2 ತಿಮೊ 3:6 - ದೇವ್ನಿ ಖ್ಹಾಚಿ ವಚನ್

⁶ ಅವ್ಣಾಮ ಥೋಡು ಜ಼ಣು ಅದ್ಮಿನ ಘರ್‌ಮ ಪೇಶಿನ್, ಪಾಪ್‌ಥಿ ಭರೈರ‍್ಹೀತೆ ಅಜು಼ ಬಿಜಿ ಖ್ಹಾರಿ ಆಖ್ಹ್‌ಮ ಡುಬಿರ‍್ಹೇಸ್ತೆ ಬುದ್ಧಿಕೊಂತೆ ತಯೇಡಾವ್‌ನ ಕಬ್‍ಜಾ಼ ಕರಿಲೇಸ್.

2 ತಿಮೊ 3:6 Iomraidhean Croise

ಮತ್ತಾಯ 11:28

“ಅಲಾ ಥಕಿರ‍್ಹವಾಳ, ಭೋಜೊ ಪಾಡಿರಾಖವಾಳ, ತುಮೆ ಖ್ಹಾರು ಮಾರಕನ ಆವೊ; ಮೇ ತುಮುನ ಅರಾಮ್‌ ದೆವುಸ್‌.

ಮತ್ತಾಯ 23:13

“ಮೋಶೆನಿ ವಚನ್ನ ಶಿಕಾಡವಾಳ ಶಾಸ್ತ್ರಿಯೆ ಅಜು಼ ಫರಿಸಾಯರ್‌ವಾಳ ತುಮಾರಿ ಹಾಲ್ನ ಶಾತ್‌ ಬೋಲು! ತುಮೆ ಖೋಟ್ ದಿಲ್‌ವಾಳ ಹುಯಿರ‍್ಹಾಸ್! ಅದ್ಮಿಖ್ಹಾರು ಸೊರ್ಗಾನು ರಾಜ್ಯಮ ಜಾ಼ವಾನು ಬಾಕಲ್‌ನ ತುಮೆ ಖ್ಹಾಮ್ಣೆ ಮೂಚಿನಾಖೋಸ್, ತುಮೇಬಿ ಮಹಿ ಕೋಜಾ಼ಯ್ನಿ ಅಜು಼ ಮಹಿ ಜಾ಼ವ್ಣುಕರಿ ಕರಾವಾಳಾನಾಬಿ ಕೋ ಮ್ಹೇಲೋನಿ.

ಮತ್ತಾಯ 23:14

ಅಲಾ ಠಗಾರು ಖ್ಹಾರ ಪಂಡಿತ್ ಪರಿಸಾಯವಾಳ ಅದ್ಮಿಖ್ಹಾರು ದೇಖಾದೆಕರಿ ಲಾಂಬಿ ಪ್ರಾರ್ಥನೆ ಕರೋಸ್ ತುಮೆ ಮುಂಡಚ್ಚಿನ ಶೊತ್‌ನ ಗಳಿಲಿನ್ ನಾಟಕ್ ಕರೋಸ್. ಇನಖ್ಹಾಜೆ ತುಮೆ ಘಣಿ ನಿಶತ್‌ ಲೀಲಿಶು.

ಮತ್ತಾಯ 4:24

ಇನಿ ಬಾರೇಮಾನಿ ಖಬರ್ ಸಿರಿಯ ದೇಖ್ಹ್‌ ಅಖ್ಖುಸ್ ಫೈಲಿಗಯು. ತದೆ ಆದ್ಮಿಖ್ಹಾರು ರೋಗ್‌ಮ ರ‍್ಹವಾಳನ ಯೇಸುಕನ ಲಾಯು, ಇವ್ಣಾಮ ಕೈಯೆಕ್ಕಿ ತರ‍್ಹಾನು ರೋಗ್‌-ರಾಯಥಿ ತರಪ್‌ಡುಕರ್ತುಥೂತೆ ಅಜು಼ ಭೂತ್‌ ಧರಿರಾಖ್ಯುಥೂತೆ, ಮಿರ್‌ಘಿ ಥೂತೆ ಅಜು಼ ಲಕ್‍ವೊ ಮಾರಿರಾಖ್ಯುಥೂತೆ ಇವ್ಣ ಅಖ್ಖಾನ ಇನಕನ ಲಾಯು. ಯೇಸುನೆ ಇವ್ಣ ಖ್ಹಾರಸ್ನ ಅಛ್ಛು಼ ಕರ‍್ಯೊ.

1 ಕೊರಿಂಥ 12:2

ತುಮೆ ಅಲ್ಹಾವ್‌ ಅದ್ಮಿ ರ‍್ಹವಾನಿ ವಖ್ಹ್‌ತೆ ವಾಟ್‌ ಭೈಕಿನ್ ಕಿಮ್ ಮುಕ್ಕ ಮೂರತ್‍ಭಣಿ ಫರಿರಾಥ ಕರಿ ತುಮೆ ಮಾಲುಮ್ ಕರಿರಾಖ್ಯಸ್.

1 ತಿಮೊ 5:6

ಕತೋಬಿ ಏಕ್‌ ಮುಂಡಚ್ಚಿ ಬಿಜ಼ ಪರ್ಖ್ಹಾನ ಜೋ಼ಡ್ಮ ಇನಿ ಆಖ್ಹ್‌ನ ಪೂರ ಕರಾನ ಇನಿ ಜಿ಼ಂದ್‌ಗೀನ ದಿನಾಖಿದಿದೀತೊ, ಯೋ ಬಚಿರ‍್ಹಯೀತೋಬಿ ಮರ್‌ವಾದಾಖ್ಹಲಸ್.

1 ತಿಮೊ 6:9

ಕತೋಬಿ ಶೌಕಾರ್ ಹೋಣುಕರಿ ಆಖ್ಹ್ ಕರಾವಾಳು ಇವ್ಣು ಇವ್ಣೇಸ್ ಶೋದನೆಮ ಪಡಾಸ್‌ ಅಜು಼ ಕೈಯೆಕ್ಕಿ ಖರಾಬ್ ಅಜು಼ ಖತರ್‌ನಾಕ್ ಆಖ್ಹ್‌ನ ಫಾಖ್ಹಾಮ ಖ್ಹಪ್‌ಡಿಜಾ಼ಸ್, ಅನೇಥಿ ಇವ್ಣೆ ಬಿಗ್‌ಡಿಜಾ಼ಸ್ ಅಜು಼ ಬರ್ಬಾತ್ ಹುಯಿಜಾ಼ಸ್.

ಪೌಲನೆ ತೀತನ ಲೀಖ್ಯೋತೆ ಚಿಟ್ಟಿ 1:11

ಇವ್ಣ ಫಾಯಿದಾನಖ್ಹಾಜೆ ಬೋಲ್ನುನಾತೆ ವಚನ್ನ ಬೋಲಿದೀನ್‌, ಹಿಡಿ ಕುಟುಂಬ್‌ನಾಸ್ ನಾಶ್ ಕರುಕರಸ್. ಅನಖ್ಹಾಜೆಸ್ ಇವ್ಣು ಮ್ಹೋಡು ಮೂಚಿರ‍್ಹೇಣು.

ಪೌಲನೆ ತೀತನ ಲೀಖ್ಯೋತೆ ಚಿಟ್ಟಿ 3:3

ಶನಕತೊ ಏಕ್‌ ಹಗಾಮ್‌ಥು ತದೆ ಅಪ್ಣೇಬಿ ಅಗಾಡಿ ಖ್ಹಯಾಲ್‌ಭರ‍್ಯಾ ಹುಯಿರ‍್ಹಾಥ, ಹುಕುಮ್‌ನ ತೋಡಾವಾಳ ಹುಯಿರ‍್ಹಾಥ ಅಜು಼ ಘುಂಜ್‌ಳಾವ್ಣಿಮ ಥಾ. ಖ್ಹಾರಿಸ್ ತರ‍್ಹಾನಿ ಲಾಲಚ್‌ಬಿ ಅಜು಼ ಭೋಗ್‌ನ ಗುಲಾಮ್ ಥಾ. ಅಪ್ಣ ಖರಾಬ್ ಖ್ಹಯಾಲ್ ಅಜು಼ ಗಲ್ತಿಕರಾಸ್ಮ ಅದ್ಮಿಖ್ಹಾರು ಅಪ್ಣುನ ದಾವೊ ಕರ್ತುಥು.ಅಪ್ಣೇಬಿ ಏಕ್‌ಥಿಏಕ್ ದಾವೊ ಕರ‍್ಯಾ.

2 ಪೇತ್ರ 2:18

ಗಲತ್‌ ವಾಟ್‌ಪರ್ ಚಾ಼ಲವಾಳನಿ ಖ್ಹಂಗ್‌ಥಿ ಛು಼ಕಿಜಾ಼ವಳ ನವ ಅದ್ಮಿನಿ ಜೋ಼ಡ್ಮ ಅವ್ಣೆ ಫಾಯಿದೊಕೊಂತೆ ಪೋಲಿ ವಾತೆನ ಬೋಲಿನ್, ಶರೀರ್‌ನಿ ಖರಾಬ್ ಆಖ್ಹ್‌ಮ ನಾಖಿನ್ ಘಣಿ ಢೊಂಗಿನಿ ಬುದ್ಧಿಥಿ ಇವ್ಣುನ ಮಂಕ್‍ಕರ‍್ನಖಾಸ್.

2 ಪೇತ್ರ 3:17

ಇನಖ್ಹಾಜೇಸ್ ಪ್ಯಾರ್‌ನ ದೋಸ್ತಿವೊ, ಆ ಖ್ಹಾರಿ ವಾತೆನ ಪಹಿಲೆಸ್ ಮಾಲುಮ್‌ಕರ್‌ಲಿದತೆ ಇನಾಖ್ಹಾಜೆ ತುಮೆ ಜ಼ತನ್‌ಥಿ ರ‍್ಹವೊ. ಖರಾಬ್ ಅದ್ಮಿನಿ ಖರಾಬ್ ಬೋದನೆಮ ಮಂಕ್‍ನಕೊ ಹುಯಿಜಾ಼ವೊ. ತುಮಾರಿ ಘಟ್ ವಿಶ್ವಾಸ್‌ಮಾಥು ಪಡ್ಣುನಾತೆ ಹೊಷಾರ್‌ರ‍್ಹವೊ.

ಯೂದನೆ ಲೀಖ್ಯೋತೆ ಚಿಟ್ಟಿ 1:16

ಆ ಖರಾಬ್ ಬೋಧನೆ ಕರಾವಾಳು, ಭಣ್‍ಕಾವಾಳುಬಿ ಗಲತ್‌ ಢೂಂಡಾವಾಳೂಬಿ ನಿಕ್‍ಳ್ಯೊಜಾನ್ ವಾಳೂಬಿ, ಬಡೈಮಾರವಾಳೂಬಿ ಶೊಂತ್‍ ಫಾಯಿದನಖ್ಹಾಜೆ ಖ್ಹರಾವ್ಣಿ ಕರಾವಾಳುಬಿ ಹುಯಿರ‍್ಹುಸ್.

ಯೂದನೆ ಲೀಖ್ಯೋತೆ ಚಿಟ್ಟಿ 1:18

ಅಪೊಸ್ತಲರ‍್ನೆ ತುಮುನ, “ಖ್ಹರ್ತಿನ ಹಗಾಮ್ಮ ದೇವ್ನಿ ಬಾರೇಮ ತುಮೂನ ನಕ್ಲೆ ಕರವಾಳು ಅದ್ಮಿಖ್ಹಾರು ರ‍್ಹಿಶೆ, ಅಜು಼ ಭಕ್ತಿಕೊಂತೆ ಆಖ್ಹ್‌ನ ಅಖ್ಖುಲೀನ್ ಚಾ಼ಲವಾಳು ಹುಯಿರ‍್ಹಿಶೆಕರಿ ಇವ್ಣೆ ತುಮೂನ ಬೋಲ್ಯುಥು.

ಯೂದನೆ ಲೀಖ್ಯೋತೆ ಚಿಟ್ಟಿ 1:4

ಶನಕತೊ ಭಕ್ತಿಕೊಂತೆ, ಅಪ್ಣ ದೇವ್ನ ವಾರ್‌ಖ್ಹಾನ ಭಾಣುಕರಿಲೀನ್‍ ಖ್ಹರಮ್‌ಕೊಂತೆ ಕಾಮ್ನ ಕರವಾಳುಬಿ, ಅಪ್ಣೊ ಎಕ್ಕಸ್ ಯಜಮಾನ್‌ಬಿ ಪ್ರಭು ಯೇಸುಕ್ರಿಸ್ತನ ಝಿಟ್ಕಾರವಾಳು ಥೋಡುಜ಼ಣು ಗಪ್ಲಥ್ಥಿ ಸಬೆಮ ಮಹಿ ಪೇಶಿರ‍್ಹುಸ್. ಅವ್ಣೆ ಅಗಾಡಿಥೂಸ್ ನಿಶತ್‌ನ ನೇಮಕ್‍ಹುಯಿರ‍್ಹುಸ್‍ ಕರಿ ಪವಿತ್ರ ವಚನ್‌ಮ ಲೀಖೈರುಸ್.