Lʉkas 1:1 - Kálar Nzyɛ̌m : Ejwán é Sáá

¹ Théophile, mɨ́ɔɔ́ wǎm! Bisyɛ́ɛla bínɨ́nɨ́ɨ́ Nzyɛ̌m á sâ ɨ́ páʼ gá wɨ́ná bí, byé mû ó sí cɛmɔɔ nzɔ̂ʼ nzɔʼ.

Kálara Zyɛ̌m Edwán é mpʉ̌n

¹ Tamamʉr Teofil, bɨsyɛɛla byé a syɛɛlɨ é bɨna ga tʉŋlʉ ɨ, bʉr, bɨ jwɨʼla lé etile bye zɔʼ e zɔʼ.

Lʉkas 1:1 Iomraidhean Croise

Markus 16:20

Nó ó ómpʉ́n bé, bé á to le etúno Mbɨambɨa Lɔ́ɔ ɨ́ gúmó yɨ́yɛ̂h yɨ́. Píe lɔ́ɔ́ bé á túno wɨ́, Tî Yésʉs á ntɨntɨh mesimá ó, maá me dí eboʼlo ó, lɔ́ɔ́ wɔ́ɔ́, wé á kʉ be ó tyeetye má.]

Yʉanes 20:31

Sá mé mû sí cɛma bɨ́n ɨ́ mekaná mâʼ yɨ́, yé ó, bɨ̌n bûʼlaa ó, Yésʉs ó dí Mʉ̌r Nzyɛ̌m á lœm múló mé jwɨ́ɨ nyá, nye ntémé, nye ó Mwân mé Nzyɛ̌m. Bɨ́n sí dyɛ̂ʼwo e né nó, bɨ̌n bé óbǐ twiʼ ɨ́ nzɨ̌ nyé.

Rôm 14:5

Bâʼ bʉ̂r, bé jwɨʼ ó, myúú mímóhó, myé lɨ́ elaa myúú ɨ́ dúu ɨ́ míh mé Nzyɛ̌m. Bʉ́ʉ́ bʉ̂r bɨ́ɛ jwɨjwɨʼ ó, mimóhó mímyɛ̂h, myé ó mbi ngwár ɨ́ mbeá wé. Bisyɛ́ɛla bi mʉ̂r nyɨnyɛ̂h, byé ɨ́ jala le eduduho ó, lɨ́ otîtyěl o mípahlá mí lémé wé.

Rôm 4:21

Nye á kʉ gʉ́a ó, Nzyɛ̌m á be ó e nkul edwe nyé sá nyé á pa kɛʼ nye yɨ́.

Kolosi 2:2

Syɛ́ɛ́ mé dí eséa yɨ́, mě séá yé ó, me nkʉ̂ gbâ bɨ́n nkul ɨ́ miléme, le esâ ó, bɨ̌n kpɛ́laa, le egwá pûhla. Bɨ̌n nkʉ̂ gʉ́ǎ búʼó gá yɨ́ná ɨ́ pébébé, sá dí bɨ̌n e nyɔm ɨ́ buo buo yɨ́. Bɨ̌n gʉ́ŋaa ntémé Krîst, mʉ̌r Nzyɛ̌m á sol ɨ́ lwǐb ódîm nyá.

Kolosi 4:12

Epafrâs, mʉr á duho kwá nyɨ́n nyá, nye lɨ́ esoho bɨ́n. Nye ó syɛ̂l mesâ mé Krîst. Nye lɨ́ ejɨʼla e Nzyɛ̌m e nkul jɔʼ yɨ́yɛ̂h ɨ́ lɔ̌b wɨ́n ó, bɨ̌n tyɛ́bɨɨ mekʉ̌ sí ɨ́ sɨ́ŋ, bɨ̌n díʼee otɔ́má bʉ̂r ɨ́ mipáʼ mímyɛ̂h, le egʉ́a bísyɛ́ɛla bíbyɛ̂h Nzyɛ̌m dí ekpɛl bí ɨ́ pébébé.

1 Tesalonika 1:5

Ebě, ɨ́ jɔʼ bɨ́h á lɛ́ɛ bɨ̌n Mbɨambɨa Lɔ́ɔ́ mé Krîst yɨ́, bɨ̌n bé á bé anʉǎ lɔ́ɔ waá le epɨ̂h. Yé ó, ebě, ɨ́ jɔʼ yaá, Nzyɛ̌m á si lɛ̂ʼle bɨ̌n nkǔl nɨ́nɨ́ɨ́ nyé tɨ̂. Sísǐm wé, wé á si sulo ntémé ɨ́ bɨ̌n. Bɨ̌n bé á nze ka gʉ́a ɨ́ jɔʼ yaá ó, lɔ́ɔ waá, wé á kʉ be ó, tyeetye. Bɨ̌n bé lɨ́ egʉ́a ntémé mpʉ mɨ́ná bé á bɨbe gá yɨ́. Bɨ̌h bé á títíʼe nó ó, lɨ́ esú lé édi bɨ́n e nyɔm.

1 Timotɛ 3:16

Yê tyeetye ó e bipéh bí búʼó yɨ́ná byé á nyɛɛ be misolá bí. Byé mû ó sí pâʼlɔɔ. Byé ntémé, byé ɨ́ buú bwaʼ, mpʉ bʉ̂r bɨ́bɛ̂h dí ekam yɨ́. Byé ó: «Nye á nze nyɨ̂n ɨ́ sí yɨ̂ʼ ó e nyʉ̂l bipúno. Sísǐm mé Nzyɛ̌m nzě lɛ̂ʼle mɨ́ná gá ó, nyé abe e mebě. Beéngeles, bé á si siŋle nye. Bʉr o bíkúl bíswîh, bé á si jóʼo lɔ́ɔ dí edumo e né wɨ́. Bʉr ó sí yɨ̂, bé á si dyɛ̂ʼwo e né. Nye nzě bɨ́nɔɔ ɨ́ jʉ́o kʉ́, nko nyé á bi kûm yɨ́.»

2 Timotɛ 4:17

Tî Yésʉs ó b'á kɛm me, le egbâ mé pîm ɨ́ búʼó. Nye á sâ nó ó, nye nkʉ̂ swâhlě túnó waá ɨ́ nzɨ̌ nyǎm, le esâ ó, bʉr o bíkúl bíbyɛ̂h nkʉ̂ jóʼo wê. Nó ntémé ó mé á pɛʼɔɔ ɨ́ nǔm ngbampɨɨ yɨ́.

Ebrœ̂ 10:22

nó mɨ́ná jálá le esîhle gá bǎʼ e Nzyɛ̌m, abe e mesónó ɨ́ miléme, e milémé lwɨ́ŋlá e búʼó yɨ́. Milémé gá míná, myé mû ó mipubá. Menyʉ́l gá mɨ́ná mɨ́ɛ, mé mé ó minjwɨá e medíbé me dí ɨ́ ntyɛ́h ntyɛ́h má.

Ebrœ̂ 6:11

Bɨ̌h gwɨ́m ó, mʉr nyɨnyɛ̂h sâʼ sɨ́n lɨ́ eséǎ syɛ́ɛ́ yaá, tó kumo lɨ́ odumo, akâr. Jɔʼ yaá ó lémé wé ngá lóno ɨ́ mpûʼla yɨ́.