Éfɛsɔs 2:3 - Kálar Nzyɛ̌m : Ejwán é Sáá

³ Mɨná bɨ́bɛ̂h, bé á nyɛɛ dudû gá ó, kʉ̌ tyen ngwár e ngwár waá. Mɨná bé á jaa gwɨgwɨ̂m gá ó, njɨ elóŋlo bísyɛ́ɛla njwɨr myâ gá wɨ́ná, wé á kʉ bu gwɨ̂m ó, mɨná sâʼ bí. Bigwɨ́má byaá ó b'á jaa bu pɨpálwo mɨná gá ɨ́ miléme. Sá yé á kʉ jala e bɨ̌h oYúden yɨ́, yé á be ó, bɨ̌h jâʼraa e nkpaa mé Nzyɛ̌m, jwɨʼ gwár e gwár e mpʉ bʉ̂r o dí abe óYúden bá, bé á jala le ejaʼra e nye yɨ́.

Kálara Zyɛ̌m Edwán é mpʉ̌n

³ Bɨna bɨbɛh, bé a taare kœʼ ga ó, ebò e cyen egwar laa. Bɨna bé a kʉ saa-saa ga ó, njɨ edu bɨgwɨma bɨ nyʉl bɨpuno ga wina. Bɨgwɨma byaa ó b'a bul pebre-pebre bɨna ga é mɨleme. Sa yé a kʉ jala e bɨh oYʉden ɨ, yé a be ó, Zyɛm kpaŋa empime le e bɨh, jwɨʼ gwar e gwar mpʉ nye a jala le ekpaa e bʉr o ndɨ abe oYʉden ɨ.

Éfɛsɔs 2:3 Iomraidhean Croise

Markus 4:19

Sâ gwár, mitúú mí sí le gwɨ́má ókúm le ogbaa, byé á si dímle bé ɨ́ nzɨ̌ mikóo myɔ́ɔ́. Bé lɨ́ ebuú tyel mílémé kʉ́ lɨ́ ebi e bísá bí sí yɨ̂. Bisâ byaá, byé ntɔ̂ʼ kâʼ Mbɨambɨa Lɔ́ɔ, wé l'akǎ gúm tô dóló.

Yʉanes 1:13

Bé á bé atyélɔɔ bwán mé Nzyɛ̌m ɨ́ nkǒ páʼ métié, nkʉ̂ ɨ́ lɔ̌b bígwɨ́má ményʉ́l mɔ́ɔ́, nkʉ̂ ɨ́ lɔ̌b gwɨ́má mʉ̂r. Bé á byɛ̂l ó byɛ́lɨ́ɨ nó, ɨ́ gwɨ́má mé Nzyɛ̌m.

Yʉanes 8:44

Sɔ́ŋ wɨ́n, nye ó sɔ́ŋ meleme. Sá tɨ̂ʼ ó bɨ́n dí ekpɨkpɛ̌l njɨ esâ gwɨ́má mé sɔ́ŋ wɨ́n yɨ́. Nye á boo be ó njʉ̂l bʉr, duho ɨ́ menyɛ̌l. Nyé abe e nkul elɛ́ɛ ótyeetye lʉ́ʉ́ dʉ́o, ebě, otyeetye, wé abe e né. Jɔʼ nyé dí elɛ́ɛ bíbɛr yɨ́, nyě lɛ́ɛ́ ó, sá yé, ánta nye, ebě, nye ó mʉr bibɛr. Nye ntémé, nye ó sɔ́ŋ bibɛr.

Mɨlʉmlʉ 14:16

Ɨ́ mimbú mí píhe, nye á si bîr bikúl bí bʉ̂r, tâŋ mimyǎ mi bʉ̂r ɨ́ buo buo ó, bé dyɛ́lɨɨ ɨ́ mɔ́ɔ́ ménzɨ̌ bé bʉr o tɨ̂ʼ bé á boo twâr má.

Rôm 1:24

Sá tɨ̂ʼ ó Nzyɛ̌m á bîr ó, bé sâʼ bisyɛ́ɛla bi mpîr bé á gwɨgwɨ̂m bí yɨ́. Nó ó bé dí esɛ́ɛla bísá bí ésɔ́m páʼ nyɔ́ɔ́, nyâʼ lɨ́ esâ nyʉ́ʉ́ yɨ́.

Rôm 11:30

Bɨ̌n, bʉr o dí abe óYúden bá, bɨ̌n bé á si sâ Nzyɛ̌m ajóʼo ɨ́ mimbú mí píhe. Ɨ́ báánâ mpʉ óYúden bɨ́ɛ dí ebene édyɛ̂ʼwo e né yɨ́, Nzyɛ̌m kǎ nzě jɨ̂ʼ bɨ́n nkoó.

Rôm 13:14

Diʼee gá ɨ́ mpúhlá le Tî Yésʉs-Krîst. Bwáráá gá nye mpʉ̌ kán. Atoŋlo gá mpʉ bɨ́n dí e nkul elóŋlo bísyɛ́ɛla bí njwɨr myâ wɨ́ná yɨ́.

Rôm 2:14

Ɨ́ nkǒ páʼ bʉ̂r o dí abe óYúden, baá o dí agʉ́a métié mé Moyɨ̂z bá, bɨ́ɛ bé ósâ mpʉ métié maá dí etɨ́e yɨ́ nó, yé óbe bé ó, mpʉ̌ sá lɛ́ɛ́, bé e metié maá micɛmá ɨ́ milémé myɔ́ɔ́ tʉ́ŋlʉ̌.

Rôm 5:10

Jɔʼ mɨ́ná bé á be gá ontɨ̂m le obɨn mé Nzyɛ̌m yɨ́, Mwân mé Nzyɛ̌m á si dwe lɨ́ esú gá lɨ́ná, lɨ́ esâ sáá páʼ gá nyɨ́ná e Nzyɛ̌m Sɔ́ŋ. Krîst pǎ nyɛɛ́ cwɨ́a le ontɨ̂m le obɨn bé, á dwɛʼra e mɨná gâ, bʉr o sáá nyaá! Nzyɛ̌m ókʉ́ tiʼ mɨ́ná gá e nzɨ̌ twiʼ mé Yésʉs-Krîst, Mwân wé.

Rôm 5:9

Yésʉs pǎ nyɛɛ́ pyêl métié mé, ntɔ̂ʼ dwe lɨ́ esú ó, nye dwêʼ mɨná gá, osyɛ̂l o mísyóm, nkam, á dwɛʼra ɨ́ jɔʼ mɨ́ná gá mû otîtyěl o bʉ̂r ɨ́ míh mé Nzyɛ̌m yɨ́! Nye ókʉ́ tiʼ mɨ́ná gá ɨ́ jɔ̌ʼ Nzyɛ̌m ngá lɛ̂ʼle nkpáa nyé ɨ́ lɔ̌b bʉ́ʉ́ bʉ̂r yɨ́.

Rôm 6:12

Mpʉ yé dí nó yɨ́, ayɨ́ kǎ kam gá ó, syóm, wé báʼa jwɨ́ɨ bɨ́n. Wé ayɨ́ kǎ nʉǎ jwɨ́ɨ ɨ́ nkǒ páʼ ményʉ́l mɨ́n, maá me dí edwe má. Ayɨ́ kǎ bîr gá ó, syóm, wé ntáŋaa bɨ̌n ɨ́ nkul, ó bɨ̌n sâʼ wé mejóʼo, nkʉ̂ dû bíbɨ́bla bígwɨ́má byé.

Rôm 7:18

Me lɨ́ egʉ́ǎ mbɨ̂mbɨá ó, sá mpâ, yé abe ɨ́ me. (Sá mê gwa lɛ́ɛ́ yɨ́, yé ó: «ɨ́ njwɨr myá wâm tʉ́ŋlʉ̌».) Ebě, sá mé dí ekam yɨ́, yé ó, me gwɨ́mɨɨ bisyɛ́ɛla bimpâ. Tó kœb ó, nkul dí ó, me sâʼ bisyɛ́ɛla byaá nyɨ́, nyé akúnwo e me.

Rôm 9:22

Nzyɛ̌m á sâ syɛ́ɛla yaá ó, nye lɛ̂ʼlaa bʉr nkpaa nyé le nkul nyé. Sá tɨ̂ʼ ó bɨ́n dí ebee nyé lɨ́ ebuú sâ bíhwó ɨ́ nkǒ páʼ bʉ̂r o jálá le ejaʼra e nkpaa nyé bá yɨ́. Nye lɨ́ ekʉ́ dûhwo baá nyé bónó édímle bá. Nyé sí kpɛl ó, nyě ntɨ́ʼ ó bʉr, dû mpʉ nkpáa nyé dí yɨ́ nɛ́ɛ: gua, gó e wáǎ lɔ̌b tɨ̂?

1 Korɛnt 4:7

Nzé nyɨɛ á bɨ̂r gua kʉ́, laa bʉ̂r bɨ́bɛ̂h ɛ̌? Yé gó dí e yé, gó á be abǐ biʼée yɨ́? Yé bé sá yɨ́yɛ̂h gó dí e yé yɨ́, go á bi yé ó, biʼée nó, gǒ nkʉ́ná mpʉ̌ sá lɛ́ɛ́, yé abě ndwéá ɨ́ yé?

2 Korɛnt 7:1

Nó, bɨ́ɔɔ́ o kpɛ̌l bâm ɛ̌! Mpʉ mɨ́ná gá dí e menkɛ̌ʼ ménɨ̌ yɨ́, mɨná púbaa gá mɨná bʉr o tɨ̂. Mɨná pɛ́ʼɛɛ gá bilœ̌ʼ bi dí ɨ́ mɨná gá ɨ́ menyʉ̂l ti e miléme bí. Mɨná kómlaa gá kʉ̌ tyen gá wɨ́ná, ó wé díʼee sá dí ti yɨ́, ɨ́ ndwááwá mɨ́ná dí edwáawo gá Nzyɛ̌m wɨ́.

Galásia 3:22

Gúmo yaá ó Mékaná mé Nzyɛ̌m dí elɛ́ɛ ó, bʉr ó sí yɨ̂ʼ bɨ́bɛ̂h, bé ɨ́ jwɨ́ɨ́ syóm yɨ́. Syóm wɔ́ɔ́, wé á si kâʼ bɨ́bɛ̂h menkara. Sâ gwár, Nzyɛ̌m dwe nkɛ́ʼ nyé ó, ɨ́ baá bɨ́bɛ̂h dí edyɛ̂ʼwo e Yésʉs-Krîst bá. Nyě dwé bé nyǎ ó, njɨ ɨ́ lɔ̌b búʼó yaá.

Éfɛsɔs 2:2

Bɨ̌n bé á be lɨ́ edudû kʉ̌ tyen ébébe bʉ̂r ó sí yɨ̂ʼ bɨ́bɛ̂h. Bɨ̌n bé á dudû ɨ́ bíi yaá ó, sísǐm édúrʉ́ʉ́ dí tyélá ɨ́ diá jwɨ́ɨ́ yé páʼ jʉ́o le ejwoo wɨ́. Sísǐm waá ó dí etyɛ̂b bʉ̂r ɨ́ miléme ɨ́ báánâʼ ó, bé bénaa edyɛ̂ʼwo e Nzyɛ̌m.

Éfɛsɔs 4:22

Bɨ̌n e túmó koo e kʉ̌ tyen myâ wɨ́n, myǎh njʉ̌m nyʉ̂l bɨ́n á nyɛɛ be e né nyɨ́. Bigwɨ́má bí njʉ̌m nyʉ̂l nyaá, byé lɨ́ edímle bʉ̂r ɨ́ nzɨ̌ mikóo myɔ́ɔ́, tyen bé lɨ́ eswie.

Kolosi 1:21

Ɨ́ mimbú mí píhe, bɨ̌n bé á be ó e ncɛrá e Nzyɛ̌m. Táare e mbi écwólwo bɨ́n á be e lé lɨ́, kumǒ kumáa e bisyɛ́ɛla bí ébébe bɨ́n á sɨsâ bí, bɨ̌n bé á jaa bɨbe ó, njɨ ontɨ̂m le obɨn mé Nzyɛ̌m.

1 Tesalonika 4:13

Nó ó, bɨ́ɔɔ́ bâm, mě kpɛ̌l ó, bɨ̌n gʉ́ŋaa esúʼlá é bʉ̂r o mû sí dwe bá ɨ́ pébébé. Bɨ́n ójéʼě lɔ̌b waá nó, nyʉ̂l ámû tyɛʼ bɨ́n ɨ́ mpʉ me bʉ̂r o dí abe e mpûʼla ɨ́ miléme ó, bé ópah bá.

1 Tesalonika 5:6

Ɨ́ mpʉ yé dí nó yɨ́, bɨ̌n bé ajala le ejâ bíjô mpʉ bʉ́ʉ́ bʉ̂r dí esâ yɨ́. Nó ó, diʼee gá ɨ́ mpʉ̂n. Máráá gá miléme.

1 Timotɛ 6:9

Tó kœb ó, bʉr o b'á tíʼe ɨ́ milémé myɔ́ɔ́ ó, bé óbi bísâ ɨ́ buo buo bá, bé lɨ́ eduma ɨ́ mebʉ́blá. Bé lɨ́ eswam bé bʉr o tɨ̂ʼ enkɔ́máá ɨ́ twíí. Bé lɨ́ emɛ́rɔɔ ɨ́ mpila bígwɨ́má ɨ́ buo buo. Bʉr o dí edû bígwɨ́má byaá bá, bé dú ó, sá dí ajwɨ̂ʼ yɨ́, le yaá dí edulo mítúú ɨ́ nyʉ̂l mʉr yɨ́. Bé e mbi bígwɨ́má dí edímle mʉ̂r, le ejʉ̂ nyé wɨ́.

Títos 3:3

Ebě, mɨná gá bɨɛ á nyɛɛ be ó nó: bigʉʼlʉgʉ́, baajóʼo-mélɨ́, sí dîm. Mɨná bé á didi gá ó, bitúʼǎ bígwɨ́má mimbi mimbi. Mɨná bé á títíʼe gá ó, lɨ́ esâ bʉ̂r ebébe é léme le nzwíí. Bɨ́ɛ ntémé lɨ́ esíe bɨ́ná gâ. Mɨná bɨɛ ntémé, bé á si nwimla páʼ gá nyɨ́ná.

1 Pyɛr 1:14

Mpʉ bɨ́n dí eboó sɨsâ Nzyɛ̌m mejóʼo yɨ́, akǎ dû gá bigwɨ́má bɨ́n á nyɛɛ bɨbe e byé, bɨ̌n dína bigʉʼlʉgʉ́ bí.

2 Pyɛr 2:14

Míh mɔ́ɔ́, mé jaá sáa ó, njɨ bʉbá bé sâʼ medyɛ̂n e bé bá. Bé abá gbala lɨ́ esâ syóm. Bé sɨ́sáá ó, bʉr o dí ɨ́ tyɛʼ bá, bé bílɨɨ ɨ́ bilám byɔ́ɔ́. Bé jaá gbâ lémé ɨ́ dwííí ó, njɨ lɨ́ ejɨ̂ʼ édû bígwɨ́má ményʉ́l mɔ́ɔ́. Nzyɛ̌m, nyɨ́ syɛm bê.

2 Pyɛr 2:18

Bé lwilwib ó e mekǎn mé jáálé, maá me dí dwêh má. Ɨ́ nzɨ̌ bigwɨ́má ményʉ́l mébomo mɔ́ɔ́, bé lɨ́ edulo bʉ̂r o bé alúno syɛb ményʉ́l mɔ́ɔ́ ɨ́ sɔ́má bígʉʼlʉgʉ́ bá.

1 Yʉanes 2:16

Bisá bíbyɛ̂h bi dí egúmo e sí yɨ̂ʼ bí, bisá bíbɨ́bla bi bʉ̂r dí egwɨ̂m bí, byaá míh mɔ́ɔ́ dí egwɨ̂m bí, bisá bé dí esâ jáálé ɨ́ lɔ̌b wɔ́ɔ́ bí, bisâ byaá bíbyɛ̂h, byé aduho kwá mé Nzyɛ̌m Sɔ́ŋ. Byé duho ó, ɨ́ sí yɨ̂.

1 Yʉanes 2:8

Dǎm jóʼo nó, lé yɨ́ɛ ó edwán lé étié mé dí ecɛma bɨ́n lɨ́. Yé lɨ́ enyɨ̂n ó, lê tyeetye ó, ɨ́ Yésʉs-Krîst tʉ́ŋlʉ̌, le kwá nyɨ́n ntémé. Edúrʉ́ʉ́, lé mû ó lɨ́ esɔ́a. Njʉl, wé mû ó lɨ́ epǎn myɛ́n mpâ.