Lukas 1:35 - Perjanjian Baru Bahasa Melayu Maluku Utara

³⁵ Malaekat itu jawab pa dia, “Bagini. Nanti Roh Kudus mo datang pa ngana. Tuhan Allah yang Paling Tinggi itu mo kuasai pa ngana. Jadi, Anak yang akan ngana kase lahir itu suci, deng orang mo pangge pa Dia, Anak Allah.

Lukas 1:35 Iomraidhean Croise

Matius 1:18

Yesus Kristus lahir, pe carita bagini: Maria, Yesus pe mama itu so baku janji mo kawing deng Yusuf. Maria ini bolong tau laki-laki, tau-tau dia so hamil. Maria hamil karna Roh Kudus.

Matius 1:20

Tapi waktu Yusuf masi pikir-pikir dia pe rencana itu, Tuhan Allah pe malaekat datang pa dia dalam mimpi, kong bilang pa dia, “Yusuf, raja Daud pe turunan. Ngana tara usa tako ambe pa Maria jadi ngana pe bini, karna ana yang ada pa dia pe dalam puru itu dari Roh Kudus.

Matius 14:33

Pe lia samua itu, orang-orang yang ada di parau semba pa Yesus deng bilang, “Guru ini butul Anak Allah.”

Matius 27:54

Ada komandan kompi Roma deng dia pe ana-ana bua yang jaga pa Yesus waktu Yesus dapa salib. Dorang tako skali waktu tana goyang kuat itu deng waktu dong lia samua yang jadi itu. Kong dorang bilang, “Butul, Dia ini memang Anak Allah!”

Matius 4:3

Waktu itu, Iblis tukang goda itu datang pa Yesus kong bilang, “Ngana ini Anak Allah, to? Kalu bagitu, Ngana parenta suda supaya batu-batu ini jadi roti.”

Markus 1:1

Ini Kabar Bae tentang Yesus Kristus, Anak Allah.

Markus 1:24

“Ee, Yesus orang Nazaret! Jang iko campur deng torang pe urusan. Jang kase mati pa torang. Kita tau Ngana sapa. Ngana ini Orang Suci dari Tuhan Allah.”

Lukas 1:27

Tuhan suru dia pigi pa nona satu, dia pe nama Maria. Maria itu bolong tau laki-laki tapi dia ada rencana mo kawing deng laki-laki satu yang pe nama Yusuf. Yusuf ini raja Daud pe turunan.

Lukas 1:34

Pe dengar itu, Maria bilang pa malaekat itu, “Bagimana itu mo jadi? Kita kan masi nona-nona, bolong perna tidor deng laki-laki.”

Lukas 1:36

Bukang itu saja, Elisabet ngana pe sudara itu, biar dia so tua deng orang bilang kata, dia tara bisa dapa ana, tapi skarang dia so hamil ana laki-laki anam bulan.

Yohanes 1:34

Kita so lia pa Dia deng kita pe mata kapala sandiri, jadi kita kase tau pa orang-orang, Dia itu suda Anak Allah!”

Yohanes 1:49

Pe dengar itu, Natanael kage kong mangaku, “Guru, skarang kita percaya, Guru memang Anak Allah. Guru ini orang Israel pe Raja!”

Yohanes 20:31

Tapi samua yang so tatulis di kitab ini, itu ada tulis supaya ngoni percaya Yesus itu Mesias, Raja yang Tuhan Allah janji mo kase slamat pa manusia, deng Dia itu Anak Allah. Kalu ngoni so percaya pa Dia, ngoni mo dapa hidup deng Dia slama-lamanya.

Kisah Para Rasul 8:36

Waktu dorang di tenga jalang, dorang dapa tampa satu yang ada aer. Kong pejabat itu bilang pa Filipus, “Coba lia, di situ ada aer! Apa kita so bole dapa baptis?” [

Roma 1:4

Dia itu suda Yesus Kristus torang pe Tuhan. Torang dapa tau Dia itu Anak Allah, barang waktu Dia mati, kuasa dari Tuhan Allah pe Roh kase hidup ulang pa Dia.

Galatia 2:20

Jadi, skarang kita hidup tara iko kita pe kekuatan sandiri lagi, tapi Yesus Kristus yang hidup deng berkuasa pa kita pe diri. Kong selama kita hidup di dunia skarang ini, kita hidup cuma deng percaya saja pa Anak Allah. Dia yang so sayang pa kita deng yang so serakan Dia pe diri mati untuk kita.

Efesus 2:3

Dulu torang samua itu sama deng dorang lagi, torang hidup cuma iko manusia pe mau yang suka biking dosa, deng torang cuma iko torang pe keinginan deng pikiran yang tara bae. Sebenarnya torang pantas dapa hukum dari Tuhan Allah, karna yang torang biking itu jahat, sama deng samua orang di dunia jaga biking.

Ibrani 4:15

Barang, Yesus Kristus torang pe Imam Basar itu, Dia mangarti skali torang manusia ini tara kuat kong gampang tagoda biking barang jahat. Karna waktu Dia di dunia, Dia me perna dapa goda macam-macam sama deng torang, cuma Dia tara perna tagoda sampe biking dosa.