Markos 8:34 - Northern Tepehuan Bible

³⁴ Amaxi go Suxi báí mamaatïrdamigadï ïmadï go gaa odami ix makïdï ami darajatadai sai miadïrï gukakana daidi potïtïdai, —Xi ïmadutai gin oidatukuda ïrhiada gï agai xi mai ïïgiada ïgai ïïgi tïgibudadï dai gï agai xi bhai gï dukamikagi ïgai ix gï muatudagi jaa kuruxiabha gï xixakai. Ix makïdï bhai gï dukamikagi podukai gï agai xi gin oidatukuda.

Tepehuan Northern: Diuusi ñiooquidʌ utuducami oodamicʌdʌ

³⁴ Dai amaasi vaí ʌSuusi gʌmamaatʌrdamiga ʌʌmadu ʌoodami daidʌ itʌtʌdai: ―Isʌmaadutai giñoidatucuda ʌliada maitʌaagai isʌʌgi gʌtʌgitocagi, dai gʌaagai isvʌʌscʌrʌ baigʌducagi siʌduñiada gʌmuaatuda giñvaavoitudaitai daida giñoidatucuda.

Markos 8:34 Iomraidhean Croise

Mataibo 10:38

—Daiñi, kïïga maatï aapimï ix tuma bïïtarï go kukuruxi, sai ami xixixai óídakami go soimaaxi ibuadami dai naana dukai soimaaxi buididiña ïgai ami kukuruxiana. Podukai aapimï ïpï gï agai xi bhai gïn dukagi ix soimaaxi taatagi xïxkadï soimaaxi ibuadami dukai gïn nïijadagi óídakami gin urabakatai aapimï. Ix mai bhai gïn dukagi aapimï xi soimaaxi taatagi podukai gin oiditai aidï gia maiti ïr gïn ajïakami aapimï xi gin urabakagi— itïtïdai.

Mataibo 16:24

Daidi bhodïrï Suxi potïtïdai mamaatïrdamigadï, —Gïn aagidamu aanï ix dukatai gï agai xi ibuadagi odami ix makïdï ipïrhiadagi saidi ïr gin mamaatïrdamigakagi. Gï agai xi dagitoagi ïgai ïïgi tïgibudadï. Ka maiti gï agai xi ibuadagi ïgai ïïgi ixtumaxi ipïrhiadagi ïgai tudu. Xorai gin oijada ïrhiada gï agai bhaiyoma xi bïïx tasai kusukan dukai imïdagi go kuruxi ixtukïdï gï muatuda aagai ïgai. Gobai itïiya ïrhidi sai gï agai xi bïïx tasai bhai gï dukagi ïgai ix soimaaxi taatagi dai asta sai gï muatudagi gin oiditai. Aidï gia bhaigakamu ïgai xi gin oijadagi daidi ïr gin mamaatïrdamigakagi. Ïma dukai gia cho— itïtïdai.

Mataibo 27:32

Kaiyañdïrï iimïi ïgai dai ayi ïmo kïïrhi Sireniañdïrï oidakami, Ximuñi tïgidu ïgai. Dai go sandadaru gubukadakïdï tïjai sai kusubana ïgai go kuruxi.

Markos 10:21

Dai Suxi oigïda tïï go kïïrhi daidi potïtïdai, —Aidï gia mosïkaxi biïga pïxi gaagaragi gï buxtuidaga dai óídagi go tuminxi go soi titiigami pai gï biidakagi aapi aïkai Diuxi ïmadï tïbagiïrï. Poduñi aapi dai gokiïrï dibia dai gin oijada— itïtïdai Suxi.

Markos 7:14

Dai bhodïrï Suxi ïpamu bai go odami daidi itïtïdai, —Kïïga abïr tïgito kaï gin aatagi— itïtïdai.

Lukas 13:24

—Go kïïgakïrï bubaidaragai ïr ïmo kuuparagai arhidukami gajiakoga duu xako gï agai xi bapakiagi odami ïmo kiiyïrï dai go tuidakami go kii ïr Diuxi. Kabami abïr gïn aaga dai bapaki ami xako mai gïdu gajiakoga tudu. Kaxkïdï tudu ayimu ixtuigako tuidakami go kii kuupa agai go kuuparagai dai aidï ka mai bhaigakamu óídakami ix bapakiagi. Muidutai aapimï kidigamadïrï bimu aidï dai gaagamu ixdukatai bapakiagi dai ka mai ixtutuidimu. Aidï gataañimu aapimï baakigai dai potïdamu aapimï Diuxi, —Aapi Tïanïdami, kupiokañi go kuuparagai xi bapakia aatïmï— itïimu aapimï aidï. Dïï gia Diuxi pobai gïn tïdamu, —Maita an maatï xajadïrï óídakami aapimï— itïimu ïgai.

Lukas 14:33

Dai pomaaxi aapimïkïdï ïpï xi gin oijada ïrhiadagi aapimï gï agai xi gïn tïgitokagi aapimï sa bhai daasamu aapimï ixtumaxi gï aagadagi gin oiditai. Kaxkïdï tudu xorai mai bhai aagagi ix dagitoagi bïïxi ixtumaxi biakagi mai bhaiga xi ïr gin mamaatïrdamigakagi— itïtïdai.

Lukas 18:22

Daidi kaïkai go Suxi ix kaiti go kïïrhi saidi potïtïdai, —Kia biïga ïpï ïmo ixtumaxi xi iduña aapi— itïtïdai. —Kia gï biïga xi gaagaragi aapi gï buxtuidaga dai oidagi go tuminxi go soititigami— itïtïdai. —Aidï gia biakamu aapi naana maaxi ixtumaxi namïakami tïbagiana. Poduñi tudu dai gokiïrï gin uraba dai gin oijada— itïtïdai.

Lukas 20:45

Dai bhodïrï Suxi maa ïmo ñoki mamaatïrdamigadï dai bïïxi go odami ix makïdï ami daraka kaï.

Lukas 9:23

Daidi bhodïrï Suxi potïtïdai bïïxi go odami, —Gïn aagidamu aanï ix dukatai gï agai xi ibuadagi odami ix makïdï ipïrhiadagi ïr ïmo gin mamaatïrdamigakagi. Gï agai xi dagitoagi ïgai ïïgi tïgibudadï. Ka maiti gï agai xi ibuada ïgai ïïgi ixtumaxi ipïrhiadagi ïgai tudu. Gï agai bhaiyoma xi bïïx tasai kusukan dukai imïdagi ïgai go kuruxi ixtukïdï gï muatuda aagai ïgai. Gï agai tudu xi bïïx tasai bhai gï dukagi ïgai ix soimaaxi taatagi dai asta xi gï muatudagi gin oiditai. Aidï gia bhaigakamu ïgai xi gin oijadagi dai xi ïr gin mamaatïrdamigakagi. Ïma dukai gia cho—.

VUAANA 10:27

—Ix makïdï ïr gin sosoiga kañiñiru gia kïïga ïïgida kaïkana gin ñoki dai kïïga maatï aanï gin sosoiga dai ïgai gin ïmadï ajiopaiña.

VUAANA 19:17

Daidi bhodïrï go sandadaru bhïiyi go Suxi dai baidakai ïmo gidiïrï xako odami modïrï tïgidu. Dai ami Gólgota tïgidu Hebreokïdï ïpï. Daidi go Suxi ïïgi kusuba iimïi kuruxigadï.

Hechos 14:22

Dai dïgabunukai ïgai bïïxi go kiikiïrï ïgai gamaakaiña gubukadagai abhana go buaboitudadami daidi gaabïnakidiña xi kïïgakïrï buaboidaiña ïgai. Dai aagidimi ïgai sai gï agaitadai kia xi odami naana maaxi soi ïrhiaragai taatagi xi gokiïrï ayimu ixtuigako gatïanïda agai Diuxi.

Romanos 6:6

Kïï maatï aatïmï sai aidïxi Suxi gï xixatu kuruxiana aidï gïr ibhïdaga ïkidadï gï xixatu ïpï ïgai ïmadï. Podui Diuxi sai podukai ka maiti gïr tïanïdana go soimaaxkami.

Romanos 8:17

Maamaradï aatïmï Diuxi tudu. Kaxkïdï xibi bïïxi go bhai ïrhiaraga ix makïdï Diuxi bhai darasakami bia Suxi Kristo bïïtarï ïr aatïmï gïr bïïtarï ïpï. Dïï gia gï agai xi soimaaxi taatagi aatïmï ïpïan dukai ix dukatai taata Suxi bai podukai gïr aiyagi ïmo xadutudaragai ïgai ïmadï ïpï.

1 Korintios 15:31

Katoma gin aïjïiña mukigami bïïx tasai ibuadatai aanï gin aaduindaga, gobai kïïga ïr buaboi. Gïn aagidamu aanï xïï kïïga ïr buaboi gobai. Daiñi, ix xïïxi ïr buaboi sai bhai gin ïrhidi aanï aapimïkïdï bïïna darakatai aapimï Suxi Kristo pokaxi ïr buaboi ïpï sai bïïx tasai bhaitoma gin ajïi mukigami.

1 Korintios 8:13

Kaxkïdï maiti ipïrhidi aanï ix sobhidagi gin susukurhi buaboidaradï. Dai ix oidakagi tomax tuma kuadagai ix makïdï soimaaxi ïrhidi go jaa bhaiyoma mai ugimu aanï tomarhi ïmo imidagai tomaxi aanï kïï maatï sai maiti ïr soimaaxi gobai. Maiti ipïrhidi aanï ix sobhidagi gin susukurhi buaboidaradï kaxkïdï.

1 Korintios 9:19

Maiti gin aa namïidiña odami gin aaduindagai tudu ix kaxkïdï mai tipu xorai gin tïanïdagi. Dïï tomaxi mai tipu xorai gin tïanïdagi aanï ïïgi bhai aa ix ïmo pioñi dukai gaatabuadagi soiña iñïrhiditai bïïxi óídakami sai buaboitudaiña.

Galatas 2:20

—Aanï in bïïtarï pomaaxi gin oidakaragai xibi— antïtïdai. —Daiñi, ïkioma aanï ïr ïmo soimaaxi kïïrhikatadai. Dïï gia aidïxi muu Suxi Kristo gïr bïïtarï kuruxiana aidï muu go kïïrhi soimaaxkïdï ïgai ïmadï ïpï dai xibi ka utudui bii aanï. Dai kaxkïdï ka mai xu xi go kïïrhi ïkidadï oidaga gin tukugïrï dai bhaiyoma Suxi Kristo ïgai dai gin ïrana oidaga. Xibi oidaga aanï buaboitudaitai Suxi Kristo ix makïdï kïïgakïrï gïr oigïdai. Kïïga gïr oigïdai ïgai tudu dai kaxkïdï gï dagito sai gï muatudana dai kïïgakïrï gïr bubaitu— antïtïdai aanï go Piduru.

Galatas 5:24

Daiñi, aatïmï ka bïïna daraka Suxi Kristo xibi dai ka ïkobai bii aatïmï gïr ïïkidadï tïgibudagaiñdïrï. Aatïmï gïr bïïtarï ka kuruxiana xixapikan dukai biyan dui gïr ïïkidadï tïgibudagai tudu dai kaxkïdï ka mai bia aatïmï xi ïïgiadagi gobai xïïxkadï gïr aagidagi sai iduña rïrhidi ixtumaxi.

Galatas 6:14

Dïï aanï gia xadïrï gïdukïdï gin ïrhidiña ibuadatai aanï ïmo aaduindagai ïïgi gin gubukarhigakïdï podukai. Mosïkaxi ïmo ixtumaxi gia pokaitada antaada aanï sai gia namïga dai gobai ïr go aaduindagai ix makïdï idui Suxi Kristo kuruxiana. Ami tudu kuruxiana bhai dui Suxi Kristo sai ka mai biakagi aanï xi ïïgiadagi go tïgibudagai ix makïdï oidaga tami oidigi daama. Ïmo mukiadï dukai gin bia ïgai bïïtarï go tïgibudagai gobai tudu. Dai xibi ïpïan dukai xi ïmo mukiadï ka maiti ïr soiñi podukai ka maiti ïr soiñi gin bïïtarï go tïgibudagai ix makïdï oidaga tami oidigi daama ïpï. Bïïxi gobai bhai dui Suxi kuruxiana gin bïïtarï.

Filipenses 3:10

Gin aaduñi, kïïga biaka in ïrhidi bamioma urabaragai Suxi Kristo ïmadï. Taata in ïrhidi sai kïïga gubuakami dukai gaatabuadagi ïgai gin ïmadï ïpïan dukai ix dukatai gubuakami aatadui Diuxi go Suxi ïmadï aidïxi duakaturhi ïgai. Biaka in ïrhidi urabaragai Suxi ïmadï soimaaxi taatakai aanï ïpïan dukai xi taata ïgai. Ïpïan tuigaka in ïrhidi aanï Suxi Kristo asta xako ukami bhai gin dukagi ix mukiagi ïpïan dukai ïgai.

Filipenses 3:7

Ïkioma buaboitudaiña aanï saidi ïr soiñikatadai bïïxi gobai gin bituldaraga dai gin aaduindaga. Dïï gia xibi ka maatï aanï sai maiti ïr soiñi gobai toma lïïchi. Xibi buaboitudai aanï Suxi Kristo bhaiyoma.

Kolosenses 1:24

Gin aaduñi Diuxi amadïrï, aanï soimaaxi taatamai xibi ibuadatai ïmo aaduindagai ix makïdï ïr soiñi gïn bïïtarï. Dïï gia tomaxi soimaaxi taatakagi aanï bïïxkïrï bhai gin ïrhidiña aanï maatïkatai sai aapimï gïn bïïtarï soimaaxi taataimi aanï. Daiñi, Suxi Kristo soimaaxi taata go buaboitudadami bïïtarï baasïkioma dai xibi aanï in ajïga xi soimaaxi taatagi go buaboitudadami bïïtarï ïpï ïpïan dukai ïgai.

Kolosenses 3:5

Kaxkïdï abïr dagitoda ixtumaxi ibuadana aapimï aidïxi oidiña aapimï gïn ïkidadï oidakaraga. Maiti abïr ïmadï bopoda tudu ix makïdï maiti ïr gïn aduñi dai maiti abïr tïtïgito ajiopada podukai ïpï. Maiti abïr ibuada ïrhiada buirudagai tudu. Dai maiti abïr koimudadï tutiaka. Tomaxorai ix makïdï koimudadï tutiakagi ïpïan dukamikana ix makïdï Diuxi dukai nïidi ixtumaxi ix makïdï maiti ïr Diuxi. Ïgai bamioma namïakami dukai nïidi ixtumaxi oidaga tami oidigi daama dai mai pokaxi namïakami dukai nïidi ïgai Diuxi.

2 Tesalonicenses 3:11

Dïï kajioma aatïmï sai paparïga ïïmadutai aapimï. Maiti as aatabuayi ïgai dïï gia jaa aaduindadïrï gia tïanïdan dukai bapasai.

Tito 2:12

Dai xibi maatï nïiditai aatïmï xïï kïï tuiga Diuxi gobai gïr soikïi naana maaxi ixtumaxiïrï. Gïr soikïi gobai xi dagitoagi aatïmï ixtumaxi mai bhai ïrhidi Diuxi. Dai gïr soikïi ïpï xi gajiadïrï biagi aatïmï go soimaaxi ix makïdï ibuada ïrhidiña odami ix makïdï mai buaboitudai. Dai maatï nïiditai aatïmï xïï kïï tuiga Diuxi gobai gïr soikïi xi sïïrhi gïr tïtïgitoagi ïpï dai xi buañixikan dukai óídakagi idi oidigi daama kïïga ïïgiditai aatïmï Diuxi. Bïïxi gobai gïr soikïi maatï nïiditai aatïmï xïï kïï tuiga Diuxi otosakai ïgai Suxi Kristo.

Hebreos 13:13

Go óídakami soi dukai nïidiña go Suxi tudu dai kaxkïdï soi buididi podukai maigobai busaidakai go kiikiañdïrï. Kaxkïdï tï tai ïpïan dukai soimaaxi taata Suxi soi dukai gïr nïiditai jaa urabakatai aatïmï Suxi. Tï oijada Suxi tomaxi maigobai ïkobai gïr bubiadan duñagi óídakami soi dukai gïr nïiditai.

1 Pedro 4:1

Daiñi, Suxi Kristo soimaaxi taata dai muu aidïxi tami oidigi daama dakatadai ïgai. Dai kaxkïdï aapimï gï agai sai gïn kabakadagi dai ïpïan dukai tïtïgitoagi aapimï ïgai. Gï agai sai bhai gïn dukagi ix soimaaxi taatamadagi ïpïan dukai ïgai tudu. Ix soimaaxi taatamadagi aapimï ïpïandukai Suxi Kristo oiditai aapimï ïgai gobai itïiya ïrhidi sai ka dagito aapimï go soimaaxkami ix makïdï oidiña aapimï ïkioma.

1 Pedro 4:13

Bhai gïn ïrhiadabïrai bhaiyoma. Gobai ix makïdï taatamaimi aapimï ïr ïmo urabaragai Suxi Kristo ïmadï kaxkïdï. Ïgai podukai soimaaxi taata ïpï tudu. Dai gobai itïiya ïrhidi sai gia kabami bhai gïn ïrhiadamu aapimï xïxkadï dibiagi ïgai ïpamu xïïxkadï gï maaxitudagi xïï xigiamaaxi ïgai dai xïï kabami ïr gubuakami ïpï.

2 Pedro 1:14

Kaxi gin maatïturhi Suxi Kristo Gïr Nukadakami sai ka otoma mukia iñagai aanï tudu.

1 Juan 3:16

Daiñi, Suxi Kristo ïïgi gï tïïgi saidi gï muatudana gïr bïïtarï dai pobuadatai gïr tïtïïgidi ïgai ixdukatai kïïgakïrï oigïada aatïmï jaa. Dai gokïdï gï maatï sai gï agai aatïmï xi gamaakadagi tomax tumaxi dai asta ïïgi gïr ibhïdaga soiña rïrhiditai gïr aaduñi.

Apokalipsis 2:10

Daiñi, ka miadaimi xi soimaaxi taatagi aapimï. Aidï go diabora gatïañi agai gïn maamaixaragai. Soimaaxi taatamu aapimï chïki tasai tudu nïidana sa bhai ïr buaboi xi gin buaboitudai aapimï. Dïï maiti abïr duduadikuda dai bhaiyoma abïr apia buaboitudada aapimï tomaxi gïn kodagi go jaa dai aanï gïn maakimu ïmo gïdukami maitïki. Gïn maakimu aanï xi kïïgakïrï óídakana aapimï bïïxkïrï bïïtarï tudu.