Ibru 10:29 - Namiae

²⁹ Unam besum ijegvo eraneb bu Jesu Godon Farif iji abe buzeivo iji God fu kam unam ise ijia arafiriak. Regavo madu eraneb bu Jesuon kavuan iji fu e ijiebuon ise iji sokafa useme unam iviamkor iji abe marenma iji ba abe ikin igeg vierafejo iji God fu kam vajai fian miak. Regavo madu fu e iji bu Godon Kaven Akaij iji fu ma rediamo ijefuon vuak ise kuaivo iji God fuka unam ma ise ijia vajai fian miakfuon.

Ibru 10:29 Iomraidhean Croise

Metiu 7:6

Regavo na kuardiainva ijeg jab Godon vuak akaij iji abe va e iji bu vuak ma iji faikuai uzavo ijin kuardiak. E iji bu ire mon igi bu kege maf iji vajiavo igekin. Maf iji bu ire mon iji kege irerag abekfuon iji bu vierafenva bado bu kam datuaik. Ijegvo jaba mukor giaknum vuak nun ma iji abe va e iji buba oimarknum faikuai vierafenva iji kuardiakva buka uzak. Buka ada bijume una vuak jon bu ke karoime una buon ijia kuardiaknum kam kania arafiriakno kiain.

Mak 7:2

Bu ijia kariknum giak e Jesuon vuak faivo roin buba imut do soin revo bum duok ij. Bu unam e Ferisis bu imut do some duok ijo ijeg buba rej.

Ruk 12:10

Regavo madu e be erar fu Ema ijiebuon Farif igi vuak ise nuisina kuaimon iji na game arek rega erar fu vuak ise kafo una Kaven Akai iji fuisina kuaimon iji God fuba game arek.

Jon 10:36

Regavo naiji na asoinun ijar na fu vierafen ijefuon fu kiema na moikigia ruain ga ja irerafuon kie a Godon if iji abe buzemno kiev. Ja kafu igi na kia naina Godon Farifno kiainva ijefuon ja ijeg rej.

Jon 17:19

Regavo na buifuon na vajai nun abe isuf baroine oifuon ikredo buk bu e akai rene oifuon ikrek.

Eks 7:51

Stiven fu suar iji kuardia barme uri kia, Ja sibe nui giren. Jaika e taraikor igeg Godon vuak iji jaba faiv. Ja e saifjon bu kenva jak ja ijeg Godon Kaven iji nuigafav.

Romens 16:20

Ijefuon ja ijegrekva God iji fu tavan bog e ifejdiako bu afuime karioijo ijar daro miaga ja uri giriesame Setanon daro iji abe gareg akozek. Regavo madu fu ifejdiaga jab e iji bu jana karine ise kafokafo kegoijo ijiebuon vuak iji igiak.

1 Korintiens 11:27

Ijefuon erar fuba E Bomana agoiknum bred ijiga do vuain iji kege ikma e iji fuka ise ren. Ijefuon maiji fuba E Bomana ijefuon surif ijiga kavuan iji mukorigia agordiam.

1 Korintiens 11:29

Regavo erar fu Kurais kuros ijia fu guainma ijefuon maiji fuba mukoi vierafegavo fum bred ijiga do vuain iji kege ikma E Bomana fu koikfuon abe vajai fian mak.

1 Korintiens 15:27

No vierafega ire iji fuka marek. Ijefuon maiji God fun buk akaij iji bu isoinva ijia fu ijeg kuai, God fu Kurais abe unaga fu ire fok samuagdiak. Regavo God fuk fuba arime Farifuon ijefuon rotit ijia fik. Ijefuon maiji fu Godri koikfuon Kurais abe unaido fu ire fok samuagdiak.

1 Korintiens 6:11

Regavo ur tavan kafo e roin jak jaka unam ma ise igi na kuardiavo ja ijeg reoin. Regavo fun E Bomana nuvuon Jesu Kuraisri kavuan fuon ijia abe ise jon iji somdiain. Fu somdiame ke una e akai fuon ren. Fu ise jon ijesugin somdiainma bakin gavo fu madu Kaven Akai ijefuon daro ijia ja karauniame ke una unam fuon ma ijia uniain.

Efisiens 4:30

Regavo jab oine uri vuak ise kafo kuaim Godon Kaven Akai iji oifian mak ijefuon maiji Kaven Akai iji fu oijon ijia fin. Regavo madu fu Kaven Akai ijar anf igeg jana namdo rad tavan ijefuon ruakma God fu ja karauniak.

Efisiens 5:26

Regavo Kurais fu efuon ijiebuon guainma iji fuka vajai fuon abe isuf igeg God baroidain. Regavo fu e iji bu fu ma vierafejo iji kege una e akai igeg uniakafa vierafen. Ijefuon fu ja do ruardiainma ijiga ja uri vuak fuon ma vierafenva ijar fun ise jon iji somdiain.

Ibru 10:10

Jesu Kurais fu irerag God fu vierafenma iji ren. Ijefuon e fok no Kurais vajai fuon fu abe efknum isuf baroinma ijia fun ise nuvuon iji mukorigia somduoma non maturaime e akai ren.

Ibru 12:25

Ijefuon mukorigia samuanamiknum karigavo jab God fu kuardiamo iji faime uzak. Ijefuon maiji Mosis fu moikigia e Isrerko ijeg kuardiamga bu magainva iji kafo buba iji fu kege vajai fian miamo iji asidiame usem subinai vain. Unam besum ijegvo no God e varur gufia fino fu kuarduomo iji ba faime igakva no izeg iji fu kege vajai fian muokreno ijia asidiakva bakin.

Ibru 13:20

Regavo na sirimamega God e iji e ifejdiaga bu afuime karioijo iji fu ja ifejdiak. Ijefuon maiji fu E Bomana Jesu Kurais Farifuon besum iji kuama fu guame una urin. Regavo fu Jesur e fok igi no maf-sif ijeg oijo iji mukorigia samuagduome kavuan fuon abe useme unam iviamkor iji no Godna besum karikfuon iji amaren.

Ibru 2:11

Jesur e fok ise buon iji somdiame baren. Regavo fuga e iji fu ise buon somdiama bu maturainva iji bun una agan besum ren. Ijefuon Jesu fuba jum gavo fu aroikaraknum kia, Ja diaifnuno kiain.

Ibru 2:3

Ijefuon no Godon Farif ijefuon vuak ma bomana izeg fu no karaunuomo iji nuigafakva no izeg God fu no arafuruokreno iji asidiame usem vakva bakin. Regavo vuak iji fun Jesu E Bomana ijar koikfuon kuardiainma vo rad bun e iji bu vuak iji fainva ijieb abe no kuarduin.

Ibru 4:14

E Bomana Jesu Kurais Godon Farif iji nuvuon isuf baroino iji fun nuvuifuon una varur gufia Godon sanainma ijia vain. Ijefuon no Jesu e iji no ma vierafejo ijefuon vuak iji giriesame kunai vakfuon.

Ibru 6:4

Noka kaven ijefuon vuak ijia nijaidiame vaga ijar ifejduoga no e damuigin rek. Ijefuon maiji fuka ma giredo e iji Kuraison vuak ma iji nuigafame vainva iji bu izeg una karoime ruakva bakin. Ijefuon maiji e iji bun amur Kuraison vuak iji bun mukorigia fain. Regavo madu bu Jesu e iji varur ijia ari ruainma iji fun oibuon ijia ik ren revo Kaven Akai ijefuon ire ma iji fateroin bun aben.

Ibru 6:6

Regavo buka una Kurais ma nuigafame vainva iji bu izeg una oi karoime roga God fu ise buon giame arekma bakin. Ijefuon maiji e iji buka izeg tavan iji e Jius bu Kurais Godon Farif iji abe e nifak ijia kuros kanava fu jufabekafa bu renva bu ijeg rej.

Ibru 9:13

Regavo ni una akai usuikor iji vierafef. E kafo bu ise kafo rejo iji e isuf baroino iji fu fanuf ijiebuon kavuan iji abe ro isuf iji bu amur baroinva ijefuon kuotuvuat iji abe do ijia davaruaime abe e iji usemadiav. Fu ijegrediame barmo iji e iji bun una Godon nifak ijia mardiav.

Ibru 9:20

Mosis fu ijegrejknum e iji kuardiame kia, Kavuan ijar akaij igi abe marenmado ja God fu kiainma iji igakno kiain.

Revareson 1:5

Regavo na sirimamega Jesu Kurais e iji fu nuibakin rene Godon vuak ma iji abe ruainma iji fuk ja mardiame ifejdiakfuon. Fur amur guame una uri E Bomana rene moik igefuon e mamkanuk fok samuagdia fin. Jesu Kurais fu no oijmuomo ijefuon fu guame kavuan fuon useme ise iji fu no anu kunuinma ijia somduome baren.