Ibrani 4:2 - Perjanjian Baru Bahasa Melayu Maluku Utara

² Barang, torang me so dengar kabar yang bae tentang bisa baistrahat sama-sama deng Tuhan Allah, sama deng torang pe orang tua dulu-dulu so dengar. Tapi kabar yang torang pe orang tua dulu-dulu dengar itu tara ada guna, barang dorang tara percaya butul-butul.

Ibrani 4:2 Iomraidhean Croise

Kisah Para Rasul 13:46

Tapi Paulus deng Barnabas barani skali mangada pa orang-orang itu kong bilang, “Memang Tuhan Allah yang suru la torang kase tau kamuka Tuhan Allah pe firman pa orang-orang Yahudi. Tapi ngoni tara mau percaya, jadi deng bagitu, ngoni so nilai ngoni pe diri tara pantas mo dapa hidup deng Tuhan Allah slama-lamanya. Jadi, skarang torang mo pigi pa orang-orang yang bukang Yahudi supaya mo kase tau Tuhan Allah pe firman itu.

Kisah Para Rasul 3:26

Kong skarang, Tuhan Allah so utus Yesus kamuka pa ngoni orang-orang Yahudi. Dia itu Tuhan Allah pe Orang yang jaga biking apa yang Dia suru, kong Dia itu yang jadi berkat supaya ngoni masing-masing bole kase tinggal ngoni pe kalakuang yang jahat.”

Roma 2:25

Torang orang Yahudi, torang dapa sunat supaya jadi tanda, Tuhan Allah pili pa torang jadi Dia pe umat. Kalu torang biking aturan di lima kitab Musa, sunat itu ada arti torang itu butul-butul Tuhan Allah punya. Tapi kalu torang tara iko aturan di lima kitab Musa, sunat itu jadi tarada arti.

Roma 3:3

Tapi ada dari torang orang Yahudi yang tara setia pa Tuhan Allah. Kalu bagitu, apa Tuhan Allah tara mau setia lagi deng Dia pe janji?

1 Korintus 13:3

Biar lagi kita kase barbage samua yang kita punya pa orang susa, deng biar lagi kita serakan kita pe diri untuk dapa bakar karna iko pa Tuhan Yesus, tapi kalu kita tara sayang pa orang laeng, samua itu tarada dia pe guna untuk kita.

Galatia 3:2

Coba ngoni inga! Ngoni tarima Roh Kudus itu bukang gara-gara ngoni ada biking aturan-aturan di lima kitab Musa, to? Tapi ngoni tarima Roh Kudus karna ngoni percaya pa Yesus Kristus waktu ngoni dengar Kabar Bae tentang Dia itu.

Galatia 3:8

Di Kitab Suci, torang bole tau, dari dulu Tuhan Allah so rencana mo biking orang-orang bukang Yahudi itu jadi orang yang tara sala pa Dia pe muka, asal dorang percaya pa Yesus Kristus. Tuhan Allah so kase tau Kabar Bae tentang Yesus Kristus itu lebe kamuka pa Abraham bagini, “Dari ngana, samua suku bangsa di dunia mo dapa berkat.”

Galatia 4:13

Pasti ngoni masi inga, waktu kita pertama kali datang pa ngoni, itu karna kita saki. Kong justru itu, jadi kesempatan pa kita untuk kase tau Kabar Bae dari Tuhan Allah pa ngoni.

1 Tesalonika 1:5

karna pertama kali waktu torang kase tau Kabar Bae tentang Yesus Kristus pa ngoni, ngoni bukang cuma dengar torang pe kata-kata saja, tapi ngoni me lia Tuhan pe kuasa dari Roh Kudus. Roh Kudus yang kase yakin sampe ngoni jadi percaya Kabar Bae itu. Ngoni me lia torang pe kalakuang yang bae, sampe ngoni tau Kabar Bae itu butul.

1 Tesalonika 2:13

Torang lagi salalu bilang tarimakasi pa Tuhan Allah karna waktu torang kase tau pa ngoni Kabar Bae dari Tuhan Allah, ngoni tarima itu deng sanang hati. Ngoni tarima Kabar Bae itu karna ngoni tau, kata-kata itu bukang dari manusia, tapi dari Tuhan Allah. Deng memang itu butul dari Tuhan Allah. Kong Kabar Bae itu bakarja di ngoni pe hati yang percaya pa Yesus Kristus.

1 Timotius 4:8

Ambe conto, kalu torang lati torang pe badan supaya kuat, itu bagus, tapi dia pe guna cuma sadiki. Tapi kalu torang lati torang pe diri untuk biking Tuhan Allah pe mau, dia pe guna banya skali. Kalu lati torang pe diri bagitu, pasti ada berkat untuk torang pe hidup skarang di dunia ini deng nanti waktu torang hidup ulang.

Ibrani 11:6

Tara mungkin orang mo biking Tuhan Allah pe hati sanang, kalu dia tara percaya pa Tuhan Allah. Barang, sapa saja yang mo datang pa Tuhan Allah, dia musti yakin Tuhan Allah ada, deng dia lagi musti yakin, Tuhan Allah mo kase hal-hal yang bae pa orang-orang yang butul-butul cari pa Dia.

Ibrani 3:12

Jadi sudara-sudara, ngoni musti ati-ati. Jang sampe ada satu dari ngoni yang pe hati jahat sama deng itu, sampe so tara percaya deng tara iko lagi pa Tuhan Allah yang hidup.

Ibrani 4:6

Jadi dari ayat-ayat itu so jelas, torang pe orang tua dulu-dulu so kamuka dengar kabar yang bae tentang tana itu, tapi dorang tara jadi maso di situ, karna dorang tara dengar-dengaran pa Tuhan Allah. Tapi biar bagitu, masi ada kesempatan untuk Tuhan Allah pe umat bole baistrahat sama-sama deng Dia.

Yakobus 1:21

Jadi ngoni musti berenti biking samua hal yang tara bae deng yang jahat. Ngoni musti tarima Tuhan Allah pe firman deng hati yang tara sombong. Firman itu so ada di ngoni pe hati, kong punya kuasa untuk kase slamat pa ngoni.

1 Petrus 1:12

Yesus Kristus pe Roh itu me yang kase tau pa nabi-nabi itu kalu pasáng yang dorang jaga kase tau itu bukang untuk dorang pe diri sandiri saja, tapi untuk ngoni skarang ini. Yang dorang kase tau itu, Kabar Bae tentang Yesus Kristus. Skarang, ngoni so dengar dari orang-orang yang kase tau Kabar Bae itu pa ngoni. Dorang kase tau itu deng kuasa Roh Kudus yang dari sorga. Kong yang dorang kase tau itu, itu yang malaekat-malaekat me suka cari tau.