Lʉkas 8:15 - Kálara Zyɛ̌m Edwán é mpʉ̌n

¹⁵ No ó mʉʉ mompœʼ mɛɛ, mé a kur ó, é si mocyɛʼ, sa nɨ lé edweʼle bʉr o b'a be e mɨmpaŋ mɨleme. É jɔʼ bé a joʼo lɔɔ Zyɛm ɨ, bé a si baʼle we é mɨleme myɔɔ le egumo mpumo é bɨtiʼ byɔɔ, ndwe le esa bihbe.»

Kálar Nzyɛ̌m : Ejwán é Sáá

¹⁵ Nó bʉ́ʉ́ bʉ̂r, bé ó mpʉ̌ mpeʼ, yé á kur ɨ́ bwǎh métyɛʼ yɨ́. Bé lɨ́ ejóʼǒ lɔ́ɔ́ mé Nzyɛ̌m e mimbɨambɨa míléme. Bé lɨ́ emɛ̂r lɔ́ɔ waá ɨ́ kpɨ́ɨ́ɨ́, le esâ bíhwó, gúmo ntémé mpumó ɨ́ buo buo.»

Lʉkas 8:15 Iomraidhean Croise

Mataos 24:13

No ó waa ódihbe, to pyal é l'esie e, nyiha ó ngo bi tiʼ molu mo mpoʼ mɨmɛh.

Lʉkas 11:28

No ó Yesʉs a bɨha e nye ó: «Mocyɛʼ mo mpom, mé é bul laŋle ó, e baa lé ejoʼo lɔɔ Zyɛm le edu we e.»

Lʉkas 6:45

Leme mʉr, wé ó mpʉ ekʉm. Mʉr ndɨ é mbɨa ɛ, nye enʉa bɨsa bɨ embɨa bye ó, tɨ, é l'ekʉm le tʉŋlʉ, ntɔʼ pyɛl-pyɛl bye kʉl. Mʉr ndɨ é bebe e, nye enʉa bɨsa bɨ ebebe bye ó, é leme we, ndɨ mpʉ bebebebe ekʉm le e, pyɛl bye kʉl. Sa mʉr ndɨ e ye lwɨŋla é leme we e, yé ó nʉm we lé epyɛl kʉl ɨ.»

Lʉkas 8:14

Mʉʉ mompœʼ nteme, mé a kur ó, é bwah yé a be e mɨndwinʉ ɨ, sa nɨ lé edweʼle bʉr o b'a joʼo lɔɔ Zyɛm ɨ. Sa gwar, bé a be ó lé eyeʼbe bɨsa bɨ jobo yi, le okum e l'ogbaa ndwe e bɨgwɨma bɨ tiʼ yi. Bɨsa byaa, byé a be ó be é mɨleme é larada, bé l'abe e nkul eka gumo mɨmpaŋ mɨ mpumo é bɨtiʼ byɔɔ.

Lʉkas 8:16

«Mʉr, nye abe lé etumo elama é l'efu le ebur le é kaʼ tʉŋlʉ. Mʉr, nye abe e nkul eto cyel twima elama é duo si. Nye ócyel le ó, é cye elama kʉ é l'efu ó, bʉr bé óni tɨʼ ɨ, diʼe é myɛn.

Yʉanes 14:15

«ǃBɨn si kpɛl me nɛʼɛ, bɨn nteme, bé ódu mɨtiila me lé etiile bɨn ɨ.

Yʉanes 15:10

ǃBɨn si du mɨtiila me lé etiile bɨn nɛʼɛ, bɨn bé óbe ó bʉr me lé ekpɛl ɨ, ebe, mɨ du mɨtiila Sɔŋ wam a tiile me e. Me egʉa nteme ó, nye ekpɛl me.

Rôm 2:7

Baʼ bʉr, bé esaa ó, kum é mih mo Zyɛm, e duu le tiʼ ndɨ asie-sie e. Bé edihbe sɔɔlʉ waa e bihbe, lé esa bɨsyɛɛla bɨ ncwɨncwɨa. Bé ó baa Zyɛm ódwe tiʼ molu mo mpoʼ mɨmɛh ɛ.

Rôm 6:22

Banana, Zyɛm, nyi sa ó, bɨn diʼe é dia otî é nko paʼ Syem. Bɨn mu ó é dia osyɛl o mosa mo Zyɛm. Mpumo lé ecyèl é bɨtiʼ bin ɨ, nye ó ndɨ ebò e cyen ndɨ ti é mih mo Zyɛm ɨ. Ndumlo tɨ, wé ó tiʼ molu mo mpoʼ mɨmɛh.

Rôm 7:18

Ebe no, me egʉa mbɨmbɨa ó, sa mpa, yé abe é me. (Me si jala le etile yɛɛ ó: «é nyʉl bɨpuno wam tʉŋlʉ».) Ebe sa lé ekunbo e me e, yé ó, me gwɨmɨ mɨmpaŋ bɨsyɛɛla. To kœb ó, nkul ndɨ ó, me saʼ bɨsyɛɛla byaa ɛ, nye akunbo e me.

Rôm 7:4

Obɨɔ ga bam aa! Bɨn nteme, bé ó é dia otî, motie mo Moyiz l'aka jwɨ̀ʼ bɨn, ebe, é zyɛŋa win boo Krɨst, bɨn bé a si dwè é nko paʼ bɨpuno. Bɨn bé a dwè ó, bɨn nkʉʼ di baa mo Krɨst, mʉr Zyɛm a pɛ̀h é foo ó, bɨna nkʉʼ gumo ga mpumo é l'efu mo Zyɛm ɨ.

Rôm 8:25

Sa bɨna l'apa bee ga ɛ, ǃɨ mɨleme ga mina si be e mbɛla ó, bɨna bé óbee ga ye nɛʼɛ, kʉ gʉa ó, bɨna bé ejala le edihbe ga mpono waa.

1 Korɛnt 7:19

Esaŋɔ mpʉn nkʉ di, asaŋɔ mpʉn, yé alɛɛ sɔʼɔ. Sa ndɨ e nyɔm ɨ, yé ó, go duʼo motie mo Zyɛm.

Éfɛsɔs 2:8

Ebe, bɨn bé a bi tiʼ molu mo mpoʼ mɨmɛh ó, é zi ncwɨncwɨa mo Zyɛm, é zi buʼo. Tiʼ yaa, yé aduho é bɨn bʉr o tɨ. Yé ó etʉm Zyɛm a ntɨh bɨn ɨ.

Filipi 1:11

No ó bɨn bé ódi ocɨcyel o bʉr é zyɛŋa win boo Yesʉs-Krɨst ɨ. Bʉr, bé óbul dwe Zyɛm kum le eseʼle nye ebe bɨn.

Kolosi 1:10

É mbi waa ó bɨn bé ókœʼ ebò e cyen lé ejala e Da Yesʉs ɨ, le esa sa nye lé ebul kpɛl ɨ. Bɨn bé óto dolo lé esa mɨmpaŋ bɨsyɛɛla bin bibyɛh, le egumo mɨmpaŋ mɨ mpumo lé ejala e nye e. Toʼ ga dolo lé egwɨe é pɨʼ, lé egʉa Zyɛm é kpɛhla.

Kolosi 1:6

Mbɨambɨa Lɔɔ, wé emyɛma é bɨn tʉŋlʉ, myɛma é si nwaʼ nyiwɛh, lé etɨe bʉr motum modwan, mpʉ wé esa é mbɛr Zyɛm win ɨ. Bɨn bé a be ó si joʼo bʉr lé elab lɔb ncwɨncwɨa mo Zyɛm, bɨn ntɔʼ gʉa jwɨʼ ocyecye ndɨ tɨʼ ɨ.

Ebrœ̂ 10:36

Sa lé ejɨŋɔ é nko paʼ win ɨ, yé ó bihbe. ǃBɨn si be e bihbe waa nɛʼɛ, bɨn bé ósa gwɨma mo Zyɛm é jɔʼ yaa. Bɨn bé óbi sa nye a kɛʼ bɨn ɨ.

Ebrœ̂ 2:1

Ebe no ó bɨna lé ejala le egʉa joʼlo sikʉlʉ bé a taare ntɛŋ bɨna ga ɛ, é l'efu ó, bɨna beʼ ga l'aka lɨŋa é buʼo.

Jacques 1:4

Sa gwar, yé ejala ó, bihbe waa diʼe bɨn e nyɔm é mɨpaʼ mimyɛh. Nye ósa ó, bɨn kuma é l'ombɨmbɨa é mɨpaʼ mimyɛh, abe e sa yé lé esa bɨn sɔɔlʉ.

1 Yʉanes 2:3

Yé be ó, bɨna bé edu ga motie mo Zyɛm nɛʼɛ, lɛɛ ó, syɛɛla yaa, yé óbe ó dweʼle, sa lé elɛʼle ó, bɨna bɨ gʉa ga nye.