Ibrani 1:2 - Perjanjian Baru Bahasa Melayu Maluku Utara

² Tapi skarang, di waktu yang so dekat hari kiamat ini, Tuhan Allah so utus Dia pe Anak sandiri yang bicara langsung pa torang. Dia pe Anak itu yang dulu Tuhan Allah pake untuk biking dunia ini deng samua-samua dunia pe isi. Kong Dia pe Anak itu suda yang Tuhan Allah so tentukan supaya jadi ahli waris dari samua-samua yang ada.

Ibrani 1:2 Iomraidhean Croise

Matius 13:39

Kong musu yang ambur bibit kusu-kusu itu, Iblis. Turus, waktu bapete itu, hari kiamat, hari yang Tuhan mo adili pa samua orang. Kong orang-orang yang bapete itu, itu malaekat-malaekat yang turung dari sorga.

Matius 17:5

Waktu Petrus masi bicara, kage-kage awan yang tarang turung tutu pa dorang. Kong dorang dengar dari dalam awan itu ada suara yang bilang bagini, “Ini Kita pe Anak yang Kita sayang. Dia biking Kita pe hati sanang. Dengar suda pa Dia!”

Matius 21:38

Tapi waktu orang-orang yang urus kobong itu dapa lia pa tuang kobong itu pe ana, dorang baku bilang bagini, ‘Dia ini suda yang nanti jadi waris untuk kobong ini. Jadi, mari suda torang bunu pa dia, la kobong ini mo jadi torang punya.’

Matius 26:63

Tapi Yesus cuma badiam. Kong imam basar itu bilang lagi pa Dia, “Demi Tuhan Allah yang hidup, Ngana bilang kamari pa torang, apa butul Ngana itu Mesias, Raja yang Tuhan Allah janji dari dulu? Kong apa butul Ngana me Anak Allah ka bukang?”

Matius 28:18

Yesus badekat pa dorang kong bilang, “Kita so tarima samua kuasa di sorga deng di bumi.

Matius 3:17

Kong dapa dengar Tuhan Allah pe suara dari sorga bagini, “Ini Kita pe Anak, Kita paling sayang pa Dia. Dia yang biking Kita pe hati sanang.”

Markus 1:1

Ini Kabar Bae tentang Yesus Kristus, Anak Allah.

Markus 12:6

Skarang tinggal satu orang, dia pe ana yang paling dia sayang. Ahirnya dia suru dia pe ana itu pigi pa dorang. Dia bilang bagini, ‘Kalu kita pe ana yang ka sana, pasti dorang hormati pa dia.’

Markus 12:7

Tapi orang-orang yang jaga kobong itu baku bilang bagini, ‘Dia ini suda yang nanti jadi waris untuk kobong ini. Jadi mari torang bunu pa dia la kobong ini jadi torang punya.’

Yohanes 1:10

Sebenarnya tarang itu dari dulu-dulu so ada di dunia ini. Deng Tuhan Allah pake pa Dia untuk biking dunia ini. Tapi orang-orang di dunia ini tara kanal pa Dia.

Yohanes 1:14

Tuhan Allah pe Firman itu so jadi manusia, kong Dia tinggal di antara torang. Torang so lia Dia pe kuasa yang hebat, kuasa yang Dia dapa dari Tuhan Allah, Dia pe Bapa, karna Dia itu Tuhan Allah pe Anak. Kong Tuhan Allah pe Anak itu cuma satu itu saja. Dia yang biking torang bole tau yang butul tentang Tuhan Allah deng tentang Tuhan Allah pe sayang pa torang.

Yohanes 1:3

Tuhan Allah pake pa Yesus, Firman itu untuk biking samua-samua yang ada. Deng tara ada satu barang yang jadi, kalu Tuhan Allah tara pake pa Dia itu.

Yohanes 13:3

Yesus tau Dia pe Bapa so kase samua kuasa pa Dia. Dia me tau Dia itu datang dari Tuhan Allah, Dia pe Bapa, kong Dia lagi nanti mo bale ulang pa Tuhan Allah.

Yohanes 13:32

Kong kalu orang lia Tuhan Allah dapa puji deng hormat bagitu, Tuhan Allah lagi mo biking orang-orang mo puji deng hormat pa Anak Manusia, kong so tara lama lagi samua itu mo jadi.

Yohanes 15:15

Kita tara sebut ngoni ini orang karja lagi, karna orang karja itu tara tau apa yang dia pe tuang biking. Tapi Kita bilang ngoni ini Kita pe tamang, karna samua yang Kita so dengar dari Kita pe Bapa, Kita so kase tau pa ngoni.

Yohanes 16:15

Samua yang Kita pe Bapa punya, itu lagi Kita punya. Jadi ngoni bole tau pasti, apa saja yang Roh Kudus kase tau pa ngoni, Dia dapa itu dari Kita.”

Yohanes 17:2

Barang, Bapa so kase kuasa pa Kita untuk berkuasa pa samua orang yang ada di dunia ini, supaya samua orang yang Bapa so kase pa Kita, Kita bole kase hidup deng Bapa slama-lamanya.

Yohanes 3:16

Memang Tuhan Allah paling sayang skali pa samua orang di dunia ini, sampe Dia kase Dia pe Anak yang cuma satu untuk tebus manusia pe dosa-dosa, supaya sapa saja yang percaya pa Dia pe Anak tara mo dapa hukuman tapisa deng Tuhan Allah, tapi mo dapa hidup deng Dia slama-lamanya.

Yohanes 3:25

Satu kali bagini, Yohanes pe murit babarapa orang baku malawang deng orang Yahudi yang laeng tentang cara agama Yahudi kase bersi dorang pe diri dari dosa.

Yohanes 5:26

Barang, sama deng Bapa ada kuasa untuk kase hidup orang, bagitu lagi Dia kase kuasa itu pa Dia pe Anak untuk kase hidup pa orang.

Yohanes 5:27

Bapa so kase kuasa pa Dia pe Anak untuk adili orang, karna Dia pe Anak itu Anak Manusia yang dari sorga suda.

Yohanes 9:29

Torang tau, Tuhan Allah so bicara pa nabi Musa, tapi tentang Orang itu, torang tara tau Dia itu datang dari mana.”

Kisah Para Rasul 10:36

Ngoni pasti so tau Kabar Bae yang Tuhan Allah bilang pa orang-orang Israel: Yesus Kristus itu Raja yang mo kase slamat pa manusia, Dia yang bole biking manusia pe hubungan deng Tuhan Allah jadi bae. Yesus Kristus itu yang jadi Tuhan untuk samua orang.

Kisah Para Rasul 2:17

Tuhan Allah bilang, ‘Di waktu so dekat-dekat ahir jaman, Kita mo kase Kita pe Roh pa samua orang. Ngoni pe ana laki-laki deng parampuang akan kase tau pa orang-orang pasáng yang dorang dengar langsung dari Kita. Ngoni pe ana-ana muda mo dapa penglihatan-penglihatan, deng orang-orang tua me mo dapa mimpi dari Kita.

Roma 1:4

Dia itu suda Yesus Kristus torang pe Tuhan. Torang dapa tau Dia itu Anak Allah, barang waktu Dia mati, kuasa dari Tuhan Allah pe Roh kase hidup ulang pa Dia.

Roma 8:17

Deng karna torang ini so jadi Tuhan Allah pe ana-ana, nanti tong mo dapa warisan dari Dia, itu berarti, torang ini me ada hak dari samua yang Dia so kase sadia untuk Dia pe ana-ana. Kong torang mo dapa samua itu sama-sama deng Yesus Kristus. Tapi kalu torang mau dapa itu, tong lagi musti menderita iko pa Tuhan Allah sama deng Yesus Kristus so menderita, supaya torang nanti dapa puji deng hormat sama-sama deng Dia.

1 Korintus 2:7

Tapi rencana yang bijaksana itu dari Tuhan Allah. Rencana itu dulu orang bolong tau karna Tuhan Allah bolong buka rahasia itu. Dia pe rencana itu so ada dari dulu waktu Dia bolong cipta dunia ini. Dia biking rencana itu, supaya torang yang percaya pa Dia bole dapa puji deng hormat.

1 Korintus 8:6

tapi untuk torang yang percaya, Tuhan Allah itu cuma satu saja. Dia itu torang pe Bapa, yang cipta samua-samua yang ada di dunia ini, deng Dia itu lagi yang kase torang hidup supaya tong hidup untuk biking Dia pe mau. Torang pe Tuhan me cuma satu, Yesus Kristus. Kong deng Dia itu suda, Tuhan Allah cipta dunia deng samua-samua yang ada. Deng karna Dia, torang bole hidup.

Galatia 4:4

Tapi, bagitu waktu yang Tuhan Allah tentukan so sampe, Tuhan Allah utus Dia pe Anak datang di dunia. Anak itu yang lahir dari parampuang satu, kong Anak itu, hidup iko agama Yahudi pe aturan-aturan yang ada di lima kitab Musa.

Efesus 1:10

Dia pe rencana itu bagini: kalu so sampe dia pe waktu yang Tuhan Allah so tentukan, Dia mo biking samua yang ada di sorga deng di bumi jadi satu, kong Yesus Kristus yang berkuasa pa samua itu.

Efesus 3:9

Tuhan Allah yang biking samua-samua yang ada, Dia itu yang kase tugas itu pa kita, supaya samua orang dapa lia jelas Tuhan Allah pe rencana yang so deng ratus-ratus taong Dia bolong kase tau itu so jadi.

Ibrani 1:5

Barang, tara perna Tuhan Allah bilang pa malaekat mana saja, sama deng Dia bilang pa Yesus bagini, “Ngana Kita pe Anak. Hari ini Kita kase tau pa samua orang, Ngana Kita pe Anak.” Kong, tara perna lagi Tuhan Allah bilang tentang malaekat mana saja bagini, “Kita akan jadi Dia pe Papa, kong Dia itu akan jadi Kita pe Anak.”

Ibrani 1:8

Tapi pa Anak Allah, Tuhan Allah bilang bagini, “Ngana itu Tuhan Allah, Ngana mo dudu di kursi raja kong Berkuasa sebagai Raja pa Ngana pe umat sampe slama-lamanya. Ngana berkuasa itu deng adil.

Ibrani 11:3

Deng karna torang percaya pa Tuhan Allah, torang jadi mangarti, langit deng bumi ini Tuhan Allah biking cuma deng Dia pe bicara saja. Jadi apa yang torang bole lia itu, Dia biking dari apa yang torang tara dapa lia.

Ibrani 2:3

Ajaran itu memang penting skali torang iko, tapi lebe penting lagi ajaran dari Tuhan Yesus yang Dia bilang langsung pa torang manusia! Ajaran itu tentang Dia yang kase slamat pa torang, kong ajaran itu bagus skali! Jadi kalu torang tara peduli, jang kira torang mo lolos dari hukuman! Yesus sandiri yang pertama kase tau ajaran itu, kong dorang yang dengar itu kase tau pa torang. Jadi, deng dorang pe kesaksian itu, torang bisa tau, ajaran itu memang butul.

Ibrani 3:6

Tapi Yesus Kristus lebe berkuasa dari nabi Musa. Barang, Yesus Kristus itu Anak Allah yang setia pa Tuhan Allah pe umat, sama deng ana satu yang berkuasa pa samua dia pe papa pe ruma. Kong torang ini sama deng Tuhan Allah pe ruma sandiri, asal torang bapegang kuat deng tong pe percaya, deng torang yakin torang akan dapa apa yang Tuhan Allah so janji mo kase pa torang. Itu yang biking torang pe hati sanang.

Ibrani 4:14

Skarang ini torang so untung, karna torang so ada Imam Basar yang Paling Hebat. Dia itu suda Yesus Kristus, Anak Allah. Dia yang kase bae-bae torang manusia yang berdosa pe hubungan deng Tuhan Allah. Dia so nae di sorga, kong so ada sama-sama deng Tuhan Allah. Jadi, mari suda torang tetap kuat percaya pa Dia.

Ibrani 5:8

Dia itu Anak Allah, tapi biar bagitu, Dia kase Dia pe diri dapa siksa macam itu, la jadi tanda, Dia dengar-dengaran pa Tuhan Allah.

Ibrani 7:28

Barang, kalu iko aturan-aturan di lima kitab Musa, orang yang dapa angka jadi imam basar, dorang itu cuma manusia biasa saja yang gampang tagoda biking dosa. Tapi abis Tuhan Allah kase aturan-aturan itu, Dia biking lagi janji yang baru deng sumpa la Dia angka Dia pe Anak sandiri, Yesus Kristus. Dia pe Anak itu sempurna, deng Dia jadi Imam yang kase bae-bae torang pe hubungan deng Tuhan Allah sampe slama-lamanya.

Ibrani 7:3

Tentang Melkisedek ini, orang tara tau dia pe asal-usul. Dia pe papa sapa, dia pe mama sapa, tarada yang tau. Tara ada lagi yang tau dia lahir tempo apa deng mati tempo apa. Jadi sama deng Anak Allah, Melkisedek tetap jadi imam sampe slama-lamanya.

Ibrani 9:26

Barang, kalu ulang-ulang kali Dia kase korban Dia pe diri, itu berarti, mulai dari dunia ini jadi, Dia musti ulang-ulang menderita turus. Tapi skarang ini, yang orang bilang dunia so mo kiamat, Dia datang di dunia cuma satu kali saja untuk hapus manusia pe dosa-dosa deng cara Dia kase Dia pe diri sandiri mati untuk jadi korban persembahan.

1 Petrus 1:20

Waktu dunia ini bolong ada, Tuhan Allah so pili pa Yesus Kristus. Kong di hari-hari yang so dekat deng kiamat ini, Dia so datang di dunia supaya ngoni samua bole slamat dari ngoni pe dosa-dosa.

2 Petrus 3:3

Ini yang paling penting yang ngoni musti tau, kalu so mo kiamat, nanti ada banya orang yang suka bahina torang pe percaya, barang dorang hidup cuma iko dong pe keinginan yang jahat.

Yudas 1:18

Dorang bilang, nanti waktu so mo kiamat, akan datang orang-orang yang suka bahina torang pe percaya. Dorang itu akan hidup iko dong pe napsu yang baku lawan deng Tuhan Allah pe mau.