Oroot 4:6 - Ojibwe Kihcimasina'ikan

⁶ Ini tahsh nawac pehsho inawemaakanan kii‑ihkitowan, “Kiishpin hsa 'i ishihsek, intawaa hsa ninka pakitinaan kaashi tipinawewisiyaan niin nihtam cikii ataaweyaampaan i'i ahki, aaniihsh niniicaanihsak kaawiin mihsawaa otaani tipentansiinaawaa. Kiin hsa intawaa ataawen, kaawiin niin niwii ataawehsii,” okii'ikoon.

ᐅᒋᐺ ᑭᒋᒪᓯᓇᐃᑲᓐ

⁶ ᐃᓂ ᑕᔥ ᓇᐗᒡ ᐯᔓ ᐃᓇᐌᒫᑲᓇᓐ ᑮᐃᑭᑐᐗᓐ, ᑮᔥᐱᓐ ᓴ ᐃ ᐃᔑᓭᒃ, ᐃᑕᐙ ᓴ ᓂᑲ ᐸᑭᑎᓈᓐ ᑳᔑ ᑎᐱᓇᐌᐎᓯᔮᓐ ᓃᓐ ᓂᑕᒻ ᒋᑮ ᐊᑖᐌᔮᐹᓐ ᐃᐃ ᐊᑭ, ᐋᓃᔥ ᓂᓃᒑᓂᓴᒃ ᑳᐐᓐ ᒥᓴᐙ ᐅᑖᓂ ᑎᐯᑕᓰᓈᐙ᙮ ᑮᓐ ᓴ ᐃᑕᐙ ᐊᑖᐌᓐ, ᑳᐐᓐ ᓃᓐ ᓂᐐ ᐊᑖᐌᓰ, ᐅᑮᐃᑰᓐ᙮

Oroot 4:6 Iomraidhean Croise

Cenisihs 38:8

Miitahsh Coota kaakii'inaatc ini kotak okosihsan Oonan eshinihkaasonitc, “Maacaan awi wiihpemim kiicihkiwensi wiiwan ci⁠tootawatc a'a ihkwe aaniin kekii ishihcike'ikohpan wiinimoon cini ayaawaatc apinoonciisha' keni nihtaawikinitc, kiicihkiwensi cini ayaanitc opiiwesiima'.”

ᑑᑕᕒᐋᓇᒦ 25:7

Kiishpin itahsh wiin a'a inini wii⁠wiitikemaahsik ini wiicihkiweyipaniin wiiwini, a'a tahsh ihkwe ta⁠ishaa eshi'ayaanitc kaa⁠niikaanisinitc o'o ci‑ihkitotc, ‘Ninaapemipan wiicihkiweyan hsa kaawiin inentansiiwan ci⁠ani pimiwitoonitc owiinsowini i'imaa Isriyalahkiink. Kaawiin hsa niwii tootaakohsii kekii ishihcikehpan, niinim itahsh e⁠inawemitc,’ ta⁠ihkito.

ᑑᑕᕒᐋᓇᒦ 25:8

Iki tahsh kaa⁠niikaanisiwaatc ootenaank oka antomaawaan ini ininiwan ci⁠kakanoonaawaatc. Kiishpin itahsh aanciko ihkitonitc, ‘Kaawiin niwii wiitikemaahsii.’

ᑑᑕᕒᐋᓇᒦ 25:9

A'a tahsh ihkwe oka naasihkawaan ini wiinimoon kaawii wiitikemikohsik ci⁠waapamikotc i'i kaa⁠niikaanisinitc ootenaank, miitahsh keshi kiitahkisinepinaatc ci⁠sihkwaanaatc owatenkoniink o'o ci‑ihkitotc, ‘Mii hsa 'o entootawintc inini kaa⁠tepwehtansik ci⁠oshihtamawaatc wiicihkiweyini opiiwesiimini,’ ta⁠ihkito.

Oroot 2:20

Miitahsh o'o Neyoomiiwan kaa⁠ihkitonitc, “Taka kaaTipencikenitc oka shawenimikoon, mooshak kaa⁠minotootawaanitc eshi ahshotamawaanitc kaa⁠pimaatisinitc, i'i kaye kaa⁠pimaatisihsinik.” Miihsh kii⁠ani ihkitonitc, “A'a hsa inini pehsho kitinawemaanaan, mii' iitok a'a peshik kaa⁠ishinaakwaninik ci⁠naanaakaci'inankipan,” kii‑ihkitowan.

Oroot 3:13

Miitahsh o'omaa ayaan kapetipihk. Kishepaawakahk itahsh kika kihkentaamin taka ciwii otaahpininokwen ci⁠naanaakaci'ihk. Kiishpin tahsh inentank ci⁠naanaakaci'ihk, mii 'iwe kwayahk, maano hsa kika naanaakaci'ik. Kiishpin itahsh wiin inentansik ci⁠otaahpinihk, kehcinaac iko e⁠kehcinaa'oyaan kaaTipenciketc wiin misiwe eh⁠tipenciketc, kitahshotamawin niin hsa piko kika otaahpinin ci⁠naanaakaci'inaan. Miitahsh i'imaa ishi pimihshinin piinihsh ci⁠waapank,” kii‑ihkito.

Oroot 3:9

Miihsh kaa⁠ihkitotc, “Awenen kiin,” kii‑ihkito. A'a tahsh ihkwe kii‑ishi nahkwehtam, “Niin Oroot kaakii anohkiihtawinaan. Taka akwana'ohshin i'i kaa‑akwaniiyan, kiin iitok pehsho kitinawemin,” kii‑ihkito.