ମାର୍କ 1:4 - New Testament in Pengo Parja Language

⁴ ହେ ଡାଣ୍ଡାସି ଡୁବନ୍‌ହିନି ଯୋହନ ମାଚାନ୍ ଆରେ ହେୱାନ୍ ଟାଙ୍ଗ୍ରାବାହାତ ମାଚାନ୍। ହେୱାନ୍ ମାନାୟାରିଙ୍ଗ୍ ୱେଚ୍‌ଚି ମାଚାନ୍, “ପାପ୍ କାମାୟ୍ ପିସ୍ତି ମାପୃତାକେ ୱାଡ ଆରେ ଡୁବନ୍ ଅୱାଟ୍। ଏଲେଙ୍ଗ୍ କିତିସ୍ ଈଶ୍ୱର ମିଙ୍ଗେଙ୍ଗ୍ ପାପ୍ କେମା କିଦ୍‌ନାନ୍।”

ସତ୍‌ ବଚନ୍‌ ପୁନି ନିୟମ୍‌

⁴ ପାଚେ ବାପ୍ତିସିମ୍‌ ହିନି ଜହନ୍‌ ବାଲି ବାଟାତ ହାଲ୍‌ଜି ପାପ୍‌ କେମା କାଜିଂ ପାପ୍‍ତାଂ ମାନ୍‌ବାଦ୍‌ଲାୟ୍‌ କିନି “ବାପ୍ତିସିମ୍‌ ସୁଣାୟ୍‌ କିଦେଙ୍ଗ୍‌ ଲାଗାତାନ୍‌ ।”

ମାର୍କ 1:4 Iomraidhean Croise

ମାତିଉ 3:11

“ଏପେଙ୍ଗ୍ ପାପ୍ କାମାୟ୍ ପିସ୍ତି ମାପୃତାକେ ୱାତିଲେ ଆନେଙ୍ଗ୍ ମିଙ୍ଗେଙ୍ଗ୍ ଏଜୁକାଙ୍ଗ୍ ଡୁବନ୍ ହିଦ୍‌ନାଙ୍ଗା, ମାତର୍ ନା ପାଚେ ଇନେର୍ ୱାନାନା, ହେୱାନ୍ ନା ତାକେତାଙ୍ଗ୍ ବେସି ସାକ୍ତିକାଟାକାନ୍। ଆନେଙ୍ଗ୍ ଚାକର୍ ଲେକେ ଆଜି ତା କାଲ୍‌ନି ପାଣ୍ଡାୟ୍ ଆସ୍ତେଙ୍ଗ୍ ପା ସାମାନ୍ ଆକାୟ୍। ହେୱାନ୍ ମିଙ୍ଗେଙ୍ଗ୍ ପବିତ୍ର ଆତ୍ମା ଆରେ ନାଣିତାଙ୍ଗ୍ ଡୁବନ୍ ହିଦ୍‌ନାନ୍।

ମାର୍କ 1:5

ହେବେତାଙ୍ଗ୍ ଯିହୁଦା ଜିଲ୍ଲା ଆରେ ଯିରୁଶାଲାମ ସହର୍‌ତାଙ୍ଗ୍ କେତେକ୍ ମାନାୟ୍ ତା ଲାଗେ ୱାତାର୍, ଆରେ ହେୱାର୍ ଜାର୍-ଜାର୍ ପାପ୍‌ତିଙ୍ଗ୍ ୱେଚ୍‌ଚାର୍, ହେବେ ଡୁବନ୍‌ହିନି ଯୋହନ ହେୱାରିଙ୍ଗ୍ ଯର୍ଦ୍ଦନ ନାଗୁଡ଼୍‌ତ ଡୁବନ୍ ହିତାନ୍।

ଲୁକ ଲେକିକିତି ଜିସୁ କ୍ରିସ୍ଟତି ନେକ୍ରିକାବୁର୍‌ 1:77

ମାନାୟାର୍ ପାପ୍ କେମା ଇନେସ୍‌କିଜି ଆନାତ୍, ଆରେ ଈଶ୍ୱର ଦଣ୍ଡ୍‌ତାଙ୍ଗ୍ ଇନେସ୍ ଉଦାର୍ ଗାଟାଆଦ୍‍ନାତ୍ ହେ ବିଷୟରେ ମାନାୟାରିଙ୍ଗ୍ ବୁଜାଇକିନାଇ।

ଜହନ୍‌ 3:23

ଡୁବନ୍‌ହିନି ଯୋହନ ଶାଲମ୍ ସହର୍ କଚଣ୍‌ନି ଏନୋନ ନାଟ ମାନାୟାରିଙ୍ଗ୍ ଡୁବନ୍‌ହିଜି ମାଚାନ୍। ଇନେସ୍‌କି ହେବାହାତାକେ ବେସି ଏଜୁଙ୍ଗ୍ ମାଚିକ୍। ଆରେ ମାନାୟାର୍ ହେବେ ଡୁବନ୍ ଅଦେଙ୍ଗ୍ ହାଲ୍‌ଜି ମାଚାର୍।

ପକ୍ୟାତାକା 10:37

ଡୁବନ୍‌ହିନି ଯୋହନ ଡୁବନ୍‌ହିନି ବିଷୟରେ ହିକ୍ଷା ହିତି ପାଚେ, ଗାଲିଲୀ ଜିଲ୍ଲାତାଙ୍ଗ୍ ଆରମ୍ କିଜି ଯିହୁଦା ଜିଲ୍ଲାତାକେ ଗଟାଆତି ୱିଜୁ ଗଟ୍‌ନାତିଙ୍ଗ୍ ଏପେଙ୍ଗ୍ ପୁଚାଦେର୍‌ନା।

ପକ୍ୟାତାକା 22:16

ଏନେଙ୍ଗ୍ ନଙ୍ଗୟ୍ ଇନା କିଦେଙ୍ଗ୍ ଡେରି କିନାୟା, ନିଙ୍ଗା! ଆରେ ଡୁବନ୍ ଆ। ଆରେ ନି ପାପ୍ କେମା ପାୟା ଆଦେଙ୍ଗ୍ ଏନେଙ୍ଗ୍ ତା ତର୍‍ଦାଙ୍ଗ୍ ପାର୍ତାନା କିୟା।’