1 Timoti 1:9 - Namiae

⁹ Regavo no madu vierafega akaij iji fu e iji ma reoijo ijiebuon abedenva bakin ga fu e iji bu akaij iji abe tuaseme ba igame javo ijiebuon abeden. Regavo akaij iji bu e iji ba God ma vierafejo ijigam e iji unam ise kafokafo re ga ba maturaime karijo ijiebuon abeden. Regavo madu e iji buba ire ma iji God oimaikfuon ijia rejo ijigam e iji e kaniavo ijigam e iji bu eofijaf kaniaga bu aoivo ijiebuon akai igi God fu iji abeden.

1 Timoti 1:9 Iomraidhean Croise

Metiu 10:21

Regavo vake tavan iji e bu uri e nuifuon ikrejo iji kania bu aoivo ijia e buka uri uviaifijaf ga afijaf iji koikbuon kege una foris vajiaga bu kania bu aoik. Regavo madu am iji bu una karoime eofijaf iji koikbuon sivisaga foris bu va kania bu aoik.

Romens 4:13

God fu usuibe e Eburam ga aganfuon fu kiainma iji fu ijeg kia ire fok moikigia naoivo iji na abe ja miakno kiain. Regavo e Eburam fu Godon akaij iji mukoi igiainma ijefuon God fu moikigi abe bu miainma bakin. Regavo fun e Eburamri God ma vierafega Godri fuon oimarknum keuname abe unam fuon ma ijia unain. Ijefuon God fu gaga Eburam fun maturaimga fu moikigi abe Eburam ga uifarif fuon iji miain.

Romens 5:20

Regavo fu e Mosisri Godon akaij iji abe e fok no muin. Regavo no akaij iji game vierafega noka ise uruvana ren. Rega God fu e fok ijiebuon oifian abene ise buon giame arenma iji fuka ma bomana.

Romens 6:14

Jab zazaime tavan uruvana Setanon ir iji abene ise reok. Revo nika giriesame koikjo vajai jon samuanamif. Ijefuon maiji ja Godon akaij ijia bidua karinva bakin revo ja fuon ma iji fu vajuomo ijiga izeg fu nuvuon oifian abe ifejduomo no ijia biduame karij.

Garesiens 3:19

Regavo fu Eburam ijeg efkin ifejdakma akaij ijefuon maiji irerag? Akaij iji miainva ijefuon maiji fu ijar ifejdiaga e iji bu vierafe ire izi fu ma ga ire izi fu ise ijieb oifian abe miavo bu ijin giaknum kariokfuon fu ijefuon miain. Regavo akaij iji fum ijia na roke Kurais e iji God fu Eburam kuainma iji fu ruain. God fu akaij iji abe anera iji miavga bu abe e iji uf ijia manino e Mosis mavga fu abe e iji miain.

Garesiens 5:18

Regavo tavan iji a Kaven Akai ijar kuardamo a ijin jame kego iji a akaij ijia biduame fino bakin.

1 Timoti 4:7

Regavo suar usuikor iji ka ma daro bakin iji ijia aref. Regavo tavan bog nika daro on ijekma Kaven Akai ijefuon unam ijia uruvana mimataoikin a daro abek.

1 Timoti 6:20

Regavo Timoti Godon vuak ma iji fu nijaidainma iji mukorigia samuagdiamne. Regavo vuak kuaivo ijiga vuak ise ijefuon musikuaivo iji e bu kufuime kuai mano kuaivo iji mukorigia agordiaf.

2 Timoti 2:16

Regavo vuak kufuij ga vuak ise ijia buba a aferdaga a God maiji unakome aibe vakfuon. Regavo e vuak kufui nijaidiavo vuak ijeg bu kuaivo iji ni mukorigia agordiamne.

2 Timoti 3:2

E uruvana buka uri vajai buon iji uruvana oijmiame uri mon bomana oijmiaknum koikbuon kam e mamkanuk rene aroikarak. Regavo vuak buon bu kuaivo iji buba e roin ifejdiaknum vo eofijaf igiak revo buka oifiaigma oknum oibuon ijia buka ire ma kafo vierafekva bakin.

Taitas 1:10

Ijefuon maiji e uruvana buka vuak kufui kuaimoijknum una vuak ma ijin dab buzeime nigaraimoij. E ijegreoijo iji bu e Jius bu ur oi karoime Jesu ma vierafenva ijieb ijeg reoij. Bu kuardiame kia, Ja vierafe bu ja karauniakva ni E Jiusbuon akai iji mukoi igiafno kiav.

Taitas 1:16

Bu ijegrejknum kuai, No God non vierafenvano kuaiv revo unam buon bu kegoijo ijar nijaiduomoni bu God buba mukorigia vierafej. Regavo e ijekin iji buka ma e ise vo ba God igavo ijefuon buba ire ma kafo rekfuon.

Taitas 3:3

Ijefuon maiji ur noba oinuvuon karoinva ijia Godon vuak ma iji noka ba mukorigia vierafen revo noka ise reoin. Regavo madu noka ba God igain revo noka irerag vajai nuvuon fu vierafeno no ijesugin reoin. Ijefuon vajai nuvuon buka ise ijar anu kunuin. Revo madu noka vuak ise kafo e kafobuon kuaiknum e kafobuon ire kafo karekuai vierafen. Regavo e kafo bu no guovo buka deajidiam ga no madu bu giavo noka deajiduom.

Ibru 11:31

Regavo madu bara Reab ebuon baru turamo iji fu ma vierafenma ijefuon fu e Isrerko iji bu isuar sauime ai Jeriko gakuai vainva fu iji ifejdiame kege sauin. Ijefuon fuba e iji bu God ba igainva ijiena guain.

Ibru 12:16

Regavo nika mukorigia ganamif e be fub unam ise barubara oknum vo Godon if abe arafirik. Iso fu renma ijeg jab God fu kuainma iji abe ukakbe vierafene rubdiak. E Iso fu farif amur fu asoifuon ijefuon sinuom iji fur kekfuon revo fu vasiaguamga ire ma iji fok fu rad kekfuon iji fuim una diar fuon ijefuon ire sibank iji kimen.

1 Fita 2:7

Regavo e iji ja Kurais ma vierafejo iji fu irerag igekin ijefuon ja fu ma oijmav. Regavo e iji bu fuba ma vierafejo iji Godon vuak iji bu usuibe isoinva iji fu kuai, E iji bu mun ga tuar ijia ar savo bu vierafero tuar iji fu isero buba abe ar sain revo bu abe akozen. Bu ijeg ren revo iviakma fu Godri tuar iji abe ar uf ijia ru abesenma ijar ar iji kunaim girme manin. Regavo tuar iji fu kuainma iji fu Jesu Kurais E Bomana iji iviakma sos fok bu ijia fuon biduame karijo ijin.

1 Fita 3:20

E iji Jesu fu vuak kuardiainma iji fu e iji bu tavan iji Noa fu sisim sako bu Godon vuak iji uzainva fu e ijiebuon kaven iji kuardiain. Noa fu sisim bomana iji amarekoga e iji bu vek e rene karinva ijia bu Godon vuak iji buba igain revo God fuba migegare bu kam arafirian revo fu bu samuagdiain. Regavo rad bu e sibank e eit (8) ijeg vuak fuon iji igain ijefuon ve bomana fu dame do nafuima e iji buba do in.

1 Fita 4:18

Regavo Godon vuak bu usuibe isoinva iji fu ijeg kuai, God fu e iji bu if fuon ijia vajai fian abenva iji karauniakafa vierafen revo fuka ma gigikin gakma e iji buba ma vierafene ise reoijo iji bu izeg rek?

Jiud 1:15

Fu aferdia e fok kege ise buon iji mazim giakafa rok. Fu e iji bu Godon e ani rene unam ise God ba oimaikfuon bu rejo iji kege arafiriakafa rok. Regavo madu bu vuak kuriaikuriaikin bu Godsina kuaivo iji kam arafiriakafa bu iji rok.

Revareson 21:8

Regavo e iji bu nuifuon ikrekuai juvknum uzame ba unam nun ijia jajie vako ijigam e iji ba na ma vierafejo ijigam e iji bu unam ise siroij igegrejo iji bu mian naoik. Regavo e iji e kaniavo ga e kafobuon bara turavo ijigam e zuaigin ga e iji ire kafo imut ijia amardiame buon sirimamejo ijigam e iji kufuimejo ijiebuon ar iji mian kavuaime naino ijin. Bu ijia madu una aoime barekno kien.

Revareson 22:15

Regavo mai ijefuon makaf ga aror ijia bu e iji unam ise reoijo ijigam e iji zuainavo ijieb ijia ok. Regavo madu e iji bu barubara buon fudainamime unam ise rejo ijigam e roin kaniavo ijieb ijia ok. Regavo madu e iji bu kaven kufui imut ijia amardiainva iji oijmiavo ijigam e iji bu vuak kufui kuaimoijo ijiga unam kufui iji kegoijo ijieb ijia ok. Bu e fok ire ise ijekin ijia reoijo iji buba Godon mai iviamkor ijia aruk revo bu makaf ijia ok.