Filipi 2:2 - Perjanjian Baru Bahasa Melayu Maluku Utara

² Jadi, ngoni biking suda kita pe hati lebe tamba sanang deng cara bagini: ngoni musti hidup satu hati deng satu pikiran, ngoni musti lebe baku-baku sayang, ngoni musti ada hubungan dekat satu deng yang laeng, deng ngoni lagi musti hidup deng satu tujuan.

Filipi 2:2 Iomraidhean Croise

Yohanes 3:29

Skarang Dia so ada, jadi kita sanang skali. Dia itu sama deng pengantin laki-laki, kong kita ini sama deng Dia pe tamang. Pengantin laki-laki itu yang penting, karna pengantin parampuang itu dia punya. Tapi pengantin laki-laki pe tamang tara penting, dia cuma badiri dekat pa dia kong badengar pa dia. Dia sanang skali dengar pengantin laki-laki pe suara. Bagitu lagi deng kita, kita sanang skali dengar lebe banya orang ada iko pa Dia.

Kisah Para Rasul 1:14

Dorang samua salalu bakumpul la berdoa deng satu hati. Dorang berdoa sama-sama deng babarapa parampuang, Yesus pe sudara-sudara, deng Maria Yesus pe mama.

Kisah Para Rasul 2:1

Waktu orang Yahudi biking dorang pe sukur bapanen yang dong sebut hari raya Pentakosta, samua orang yang percaya pa Yesus bakumpul di ruma satu di Yerusalem.

Kisah Para Rasul 2:46

Tiap hari, dorang bakumpul deng satu hati di Ruma Ibada Pusat pe kompleks. Dorang me makang sama-sama dari ruma yang satu pigi di ruma yang laeng deng rasa sanang deng hati yang sunggu-sunggu.

Kisah Para Rasul 5:12

Waktu itu lagi, Yesus pe rasul-rasul biking banya mujizat deng tanda-tanda yang kase tunju Tuhan Allah pe kuasa di orang banya pe muka. Samua orang percaya, dorang satu hati bakumpul di Ruma Ibada Pusat pe teras, yang pe nama, ‘Teras Salomo’.

Roma 12:16

Ngoni musti hidup satu hati deng ngoni pe sudara-sudara yang percaya. Jang basombong tapi musti batamang deng sapa saja, biar orang itu orang laeng anggap dia tara arti. Kong jang ngoni anggap ngoni pe diri so pande!

1 Korintus 1:10

Sudara-sudara, karna kita ini torang pe Tuhan Yesus Kristus pe utusan, jadi kita minta pa ngoni samua supaya ngoni baku dengar satu deng yang laeng. Ngoni tara bole tapisa satu deng yang laeng, tapi ngoni musti tetap jadi satu, satu pikiran deng satu tujuan.

2 Korintus 13:11

Sudara-sudara, di ahir kita pe surat ini, kita minta ngoni samua hati sanang suda karna Tuhan. Ngoni berusaha la ngoni tamba butul-butul iko pa Tuhan Allah. Kong ngoni tarima kita pe nasehat samua ini. Ngoni hidup satu hati, deng hidup baku bawa bae-bae. Kalu ngoni hidup bagitu, Tuhan Allah yang sayang pa torang deng yang biking torang pe hati jadi tenang, akan sama-sama deng ngoni.

2 Korintus 2:3

Jadi, itu dia pe sebab, tuhari kita so tulis surat pa ngoni kamuka untuk togor pa ngoni. Kita biking bagitu la ngoni ruba ngoni pe kalakuang supaya waktu kita datang ulang pa ngoni di kota Korintus, ngoni so tara akan kase sedi lagi kita pe hati. Barang ngoni yang musti biking kita pe hati sanang. Deng kita yakin, kalu kita pe hati sanang, ngoni me pasti sanang lagi.

2 Korintus 7:7

Torang pe hati jadi kuat, bukang cuma karna Titus so datang pa torang, tapi karna ngoni so biking dia pe hati jadi kuat waktu dia sama-sama deng ngoni. Dia bilang, ngoni so ingin skali mo baku dapa deng kita, ngoni so manyasal deng apa yang ngoni biking dulu, kong ngoni smangat lagi supaya ngoni deng kita pe hubungan jadi bae-bae ulang. Samua itu biking kita pe hati tamba sanang skali.

Filipi 1:4

Kong tiap kali kita kase berdoa pa ngoni samua, kita salalu berdoa deng hati yang sanang.

Filipi 2:16

Ngoni pegang kuat suda Tuhan Allah pe firman yang bole biking orang hidup deng Tuhan Allah slama-lamanya. Kalu ngoni hidup bagitu, nanti kita pe hati bole sanang waktu Yesus Kristus datang ulang yang kedua kali, karna ngoni butul-butul percaya pa Yesus Kristus. Kong karna ngoni pe percaya itu, kita bole tau, kita pe usaha kase tau Kabar Bae pa ngoni di dunia ini tara sia-sia, tapi ada dia pe hasil.

Filipi 2:20

Kita suru dia pigi pa ngoni itu, karna yang satu hati deng satu pikiran deng kita, cuma Timotius saja. Dia itu yang butul-butul pikir ngoni pe bae.

Filipi 4:2

Kita minta pa Euodia deng Sintikhe, supaya ngoni dua baku bae ulang, sama deng yang pantas orang yang so percaya pa Tuhan musti biking.

Kolose 2:5

Barang, biar lagi kita tara sama-sama deng ngoni di sana, tapi kita tetap inga pa ngoni, jadi anggap saja kita ada sama-sama deng ngoni. Kita sanang lagi, dapa dengar ngoni so satu hati kong ngoni pe percaya tetap kuat pa Yesus Kristus.

2 Tesalonika 2:13

Sudara-sudara yang Tuhan Allah sayang! Torang salalu bilang tarimakasi pa Tuhan Allah untuk ngoni, karna waktu dunia ini bolong jadi, Dia so pili pa ngoni supaya ngoni dapa slamat. Dia kase slamat pa ngoni, barang ngoni percaya ajaran yang butul dari Tuhan Allah, deng karna Roh Kudus biking ngoni jadi Dia pe umat yang hidup deng hati bersi.

2 Timotius 1:4

Kita inga tempo hari ngana manangis waktu torang dua mo baku pisa, jadi kita ingin skali mo baku dapa lagi deng ngana supaya kita pe hati jadi sanang.

Filemon 1:20

Jadi, kita pe sudara Filemon, kita minta pa ngana yang percaya pa Tuhan supaya ngana tarima suda pa Onesimus. Torang dua ini so sama-sama percaya Kristus Yesus, kong kalu ngana tarima pa Onesimus, kita pe hati pasti sanang.

2 Yohanes 1:4

Kita sanang skali karna kita dengar ada dari ibu pe ana-ana yang hidup iko Tuhan pe ajaran. Apa yang dorang biking itu sama deng yang Tuhan Allah, torang pe Bapa, parenta pa torang.

3 Yohanes 1:4

Kita paling sanang skali dengar, orang-orang yang kita so sayang sama deng kita pe ana-ana ada iko Tuhan pe ajaran. Tarada hal laeng yang biking kita sanang macam bagitu.