Filipi 1:10 - Perjanjian Baru Bahasa Melayu Maluku Utara

¹⁰ sampe ngoni bole tau mo pili mana yang bae, supaya ngoni bole hidup deng hati yang bersi, kong di hari Yesus Kristus datang ulang yang kedua kali, tara ada yang bisa kase sala apa-apa pa ngoni.

Filipi 1:10 Iomraidhean Croise

Matius 16:23

Tapi Yesus babale kong togor pa Petrus, “Badiam ngana! Ngana pe bicara sama deng Iblis pe bicara. Ngana halangi Kita untuk biking Tuhan Allah pe mau. Barang, ngana cuma pikir apa yang manusia pikir, bukang apa yang Tuhan Allah pikir.”

Matius 26:33

Kong Petrus bilang pa Yesus, “Biar dorang samua pe percaya tagoyang sampe lari kase tinggal pa Guru, tapi kita ini tara akan mungkin!”

Yohanes 1:47

Turus dorang dua pigi pa Yesus. Pe lia Natanael datang pa Dia, Yesus bilang, “Coba ngoni lia, dia yang kamari ini butul-butul orang Israel, dia tara putar bale.”

Yohanes 3:20

Barang, sapa saja yang suka biking barang yang jahat, dia binci tarang kong tara mau datang di tarang itu, supaya dia pe kalakuang-kalakuang yang jahat itu tara dapa lia.

Kisah Para Rasul 24:16

Kong karna kita percaya deng yakin bagitu, kita salalu berusaha hidup deng hati bersi pa Tuhan Allah pe muka deng pa manusia.

Roma 12:2

Jang ngoni iko dunia ini pe mau. Lebe bae ngoni kase biar la Tuhan Allah ruba ngoni pe pikiran jadi baru supaya ngoni pe kalakuang me beruba. Karna deng ngoni pe pikiran yang baru, ngoni bole tau Tuhan Allah pe mau: yang bagus, yang butul, deng yang biking Dia pe hati sanang.

Roma 12:9

Ngoni musti sayang orang butul-butul, jang foya-foya! Ngoni musti binci samua barang yang jahat, kong ngoni biking suda samua yang bae.

Roma 16:17

Sudara-sudara, kita minta deng butul-butul pa ngoni, ati-ati pa orang yang jaga kase ajaran yang baku beda deng yang torang so ajar pa ngoni. Ati-ati karna dorang suka biking ngoni jadi tapisa-pisa deng biking ngoni jadi ragu-ragu deng ajaran yang torang so kase ajar pa ngoni. Jadi jang badekat pa dorang itu!

Roma 2:18

Kong torang orang Yahudi, torang tau Tuhan Allah pe mau yang musti torang biking. Torang tau mana yang butul karna torang so balajar dari aturan yang ada di lima kitab Musa.

Roma 7:16

Jadi, kalu kita biking barang yang jahat yang kita tara suka mo biking, itu berarti, kita so mangaku, aturan yang di lima kitab Musa itu bagus untuk kita biking.

Roma 7:22

Karna, di kita pe hati, kita suka skali iko Tuhan Allah pe aturan.

Roma 8:7

Barang, orang-orang yang hidup cuma iko manusia pe mau yang suka biking dosa, dorang itu jaga malawang pa Tuhan Allah. Dorang tara iko Tuhan Allah pe aturan, karna memang dorang tara mampo iko aturan itu.

1 Korintus 1:8

Dia lagi akan kase kuat turus ngoni pe percaya sampe Dia datang ulang, supaya di waktu itu, Dia dapa ngoni tara sala apa-apa.

1 Korintus 10:32

Jang ngoni biking apa-apa yang biking sampe orang laeng tara jadi iko pa Tuhan, biar dia itu orang Yahudi ka, orang bukang Yahudi ka, atau biar lagi dia itu dari Tuhan Allah pe jemaat.

1 Korintus 8:13

Jadi, kalu gara-gara makanang itu biking kita pe sudara yang percaya pa Tuhan jadi berdosa, itu sama deng kita so biking dia pe kaki tagate di batu kong jatu. Jadi lebe bae kita sama skali tara usa makang daging itu lagi selama kita hidup. Karna kita tara mau skali kita pe sudara jadi berdosa lagi gara-gara kita.

2 Korintus 1:12

Sudara-sudara, yang biking torang pe hati sanang, itu karna tong pe dalam hati sandiri yang kase tau ini butul: torang pe kalakuang pa samua orang di dunia itu bae deng lebe-lebe lagi tong pe hubungan deng ngoni me bae. Torang pe hidup jujur, deng tong pe tujuan butul iko Tuhan Allah pe mau. Kong samua yang tong biking itu bukang karna tong iko manusia pe pande, tapi karna Tuhan Allah pe bae sampe tong mampo biking samua itu.

2 Korintus 2:17

Torang tara mampo biking tugas ini deng tong pe kekuatan sandiri. Barang torang tara sama deng banya orang laeng, yang kalu kase tau Tuhan Allah pe firman, cuma mo cari doi. Tapi torang, kalu torang kase tau Tuhan Allah pe firman, torang biking deng hati bersi. Tuhan Allah sandiri yang kase tugas ini pa torang deng Dia yang lia torang kase tau Tuhan Allah pe firman pa orang-orang, karna torang percaya pa Yesus Kristus.

2 Korintus 6:3

Torang berusaha hidup bae-bae supaya jang torang biking orang tara mo iko pa Yesus Kristus. Jadi, deng torang hidup bae-bae bagitu, tara ada orang yang mo kase sala apa-apa pa torang di torang pe pelayanan.

2 Korintus 8:8

Kita bicara tentang doi sumbangan itu, bukang berarti kita mo parenta pa ngoni. Tapi kita mau ngoni tau, jemaat-jemaat di daera Makedonia suka skali bantu pa orang yang perlu, supaya ngoni lagi ada smangat untuk bantu orang sama deng yang jemaat-jemaat Makedonia so biking. Karna kalu ngoni biking bagitu, orang bisa tau, ngoni itu butul-butul sayang orang.

Galatia 5:11

Sudara-sudara, ada orang yang bilang kata, kita ini jaga kase ajar orang musti iko aturan sunat yang ada di lima kitab Musa. Padahal, kita tara perna ajar bagitu, karna kalu kita ajar bagitu, pasti orang-orang yang sama-sama Yahudi deng kita tara siksa pa kita. Tapi yang kita kase ajar pa orang-orang itu, dorang musti percaya pa Yesus Kristus yang mati di kayu salib. Kong gara-gara kita kase ajar bagitu, ini yang jadi masala basar pa dorang sampe dorang tara mau percaya, sama deng dorang pe kaki ada tagate di batu.

Efesus 4:15

Tapi torang bilang yang butul pa orang laeng karna torang sayang pa dorang. Kong dalam samua hal, torang pe sifat lebe hari lebe tamba bae sampe sama deng Yesus Kristus pe sifat. Dia itu torang samua yang percaya pe pemimpin, sama deng Dia itu torang pe kapala.

Efesus 5:10

Deng ngoni lagi musti berusaha cari tau apa saja yang biking Tuhan Allah pe hati sanang.

Efesus 5:27

Jadi, torang yang so jadi Dia pe jemaat bole jadi Tuhan pe umat yang bersi dari dosa, kong tarada orang yang mo kase sala pa torang. Torang tarada dosa apa-apa sampe waktu Tuhan Yesus datang ulang jemput pa torang, jadi torang bole badiri pa Dia pe muka.

Efesus 6:24

Kita minta pa Tuhan Allah supaya Dia kase Dia pe bae pa samua orang, yang dorang pe sayang tara abis-abis pa Yesus Kristus torang pe Tuhan.

Filipi 1:16

Dorang yang kase tau ajaran tentang Yesus Kristus deng tujuan bae ini, dorang biking bagitu karna dorang sayang pa Tuhan Allah deng pa kita, deng karna dong tau, Tuhan Allah yang utus pa kita untuk bela Kabar Bae tentang Yesus Kristus supaya orang bole tau Kabar Bae itu butul.

Filipi 1:6

Kong kita yakin, Tuhan Allah yang so mulai bakarja di ngoni pe hati, Dia itu suda yang akan turus bakarja biking yang bae pa ngoni sampe di hari Kristus Yesus datang ulang yang kedua kali.

Filipi 2:16

Ngoni pegang kuat suda Tuhan Allah pe firman yang bole biking orang hidup deng Tuhan Allah slama-lamanya. Kalu ngoni hidup bagitu, nanti kita pe hati bole sanang waktu Yesus Kristus datang ulang yang kedua kali, karna ngoni butul-butul percaya pa Yesus Kristus. Kong karna ngoni pe percaya itu, kita bole tau, kita pe usaha kase tau Kabar Bae pa ngoni di dunia ini tara sia-sia, tapi ada dia pe hasil.

1 Tesalonika 3:13

Torang minta bagitu, supaya nanti waktu torang pe Tuhan Yesus datang ulang sama-sama deng samua orang yang so jadi Dia pe umat, ngoni jadi orang yang pe hati bersi pa Tuhan Allah, torang pe Bapa pe muka, deng Dia tara dapa ngoni pe sala apa-apa.

1 Tesalonika 5:21

Cuma, ngoni musti cari tau bae-bae pasáng itu la tau kalu itu butul-butul dari Tuhan ka tarada. Kalu memang itu butul dari Tuhan, ngoni musti iko itu sunggu-sunggu.

1 Tesalonika 5:23

Tuhan Allah yang biking torang pe hati tetap tenang, jadi torang minta supaya Dia biking ngoni jadi Dia pe umat sandiri yang hidup deng hati bersi. Torang minta supaya Dia jaga ngoni pe badan, hati deng jiwa, supaya ngoni tarada sala apa-apa waktu torang pe Tuhan Yesus Kristus datang ulang.

1 Yohanes 4:1

Sudara-sudara yang kita sayang, jang ngoni percaya pa samua orang yang bilang, pa dorang ada Tuhan Allah pe Roh. Lebe bae ngoni lia dulu bae-bae kalu dorang butul dari Tuhan ka bukang, karna banya orang yang datang skarang bilang kata, dong kase turus Tuhan Allah pe pasáng, padahal bafoya. Dorang cuma nabi palsu.

Wahyu 2:2

Kita tau samua yang ngoni jaga biking: ngoni so karja karas biking Tuhan Allah pe mau, deng ngoni me tahang mangada siksa. Kita me tau ngoni tara tapengaru deng orang jahat yang tinggal di sekitar ngoni. Ngoni me so cari tau bae-bae pa orang-orang yang bilang kata, dong itu Kita pe utusan yang orang sebut rasul. Padahal dorang itu bukang rasul, kong ngoni dapa tau dong itu memang pangbafoya.