2 ಥೆಸ 1:3 - ದೇವ್ನಿ ಖ್ಹಾಚಿ ವಚನ್

³ ಹಮಾರ ಭೈಯೆ ಭೇನೊ, ತುಮಾರಿ ಬಾರೇಮ ಹಮೆ ಹಮೇಶ ದೇವ್ನ ಧನ್ಯವಾದ್ ಕರಿಯೇಸ್. ಅಮ್ ಕರಾನು ಹಮೂನ ಬರೊಬರಸ್‌ ದೆಖಾಯು, ಶನಕತೊ ತುಮಾರಿ ವಿಶ್ವಾಸ್ ಘಣು ಭಡುಕರಾಸ್ ಅಜು಼ ಏಕ್‌ಥಿಏಕ್‌ ತುಮಾರಿ ಪ್ಯಾರ್ ದನ್‌ಪರ್-ದನ್ ಭಡ್ತು ಜಾ಼ವಾದೆ.

2 ಥೆಸ 1:3 Iomraidhean Croise

ಲೂಕನೆ ಲೀಖ್ಯೋತೆ ಅಛ್ಛಿ ಸಮಾಚಾರ್ 15:32

ತೋಬಿ ಖ್ಹುಶಿ ಕರಾನು, ಶಂತೋಖ್ಹ್‌ ಕರಾನು ಬರಾಬರಸ್‌. ಶನಕತೊ ಆ ತಾರೊ ಭೈ ಮರಿಗಯೋಥೊ ಪಾಛೊ಼ ಜಿವ್ತೊಹುಯಿನ್ ಐರ‍್ಹೋಸ್, ಗುಮೈ ಗಯೋಥೊ ಮಳಿರ‍್ಹೋಸ್‌” ಕರಿ ಬೋಲ್ಯೊ.

ಲೂಕನೆ ಲೀಖ್ಯೋತೆ ಅಛ್ಛಿ ಸಮಾಚಾರ್ 17:5

ಅಪೊಸ್ತಲರ‍್ನೆ ಪ್ರಭುನ, “ಹಮಾರಿ ವಿಶ್ವಾಸ್‌ನ ಭಡಾವ್” ಕರಿ ಬೋಲಿಲಿದ.

ಯೋಹಾನ 15:2

ಮಾರಾಮ ರ‍್ಹೀನ್, ಪಂಡು ದೇಯಿಕೊಂತೆ ಹರೇಕ್ ಡಾಳಿನ ಯೋ ಕತ್ರಿನಾಖಸ್‌; ಅಜು಼ ಪಂಡು ದೇಸ್ತೆ ಹರೇಕ್ ಡಾಳಿನ ಬಿಜೂ಼ಬಿ ಜಾ಼ಖ್ಹತ್ ಪಂಡು ದ್ಯವಾನಿಘೋಣಿ ಇನ ಛಾ಼ಟಿನ್ ಪಾಕ್‍ಕರಾಸ್.

ಪೌಲನೆ ರೋಮಾಪುರವಾಳನ ಲೀಖ್ಯೋತೆ ಚಿಟ್ಟಿ 1:8

ಖ್ಹಾರೇಥಿ ಪಹಿಲೆ ತುಮಾರಿ ವಿಶ್ವಾಸ್‌ನಿ ಬಾರೇಮ ಜಗತ್ನ ಅಖ್ಖಿಬಾಜು಼ ಪೂಚ್‍ತಾಚ಼್ ಹೂಕರಸ್. ಇನಖ್ಹಾಜೆ ಮೇ ತುಮಾರಭಣೀಥು ಯೇಸುಕ್ರಿಸ್ತನ ನಾಮ್‌ಥಿ ದೇವ್ನ ಧನ್ಯವಾದ್ ಕರುಸ್.

1 ಕೊರಿಂಥ 1:4

ದೇವ್ ಕ್ರಿಸ್ತಯೇಸುಥಿ ತುಮೂನ ದೀರಾಖ್ಯೋತೆ ವಾರ್‌ಖ್ಹಾನಖ್ಹಾಜೆ ಮೇ ತುಮಾರಖ್ಹಾಜೆ ಮಾರ ದೇವ್ನ ಕದೇಬಿ ಧನ್ಯವಾದ್ ಕರುಸ್.

2 ಕೊರಿಂಥ 10:15

ಹಮೆ ಮಿತ್‌ಮೀರಿನ್ ಬಿಜೇಕ್‍ಜ಼ಣಾನ ಮಿನ್ಹತ್‍ನ ಫಲ್ನ ಲೀಲಿನ್‌ ಆ ಹಮಾರು ಕರಿ ಬೋಲಿಲ್ಯಾವಾಳ ಕಾಹೆ. ಕತೋಬಿ ಹಮಾರಿ ವಿಶ್ವಾಸ್ ಜಾ಼ಖ್ಹತ್ ಹುವಾತೆ ತಿಮ್ ತುಮಾರೇಥಿ ಹಮಾರು ಕಾಮ್ ಬಿಜೂ಼ಬಿ ಭಡ್ತುಜಾ಼ಶೆ.

ಎಫೆಸ 5:20

ಕೆದೇಬಿ ಖ್ಹಾರ ಕಾಮ್ನಖ್ಹಾಜೆ ಅಪ್ಣೊ ಪ್ರಭು ಯೇಸು ಕ್ರಿಸ್ತನ ನಾಮ್ಮ ಬಾ ಹುಯಿರ‍್ಹೋತೆ ದೇವ್ನ ಧನ್ಯವಾದ್ ಕರೊ.

ಫಿಲಿಪ್ಪಿ 1:7

ತುಮಾರಿ ಬಾರೇಮ ಮನ ಅಮ್ ಬೋಲಾವಸ್ತೆ ಖ್ಹಾಚು಼ಸ್. ಶನಕತೊ ಮೆ ಬಂದಿ ಹುಯಿರ‍್ಹವಾನಿ ವಖ್ಹ್‌ತೆಬಿ, ಸುವಾರ್ತೆನಿ ಬಾರೇನು ಆಡ್‌ಫೇಡ್‌ಮಾಬಿ ತುಮೆಖ್ಹಾರು ಮಾರಜೋ಼ಡೆ ದೇವ್ನಿ ವಾರ್‌ಖ್ಹಾಮ ಭಾಗ್‌ವಾಳ ಹುಯಿರ‍್ಹಾಸ್ ಕರಿ ತುಮುನ ಮಾರ ದಿಲ್ಮ ರಾಖಿಮ್ಹೇಲ್ಯೋಸ್.

ಫಿಲಿಪ್ಪಿ 1:9

ಅಜು಼ ತುಮಾರಿ ಪ್ಯಾರ್ ಅಜೂ಼ಬಿ ಜಾ಼ಖ್ಹತ್ ಭಡಿನ್ ಪೂರ ಅಕ್ಕಲ್‍ಥೀಬಿ ಖ್ಹಯಾಲ್‌ಥಿ ಮಳಿರ‍್ಹವಾಳ ಹುಯಿರ‍್ಹೇವ್ಣುಕರಿ ಮೆ ತುಮಾರಖ್ಹಾಜೆ ಪ್ರಾರ್ಥನೆ ಕರುಸ್.

1 ಥೆಸ 3:12

ತುಮಾರಪರ್ ಹಮಾರಿ ಪ್ಯಾರ್ ಕಿಮ್ಕಿ ಇಮ್ಮಸ್ ತುಮಾರಿ ಪ್ಯಾರ್ ಬಿಜಾ಼ಪರ್‌ಬಿ ಭಢ್ವಾದೆ ಇಮ್ಮಸ್ ತುಮಾರಟೇಕೆ ಹಮಾರಿ ಪ್ಯಾರ್‌ಬಿ ಜಾ಼ಖ್ಹತ್ ಹುಯಿರ‍್ಹವಾನಿಘೊಣಿ ಪ್ರಭು ಆಶೀರ್ವಾದ್‌ ಕರ‍್ವಾದೆ.

1 ಥೆಸ 3:6

ಕತೋಬಿ ತಿಮೊಥೆ ಹಮ್ಕೇಸ್ ತುಮಾರಕಂಥು ಹಮಾರಕನ ಆಯೊ. ಅಜು಼ ತುಮಾರಿ ವಿಶ್ವಾಸ್‍ಬಿ ಪ್ಯಾರ್‌ನಿ ಬಾರೇಮ ಅಛ್ಛಿ ಖಬರ್‌ನ ಇನೆ ಹಮೂನ ಬೋಲಿನ್, ಕದೆಕದೇಬಿ ಲಾಡ್‌ಥಿ ಖ್ಹಯಾಲ್ ಕರಿನ್ ಹಮೆ ಕಿಮ್ಕಿ ತಿಮ್ಮಸ್ ತುಮೇಬಿ ಹಮೂನ ದೇಖಾನ ಹರ್‌ಖ್ಹುಕರ್ತಥ ಕರಿ ಬೋಲಿರಾಖ್ಯೊಸ್.

1 ಥೆಸ 3:9

ತುಮಾರ ದೇಶೆಥಿ ಹಮುನ ಮಳಿರ‍್ಹುಸ್ತೆ ಶಂತೋಖ್ಹ್‌ನಖ್ಹಾಜೆ ಕೆತ್ರು ದೇವ್ನ ಧನ್ಯವಾದ್ ಕರ‍್ಯುತೋಬಿ ಬಶ್‌ ಕೋಹುವಾನಿ.

1 ಥೆಸ 4:1

ಖ್ಹರ್ತಿನಿ ವಾತ್ ಶಾತ್‌ಕತೊ, ಹಮಾರ ಭೈಯೇ ಭೇನೆವೊ ಯೇಸು ಪ್ರಭುನ ಅದಿಕಾರ್‌ಥಿ ತುಮೂನ ಶಾತ್ ಹುಕುಮ್ ದಿದಾಥ ಕರಿ ತುಮೂನ ಮಾಲುಮ್ ಛಾ಼. ತುಮೂನ ಬಿಜು಼ ಥೋಡಿ ವಾತೆ ಬೋಲಾನು ಛಾ಼.

2 ಥೆಸ 2:1

ಭೈಯೆ ಭೇನೊ, ಅಪ್ಣೊ ಪ್ರಭು ಹುಯಿರ‍್ಹೋತೆ ಯೇಸು ಕ್ರಿಸ್ತ ಆವಾನಿ ಬಾರೇಮ ಅಜು಼ ಅಪ್ಣೆ ಖ್ಹಾರು ಎಕ್ಟು ಹುಯಿನ್ ಇನ ಮಳಾನಿ ಬಾರೇಮ ತುಮೂನ ಬೋಲಿಲಿಯೇಸ್.

2 ಥೆಸ 2:13

ಪ್ರಭು ಪ್ಯಾರ್ ಕರಾಸ್ತೆ ಭೈಯೆ ಭೇನೆವೊ, ಹಮೆ ತುಮಾರಿ ಬಾರೇಮ ಹಮೇಶ ದೇವ್ನ ಧನ್ಯವಾದ್ ಕರಾವಳ ಹುಯಿರ‍್ಹಾಸ್. ಶನಕತೊ ತುಮೆ ಪವಿತ್ರಾತ್ಮಾಥಿ ಪಾಕ್‌ ಹುಯಿನ್, ಖ್ಹಾಚಿಪರ್ ವಿಶ್ವಾಸ್‌ರಾಖಿನ್ ರಕ್ಷಣೆನ ಲೀಲ್ಯಾವದೆಕರಿ ದೇವ್ನೆ ತುಮೂನ ಶುರುವಾತ್‌ಮಾಸ್ ಚೂ಼ಣಿರಾಖ್ಯೊಸ್.

1 ಪೇತ್ರ 1:22

ತುಮೆ ಖ್ಹಾಚ ಉಪದೇಶ್‍ನ ವಿಧೇಯ ಹುಯಿರ‍್ಹಿನ್ ತುಮಾರ ಆತ್ಮಾನ ಪಾಕ್‍ ಕರಿಲಿದಾತೆ ಇನಾಖ್ಹಾಜೆ ಪಾಕ್‌ಮನ್‌ಥಿ ಭೈಯೆಭೇನೆನಿ ಪ್ಯಾರ್‌ವಾಳ ಹುಯಿರ‍್ಹೇವ್ಣು. ಅಮ್‍ರ‍್ಹವಾಪರ್, ಏಕ್‌ಥಿಏಕ್ ಪಾಕ್‍ದಿಲ್‍ಥೀಬಿ, ಛು಼ಟ ದಿಲ್‌ಥಿ ಪ್ಯಾರ್‌ಕರೊ.

2 ಪೇತ್ರ 1:13

ಮೇ ಮಾರ ಶರೀರ್‌ಕರಿ ಘರ್‌ಮ ರ‍್ಹವಲಗೂಬಿ ತುಮುನ ಯಾದ್‌ದ್ಯವಾಡಿನ್ ಹುಮ್ಮಖ್ಹ್‌ ಕರಾವನು ನ್ಯಾವ್ನು ಕಾಮ್‌ಕರಿ ಮೇ ಸೋಚಿರಾಖ್ಯೊಸ್.

2 ಪೇತ್ರ 3:18

ಅಪ್ಣೊ ಪ್ರಭುಬಿ ರಕ್ಷಕಬಿ ಹುಯಿರ‍್ಹೋತೆ ಯೇಸು ಕ್ರಿಸ್ತನಿ ಬಾರೇಮಾನು ವಾರ್‌ಖ್ಹಾಮಾಬಿ ಗ್ಯಾನ್‌ಮಾಬಿ ತುಮೆ ಭಡ್ತಾಜಾ಼ವೊ, ಇನ ಹಮ್ಕೇಬಿ ಜ಼ಗ್‌ಜ಼ಮಾನಲಗೂಬಿ ಮಹಿಮೆ ಹುವಾದೆ! ಆಮೆನ್.