Filipi 2:1 - Perjanjian Baru Bahasa Melayu Maluku Utara

¹ Sudara-sudara, ngoni so percaya pa Yesus Kristus, jadi Dia so biking ngoni pe hati kuat. Ngoni pe hati sanang karna Dia sayang pa ngoni. Ngoni so hidup satu hati satu deng yang laeng karna Roh Kudus yang pimpin pa ngoni. Ngoni me baku-baku sayang, deng ada rasa kasiang satu deng yang laeng.

Filipi 2:1 Iomraidhean Croise

Lukas 2:25

Waktu itu di Yerusalem, ada satu orang dia pe nama Simeon. Dia itu hidup butul pa Tuhan Allah pe muka deng dia dengar-dengaran pa Tuhan Allah. Deng dia ada tunggu waktu yang nanti Tuhan Allah mo kase slamat pa bangsa Israel. Kong Roh Kudus salalu sama-sama deng dia.

Yohanes 14:18

Waktu Kita kase tinggal pa ngoni nanti, ngoni ini tara akan sandiri sama deng ana yang tarada papa deng mama. Kita mo bale ulang pa ngoni.

Yohanes 14:27

Skarang Kita mo pigi, tapi hati tenang yang ada pa Kita, Kita mo kase itu pa ngoni. Hati tenang yang Kita kase itu, dunia tara bisa mo kase pa ngoni. Jang ngoni hawater deng tako.

Yohanes 17:13

Bapa, skarang Kita mo pigi pa Bapa. Kita berdoa samua ini untuk orang-orang yang iko pa Kita waktu Kita masi ada di dunia ini, supaya sanang yang Kita rasa, dorang lagi bole rasa.

Kisah Para Rasul 2:46

Tiap hari, dorang bakumpul deng satu hati di Ruma Ibada Pusat pe kompleks. Dorang me makang sama-sama dari ruma yang satu pigi di ruma yang laeng deng rasa sanang deng hati yang sunggu-sunggu.

Kisah Para Rasul 4:32

Samua orang yang percaya pa Yesus, dorang hidup satu hati deng satu pikiran. Tarada satu orang yang bilang dia pe harta cuma untuk dia pe diri sandiri saja, tapi jadi samua orang punya.

Roma 5:5

Kong karna torang so baharap deng yakin pa Tuhan Allah, torang tau, torang tara akan kecewa karna Tuhan Allah akan kase samua yang Dia janji. Torang so tau itu butul karna Tuhan Allah so kase Roh Kudus yang bakarja di torang pe hati sampe torang bole rasa Dia pe sayang yang basar.

Roma 8:26

Bagitu lagi Tuhan Allah pe Roh mo tolong pa torang kase kuat torang pe hati waktu torang rasa tong pe percaya tara kuat. Jadi waktu torang berdoa, torang tara tau apa yang Tuhan Allah mau supaya torang mo bilang, tapi Tuhan Allah pe Roh yang tolong pa torang untuk kase turus pa Tuhan Allah apa yang torang mo bilang pa Tuhan Allah deng cara yang torang sandiri tara mampo bilang deng kata-kata.

1 Korintus 12:13

Barang torang ini, ada orang Yahudi, deng ada yang bukang Yahudi. Ada orang karja yang dia pe tuang so bili, deng ada orang yang bebas. Torang samua Roh Kudus biking torang jadi satu, karna torang samua dapa baptis dari Roh Kudus yang sama. Roh Kudus yang sama itu, yang so ada pa torang samua, itu sama deng torang ada minum dari mata aer yang sama.

1 Korintus 15:31

Itu butul sudara-sudara, tiap hari kita mangada siksa itu sampe amper-amper mo mati karna kita bawa Kabar Bae ini. Tapi kita bangga pa ngoni, barang ngoni so percaya pa Kristus Yesus, torang pe Tuhan.

1 Korintus 3:16

Ngoni tau ka tarada, ngoni itu sama deng Tuhan Allah pe Ruma, kong Tuhan Allah pe Roh tinggal pa ngoni.

2 Korintus 2:14

Tapi biar bagitu me, kita bilang tarimakasi banya pa Tuhan Allah, karna Dia salalu pimpin pa torang yang percaya pa Yesus Kristus, supaya torang bisa menang dari kuasa jahat. Tuhan Allah pake pa torang di mana-mana untuk kase tau Kabar Bae tentang Yesus Kristus, supaya orang-orang bisa kanal pa Dia. Waktu dorang dengar Kabar Bae itu, dorang jadi sanang, sama deng dong dapa ciom bobou sadap.

Galatia 4:6

Kong karna torang so jadi Tuhan Allah pe ana-ana, Tuhan Allah so suru pa Dia pe Anak pe Roh tinggal di torang pe hati, kong Roh yang ada di torang pe hati itu bakarja deng biking torang bole pangge pa Tuhan Allah itu, “Papa e, ya Bapa!”

Galatia 5:22

Tapi orang yang Roh Kudus kuasai itu dapa lia dari dorang pe hidup macam bagini: pangsayang, hati sanang, hati tenang, pangsabar, pangbae, biking barang yang bae, setia,

Efesus 4:4

Torang yang percaya pa Yesus so jadi satu, sama deng torang so jadi satu badan, deng Roh Kudus yang ada pa torang me cuma satu. Kong cuma pa Tuhan Allah saja torang baharap karna Dia yang pangge pa torang untuk iko pa Dia.

Filipi 1:8

Tuhan Allah suda yang jadi kita pe saksi, kita ini paling rindu skali mo baku dapa deng ngoni, karna kita sayang pa ngoni sama deng Kristus Yesus sayang pa ngoni.

Filipi 3:3

Ngoni musti ati-ati deng dorang, karna bukang dorang, tapi torang ini suda yang jadi Tuhan Allah pe umat, torang yang semba pa Dia pake Dia pe Roh pe kuasa yang ada di torang pe hati. Torang sama skali tara percaya sama deng dorang yang pikir kata, dorang bole jadi orang yang butul pa Tuhan Allah pe muka karna apa yang manusia biking, macam deng sunat itu. Tapi torang puji pa Kristus Yesus saja, barang cuma karna Dia, torang bole slamat.

Kolose 2:2

Kita berusaha karas la ngoni lebe tamba percaya pa Yesus deng lebe tamba baku sayang sampe ngoni jadi satu hati. Kita mau supaya ngoni butul-butul mangarti deng yakin, Tuhan Allah pe rahasia yang hebat. Rahasia itu tentang Yesus Kristus yang dari dulu Tuhan Allah tara kase tau pa orang-orang, tapi skarang ngoni so bole tau.

Kolose 3:12

Tuhan Allah so pili pa ngoni, ngoni yang so jadi Dia pe umat, deng yang Dia sayang. Jadi ngoni pe hidup musti bagini: ada rasa kasiang, hati bae, tara sombong, tara kasar, deng salalu sabar.

Ibrani 6:18

Jadi ada dua hal yang tara perna beruba: pertama, Tuhan Allah pe janji, deng kedua, Dia pe sumpa. Barang, Tuhan Allah tara perna bafoya. Kong karna itu, torang yang cari slamat pa Dia, torang pe hati jadi kuat kong torang bole percaya deng yakin, tong akan tarima samua yang Tuhan Allah so janji pa torang.

1 Petrus 1:2

Tuhan Allah, torang pe Bapa so pili pa ngoni iko Dia pe rencana yang dari dulu. Kong Dia pe Roh yang biking ngoni jadi Dia pe umat supaya ngoni dengar-dengaran pa Yesus Kristus, deng supaya Dia pe dara yang so tatumpa biking ngoni jadi bersi dari dosa-dosa. Kita minta pa Tuhan Allah, supaya Dia kase Dia pe bae pa ngoni, deng Dia biking ngoni pe hati tetap tenang, kong Dia kase samua itu talebe-lebe.

1 Yohanes 3:24

Sapa yang iko Tuhan Allah pe parenta-parenta, dia so jadi satu hati deng Tuhan Allah, kong Tuhan Allah me jadi satu hati deng dia. Deng bagitu, torang bisa tau, Tuhan Allah satu hati deng torang, barang Tuhan Allah so kase Dia pe Roh pa torang.

1 Yohanes 4:12

Tarada satu orang yang perna lia langsung pa Tuhan Allah. Tapi kalu torang baku-baku sayang, Tuhan Allah tetap ada di torang pe hati, kong Dia pe sayang biking torang butul-butul sayang iko Dia pe mau.

1 Yohanes 4:16

Torang so tau deng so percaya, Tuhan Allah paling sayang pa torang. Tuhan Allah itu pangsayang. Jadi sapa yang sayang pa orang-orang, orang itu tetap satu hati deng Tuhan Allah, kong Tuhan Allah me satu hati deng dia.