Filiipʋkɔmʋ 3:12 - Nyaboa (Nyabwa)

¹² -Bho ꞌɩn ꞌlɛ -kaa, ɩ-bɩ dɩ ꞌɩn ꞌybhaꞌa ꞌɩn ꞌke ꞌliti-de, -ka ꞌɩn ꞌye ꞌɩ ka see ꞌꞌfɩa ꞌwee, ɛ -se -kaa -ko. ꞌLe, lɛ -Lagɔ ꞌybhaꞌa -a ꞌke ꞌꞌdu, ꞌɩn -see ɛ -bhla ꞌꞌdu ke -ka -zɛgɛka. ꞌLe, -ka *Zezii *Kliisɩ ꞌꞌluoꞌa ꞌɩnmʋ ꞌmʋ ꞌle ɔ ꞌyeꞌa ꞌɩnmʋ ꞌɔ nyɔ ꞌmʋ nʋ a, ꞌɛ dɩ ꞌɩn-ɩ poꞌo ꞌle ꞌkpɩ, ꞌle, -zɩgɩ ꞌwee ɔ ꞌybhaꞌa ɔ ꞌke ꞌɩnmʋ -bodɩ nʋ a, ꞌɩn ꞌke ɩ ꞌye.

Filiipʋkɔmʋ 3:12 Iomraidhean Croise

Matiee 5:48

Dɩ ꞌɩn-ɩ zaꞌa amʋ -bodɩ ꞌmʋ, ꞌya ꞌꞌlruyilbhanamʋ ꞌka-a: Aꞌba -tɩta -Lagɔ -nɩꞌa ꞌle yaku ꞌli, -ka ɔ seꞌa ꞌbɩ liꞌbhle a, a ꞌꞌdu ꞌna ꞌꞌyrili, -bho a -see ꞌꞌma ꞌle a ꞌke ɔ ka -nɩ.

Nʋnʋkpli 9:15

-Aꞌba -Kɔyi ꞌmnɔ na: ꞌƖnmɔ lbhoꞌo -ɩnmʋ, mu! ꞌSɔlʋ ꞌmnɔ, ꞌɩn -zɔ ꞌɔ ꞌbho-ɛ ꞌle ꞌɩn ꞌke ɔ ꞌan lbhʋnʋyi ꞌmʋ nʋ, ꞌle ꞌbhlɩkpɩꞌa -dadudu -ke ꞌya -yowli ꞌꞌsri ꞌʋ ꞌꞌkpi ꞌle *Izrayɛɛlɩkɔmʋ ꞌke ʋ ꞌꞌkpi ꞌkpa, ɔ ꞌke ꞌwa ꞌwee ꞌan ꞌꞌdɩzɩgɩ kpa.

1 Kɔlɛɛtɩkɔmʋ 13:10

Ɩ -nɩꞌa ꞌtɔ -kaa ꞌmʋ a, -bho -a mu ɔ gbo ꞌle yaku ꞌli, ꞌle ɔ ꞌke -amʋ ꞌɔ dɩ ꞌwee -tɔ, -a ꞌye-e -nʋ -mʋ na: Dɩ ꞌwee -a yiboꞌa ꞌle ꞌbhlʋkpa ꞌꞌkpi, ɩ se lɛ ꞌmʋꞌbhle.

1 Kɔlɛɛtɩkɔmʋ 13:12

-Ka -lue ꞌmnɔ ɔ, ꞌbho -Lagɔꞌɔ yibonamʋ ꞌꞌdana -a ꞌꞌduꞌo -bhla. ꞌBho -Lagɔꞌɔ damʋ lɩ -a yiboꞌa a, -a -see ɩ ꞌmʋ-gwɛ. Ɩ kɔɔꞌɔ-ɔ -ka nyɔ-ɔ popoꞌa ꞌle kpɔtiyena ꞌli. ꞌTraamʋ ꞌtɔ, -aꞌba -gwɛ ꞌɔ dɩ ꞌmʋ -ziaka. -Bho zɔ -lue ꞌzɔ -a ꞌye ɔ liꞌye mʋ -gezee! ꞌɔ -nɔɔ -yɛɛ ꞌliꞌa yiboɛ -mnɛɛ ɛ, -a -see ɔ ꞌꞌkpi-gwɛ ke -bhla. -Ka ɔbɔ yiboꞌa -amʋ pepe, ꞌka-a -abʋ-ʋ ꞌye ɔ yibo mʋ -lrɛɛ ɛ-bɛ -nɔɔ ꞌmnɛ ti.

1 Kɔlɛɛtɩkɔmʋ 9:24

A-bee -mnʋʋ se yibo na, plemʋ mumuꞌa li-i ꞌpo-o ꞌle ꞌkpɩ ꞌwee ꞌle ʋn-ʋ pleꞌo, ꞌle ꞌwa ꞌꞌklumʋꞌa -lue-e ꞌwlʋꞌo ꞌnynɩ? ꞌƐ dɩ ꞌɩn-ɩ ꞌtmʋʋꞌo amʋ, plemʋ -yʋ ꞌkɛ ɛ ꞌye -kpayɩ, a ꞌꞌdu ꞌwa -kaabonyʋ! A po ꞌle ꞌkpɩ ꞌle a ꞌke ꞌnynɩwlʋɛɛ ꞌye ꞌbho -Lagɔꞌɔ ꞌꞌtroli!

2 Kɔlɛɛtɩkɔmʋ 13:9

Wɔnkuɛ -a ꞌbhleꞌa ꞌbho -Lagɔjeyi, -bho ɩ -see -amʋ ꞌꞌyiꞌꞌsri, -a ꞌke ɩ amʋ ꞌꞌyi-tɔ ꞌle a-bee -mnʋʋ ꞌke ꞌbho ꞌkpɩ ꞌmʋꞌbhle, ɛ-ɛ ꞌlbhaa-a -amʋ ꞌbʋbʋa ꞌꞌyi. ꞌKa-a ɛ -nɩꞌe ꞌmʋꞌa dɩ -a poꞌo aꞌba dɩ -Lagɔ wɔn gbo, ꞌle a ꞌke ꞌꞌyritiku ꞌbho ꞌɔ -jeyi.

2 Kɔlɛɛtɩkɔmʋ 7:1

ꞌAn dɩkmalotʋꞌa ꞌꞌnynuu-a, ɩ-bɩ lɩ -nɩɩ, -Lagɔ ꞌꞌdu -ɩ -amʋ wɔn ꞌmʋtiꞌa dɩ, ꞌꞌnyinynidɩ ꞌkɛ ɛ nʋ ꞌle -aꞌba ku -ke -aꞌba -pɔlʋ -seeꞌa *liꞌsaa yi ꞌbho -Lagɔꞌɔ ꞌꞌyigbeyi, -a po ɩ le! -Aꞌba kpli ꞌsrɛɛ ꞌꞌyi ꞌbho ꞌɔ ꞌꞌyigbeyi ꞌle -a -kaa ꞌbɩ liꞌbhle! -A ꞌꞌdu ɔ ꞌbho -ka -zɛgɛka!

Galasiikɔmʋ 5:17

A -gblee, ꞌꞌnyinynilɩ nyunyɔ -ybhɛꞌɛ ꞌmʋ -ke lɩzɩgɩ -Lagɔꞌɔ Lisaazuzu -ybhɛꞌɛ ꞌmʋ, ɩ-ɩ ꞌvɔ-ɔ tʋ, ꞌle, lɩzɩgɩ -Lagɔꞌɔ Lisaazuzu -ybhɛꞌɛ ꞌmʋ -ke ꞌꞌnyinynilɩ nyunyɔ -ybhɛꞌɛ ꞌmʋ, ɩ -se lɛ -lue -ko. Ɩ -nɩ ꞌsɔnꞌɔ wlu sʋsɔꞌɔ-ɔ li. Ɛbɛ ꞌmnɛ, ꞌɩnnɛ nʋ ɛꞌo, ꞌle, lɩ ꞌwee aꞌba ꞌgwlʋ -nɩꞌa ꞌꞌyi, a se ꞌya nʋnʋa ꞌbhɛɛ.

Efɛɛzɩkɔmʋ 1:4

A -gblee, -Lagɔ -see -bhla ꞌkmʋ ti-ya ke see, ꞌle ɔ ꞌye ꞌɛ lɛtuꞌa -gɔlɩ ꞌtɛ, ɔ ꞌye -amʋ ꞌmʋꞌtɛ -a ꞌke ꞌɔ nʋ ꞌꞌdu ꞌle -a ꞌke pepe -nɩ ꞌbho ꞌɔ ꞌꞌyigbeyi.

Efɛɛzɩkɔmʋ 4:12

A -gblee, ɔ ꞌnʋ-o ꞌɛ lɛtu ꞌle ꞌɔ -glɩgbawɔnyiꞌa nyʋ ꞌke -Lagɔꞌɔ lbhʋ wɔnyiꞌbhɛɛ, ꞌle ʋn ꞌke ꞌkpa ꞌꞌyipopo ꞌle ꞌwa ꞌɔ ꞌꞌgwlideɛ ꞌke ꞌmʋku.

Filiipʋkɔmʋ 1:1

A-bʋ nyʋ-ʋ ꞌma-a *Zezii *Kliisɩꞌa nyʋ-ʋ -nɩꞌa Filiipʋgwlɔ ꞌmʋ ꞌle -ʋ -ke ɔ ꞌꞌsisriꞌa ꞌꞌyi a, -lrʋʋ ꞌꞌduꞌa ꞌɔ -glɩgbaꞌa kwagbɔlitidemʋ ꞌle -lrʋʋ ꞌyeꞌa ꞌɛ ꞌꞌlrutidemʋ -lrʋʋ ꞌꞌdu a, ꞌɩnmɔ ꞌPɔlʋ -ke Timotee -nɩ ꞌsɔn, -a-bʋ ꞌma-a Zezii Kliisɩꞌa lbhʋzemʋ, aꞌba ꞌwee bhete gbo, -a-bʋ ꞌyeꞌe amʋ! ꞌBho ꞌɛ lemʋ a, ꞌɩnmɔ poꞌo amʋ wlu -nɛɛ -jeyi.

Filiipʋkɔmʋ 3:16

A -gblee, -bho ɛ -nɩ -kaa o, -bho ɛ se -kaa -nɩ o, lɛ-ɛ -nmɔꞌɔ ꞌꞌyrili -a ꞌka nʋ, ꞌɩnnɛ ꞌmo-o, lɩ -a ꞌcɩanꞌa -a ꞌwɔnꞌɔ ꞌmʋti -ka -zɛgɛka ꞌle -a -deꞌa ꞌliti, ꞌle -pɔlʋ -lue ꞌmʋ -a kpa ꞌya -jolʋ ꞌle -aꞌba -nabhʋ ꞌke -lue ꞌtɩn -nɩ!

Filiipʋkɔmʋ 3:3

A -gblee, -a-bʋ ꞌꞌduꞌo -Lagɔꞌɔ nyʋzɩgɩ, -ɛkedɩmaa, *ꞌɔ Lisaazuzu -a ꞌbhleꞌe ꞌmʋ ꞌle -a bʋbɔ ꞌnɔ -ka -zɛgɛka. Ɩ-bɩ bhebhelɩ ʋ-bʋ nyʋ ꞌmnʋ-ʋ ꞌpɛɛꞌɛ ꞌmʋ, ꞌle ʋn-ʋ muꞌa ꞌnynɩ, ɩbɩ ꞌmnɩ -abʋ se ꞌbhɛɛ -a ꞌke ɩ ꞌmʋꞌpɛɛ. Zezii *Kliisɩ -Lagɔ -zi -nɩꞌa ꞌmʋ ꞌle ɔ ꞌyeꞌa -amʋ ꞌꞌyisrɛɛmʋ po ꞌbho ꞌɔ ꞌꞌyigbeyi, Zezii ꞌmnɔꞌɔ ꞌnynɩ -a ꞌbhɛɛꞌɛ ꞌꞌyi tenyɩ. ꞌƐ dɩ, -a-bʋ ꞌꞌduꞌo -Lagɔꞌɔ nyʋzɩgɩ.

Filiipʋkɔmʋ 3:8

ꞌKla-a moꞌo -ziaka. Ɩ-bɩ tinɩɛꞌɛ lɩ ꞌwee -ke dɩ nyɔ-ɔ ꞌbhleꞌa ꞌnynɩ, -bho ꞌɩn -gbʋ nɩ ꞌtɔ ya, bhubhulɩ ɩ ꞌꞌduꞌo. -Ka ꞌɩn yiboꞌa Zezii Kliisɩ ꞌle ɔ ꞌyeꞌa ꞌan -kɔyi ꞌꞌdu, ꞌɩnnɛ ꞌbhleꞌe ꞌnynɩ tenyɩ, ɛ ꞌye ɩ-bɩ lɩ ꞌwee -zi. ꞌYa ꞌwee, ꞌbho ꞌan damʋ, ɩ se ꞌtɔ ꞌnynɩ ꞌbhle. -Bho ꞌɩn -gbʋ nɩ ya, ɩ kɔkɔɔꞌɔ-ɔ -yrukodu. ꞌƐ dɩ ꞌɩn -zi ꞌɩ kwa gbo ꞌle ꞌɩn ꞌke ɔ-bɔ Zezii Kliisɩ yibo -ka -zɛgɛka ꞌle ꞌɩn ꞌke ɔ ꞌꞌsrii ꞌꞌkɔmʋ.

1 Tesalonikɩkɔmʋ 5:15

A ꞌꞌdu aꞌba ꞌꞌbhi ꞌꞌyrili, ꞌle, -bho nyɔ nʋ amʋ ꞌꞌnyinynidɩ ꞌꞌlruli, a -kaa ꞌɛ kpa -za! ꞌLe aꞌba ꞌꞌklumʋ o, ꞌle nyʋ ꞌwee -bodɩ o, a nʋ -zɛgɛꞌɛ ꞌꞌsɛ ꞌle -nɔɔꞌꞌo nɔɔ ꞌli!

2 Tesalonikɩkɔmʋ 2:13

A-bee -mnʋʋ -bodɩ a, ꞌlotʋꞌa ꞌꞌnynuu-a, a-bʋ -ke dɩ -aꞌba -Kɔyi *Zezii -kmaꞌa, ɛ -nmɔꞌɔ-ɔ -kaa ti -abʋ ꞌke aꞌba dɩ -Lagɔ ꞌsɛɛ po -wlɛɛwlɛɛ. A -gblee, -Lagɔ -seeꞌa -bhla ꞌkmʋ ti-ya ke a, ɔ -zaꞌa ꞌbho amʋ-ɛ ꞌle ɔ ꞌke amʋ ꞌpʋʋn ꞌbho ꞌɔ ꞌꞌyigbeyi. *ꞌƆ Lisaazuzu nʋꞌa amʋ ꞌɔ nyʋ ꞌmʋ, ꞌle ꞌɔ wɔnkuɛ ꞌmʋ ɔ -nʋ -nɩꞌe ꞌɛ lɛtu, ꞌle, a ꞌwɔɔnꞌɔ-ɔ -ziadɩꞌa dɩ, ɔ nʋꞌo -kaa -lrɛɛ.

1 Timotee 5:10

Kpli ʋn ꞌka ti-nɩ -lrɛɛ, ꞌɩnnɩ ꞌka-a: Nyʋ ꞌwɔɔn ꞌwa nʋnʋlbhʋzɛgɛ ꞌꞌkpi, ʋn ꞌꞌdu -yʋ -nmɔꞌɔ ꞌꞌyreetɩ kwa ꞌmʋ ti, ʋn ꞌꞌdu ꞌlɩkpʋꞌa -glikpʋnnynʋkpakpɩ! Ʋn ꞌꞌdu ꞌnynʋkpakpɩ-ɩ -ybhɛꞌɛ *Zeziiꞌa nyʋ ꞌmʋ -ʋ kpʋn ꞌʋ -gli, ꞌle -ʋ ꞌꞌsiꞌa ꞌbho -ʋ -kpaꞌa nyʋ-ʋ -nɩꞌa ꞌkle ꞌyenamʋ! -Gblee, ꞌnynʋkpakpɩ-ɩ -ke -pɔlʋ -nmɔꞌɔ ꞌꞌyrili ʋn ꞌke -zɩgɩ nʋ, ꞌɩnnʋ ʋn ꞌke ꞌꞌdu! -Bho ʋn -nɩ -kaa a, ꞌcnɩ ꞌwa ꞌnynɩ!

1 Timotee 6:19

-Bho ʋn nʋ -kaa a, ꞌꞌlemnɩɩ, -ka nyɔ ꞌꞌluoꞌa ka ꞌɔ ꞌgagalɩ ꞌmʋ ꞌle ɔ-ɔ de ꞌɛ -dalrɔɔ ti ꞌle nyakaꞌa dɩ a, ꞌka-a nyʋ ꞌke -Lagɔ -bodɩ nʋ ꞌɔ nyʋꞌa ꞌꞌnitiwʋnnɛɛꞌɛ damʋ ꞌle ʋn ꞌke ꞌꞌkɔgwlɛtinɩɛzɛgɛ ꞌye ꞌle ʋn ꞌke ꞌle ꞌɛ ꞌli ti-de. ꞌƐ lɛtu kɔɔꞌɔ-ɔ -ka -budu nyɔ ꞌka po ꞌwla, ꞌle ɔ poꞌa ka ꞌɛ ꞌkpʋ glu.

Eblee 12:14

ꞌBho a -ke nyʋꞌa ꞌnynɩmʋ, a ꞌbɔ ti ꞌꞌkɔmʋ -pɔlʋꞌa bhlubhlua ꞌke ꞌbho -nɩ! A ꞌbɔ ti -lrɛɛ ꞌle aꞌba -nabhʋ ꞌke ɔ ꞌtʋ nʋ! A -gblee, -bho nyɔ se *liꞌsaa ꞌbho ꞌɔ ꞌꞌyigbeyi, ɔ -see ꞌbho ꞌɔ ꞌꞌtroli -mu yi ꞌle ɔ -see ɔ ꞌye yi.

Eblee 12:23

Nyʋ ɔ -kɔꞌɔ ɔ, a-a ꞌmo-o ꞌwa tɔlʋ. ꞌƆ ꞌꞌyreetɩ -ke ꞌnynɩ-ɩ ꞌcnɩ-ɛꞌɛ ꞌle ꞌɔ ꞌꞌbɔgʋ ꞌli, -zɩgɩ ɔ ꞌbhleꞌa, -ʋ -ke ꞌꞌlru ꞌꞌyi ɩ -deꞌa ꞌbho ti, ꞌɩnnʋ a ꞌꞌduꞌo. -Lagɔ ꞌka nyʋ ꞌwee -zigle -tu, a -ke ɔ ꞌꞌsisriꞌe-e ꞌꞌyi. Nyʋ-ʋ ꞌma-a ꞌɔ -nʋ -ʋ ꞌmɛꞌɛ ɛ, -ʋ -ke -nabhʋ nʋ ꞌɔ ꞌtʋ, -ka ꞌwa ꞌꞌnyinynidɩ -gwɛ ꞌnʋ ꞌꞌkpi ti ꞌle ʋn ꞌyeꞌa ꞌbho ꞌɔ ꞌꞌtroli -nɩ, ꞌka-a aꞌba dɩ ꞌke ꞌmʋ-nɩ -lrɛɛ.

Eblee 13:21

Lɛ-ɛ -ke dɩ ꞌɩn-ɩ po ꞌɔ *wɔn gbo aꞌba dɩ, ꞌɩnnɛ ꞌmo-o, ɔ ꞌke amʋ ꞌkpɩ ꞌmʋ po, ꞌle, lɩzɩgɩ ꞌwee ɔ ꞌybhaꞌa, a ꞌke ɩ nʋ. ꞌƖn ꞌde-e ꞌꞌgwli na, ꞌɔ ꞌꞌbhuo-o ꞌye -ɛ -nʋ -mʋ ꞌle a ꞌke ꞌɔ ꞌgwlʋdɩ nʋ. Zezii *Kliisɩ-ɩ ꞌpo-o amʋ ꞌkpɩ ꞌmʋꞌa dɩ ꞌɛ lɛtu ꞌke -nʋ-ɛ. ꞌKa-a ɛ -nɩꞌe ꞌmʋꞌa dɩ, Zezii Kliisɩ ꞌmnɔꞌɔ ꞌnynɩ ꞌbhɛ ꞌꞌyi ꞌꞌkɔmʋ! Kɩn, wlu ꞌɩn -zaꞌa ꞌmʋ, *ɩ -nɩ -kaa ꞌmʋ!

Zaakɩ 3:2

A -gblee, wlu-u ꞌwlʋꞌa ꞌle -aꞌba wɔn ꞌmʋ, -ɩ seꞌa ꞌꞌyrili-nmɔ ꞌbho -Lagɔꞌɔ ꞌꞌyigbeyi, -a -gwle ꞌnɩ-ɩ ꞌmʋzanamʋ. -Bho nyɔ -ka wlu, -bho wlu -see ɔ ꞌꞌyizi ꞌbho -Lagɔꞌɔ ꞌꞌyigbeyi, ɔ -se ꞌbɩlibhleyi -ko. Ɔ ꞌbhɛɛꞌo ɔ ꞌke ꞌɔ ꞌꞌbhuo wɔnyiꞌbhɛɛ.

1 ꞌPiɛlɩ 5:10

-Bho a ꞌye -kaa ꞌkle -daan, lɛꞌꞌo lɛ-ɛ ꞌma-a -zɛgɛ, -Lagɔ -ke ꞌmʋ ɛ-ɛ ꞌwlʋꞌa, -ɔ ꞌlaꞌa amʋ, ꞌle, -ka ꞌɔ ꞌnynɩ ꞌbhɛꞌɛ ꞌꞌyi, a ꞌke -kaa ꞌnynɩ ꞌwlʋ -lrɛɛ, ꞌle a ꞌke ꞌbho ꞌɔ ꞌꞌtroli -nɩ ꞌꞌkɔgwlɛka, a -ke Kliisɩ ꞌke ꞌꞌyiꞌꞌsisri, ɔ-bɔ -Lagɔ ꞌmnɔ, ɔ-ɔ ꞌye -ɛ -nʋ -mʋ ꞌle a ꞌke pepe -nɩ ꞌbho ꞌɔ ꞌꞌyigbeyi, ɔ-ɔ ꞌye-e amʋ ꞌkpɩ ꞌmʋ -po -mʋ tenyɩ ꞌle aꞌba ꞌꞌgwlideɛ -see -denɩ ꞌmʋ -sɔ yi.

2 ꞌPiɛlɩ 3:18

Zezii Kliisɩ ꞌma-a -aꞌba -Kɔyi -ke -aꞌba ꞌPʋʋnyi, a ꞌꞌdu ɔ ꞌꞌyrili, a ꞌke ɔ yibo -ka -zɛgɛka ꞌle a ꞌke ɛ ꞌꞌlru-mu -nɩ, ꞌle, -zɛgɛ ɔ-ɔ nʋꞌa amʋ ꞌꞌlruli, ɛ ꞌke ꞌꞌkpiꞌkpa ꞌꞌkɔmʋ. ꞌNynɩꞌa ꞌꞌyibhɛɛɛ ꞌꞌdu ꞌɔ lɛ ꞌꞌkɔgwlɛka! (Dɩ ꞌwee ꞌɩn -zaꞌa ꞌmʋ, *ɩ -nɩ -kaa ꞌmʋ!)