ଏପିସିୟ 2:11 - New Testament in Pengo Parja Language

¹¹ ଇଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ମାନେ କିୟାଟ୍ ଯେ ଏପେଙ୍ଗ୍ ଜନମ୍‌ତାଙ୍ଗ୍ ନେ ବିନ୍‌ଜାତି କାଦେର୍। ଲାଗିଙ୍ଗ୍ ଯିହୁଦି ମାନାୟାର୍ ମିଙ୍ଗେଙ୍ଗ୍ ଅପ୍‌ମାନ୍ କିଜି ସୁନତ ବିଦିତିଙ୍ଗ୍ ମାନିକିୱି ମାନାୟ୍ ଇଞ୍ଜି ୱେଚ୍‌ଚି ମାଞ୍ଚାର୍, ଆରେ ହେୱାର୍ ଜାର୍‌ତିଙ୍ଗ୍ ଈଶ୍ୱରନି ମାନାୟ୍ ଇଞ୍ଜି ବାବିକିଜି ମାଚାର୍। ସୁନତ ବିଦି ଆପ୍‌କା ଗାଗାଡ଼୍ ହୁଦାଙ୍ଗ୍ ନେ ମାହାଆଜି ମାଚାତ୍, ମାନ୍ ହୁଦାଙ୍ଗ୍ ଇନାକା ହିଲାତାତ୍।

ସତ୍‌ ବଚନ୍‌ ପୁନି ନିୟମ୍‌

¹¹ ଜାର୍‌ତି ପାଚେନି ଅବସ୍ତା ଏତୁ କିୟାଟ୍‌ । ଏପେଙ୍ଗ୍‌ ପାର୍ତିକିୱି ଜିହୁଦି ମାଚାଦେର୍‌, ଜାର୍‌ତିଂ “ସୁନ୍ନତ୍‌” ଇଞ୍ଜି ମାନି ପାର୍ତିକିୱି ଜିହୁଦିର୍‌ ହୁକେ ସୁନ୍ନତ୍‌ ଆକାୟ୍‌ ଇଞ୍ଜି ମାଚାର୍‌, ଇଦାଂ କେବଲ୍‌ ର ଗାଗାଡ଼୍‌ ଅବସ୍ତାତିଂ ବୁଜାନାତ୍‌ ।

ଏପିସିୟ 2:11 Iomraidhean Croise

ମାତିଉ 20:7

ହେୱାର୍ ହେୱାନିଙ୍ଗ୍ ୱେଚ୍‌ଚାର୍, ଇନେର୍ ପା ମାଙ୍ଗେଙ୍ଗ୍ କାମାୟ୍ କିଦେଙ୍ଗ୍ ହିର୍‌ବା ଆଦ୍‌ୱାତାର୍‌ନା। ହେୱାନ୍ ହେୱାରିଙ୍ଗ୍ ଇଚାନ୍, ଟିକ୍ ମାନାତ୍ ଲାଗିଙ୍ଗ୍ ଏପେଙ୍ଗ୍ ୱିଜାକାଦେର୍ ନା ଅଙ୍ଗୁର୍ ବାଡ଼୍‍ଦ ହାଲ୍‌ଜି କାମାୟ୍ କିୟାଟ୍।

ରୋମିୟ 11:17

ଇସ୍ରାଏଲ ଜାତିନି ମାନାୟାର୍ ରଞ୍ଜାଙ୍ଗ୍ ହାର୍ଦି ଜିତ୍‌ମାର୍‌ତି କେନ୍ଦାଲେକେ ଆରେ ମା ଆକଦାଦି ଅବ୍ରାହାମ, ଇସାକ ଆରେ ଯାକୁବ ହେ ମାର୍‌ତି ଚିରାଙ୍ଗ୍ ଲେକେ, ଆରେ ଏପେଙ୍ଗ୍ ବିନ୍‌ଜାତିନି ମାନାୟାର୍ ର ରାନ୍‍ତି ଜିତ୍‌ମାର୍‌ତି କେନ୍ଦାଙ୍ଗ୍ ଲେକେ ମାଚାଦେର୍। ଏଚେପାଦ୍ନା ଈଶ୍ୱର ଅଲିବ୍ ମାର୍‌ତି କେନ୍ଦାକାଙ୍ଗ୍ କାତ୍‌ତାନ୍ ହେପାଦ୍ନା ମିଙ୍ଗେଙ୍ଗ୍ ଅଲିବ୍ ମାର୍‌ତ ଅଜି ଜଡ଼ାୟ୍ କିତ୍‌ତାନ୍, ଆରେ ଏପେଙ୍ଗ୍ ଅବ୍ରାହାମତିଙ୍ଗ୍ ଈଶ୍ୱରକିତି ପାର୍ମାଣ୍‌ନି ଆଶ୍ରିବାଦ୍ ପାୟାଆତାଦେର୍ ଆରେ ତା ହିମ୍‌ଣାୱାକ୍‌ଡ଼ା ଆତାଦେର୍।

ରୋମିୟ 2:26

ଆରେ ଯଦି ବିନ୍‌ଜାତିନି ମାନାୟାର୍ ଈଶ୍ୱର ନିୟମ୍‌ତିଙ୍ଗ୍ ମାନିକିନାର୍, ଈଶ୍ୱର ହେୱାରିଙ୍ଗ୍ ତା ଲକ୍ ଆଦେଙ୍ଗ୍ ୱିଜୁ ଅଦିକାର୍ ଆରେ ସନ୍‌ମାନ୍ ହିନାନ୍।

ରୋମିୟ 2:27

ଆରେ ଯଦି ସୁନତ ଆୱିତି ବିନ୍‌ଜାତିନି ମାନାୟ୍ ମଶା ଲେକିକିତି ନିୟମ୍‌ତିଙ୍ଗ୍ ମାନି କିନାରା ହେୱାନ୍ ମଶା ଲେକିକିତି ଦରମ୍ ସାସ୍ତର୍‌ତିଙ୍ଗ୍ ପୁଚାର୍‌ନା ଆରେ ସୁନତ ଆତି ମାନାୟ୍‌ତାଙ୍ଗ୍ ହାର୍।

୧ କରନ୍ତିୟ 12:2

ଏପେଙ୍ଗ୍ ଖ୍ରୀଷ୍ଟାନ୍ ଆୱି ଆଗେ ପୁନ୍‌ଞ୍ଜି ମାଚାଦେର୍ ଯେ, ଏପେଙ୍ଗ୍ ବେଣ୍‌କିଦେଙ୍ଗ୍ ଆଡ୍‌ୱି ମୁର୍ତିକାଙ୍ଗ୍ ହେବା କିଦେଙ୍ଗ୍ ଇନେର୍ ମିଙ୍ଗେଙ୍ଗ୍ ଟକାୟ୍ କିଜି ମାନ୍‌ଞ୍ଚାନ୍।

୧ କରନ୍ତିୟ 6:11

ମି ବିତ୍ରେ କେତ୍‌ଜାଣ୍ ମାଚାର୍ ଯେ, ହେୱାର୍ ଇଲେକେ କାମାୟ୍ କିଜି ମାଚାର୍। ମାତର୍ ଈଶ୍ୱର ନଙ୍ଗୟ୍ ମି ପାପ୍‌ତିଙ୍ଗ୍ ନୁସ୍‌ଦାତାନ୍‌ନା, ଆରେ ଏପେଙ୍ଗ୍ ହେବେତାଙ୍ଗ୍ ବିନେ ଆତାଦେର୍‌ନା। ଏପେଙ୍ଗ୍ ଈଶ୍ୱର ଆଗେ ଟିକ୍ ଲକ୍ ଆତାଦେର୍‌ନା, ଇନେସ୍‌କି ମା ଈଶ୍ୱର ମେହି ମାପୃ ଯୀଶୁ ଖ୍ରୀଷ୍ଟ ଆରେ ପବିତ୍ର ଆତ୍ମା ଇନାକା ମି କାଜିଙ୍ଗ୍ କିତିକ୍‌ନା।

ଗାଲାତିୟ 2:15

ଆରେ ଆନେଙ୍ଗ୍ ହେୱାନିଙ୍ଗ୍ ୱେଚ୍‌ଚାଙ୍ଗ୍, “ଆପେଙ୍ଗ୍ ଜନମ୍‌ତାଙ୍ଗ୍ ଯିହୁଦି ମାନାୟ୍, ଆରେ ବିନ୍‌ଜାତିନି ମାନାୟ୍ ଲେକେ ପାପି ଆକାୟ୍।

ଗାଲାତିୟ 6:12

ଇମ୍‌ଣାକାର୍ ସୁନତ ବିଦି ମାନିକିନି କାଜିଙ୍ଗ୍ ଜବର୍‌ଦସ୍ତି କିଦ୍‌ନାର୍, ହେୱାର୍ ଯିହୁଦି ମାନାୟାରିଙ୍ଗ୍ ୱାରି କିୟିକିଦେଙ୍ଗ୍ ଇଚା କିନାର୍। ଆରେ ଖ୍ରୀଷ୍ଟନି କୃଶକାଟ୍‌ତାକେ ଆପ୍‌କା ପାର୍ତି କିତିସ୍ ଉଦାର୍ ଗାଟାଆଦ୍‍ନାତ୍, ଇଦାଙ୍ଗ୍ ଶୁଣାୟ୍ କିତିସ୍ ଇନେସ୍ ହେୱାର୍ ଦୁକ୍‌କଷ୍ଟ ପାୟା ଆଉର୍, ଇଦାଙ୍ଗ୍ କାଜିଙ୍ଗ୍ ହେୱାର୍ ହେ ସୁନତ ବିଦି ମାନି କିଦେଙ୍ଗ୍ ୱେଚ୍‌ନାର୍।

ଏପିସିୟ 2:2

ଇନେସ୍‌କି ହେପାଦ୍ନା ଏପେଙ୍ଗ୍ ଇ ପୁର୍ତିନି ମାନାୟାର୍ ହାଜ୍‌ଦିଙ୍ଗ୍ ତାଙ୍ଗ୍‌ଜି ମାଚାଦେର୍, ଆରେ ବାଦାଡ଼୍‌ନି କରାପ୍ ଆତ୍ମା କି ବୁତ୍ ଆତ୍ମାନି ନେତାନି ଆଦିକାର୍ ଶୟତାନନି କାତା ମାନିକିଜି ମାଚାଦେର୍। ଇ ଶୟତାନ ନଙ୍ଗୟ୍ ଈଶ୍ୱରତିଙ୍ଗ୍ ମାନିକିୱି ମାନାୟାରିଙ୍ଗ୍ କଣ୍ଟ୍ରୁଲ୍ କିଦ୍‌ନାତା।

ଏପିସିୟ 5:8

ଇନେସ୍‌କି ଏପେଙ୍ଗ୍ ଆଗେ ମାଜ୍‌ଗାତାକେ ମାଚାଦେର୍, ମାତର୍ ନଙ୍ଗୟ୍ ମାପୃତାକେ ରବେ ଆତି କାଜିଙ୍ଗ୍ ଅଜଡ଼୍‌ତାକେ ମାନାଦେର୍। ଲାଗିଙ୍ଗ୍ ଅଜଡ଼୍‌ନି ହିମ୍‌ଣାଙ୍ଗ୍ ଲେକେ ବ୍ଯବହାର୍ କିୟାଟ୍।

ପିଲିପିୟ 3:3

ଇନେସ୍‌କି ଆପେଙ୍ଗ୍ ଟିକ୍ ସୁନତ ବିଦି ପାୟାଆତାସ୍‌ନା। ଆପେଙ୍ଗ୍ ଈଶ୍ୱର ଆତ୍ମାତାଙ୍ଗ୍ ଈଶ୍ୱରତିଙ୍ଗ୍ ପୁଜା କିନାପା। ମାନାୟ୍ କିତି ଉପାଇତିଙ୍ଗ୍ ଆପେଙ୍ଗ୍ ଆହା କିୱାଦାଙ୍ଗ୍ ଯୀଶୁ ଖ୍ରୀଷ୍ଟତାକେ ଆହା କିନାପା।

କଲସିୟ 1:21

ଆରେ ଆଗେ ଏପେଙ୍ଗ୍ ପାପ୍ କାମାୟ୍ କିଜି ଈଶ୍ୱରତାଙ୍ଗ୍ ଦେହା ମାଚାଦେର୍। ଆରେ ମି ମାନ୍ ବିତ୍ରେ କରାପ୍ ଚିନ୍ତା ଆରେ କରାପ୍ କାମାୟ୍ କିଜି ଏପେଙ୍ଗ୍ ହେୱାନିଙ୍ଗ୍ ଶତ୍ରୁ ଆଜି ମାଚାଦେର୍।

କଲସିୟ 2:11

ଏଚେପାଦ୍ନା ଏପେଙ୍ଗ୍ ଖ୍ରୀଷ୍ଟତାକେ ପାର୍ତି କିତାଦେର୍ ଏପେଙ୍ଗ୍ ସୁନତ ଆତାଦେର୍‌ନା। ଯିହୁଦି ମାନାୟାର୍ ସୁନତ ଆତିଲେକେ ଏପେଙ୍ଗ୍ ସୁନତ ଆୱାତାଦେର୍‌ନା। ମାତର୍ ଖ୍ରୀଷ୍ଟ ଏପେଙ୍ଗ୍ କିତି ପାପ୍‌ନି ଗୁଣ୍‌ତିଙ୍ଗ୍ କାଟିକିଜି ମିଙ୍ଗେଙ୍ଗ୍ ସୁନତ କିତ୍‌ତାନ୍‌ନା।

କଲସିୟ 2:13

ମି ପାପ୍ କାଜିଙ୍ଗ୍ ଏପେଙ୍ଗ୍ ହାଃତି ଲେକେ ଆଜି ମାଚାଦେର୍, ଆରେ ମି ପାପ୍‌ନି ଗୁଣ୍ ସୁନତ ଆତି ଲେକେ କାଟିଆୱାଦାଙ୍ଗ୍ ମାଚାତ୍। ମାତର୍ ଈଶ୍ୱର ମା ପାପ୍‌ତିଙ୍ଗ୍ ୱିଜୁ କେମାକିଜି ଖ୍ରୀଷ୍ଟ ହୁଦାଙ୍ଗ୍ ମାଙ୍ଗେଙ୍ଗ୍ ଜିବୁନ୍ କିତ୍‌ତାନ୍‌ନା।

କଲସିୟ 3:11

ଇଦାଙ୍ଗ୍ କାଜିଙ୍ଗ୍ ବିନ୍‌ଜାତି କି ଯିହୁଦି ଜାତିର୍ ବିତ୍ରେ, ସୁନତ ବିଦି ମାନିକିନାକାର୍ କି ମାନିକିୱାକାର୍, ବାର୍ ଦେସ୍‌ତାକାର୍‌ କି ଆଦିବାସିନି ମାନାୟାର୍, ଦାସ୍ କି ଦାସ୍ ଆୱି ମାନାୟାର୍ ବିତ୍ରେ ଇନା ବେଦ୍‌ବାବ୍ ଆକାୟ୍। ମାତର୍ ଖ୍ରୀଷ୍ଟ ନେ ୱିଜୁତାଙ୍ଗ୍ ମୁକ୍ଯା ଆରେ ହେୱାନ୍ ତାଙ୍ଗେଙ୍ଗ୍ ପାର୍ତିକିନି ମାନାୟାର୍‌ତାକେ ବାହା କିନାନ୍।