1 ತಿಮೊ 5:6 - ದೇವ್ನಿ ಖ್ಹಾಚಿ ವಚನ್

⁶ ಕತೋಬಿ ಏಕ್‌ ಮುಂಡಚ್ಚಿ ಬಿಜ಼ ಪರ್ಖ್ಹಾನ ಜೋ಼ಡ್ಮ ಇನಿ ಆಖ್ಹ್‌ನ ಪೂರ ಕರಾನ ಇನಿ ಜಿ಼ಂದ್‌ಗೀನ ದಿನಾಖಿದಿದೀತೊ, ಯೋ ಬಚಿರ‍್ಹಯೀತೋಬಿ ಮರ್‌ವಾದಾಖ್ಹಲಸ್.

1 ತಿಮೊ 5:6 Iomraidhean Croise

ಮತ್ತಾಯ 8:22

ಯೇಸುನೆ ಇನ, “ಮಾರ ಪೀಠೆ ಆವ್, ಮರ‍್ಯಹುಯಾಸ್‌ ಇವ್ಣಮ ಮರಿಗಯೂತೆ ಇನ ಮಾಟಿ ಕರಾದೆ” ಕರಿ ಬೋಲ್ಯೊ.

ಲೂಕನೆ ಲೀಖ್ಯೋತೆ ಅಛ್ಛಿ ಸಮಾಚಾರ್ 12:19

ಬಾದ್‌ಮ ಮಾರು ಮೇ, ಹೇ ಜಾನ್‌, ಕೆತ್ರಾಸ್ಕಿ ವರಖ್ಹ್ ಬೇಶಿನ್ ಖಾವಯೆತ್ರು ಅನಾಜ಼್ ತಾರಕನ ಪಡ್ಯೂಸ್. ಅರಾಮ್ ಕರಿಲೆ, ಖೈಪೀನ್ ಖ್ಹುಶಿ ಕರ್‌’ ಕರಿ ಇನು ಯೋಸ್ ಬೋಲಿಲಿದೊ.

ಲೂಕನೆ ಲೀಖ್ಯೋತೆ ಅಛ್ಛಿ ಸಮಾಚಾರ್ 15:13

ಥೋಡ ದನ್ನ ಬಾದ್‌ಮ, ಯೋ ನ್ಹಾನ ಛಿಯ್ಯಾನೆ ಇನಥೂತೆ ಖ್ಹಾರೂಸ್ ವೇಚಿನ್, ಪೈಶಾ ಕರಿಲೀನ್, ದೂರ್‌ಲ್ಯಾ ದೇಖ್ಹ್‌ನ ಜೈ಼ನ್. ಹಿಜ್ಜಾ಼ ಇನ ಮನ್ ಆವಾತೆ ಇಮ್‌ ಜಿವ್ಣುಕರಿನ್, ಇನಿ ಶೊತ್ನ ಗುಮೈಲಿದೊ.

ಲೂಕನೆ ಲೀಖ್ಯೋತೆ ಅಛ್ಛಿ ಸಮಾಚಾರ್ 15:24

ಆ ಮಾರೊ ಛಿಯ್ಯೊ ಮರಿಗಯೋಥೊ, ಪಾಛೊ಼ ಬಚಿ ಐರ‍್ಹೋಸ್; ಗುಮೈಗಯೋಥೊ ಹಮ್ಕೆ ಮಳಿರ‍್ಹೋಸ್‌’ ಕರಿ ಬೋಲ್ಯೊ. ತದೆ ಇವ್ಣೆ ಖ್ಹುಶಿ ಕರಾಲಗ್ಯು.

ಲೂಕನೆ ಲೀಖ್ಯೋತೆ ಅಛ್ಛಿ ಸಮಾಚಾರ್ 15:32

ತೋಬಿ ಖ್ಹುಶಿ ಕರಾನು, ಶಂತೋಖ್ಹ್‌ ಕರಾನು ಬರಾಬರಸ್‌. ಶನಕತೊ ಆ ತಾರೊ ಭೈ ಮರಿಗಯೋಥೊ ಪಾಛೊ಼ ಜಿವ್ತೊಹುಯಿನ್ ಐರ‍್ಹೋಸ್, ಗುಮೈ ಗಯೋಥೊ ಮಳಿರ‍್ಹೋಸ್‌” ಕರಿ ಬೋಲ್ಯೊ.

ಲೂಕನೆ ಲೀಖ್ಯೋತೆ ಅಛ್ಛಿ ಸಮಾಚಾರ್ 16:19

ಏಕ್‌ ಜ಼ಣೊ ಶೌಕಾರ್ ಥೊ. ಯೋ ಹರ್‌ಹಮೇಶ ಘಣಾಮೋಲ್‌ನು ರಾಯಿಜಾ಼ಮಣ್ಣ ರಂಗ್ನು ರೇಖ್ಹಮ್‌ನ ಲುಂಗ್ಡಾವ್‍ನ ಪೇರ‍್ಹಿಲೀನ್‌, ದನ್‌ರೋಜ಼್‌ ಘಣಿ ಅಕ್ಲಾಶ್‌ಥಿ ಜಿವ್ಣು ಚ಼ಲಾವ್‍ಕರ್ತೊಥೊ.

ಲೂಕನೆ ಲೀಖ್ಯೋತೆ ಅಛ್ಛಿ ಸಮಾಚಾರ್ 7:25

ನಾತೊ ತುಮೆ ಶಾತ್‌ ದೇಕ್ಣುಕರಿ ಗಯಾಥ? ಶನ್ಗಾರ್‌ನ ಲುಂಗ್ಡ ಪೇರ‍್ಹಿರಾಖಾಸ್ತೆ ಅದ್ಮಿನಾಕಿಶು? ಅಮ್ನು ಲುಂಗ್ಡು ಪೇರ‍್ಹಿನ್‌ ಅರಾಮ್‌ನಿ ಜಿ಼ಂದ್‌ಗಿ ಚ಼ಲಾವವಾಳು ಖ್ಹಾರು ಮಹೇಲ್‌ಮ ರ‍್ಹೇಸ್!

ಎಫೆಸ 2:1

ತುಮೆ ತುಮಾರು ಅವಿಧೇಯ ಬಿಜು಼ ಪಾಪ್ನಖ್ಹಾಜೇಥಿ ಆತ್ಮೀಕ್ ಪರಕ್ಮ ಮರಿಗಯಥ.

ಎಫೆಸ 2:5

ಖರಾಬ್ ಕಾಮ್ನ ಖ್ಹಾಜೇಥಿ ಆತ್ಮೀಕ್ ಪರಕ್ಮ ಮರಿಗಯಥಾತೆ ಅಪ್ಣುನ ಕ್ರಿಸ್ತನ ಜೋ಼ಡೆ ಜಿವಾಡ್ಯೊ.ಆ ರಕ್ಷಣೆ ತುಮೆ ಲೀರಾಖ್ಯಾಸ್ತೆ ದೇವ್ನಿ ವಾರ್‌ಖ್ಹೇಥಿಸ್.

ಎಫೆಸ 5:14

ಶನಕತೊ ಖಿವು ಅಛ್ಛಿನಿತರ ದೆಖಾವಸ್ಕಿ ಯೋಸ್ ದೆಖಾವಸ್, ಇನಖ್ಹಾಜೇಥಿ ಬೋಲೈರ‍್ಹುಸ್. “ಖ್ಹುತೊರ‍್ಹವಾಳ ಉಠಿಆವ್‌, ಮರಿರ‍್ಹವಾಳೆಥಿ ಮ್ಹೇಲಿನ್ ಉಠೊ, ತದೆ ಕ್ರಿಸ್ತ ತುಮಾರಮ ಉಜಾ಼ಖ್ಹ್‌ ಹುಯಿರ‍್ಹಿಶೆಕರಿ ಇನಖ್ಹಾಜೆ ಬೋಲೈರ‍್ಹುಸ್.

ಕೊಲೊಸ್ಸೆ 2:13

ತುಮೆ ತುಮಾರ ಪಾಪ್‌ಥಿಬಿ ಅಜು಼ ಶರೀರ್‌ನ ಆಖ್ಹ್‌ಥಿ ಛುಟ್ಕಾರ್ ಕೊಹುಯಾನಿತೆ ಇನಖ್ಹಾಜೆ ಆತ್ಮೀಕ್ ಪರಕ್ಮ ಮರಿರ‍್ಹಾವಳ ಹುಯಿರ‍್ಹಾಸ್ ಕತೋಬಿ ದೇವ್ ಕ್ರಿಸ್ತಥಿ ತುಮುನ ಜೂತುಕರ‍್ಯೊ.ಅಜು಼ ಅಪ್ಣಿ ಖ್ಹಾರೀಸ್‍ ಪಾಪ್ನ ಮಾಪ್ ಕರ‍್ಯೊ.

2 ತಿಮೊ 3:6

ಅವ್ಣಾಮ ಥೋಡು ಜ಼ಣು ಅದ್ಮಿನ ಘರ್‌ಮ ಪೇಶಿನ್, ಪಾಪ್‌ಥಿ ಭರೈರ‍್ಹೀತೆ ಅಜು಼ ಬಿಜಿ ಖ್ಹಾರಿ ಆಖ್ಹ್‌ಮ ಡುಬಿರ‍್ಹೇಸ್ತೆ ಬುದ್ಧಿಕೊಂತೆ ತಯೇಡಾವ್‌ನ ಕಬ್‍ಜಾ಼ ಕರಿಲೇಸ್.

ಯಾಕೋಬ 5:5

ಧರ್ತಿಪರ್ ತುಮೆ ಸುಕ್‍ಭೋಗ್‍ವಾಳ ಹುಯಿನ್ ತುಮಾರಿ ಆಖ್ಹ್‌ನ ಪೂರಕರೈಲ್ಯವಾಳ ಹುಯಿನ್ ಜಿವಿರ‍್ಹಾಸ್‍. ಬಲಿನ ದನ್ನ ಖ್ಹಾಜೆಕಿಶುಕಿ ಕರಿ ತುಮಾರು ದಿಲ್ನ ಫುಲೈಲಿದಾತೆ.

ಪ್ರಕಾಶಿತ್ 18:7

ಯೋ ಇನುಯೋಸ್ ಖ್ಹರೈಲಿನ್ ಭೋಗ್‌ನು ಜಿವ್ಣು ಕರೀಕಿ ಎತ್ರೇಸ್ ತುಮೆ ಇನ ಖ್ಹತಾಪ್ಣಿನ ದುಖ್‌ನ ಇನಾಪರ್ ಲ್ಯಾವೊ. ಕತೋಬಿ ಇನ ದಿಲ್ಮ ಕರಿಲಿದಿಕಿ ಮೇ ರಾಣಿ ಹುಯಿನ್ ಬೇಠಿಸ್, ಮೇ ಮುಂಡಚ್ಚಿ ಕಾಹೆ, ದುಖ್‌ನ ಕದೇಬಿ ಮೆ ದೇಖಿಷಸ್ ಕೊಯ್ನಿಕರಿ ಇನುಯೋಸ್ ಬೋಲಿಲಿದಿ.

ಪ್ರಕಾಶಿತ್ 3:1

ಸಾರ್ದಿಸ್‌ಮ ಛಾ಼ತೆ ಸಬೆನ ದೂತನ ಅಮ್‍ಲೀಕ್: ದೇವ್ನು ಖ್ಹಾತ್ ಆತ್ಮಾನ ಅಜು಼ ಖ್ಹಾತ್ ಶುಕ್ಕರ್‌ನ ಲೀರಾಖವಾಳು ಯೋ ಬೋಲಸ್ ಶಾತ್‌ಕತೊ, ತಾರು ಕಾಮ್‌ಖ್ಹಾರು ಮನ ಮಾಲುಮ್ ಛಾ಼. ಜಿವ್ತೊಕರಿ ನಾಮ್ ತುನ ರ‍್ಹಯುತೋಬಿ, ತೂ ಮರ‍್ಯೊಹುಯೊ ಹುಯಿರೊಸ್.