Eblee 8:10 - Nyaboa (Nyabwa)

¹⁰ Ɛ -nɩꞌa -kaa ꞌmʋ a, -bho ꞌɩn -ke ʋn bhla ɛ-bɛ -ybhɛybhɛtitelre ꞌmnɛ, lɛ ꞌɩn-ɩ ꞌyeꞌa -nʋ mʋ a, ꞌɩnnɛ ꞌka-a: ꞌAn ꞌꞌbhuo-o ꞌye-e ꞌan wlu ꞌle ꞌwa -pɔlʋ ꞌzɔ -po -mʋ. ꞌƐ dɩ ʋn -see ɩ ꞌmate yi. ꞌKa-a ꞌɩn-ɩ ꞌye ꞌwa -kɔyi ꞌꞌdu mʋ -ziaka ꞌle ʋn ꞌke ꞌan nyʋ ꞌꞌdu -ka -zɛgɛka.

Eblee 8:10 Iomraidhean Croise

Matiee 22:32

-Kaa ɔ ꞌlɛꞌɛ -kaa: Aꞌba ꞌꞌnaklɩgbɩ ꞌꞌwe, *Ablaamʋ, *Izaakɩ -ke *Zakɔɔpʋ, ꞌɩnmɔ -Lagɔ, ꞌɩnmɔ -ke ʋn bhlaꞌa *-ybhɛybhɛtite, ꞌɩnmɔ ꞌka-a! ꞌKa-a -Lagɔ ꞌtmʋʋꞌo Moyiizɩ. Ɩ-bɩ wlu ꞌmnɩ, ꞌya ꞌzɔ -tɛꞌɛ ꞌmʋ-ɛ. ꞌLe ɛ ꞌmʋ Ablaamʋ, Izaakɩ -ke Zakɔɔpʋ ꞌꞌwe ꞌmnʋ, ʋn ꞌmɛ-oꞌo see. ꞌLe, -bho -Lagɔ na: ꞌƖnmɔ -ke ʋn bhlaꞌa -ybhɛybhɛtite, ɛ-ɛ tɔꞌɔ na ʋn -nɩꞌe-e -bhla ti ꞌbho ꞌɔ ꞌꞌyigbeyi, -bho ꞌwla a, ꞌle ɔ ꞌke ʋ glu -za. A -gblee, -kaabonyʋ -ke -Lagɔ -naꞌa, ꞌka-a ꞌwa ꞌwee -nɩꞌo ꞌbho ꞌɔ ꞌꞌyigbeyi. Lɛ aꞌba ꞌwɔnꞌɔ ꞌmʋti, ꞌɩnnɛ ꞌka-a! ꞌƐ dɩ ꞌɩn nʋꞌo na: A-a ꞌꞌmaa-a aꞌba ꞌꞌbhi. ꞌKa-a Zezii ꞌlɛꞌo.

ꞌWlɔmʋkɔmʋ 11:27

Ɛ-bɛ -nɔɔ ꞌmnɛ ti, ꞌɩn-ɩ ꞌye-e ꞌwa ꞌꞌnyinynidɩꞌa dɩ ꞌbhɔ -mʋ, *-ybhɛybhɛtite ꞌɩn -ke ʋ ꞌyeꞌa -bhla mʋ a, ꞌɩnnɛ moꞌo.

1 Kɔlɛɛtɩkɔmʋ 6:16

Nyɔ-ɔ -ke ꞌꞌwɩlɩnynaakpʋ-ʋ ziziꞌa ꞌmʋ, ʋn -nɩ ꞌsɔn ꞌꞌdu-o nyɔ -lue, a se ɩ yibo? A -gblee, ɛ ꞌcnɩ-ɛꞌɛ-ɛ ꞌle -Lagɔbɔgʋ ꞌli na nyʋ-ʋ nʋꞌa -kaa a, ʋn ꞌꞌdu-o nyɔ -lue ꞌbho ꞌɔ ꞌꞌyigbeyi.

2 Kɔlɛɛtɩkɔmʋ 3:3

Kɩn, -ziadɩ moꞌo. ꞌLe -amʋ ꞌmʋ ɔ-ɔ zi nɩꞌo ꞌle ɔ-ɔ nʋ ɛꞌo. ꞌꞌNi ʋn-ʋ ꞌcnɩ nɩꞌa ꞌbho ꞌꞌbɔgʋ ꞌꞌkpi ꞌle ʋn-ʋ zrɛꞌɛ ɩ-bɩ ꞌcnɩyri ꞌmnɩ, ɛ -se -kaa -ko. ꞌLe ɩ -see ꞌbho sɩkpɩꞌa -klugbɩ ꞌꞌyri ꞌcnɩ-ɛ -lrɛɛ. -Lagɔ ꞌbhleꞌa nyɔꞌꞌo nyɔꞌɔ tinɩɛ, ꞌle *ꞌɔ Lisaazuzu ꞌmʋ ɔ -zi -nɩꞌo ꞌle ɔ ꞌye lbhʋ ꞌmnɛ nʋ ꞌle nyunyuꞌa -pɔlʋ ꞌzɔ.

Tiitɩ 2:14

A -gblee, ɔbɔ ꞌmnɔ, ꞌɩnnɔ ꞌꞌtayiꞌe ꞌɔ ꞌꞌbhuo ꞌꞌyiti ɔ ꞌye ꞌbho -aꞌba ꞌbɩ ꞌmʋ ꞌmɛ -nɩ ꞌle ɔ ꞌke -amʋ ꞌꞌnyinynidɩ ꞌꞌkpi -za, ɔ ꞌke -amʋ *liꞌsaa ꞌbho -Lagɔꞌɔ ꞌꞌyigbeyi, ꞌle ɔ ꞌke -amʋ -kɔ ꞌle -a ꞌke ꞌꞌyrilinmɔlɩꞌa nʋnʋa wɔnyiꞌbhɛɛ.

Eblee 11:16

-Ziadɩ moꞌo! -Bho nyɔ -gbʋ nɛ ya a, ꞌwa -dena -nɩꞌa ꞌle yaku ꞌli, -ɛ -nmɔꞌɔ ꞌꞌyrili, -ɛ -ziꞌa ꞌnɔɔ ꞌkmʋ ꞌmʋꞌa nɛ, ꞌle-e ʋn ꞌbɔꞌɔ ti ʋn ꞌke mu. ꞌƐ kamʋ -Lagɔꞌɔ ꞌꞌbhuo -ke ʋn -naꞌo, ꞌle, -ka ɔ ꞌꞌduꞌa ꞌwa -kɔyi, ɔ-ɔ wɛ ꞌɛ wɔnti. Ɔbɔ ꞌmnɔ, -da ʋn ꞌka -de ꞌꞌkɔgwlɛka, ꞌɩnnɔ ꞌye ʋ ꞌbho ꞌꞌnyɩ mʋ ꞌbho ꞌɔ ꞌꞌtroli ꞌle yaku ꞌli.

Zaakɩ 1:18

ꞌƆ wlu-u ꞌma-a -ziadɩ, a ꞌwɔnꞌɔ ꞌbɔ, ꞌle ɛ ꞌmʋ a ꞌye -nɩꞌe ꞌꞌkɔgwlɛtinɩɛzɛgɛ. ꞌLe ꞌɔ ꞌgwlʋdɩ ꞌmʋ ɔ nʋꞌo -kaa, ꞌle, ꞌbho lɛꞌꞌo lɛ ɔ -yaꞌa tiꞌa damʋ, -abʋ ꞌke kpɔ cɛ ꞌɔ dɩ, -ka lɩꞌa ꞌꞌyizabhi nyɔ-ɔ ꞌꞌnyɩꞌa -Lagɔ, ꞌya ka.

Zaakɩ 1:21

ꞌƐ dɩ, lɛꞌꞌo lɛ-ɛ ꞌma-a ꞌꞌnyinynidɩ ꞌbho -Lagɔꞌɔ ꞌꞌyigbeyi, a ple ɛ li! A -nmɔ kpli ꞌmʋ, ꞌle, -Lagɔꞌɔ wlu a ꞌwɔnꞌɔ ꞌbɔ, -ɛ poꞌa ꞌkpʋ glu ꞌle amʋ ꞌmʋ, a ꞌꞌdu ɛ ꞌbho! Ɛ-bɛ wlu ꞌmnɛ ꞌbhle-e wɔnkuɛ ꞌmʋ, aꞌba ꞌpʋnpʋan a ꞌyeꞌa ꞌbho -Lagɔꞌɔ ꞌꞌyigbeyi, ꞌle ɛ ꞌke ɛ nʋ a ꞌke ɛ ꞌli ti-de ꞌꞌkɔmʋ.

1 ꞌPiɛlɩ 1:23

ꞌAn ꞌlotʋꞌa ꞌꞌnynuu-a, aꞌba ꞌꞌbhi yiboꞌo-o na, ꞌɔ wlu-u -seeꞌa ꞌplʋ ꞌkpa yi ꞌꞌkɔmʋkɔmʋ, -ɛ ꞌꞌnyɩꞌa ꞌɔ nyʋ ꞌꞌkɔgwlɛtinɩɛzɛgɛ, ꞌle ꞌɛ wɔnkuɛ ꞌmʋ a ꞌwlʋ -nɩꞌo -lreeka ꞌle a ꞌye tinɩɛlre ꞌye. Ɔ-bɔ ꞌꞌKɔgwlɛlagɔ ꞌmnɔꞌɔ ꞌꞌyreetɩ a ꞌꞌduꞌo. Ɛ-bɛ tinɩɛ ꞌmnɛ, nyunyɔ ꞌyeꞌa ꞌmɛ mʋ, ɛ -se ꞌɔ nyɔtu ꞌꞌnyɩ ɛ amʋ ꞌnɩ -ko.

1 ꞌPiɛlɩ 2:9

Ɛ -nɩꞌa -kaa ꞌmʋ a, a-bee -mnʋʋ ꞌmo-o nyʋ -aꞌba -Kɔyi -Lagɔ -cɛꞌɛ kpɔ ɔ ꞌke -kɔ, ꞌle a ꞌke ꞌɔ bʋbɔmʋ ꞌꞌdu. Ɔ -zaꞌa-a amʋ ꞌle ꞌꞌnyinynidɩꞌa -kuyre ꞌmʋ ꞌle ɔ ꞌye zɔ -ya ꞌle aꞌba -pɔlʋ ꞌzɔ ꞌle a ꞌye ꞌɔ ꞌꞌdɩzɩgɩ ꞌwɔɔn, ɔ ꞌye amʋ tinɩɛlre ꞌꞌnyɩ, ꞌle, lɩklɩgbɩ ɔ-ɔ nʋꞌa, a ꞌke ɩ nyʋ -bodɩ ꞌmʋ-za.