୍ଗ୍ କେମା ଏନ୍‌ତାପ୍‌ନା ଇଞ୍ଜି ହେଦାଙ୍ଗ୍ ର ଚିନ୍। ଲାଗିଙ୍ଗ୍ ମା ମାନ୍ କିଲେର୍ ଆନାତ୍ ଯେ ଆସେଙ୍ଗ୍ ଈଶ୍ୱର ହୁଦାଙ୍ଗ୍ ମାହାଆତାସ୍‌ନା, ଈଶ୍ୱର ମାଙ୍ଗେଙ୍ଗ୍ କେମା କିଦ୍‌ନାନ୍ ଇନେସ୍‌କି ଯୀଶୁ ଖ୍ରୀଷ୍ଟ ହାଃତିତାଙ୍ଗ୍ ଆରେରଗ ଜିବୁନ୍ ଆତାନ୍‌ନା,