Joẹl 2:1 - Kịrịkẹnị Baịbụl

¹ Epelepe mị ofuro, Zaịyọn Tamụnọ Ḅe oria osiḅụ sime chịngị mị ọgọnọ ḅoarị ḅalafamaye mị oloku pakụma. Judapụ, ọ́ ḅụgeregere nyana! Nyanaḅọ Ḅe ene mị ḅoaḅẹ ḅọlọka sịkị ḅụ.

Joẹl 2:1 Iomraidhean Croise

1 Amanyanapụ Sịkị Mịẹaye Ma 15:28

Izrẹlapụ mamgba Ọḅọkụ Igbe mị ḅọrọma mun Jerusalẹm ḅie koromamẹ, ḅieḅẹlẹ oloku kọn ḅụ na oḍu ma na namatịḅị ịvalị ofuro ofuro ayema na ḅarafarị ayema na pịkị ọbọ mamgba na fie gbolomamẹ.

Fịafịa Nime 119:120

Ị́rị́ gose ị̀ ḅalafamẹ; ḅalafa ị̀ ḅie ḅeinmẹ ị́ya ḅẹrẹkọn ḅịpị ma gose.

Fịafịa Nime 87:1

Nyanaḅọ Ḅe osi nyana chịngị mị ọgọnọ ori oria opuama mị namamẹ;

Pakaso 10:14

Kpo ḅụ arịḅo bebe sẹ mị mgba ḅie saramẹ. Mịn igurube kpo mị ḅakatẹịn jịn sịkị ini ọrịsa ye nẹngịmẹ, anịkanịka anị na kịkịnaye jịn sịkị nweni ḅarị pịkị ọrịẹkẹ.

Aịzaya 13:6

Ḅụ akụḅụ ómine oloku owu! Nyanaḅọ Ḅe oria ene mị kpekisam, anị Kụrọmamgba Nyanaḅọ Ḅe nyọ mị famaḅịa ene mị.

Aịzaya 13:9

Nyanaḅọ Ḅe ene mị ḅoaḅẹ—anị oria ḅalafama ịganị na opu-owoi-kuḅie na ḅe si ene mị. Sẹkiri mị ini seni onwun ele mịẹḅịa, pịkị siyemịẹḅọ goyegoye fịḅịa.

Aịzaya 2:12

Anị ene ḅụ Kụrọmamgba Nyanaḅọ Ḅe, ọ̀ kụrọḅọ goyegoye mịẹiderimaḅịa, pịkịna opuma ḅụdekichịẹma se ị̀rị̀-re-ị̀rị̀-ẹ nwọ ḅẹḅọ goyegoye na.

Aịzaya 66:2

Ị̀rị̀ ḅarana bebe tomonikiri mị mgba tẹmẹmẹ! Ḅụ-iderimapụ ma na, siḅụ pịkị apụma na, pịkị ị̀ ḍikiḅalafa se ị̀ ḅịpị poki apụma na àrị ini ḍiki ḅieḅẹlẹmẹ.

Aịzaya 66:5

Nyanaḅọ Ḅe ḍukoarịye ọ́ nwọ poki, ómine ọ̀ tẹkẹtẹkẹ pịkị ọ̀ ḅịpị pokipoki apụma: “Ómine ị̀ ḅụ nyana ḅerenimẹ gose, ọ́mịna tomonima ḅie ḍapụ taraka se ọ́ wẹrịmamẹ, ini pịkị ḅarị ómine na mịẹgbolomaye nyanakẹ. Ini ó kombo se nwọ ḅẹmẹ, ‘Ye Nyanaḅọ Ḅe oria opu mị ḍiepakụma se ọ́ ḍụa, mịẹsosịkị wa ọ́mịna ḅieḅẹlẹ mị ọrịḅịa ḅara.’ Ọkụma inina-mịnaḅụ-na ini ḅụgerere ḅụ sọḅịa!

Jerimaya 16:10

“Ị́ maye mamgba ḍuko ini pịrị so sịkị, ini ị́ gbelaḅịa na à cheye gose mị fomuḅara se ini fomu. Ini gbelaḅịa, che oloko ini nwọ koro pịkị che sin ini nwọ mịẹsa, ini nyana Tamụnọ Ḅe tọrọkọ.

Jerimaya 16:7

Gbọrịḅọ sọ jụmḅọ jụmḅọ na yefị ẹkẹ anịkanịka ḅuḅuye ḅu ẹkẹ, nụḅọ na ḅẹlẹmaḅọ fị saye gose, se nụḅọ kuḅie kụrọma. Nụḅọ ḍaḅọ na nyengiḅọ na fị saye gose nụḅọ ḅụ-ebera ḅịa ḅọ sọ ofori-ẹ.

Jerimaya 4:5

Oḍu mị ofuro ama mị kelema! Iḅiọkụma oloku gelelema! Ḍuko Juda na Jerusalẹm-a tomonima pịrị ini mangị owuniaye sime amama mun.

Jerimaya 5:22

Ị̀rị̀ anị Nyanaḅọ Ḅe-ẹ, ó che gose ị̀ ḍikiḅalafaka? Ó che gose ị̀ tọrọkọ ḅụgeregereka? Àrị onwun se tọrụ ḅụ eke mịẹmẹ, fimaẹka eke anị ineda saḅa ḅọrọ ẹka ye mị. Tọrụ mị anị ineda jikeḅịa, ọkụma anị ineda anị saḅa ẹkẹ; ambura ma àrị ineda ekereaḅịa ọkụma àrị ineda toluḅọrọ-ẹkẹ.

Izikịẹl 12:23

Mịn Ị̀rị̀, Kụrọmamgba Nyana Tamụnọ Ḅe ḍuko ọ́ pịrịarịye-ẹ. Mịn kaḅo mị à mịẹse anị kulumaḅịa. Izrẹl ḅie ini ḅarị jịn sịkị seni anị kọn ẹkẹ ngịsị. Ọkụma ḍuko ini pịrị, sịkị mị ḅo lasam, ini ḍuko ini pịrịpịrị na iniaḅụ pakaḅịa nwọḅẹ ayema àrị ḅo kọkọma aye sọḅịa!

Izikịẹl 21:12

Opu ngịrị ḅiefie nwọ kọn, tomoniḅọ tọkụ; mị okola-agiji mị sime ị̀ya tomonima pịrịmẹ pịkịna Izrẹl ama ḅie tịḅịnị mamgba na pịrịmẹ. Ini ísí ị̀ya tomoni mamgba ḅụ sọ fịfaḅịa. Ị́ya ekpe ḅụrọ ḅalafa ḅụ!

Izikịẹl 30:3

Ene mị anị kpekisam, Nyanaḅọ Ḅe fịrịnwẹngịḅịa ene mị, Soḅuno na ḅụfụka na se sẹma pịrịḅịa ene mị.

Izikịẹl 33:3

Tarakaḅọ ḅe ḅoarị ọkụ ọ̀ nwọ ọrị sịkị, ori oḍu ofuro se ọrụḅọḅọ ḅeri jinemẹ.

Izikịẹl 33:6

Nyọ koruḅọ ḅe tarakaḅọ ḅe ḅoarị-ọkụ ọrị se ḅeri jine oḍu mị ofurokẹ ḅẹḅẹ, tarakaḅọ ḅe ò ḅo ini siapụma ḅaaḅịa, ọkụma inia fị mị gose à nyọ koruḅọ ḅe ọlọḅịa.

Izikịẹl 7:10

Ḍiki ḅụfụka ene ḅo Izrẹlapụma la-ẹḅoaḅẹ. Si ḅẹrẹkọn na opuayemịẹ na, opuma ḅakasam.

Izikịẹl 7:12

Sịkị mị ḅoaḅẹ, ene mị ḅo kpekisam. Ye fẹ apụ na ye dẹrị apụ na ḅo gbọrị ḅara simeḅịa. Anịatịḅị, Tamụnọ Ḅe oria fomuḅara nweni mamgba nwọ laḅịa.

Danịẹl 6:26

À kụrọ pịrịsam ị̀ya opu sẹ mị ḅie mgba, na tomoni mamgba Danịẹl Tamụnọ Ḅe ḍikiḅalafa se ori osi. “Anịatịḅị ori anị ḍumo àrị Tamụnọ Ḅe-ẹ, ọ̀ pịkị ḅẹrẹtọn gbasoḅịa. Oria amanyanakiri mị ngịsị kan ẹkẹ, oria kụrọ mị pịkị kuluma nyana ẹkẹ.

Danịẹl 9:16

Ḅọrọsa sịkị ị́ wa ḍụasam, anịgose ḅarị Jerusalẹm ḍikiḅieḅuma. Anị ị́ya opuama-ẹ, ị́ya osiḅụ sime chịngị-ẹ. Kpeki-a sẹma ḅie sime apụ mamgba, Jerusalẹm na ị́ya tomonima na ḍiki iderimamẹ, mịna sima na mịna ḅieju-aḍapụma siamịẹmịẹaye ma na gose.

Danịẹl 9:20

À tẹkẹma mun aḅẹ, à pa ị̀ya sima na ị̀ya tomoni Izrẹlapụma mịẹ-a sima na go pakụmaḅẹ, pịkị Nyanaḅọ Tamụnọ Ḅe ḅara ḅi aḅẹ na ori oria fịafịa Oputẹkẹwarị mị tẹlịma naamẹ.

Hosia 5:8

Ó Gibia ḅie owuni-epelepe ma ofuro! Rema ḅie ḅalafa-ḅerijine ḅara ọ́ nwọse nyọ fiema! Bẹt-Avẹn ḅie ómine owuni-paịn ma kọn! Ómine owu ḅie sọ Bẹnjamin owuapụ!

Hosia 8:1

Nyanaḅọ Ḅe nwọ ḅẹmẹ, “Ḅerijine ḅalafama oloku mị kọn! Tarakapụ igo tu-koro-ọkụ tu ị̀ya ama koro aḅẹ! Àrị ị̀ya tomonima na fị ọḅọkụ mị, ini kansam, se ini ininachịn à se ini ḍieaye ma pịrịsam.

Joẹl 1:15

Yei anị ḅalafama ene mị anị kpekisa-o! Kụrọmamgba Nyanaḅọ Ḅe yesima se ḅoḅịa ene mị. Anị ene mị nde anị ḅalafamaye sọḅịa ọkụ!

Joẹl 2:11

Nyanaḅọ Ḅe ori ekerea ḅẹrẹtọn oria owunima pịrịmẹ. Ọ̀ ḅịpị poki poki owunima ini ḅaka se pịkị ịnyọ nyanamẹ. Nyanaḅọ Ḅe ene mị nde anị ḅalafamaḅịa ọkụ! Tụḅọ anịa ḅie ḍumoḅe?

Joẹl 2:15

Zaịyọn Tụndụ ọgọnọ epelepe mị ofuro; ekere gbolo tomonima koḅiri se ó ḅurukụnma!

Joẹl 2:31

Ịrụa mị kanakana kpeḅịa, akalụ mị pịkịḅo tomoni-oju-pulo ḅara kịkẹḅịa, ma ayema ḅọrọ tẹrẹrẹ, anị Nyanaḅọ Ḅe oria ḅalafama ene mị ḅoḅịaye-ẹ.

Joẹl 3:14

Mẹndẹ oyiasi fịnjị fịnjị Ḅẹrẹkọn Pẹsịkiri mị ḅie omi-ẹ. Anịnyọ ḅụ anị Nyanaḅọ Ḅe ene mị ḅọlọka sịkị ḅoḅịaye-ẹ.

Joẹl 3:17

“Anịsịkị, Izrẹl, ị́ nemiḅịa na Ị̀rị̀ anị Nyanaḅọ ị́ Tamụnọ Ḅe-ẹ. Ị̀ya osi nyana chịngị, Zaịyọn ọgọnọ àrị angamẹ. Jerusalẹm mị anị osi nyana opuama sọḅịa; igoniapụ ngịsị ḅarị ineda anị inuma ẹkẹ.

Emọs 3:6

Opuama ḅie owuni oḍu mị, papa fie se tomonima ḅalafa ẹka? Ḅụfụka opuama gbolo-gbolo, Nyanaḅọ Ḅe anị fịrịmaka simeogbo?

Emọs 5:18

Anị ḅalafamaye sọ ọ́ pịrịḅịa, ómine nwọ tọrụ se Nyanaḅọ Ḅe ene mị ḍikiarị apụma! Che iḅi anị ene mị nwọ mịẹ ọ́ pịrịḅe? Anị ene mị sime ọ́ pịrịḅịa ọkụ, anị kanakana ene-ẹ enekakakẹ.

Emọs 8:2

Nyanaḅọ Ḅe ị̀ gbelamẹ, “Emọs, ị́ che ọrị?” À nwọ pẹkẹrẹmẹ, “Gbọrị ḅịasa chịnmgbọlụ kana-ẹ.” Anịsịkị, Nyanaḅọ Ḅe nwọse ị̀ ḅẹmẹ, “Ị̀ya tomoni Izrẹlapụma inia kuluma mị ḅeinsam. À ḅarị kuḅie ḍinma ẹkẹ fomuḅara se ini pịrịḅụ.

Obedaịa 1:15

“Ene mị kpekisam, Ị̀rị̀ Nyanaḅọ Ḅe, à ḅẹrẹkọn bebe sẹ mamgba pịrịḅịa sịkị. Idọm, ọ́ nwọ mịẹye mị ini se ọ́ mịẹḅịa. Ọ́ mịẹye mị ómine anị nyana ọkịḅịa.

Zẹfanaịa 1:14

Nyanaḅọ Ḅe oria opu ene mị kpekisam anị opuma kpeki se sarasarama ḅoaḅẹ! Anị ene akụ ene sọḅịa, anịatịḅị kuḅie kụrọtẹịn owunima na mịnaḅụ na ini kuḅie lọkọ ḅụ owu pakụmaḅịa!

Zẹfanaịa 1:16

owuni epelepe na opu ịḅanị na ḅeinḅịa ene-ẹ, pịkị owuni eke paịn se kụrọ ḅụọ se kụrọnị ama nanga kanḅịa ene-ẹ.

Zẹfanaịa 1:7

Nyanaḅọ Ḅe ọ̀ ḅẹrẹkọn chiri ḅụ simeḅịa ene mị kpekisam; anịgose ómine ọ̀ tọrọkọ yawụma sime. Nyanaḅọ Ḅe ọ̀ ḅụ karakarama aḅẹ oria tomonima se agbamịẹ, anịgose tarakapụ ọ̀ nwọ chịnmẹ ini ḅo Juda mị ọfọịn.

Zẹfanaịa 3:11

Anịsịkị ómine ị̀ya tomonima ómine ị̀ ḅịpị pokikẹ nwọḅẹ yeḅụ, ó gose ḅụgerere nyanaḅịaye ḅarị ofori-ẹ, ḅụdekichịẹma pịkị ḅụboma ye mịẹḅọ goyegoye àrị ini ḅọ sinḅịa, se ngịsị ọ́ ḅarị ị̀ya fịafịa chịngị mị ọgọnọ sitịḅịnyana ị̀ pịrị-ẹkẹ.

Zẹkaraịa 14:1

Nyanaḅọ Ḅe sime ḅẹrẹkọnḅịa ene mị kpekisam. Anịsịkị ini Jerusalẹm ọfọịnḅịa, se ini ọfọịnḅoaye ma ini àrị ḍieḅịa ọ́mịna tọrụkuḅu.

Zẹkaraịa 8:3

À vinpịkị Jerusalẹm munḅịa, ị̀ya fịafịa opuama mị, se àrị anị nyọ angaḅịa. Tomoni kuḅie-se-ḅụgbana gbẹịn opuama ḅara ini nwọse anị nemiḅịa, pịkị Kụrọmamgba Nyanaḅọ Ḅe chịngị mị, ini nwọse anị chịnḅịa osi nyana chịngị.

Malakaị 4:1

Kụrọmamgba Nyanaḅọ Ḅe nwọḅẹmẹ, “Opuaye mịẹmịẹ apụ mamgba na simịẹmịẹ apụma na ini osirosiroḅa ḍọkị ọkụ ḍọkịḅịa ene mị ḅoaḅẹ. Anị ene mị ḅụ, ini ḍọkị famaḅịa, iniaḅụ pẹkẹrẹ sọ kọn ẹkẹ.

Kịẹnḅịpị Ma 10:2

“Ini ikoli-ḅakụye se ḅakụsa seleḅa se mama oḍu nwọ mịẹ, anị se nwenima chịn koḅirima, pịkị se Ikowarị ma kanse sakị nwẹngị na gose.

Kịẹnḅịpị Ma 10:3

Mama oḍu ma fie ḅọlọ sịkị lamẹ ḅẹḅẹ, bebe tomoni ogbo mị mgba ḅo koḅirima ị́ gbọrị kelemaḅịa à pakaḅoḅo Ikowarị mị ḅọkọ mị ḅụ.

1 Kọrịntapụ 14:8

Oḍu ofuroarịḅọ ḅe nemikase anịa pụkọ nwọ ofuro pakụmaka ọkụma tụḅọ ḅụkarakarama ọmụ pịrị ḅe?

Filipaị 2:12

Anịẹrẹchị ị̀ ḅụ yela ikiapụ, ọ́ sịkịmamgba à ḍukoarịye mịẹmịẹḅara ḅụ àrị ómine na sime sịkị ḅụ, anị pịkị mịọkụ kụrọtẹịnmẹ na ómine à ḍukoye nwọ mịẹ, àrị ómine na ofori sịkị ḅụ sọnị. Ọ́ pa pịkị ḅalafa na ḅụgeregere na se fịrịnwẹngị mun ọ́mịna ḍụaḅọrọma mị nwọ karama.

1 Tẹsalonịka 5:2

Anịatịḅị ómine na mịnaḅụ na iḅiọkụ nemi waraḅẹ na Nyanaḅọ Ḅe Ene mị furuḅọ ḍin ḅụ ḅo ḅara nwọse ḅoḅịa.

Jems 5:8

Ómine sọnị ọkọ se ye-inema, pịkị kụrọkuḅie nyana anịatịḅị Nyanaḅọ Ḅe ḅoḅịa enema kpekisam.

1 Pita 4:7

Ye mamgba ḅe kuluma mị kpekisam. Ómine ọ́ ḅụ ọlọ se ḅụkarakarama, mịẹse ómine ineda tẹkẹḅịa ọkụ.

Ḍieḅelema Yema 6:17

Anịatịḅị anị opuma ḅalafama ịganị ene mị anị ḅosam se tụḅọ ineda anị da ḅe?”