Lukas 12:37 - Perjanjian Baru Bahasa Melayu Maluku Utara

³⁷ Orang-orang karja itu paling sanang skali karna waktu dorang pe tuang pulang, dong pe tuang dapa riki dorang masi bajaga tunggu pa dia. Kita mo bilang pa ngoni: dorang itu paling sanang skali karna dong pe tuang akan pake baju karja kong siap-siap layani pa dorang. Turus dia mo suru dia pe orang-orang karja itu dudu la makang, kong nanti dia sandiri yang mo layani pa dorang.

Lukas 12:37 Iomraidhean Croise

Matius 24:42

Karna itu, bajaga-jaga suda, karna ngoni tara tau tempo apa ngoni pe Tuhan mo datang.

Lukas 12:36

Ngoni me musti siap sama deng orang-orang karja yang ada tunggu-tunggu dorang pe tuang mo pulang dari pesta kawing. Kalu dorang pe tuang itu pulang so malam kong batoki pintu, dorang so siap langsung mo buka pintu la mo sambut pa dia.

Lukas 12:43

Orang karja itu akan paling sanang skali kalu dia pe tuang datang, kong dapa riki dia sementara biking dia pe tugas itu bae-bae.

Lukas 17:8

Tantu tara bagitu, to? Mala tabale, dia pe tuang akan bilang pa dia bagini, ‘Biking kita pe makanang suda. Abis itu ngana ganti baju, kong ngana layani pa kita sampe kita abis makang deng minum, baru ngana bole makang deng minum.’

Lukas 21:36

Tapi, ngoni musti turus-turus jaga diri bae-bae, deng berdoa supaya ngoni jadi kuat batahang untuk hadapi samua sengsara yang mo jadi itu sampe ngoni lolos dari itu. Deng bagitu, ngoni siap mo mangada pa Anak Manusia.”

Lukas 22:27

Coba ngoni pikir, sapa yang lebe penting, orang yang dudu makang, atau orang yang jaga layani pa dia? Tantu orang yang ada dudu makang, to? Tapi Kita tara bagitu, waktu Kita ada pa ngoni pe tenga-tenga, Kita yang layani pa ngoni.

Yohanes 12:26

Sapa yang suka biking apa yang Kita suru, dia musti iko pa Kita, kong di mana saja Kita ada, dia lagi musti ada di situ. Kong sapa yang biking apa yang Kita suru, Kita pe Bapa akan hormati pa dia.”

1 Korintus 2:9

Rencana itu sama deng yang tatulis di Kitab Suci, bagini: “Tuhan Allah so kase sadia banya hal untuk orang-orang yang sayang pa Dia. Yang Dia so kase sadia itu, bolong perna manusia lia deng dia pe mata, bolong perna manusia dengar deng dia pe talinga, deng bolong perna ada pa manusia pe pikiran.”

Filipi 1:21

Barang, untuk kita, kita hidup cuma untuk Yesus Kristus supaya Dia dapa puji, kong kalu kita mati, itu lagi untuk kita pe bae, karna kita bole mo sama-sama deng Yesus Kristus di sorga.

Filipi 1:23

Kita ini sama deng ada mangada dua pilihan. Kita suka mo kase tinggal dunia ini supaya bisa tinggal sama-sama deng Yesus Kristus di sorga, karna itu memang yang paling bae.

2 Petrus 1:11

Deng bagitu, nanti Tuhan Allah akan buka pintu sorga untuk ngoni, Dia akan tarima pa ngoni di Tuhan Yesus Kristus pe tampa berkuasa sebagai Raja. Tuhan Yesus Kristus itu yang kase slamat pa torang, deng Dia itu yang jadi Raja slama-lamanya.

2 Petrus 3:14

Karna itu, sudara-sudara yang kita sayang, sementara ngoni tunggu samua itu mo jadi, ngoni musti berusaha turus-turus supaya ngoni pe hidup bersi deng tarada sala apa-apa pa Tuhan Allah pe muka, deng lagi ngoni pe hubungan deng Dia tetap bae.

Wahyu 14:13

Kong kita dengar suara dari sorga bilang bagini, “Yohanes, tulis ini: mulai skarang, orang-orang yang mati karna percaya pa Tuhan, dorang itu paling sanang suda!” Kong Tuhan Allah pe Roh bilang bagini, “Butul, butul dorang itu paling sanang suda! Dorang akan istrahat dari dong pe karja karas, jadi Tuhan akan balas dong pe lala itu deng apa yang bae di sorga.”

Wahyu 16:15

Tuhan bilang, “Perhatikan bae-bae, tarada yang tau tempo apa Kita mo datang ulang dari sorga. Kita datang tara sangka-sangka, sama deng papancuri datang. Orang yang salalu bajaga-jaga dalam dia pe hidup, dia itu paling sanang. Dia itu sama deng orang yang jaga perhatikan dia pe baju, supaya tara bajalang batalanjang deng tara malu di muka umum.”

Wahyu 3:21

Sapa yang menang dari pengaru jahat, Kita mo kase dudu dia pa Kita pe pinggir sama-sama deng Kita di kursi raja. Barang, orang itu so menang sama deng Kita yang so menang dari setang-setang pe pengaru, kong Kita dudu baku pinggir sama-sama deng Kita pe Bapa di Dia pe kursi raja.

Wahyu 7:17

Karna Anak Domba yang ada di tenga-tenga kursi raja pe muka itu, Dia mo jadi dorang pe Gembala. Dia mo bawa pa dorang minum di mata aer yang biking dorang hidup, kong Tuhan Allah mo hapus dorang samua pe aer mata.”