Luke 22:26 - Luaniua New Testament

²⁶ “Ia okou isehakanaka pela. Kama hananiu okou la memea poi kekama moulalo, ia kama hamakua okou la meheheaꞌu ikonaꞌi alakama.

Luke 22:26 Iomraidhean Croise

Matthew 20:26

Ia okou isemea pena. Poi hekama okou hihai ihananiu, kama na ikau kekonaꞌi alakama.

Mark 10:43

Ia okou iseme penaa. Poi hekama okou hihai ihananiu, kama la ekau kekonaꞌi alakama.

Mark 9:35

Ia kena Jesus enoho ilalo, kena ianaa aꞌe sanahulu ma lua nakama kaukali aia la, kena ime aꞌe, “Pena hekama okou hihai ihananiu, kama na meihamai nohakaha ilalo, ime mo kama heheaꞌu nakama hakoa.”

Luke 9:48

Kena iko Jesus ime aꞌe nakama la, “Poi hekama ekaukali nakipukipu anau, kena hihai nakamaliꞌi penei, kama na ehihai anau hoi. Poi hekama ehihai anau, kama na ehihai kekama kela ehaunalia iho anau la hoi. Ia kekama moulalo okou hakoa, kena kekama hananiu.”

Romans 12:2

Ia okou isekaukali nakipukipu kemaalama nei. Emeia okou ihakiꞌe konu nahakaꞌoko okou, pela ihakea naola okou. Kena okou memakino laoi namea kela Keakua ehihai. Ala nikipukipu kaualeꞌa kela ekonu i namaisu aia.

1 Peter 5:3

Keakua eau aku keonohenua la pela okou ilolosi. Kena okou ihuli aꞌe nakama la nakipukipu kaualeꞌa. Ia okou isesau namahi okou, pela okou ihananiu iluna nakama la.

1 Peter 5:5

Okou nakama oikipu aꞌe ihalono nakama hamakua pela hoi. Ia okou inoho pasemuu ma alakama, maikinimea Keakua ehakauoki ma nakama eahu. Ia kama la elolosi laoi nakama pasemuu.