Joshua 11:12 - Pennsylvania Dutch Bible

¹² Da Joshua hott awl di kaynicha iahra shtett ivvah-gnumma mitt iahra kaynicha. Eah hott si awl kshlauwa mitt em shvatt un hott si awl doht gmacht. Eah hott dess gedu grawt vi da Mosi, em Hah sei gnecht, gebodda katt hott.

Joshua 11:12 Iomraidhean Croise

5. Mosi 7:2

un vann da Hah eiyah Gott si ivvah-gebt zu eich un diah shlauwet si nunnah, dann misset diah si gans ausreiva. Diah sellet kenn bund macha mitt eena un nett gnaydich sei zu eena.

5. Mosi 9:3

Avvah diah sellet heit vissa es da Hah eiyah Gott fannich eich heah drivvah nivvah gay zayld vi en fazeahrich feiyah. Eah zayld si umbringa un si nunnah shlauwa fannich eich, so es diah si kshvind ausdreiva un ausbutza kennet vi da Hah eich fashprocha hott.

Joshua 10:20

So is es zu kumma es da Joshua un di Kinnah-Israel si kshlachta henn mitt en grohsi shlawdahrei biss si shiah awl doht voahra. Selli es ivvahrich voahra henn's zrikk gmacht zu iahra shtett mitt mavvahra drumm rumm.

Joshua 10:28

Sellah dawk hott da Joshua di shtatt funn Makkeda ivvah-gnumma. Eah hott di shtatt un iahra kaynich kshlauwa mitt em shvatt un hott alli-ebbah doht gmacht in di shtatt. Es voah nimmand ivvahrich. Eah hott gedu zumm kaynich funn Makkeda grawt vi eah gedu katt hott zumm kaynich funn Jericho.

Joshua 10:30

Da Hah hott aw selli shtatt un iahra kaynich in di hend funn Israel gevva. Eah hott alli mensh in di shtatt kshlauwa mitt em shvatt biss nimmand ivvahrich voah. Eah hott gedu zu selli shtatt iahra kaynich grawt vi eah gedu hott zumm kaynich funn Jericho.

Joshua 10:32

Da Hah hott Lachis ivvah-gevva in di hend funn Israel. Eah hott's ivvah-gnumma da zvett dawk, un hott alli-ebbah in di shtatt kshlauwa mitt em shvatt, grawt vi eah gedu katt hott in Libna.

Joshua 10:35

Si henn di shtatt ivvah-gnumma sellah dawk un henn si kshlauwa mitt em shvatt. Eah hott alli-ebbah doht gmacht in di shtatt grawt vi eah gedu katt hott zu Lachis.

Joshua 10:37

Si henn di shtatt ivvah-gnumma. Si henn di shtatt iahra kaynich, di anra shtedlen datt rumm un awl di leit es drinn voahra kshlauwa mitt em shvatt. Si henn nimmand ivvahrich glost, grawt vi si gedu katt henn in Eglon. Di shtatt voah zammah grissa, un alli-ebbah in di shtatt voah doht gmacht.

Joshua 11:13

Avvah di Kinnah-Israel henn kens funn di shtett fabrend es uf hivla kshtanna henn vi yusht laynich di shtatt funn Hazor. Dee shtatt hott da Joshua nunnah gebrend.

Joshua 11:15

Da Hah hott sei gebott zu seim gnecht, da Mosi, gevva katt, un da Mosi hott sell gebott zumm Joshua gevva. Un grawt so hott da Joshua gedu. Eah hott nix ivvahrich glost fa du funn alles es da Hah da Mosi gebodda katt hott.

Joshua 13:6

Awl di leit in di hivla funn Lebanon so veit es Misrephoth-Maim un awl di Sidoniddah zayl ich ausdreiva fannich di Kinnah-Israel. Avvah mach es du's land fadaylsht unnich Israel fa en eahbshaft vi ich dich gebodda habb.

Joshua 21:44

Da Hah hott eena roo gevva uf alli seit, grawt vi eah kshvoahra hott zu iahra foah-feddah. Kens funn iahra feinda henn ufshtay kenna geyyich si; da Hah hott si awl ivvah-gedrayt zu eena.

Joshua 8:31

Eah hott dess gedu grawt vi da Mosi, em Hah sei gnecht, di Kinnah-Israel gebodda katt hott. Eah hott da awldah gebaut vi's kshrivva is im Buch fumm Ksetz funn Mosi—en awldah funn unkakti shtay, un es kenn eisa gyoost voah druff. Si henn brand-opfahra un dank-opfahra zumm Hah gopfaht uf em awldah.

Joshua 8:8

Vann diah no moll di shtatt ivvah-gnumma hend, dann sellet diah di shtatt ohshtekka mitt feiyah. Diah sellet dess du grawt vi em Hah sei vatt sawkt. Saynet ditzu; diah hend mei gebott.”

Joshua 9:24

Si henn no em Joshua andvat gevva un henn ksawt, “Dei gnechta voahra voahlich ksawt gvest vi da Hah, eiyah Gott, gebodda gevva hott zumm Mosi fa's gans land zu eich gevva, un vi diah awl di leit im land doht macha sellet fannich eich. Miah henn's gedu veil miah uns kfeicht henn funn eich un fa unsah layva.