Filipi 2:12 - Perjanjian Baru Bahasa Melayu Maluku Utara

¹² Sudara-sudara yang kita sayang, waktu kita ada sama-sama deng ngoni, ngoni salalu dengar-dengaran pa Tuhan Allah. Lebe-lebe skarang kita so jao dari ngoni, jadi ngoni musti tetap dengar-dengaran pa Dia. Ngoni musti berusaha turus hidup deng kalakuang yang pantas untuk orang yang so dapa slamat dari dosa-dosa. Ngoni hidup bagitu deng rasa tako deng hormat pa Tuhan Allah.

Filipi 2:12 Iomraidhean Croise

Matius 11:12

Mulai dari Yohanes Pembaptis datang sampe skarang, ada orang-orang jahat yang malawang pa orang-orang yang so jadi Tuhan Allah pe umat supaya jang percaya lagi pa Tuhan Allah, deng dorang berusaha kuasai pa orang-orang itu.

Matius 11:29

Dengar kong iko suda Kita pe parenta, sama deng sapi yang ada kase pake tali kong iko dia pe tuang pe parenta. Balajar suda dari Kita karna Kita ini bae-bae deng tara sombong, kong ngoni pe hati akan jadi tenang.

Kisah Para Rasul 16:29

Pe dengar itu, kapala penjara langsung suru orang bawa lentera kong dia maso capat-capat dalam penjara. Deng totofore, dia berlutut pa Paulus deng Silas pe muka.

Kisah Para Rasul 9:6

Tapi skarang, badiri suda kong maso di kota. Di sana baru ada yang kase tau pa ngana, apa yang musti ngana biking.”

Roma 2:7

Ada orang yang biking barang yang bae turus, karna dorang suka dapa puji deng hormat dari Tuhan Allah, deng dorang suka hidup deng Tuhan Allah slama-lamanya. Jadi pa dorang itu, Tuhan Allah mo kase hidup deng Dia slama-lamanya.

1 Korintus 15:58

Jadi sudara-sudara yang kita sayang, ngoni pe percaya musti tetap kuat. Jang kase biar ada yang pengaru pa ngoni sampe ngoni ragu deng ngoni pe percaya itu. Ngoni karja turus untuk Tuhan butul-butul, karna ngoni tau, apa yang ngoni biking untuk Tuhan itu tara akan parcuma.

1 Korintus 2:3

Kong waktu kita ada sama-sama deng ngoni itu, kita rasa kita pe diri tara mampo, deng kita rasa tako sampe totofore.

1 Korintus 4:14

Kita tulis samua ini bukang mo biking malu pa ngoni, tapi mo togor supaya ngoni jadi lebe bae. Karna ngoni ini kita anggap sama deng kita pe ana-ana yang kita sayang.

2 Korintus 7:15

Kong skarang dia lebe tamba sayang pa ngoni, barang dia inga, ngoni itu dengar-dengaran pa dia, deng ngoni tarima deng hormati skali pa dia.

Efesus 6:5

Ngoni orang-orang karja yang ngoni pe tuang so bili, ngoni musti dengar-dengaran pa ngoni pe tuang yang ada di dunia ini. Ngoni musti hormati deng tako pa dorang deng hati yang sunggu-sunggu, sama deng ngoni dengar-dengaran pa Yesus Kristus.

Filipi 1:27

Jadi yang penting skarang, ngoni musti hidup deng cara yang pantas untuk orang-orang yang so percaya Kabar Bae tentang Yesus Kristus, supaya nanti kalu kita pigi lia pa ngoni, atau kalu kita bolong sempat pigi pa ngoni, kita bole dengar, ngoni samua tetap kuat percaya deng satu hati, deng ngoni me sama-sama bakarja karas kase tau Kabar Bae itu pa orang-orang supaya dorang lagi bole jadi percaya.

Filipi 1:29

Jang ngoni tako, karna Tuhan Allah kase Dia pe bae pa ngoni bukang supaya ngoni percaya pa Yesus Kristus saja, tapi Dia me ator supaya ngoni dapa siksa dari orang yang tara percaya, kong deng bagitu, Yesus Kristus dapa puji.

Filipi 1:5

Barang, mulai dari pertama ngoni percaya Kabar Bae tentang Yesus Kristus sampe skarang ini, ngoni so bantu pa torang untuk kase tau lagi Kabar Bae itu pa orang-orang.

Filipi 1:6

Kong kita yakin, Tuhan Allah yang so mulai bakarja di ngoni pe hati, Dia itu suda yang akan turus bakarja biking yang bae pa ngoni sampe di hari Kristus Yesus datang ulang yang kedua kali.

Filipi 2:19

Kita baharap pa Tuhan Yesus, so tara lama lagi kita bole suru Timotius pigi lia pa ngoni. Deng bagitu, waktu dia bale pa kita, kita bisa tau ngoni pe kabar dari dia la kita pe hati jadi sanang.

Filipi 4:1

Jadi, sudara-sudara yang kita sayang deng yang kita rindu. Ngoni yang biking kita pe hati sanang, deng ngoni lagi yang biking kita bangga. Kita minta supaya ngoni tetap percaya turus pa Tuhan, sama deng yang tadi kita so bilang.

Filipi 4:15

Sudara-sudara yang percaya di Filipi, ngoni sandiri so tau butul, dulu waktu kita kase tinggal daera Makedonia, waktu pertama kali kase tau Kabar Bae tentang Yesus Kristus, tara ada jemaat laeng yang bantu pa kita. Cuma ngoni saja yang bantu kase doi pa kita.

1 Tesalonika 1:3

Tiap kali torang berdoa pa Tuhan Allah torang pe Bapa, torang inga pa ngoni jemaat di kota Tesalonika. Torang inga samua yang ngoni biking karna ngoni pe percaya. Torang inga ngoni pe bae pa orang-orang karna ngoni sayang pa dorang. Torang inga lagi bagimana ngoni tetap biking barang yang bae biar ngoni dapa susa, karna ngoni salalu batahang percaya deng yakin pa Yesus Kristus, torang pe Tuhan.

2 Timotius 2:10

Karna itu, kita sabar tanggung siksa itu samua deng tetap kase tau Kabar Bae tentang Yesus Kristus, supaya orang yang Tuhan Allah so pili mo jadi Dia pe umat bole percaya pa Kristus Yesus. Deng bagitu, dong bole dapa slamat deng dapa puji deng hormat sama-sama deng Tuhan Allah slama-lamanya.

Ibrani 12:1

Sudara-sudara, biar orang-orang percaya dulu-dulu yang kita so bilang tadi itu so mati, dorang pe percaya waktu dong hidup di dunia itu jadi conto la torang iko, sama deng dorang masi hidup kong ada kuliling pa torang. Jadi, mari suda torang berusaha untuk buang samua beban deng lapas suda dosa-dosa yang masi malakat pa tong pe diri, supaya torang tara ada alangan apa-apa, la torang bole percaya butul-butul pa Tuhan Allah. Mari torang berusaha iko pa Dia sama deng torang ada iko lomba lari, torang tara berenti tapi lari turus sampe di garis finis.

Ibrani 4:1

Jadi sudara-sudara, biar torang pe orang tua dulu-dulu tara dapa maso di tana yang Tuhan Allah janji untuk baistrahat, skarang Tuhan Allah pe janji untuk baistrahat sama-sama deng Dia masi ada. Jadi torang musti ati-ati, jang sampe ada satu dari torang yang tara bisa baistrahat deng Tuhan Allah.

Ibrani 4:11

Jadi, mari suda torang berusaha supaya torang bole baistrahat sama-sama deng Tuhan Allah. Jang sampe ada satu dari torang yang tara dapa baistrahat itu karna dia iko torang pe orang tua dulu-dulu pe sifat yang tara dengar-dengaran pa Tuhan Allah.

Ibrani 5:9

Deng Yesus biking bagitu, Tuhan Allah so biking Dia jadi sempurna, supaya Dia yang bisa kase slamat pa sapa saja yang dengar-dengaran pa Dia untuk slama-lamanya.

1 Petrus 2:11

Sudara-sudara yang kita sayang, ngoni orang-orang percaya ini sama deng orang-orang pendatang deng orang-orang yang cuma hidup sementara saja di dunia ini. Jadi kita kase nasehat pa ngoni, jang ngoni hidup iko ngoni pe keinginan yang tara bae yang salalu baku lawan deng ngoni pe mau untuk biking barang yang bae.

2 Petrus 3:18

Lebe bae tiap hari ngoni tamba sadar Yesus Kristus pe bae deng lebe tamba kanal pa Dia. Dia itu torang pe Tuhan Yesus Kristus yang kase slamat pa torang dari dosa-dosa. Kong untuk Dia suda puji deng hormat dari skarang sampe slama-lamanya. Amin.