Isa 53:11 - Northern Tepehuan Bible

¹¹ Gïr Nukadakami otosadï kïï tuigakïdï nïidamu gïïgïbidaragai ix makïdï taata ïgai ix xïï gïïpi ïr soiñi ka agai dai kïï bai gï ïldamu nïiditai. Ïgai bhïï aimïrada agai soi maaxkamigadï mui odami dai podukai kïïgakïrï bubaida agai.

Isa 53:11 Iomraidhean Croise

Isa 53:12

Kaxkïdï Gïr Nukadakami maakimu gubukadagai. Dasamu ïgai xi ïr gïï bhaitï kïakamigadï ka agai mui aaduñdï. Maatïmu ïgai buidïrï ix makïdï bui bïïtï. Dai bhodïrï gïïpi bhai ïrhiarakïdï takobida agai maitïkidï aaduñdï ïmadï. Ïïgi gï tïïgitu ïgai mïtai mua. Odami ïmo soimaaxi ibhïdagami dukai nïidi. Dïï ïgai muu kusu imïitai mui odami soi maaxkamigadï ix makïdï mai ïïgidi Diuxi. Podukai gï báí ïgai bïïtarï ix makïdï mai ïïgiditadai Diuxi.

Isa 53:8

Maiti ïr soi maaxi ibuadami ïgai dïï odami bïïxkïrï busaitu maixakaruañdïrï dai mua. Mai tipukatadai xorai soiñagi. Muu ïgai taatakai gïïgïbidaradï odami soimaaxi ibuadatai odami. Mai maamara ïgai dai muu.

Mataibo 20:28

—Gï agai xi gin ïpïan buadagi aapimï tudu. Aanï dibia tami oidigi daama ïmo pioñi dukai dai ïïgi gin tïïgida iñagai saidi soi gin buidadagi daidi gin muagi gin buidïrï bïïtïkamiga. Mukimu aanï dai kïïgakïrï bubaidamu mui óídakami. Podukai dasamu aanï namïgadï ix makïdï buaturhi ïgai soimaaxi ibuadamikatai ïgai tudu. Ïmo pioñi dukai aanï óídakami bïïtarï tudu tomaxi aanï ïr go Diuxi otosadï ix makïdï ïmo kïïrhi busai dai kïïga bia aanï sïïrhikami ix kabami tïanïdagi óídakami— itïtïdai.

Lukas 22:44

Dai Suxi apia kabamioma daanïi Diuxi aidï. Dai kabami soimaaxi taata ïgai dai kabami bajurai. Bajuradï otaitadai dïbïrapi ïpïan dukai ïrai.

VUAANA 16:21

Bhaiton ïpïan taadakamu aapimï ïmo oki xudu buapa agadagi ïmo aarhi odami. Ïmo oki xudu buapa agadagi ïmo arhi xïïñi soi taadakana tukamïrï. Dïï gokiïrï ka maigobai imïiña soi ïrhiaradï dai kïïga bhai ïrhidiña ka buapakai go arhi odami.

VUAANA 17:3

Dai gï agai ix odami kïï gï maatïkagi. Kaxkïdï tudu mosïkaxi aapi ïgai dai buaboikïdï ïr Diuxi. Dai gï agai ix maatïkagi ïpï ix aanï ïr go Ga Tïanïdami ix makïdï aapi otoi tami oidigi daama. Ïma dukai xadïrï kïïgakïrï óídakana odami bïïxkïrï bïïtarï ix maiti gïr maatïkagi ïgai— itïtïdai.

Romanos 4:24

Aatïmï gïr bïïtarï ojixi gobai ïpï. Daiñi, Diuxi kïïgakïrï gïr nïijadamu ïpï buaboidakai aatïmï ïgai ix makïdï duakaturhi go Suxi Gïr Nukadakami mukukai ïgai. Buaboidakai aatïmï Diuxi tudu.

Romanos 5:9

Suxi Kristo aaxi ïradï gïr bïïtarï kaxkïdï xibi Diuxi kïïgakïrï gïr nïidi. Dai xi Diuxi kïïgakïrï gïr nïidi aidï gia ka maiti gïr ayimu gïgïbidaragai.

1 Korintios 6:11

Dai ïïmadutai aapimï pomaaxkana ïkioma ïpï. Dïï gia xibi ka buaboitu aapimï Suxi Kristo Gïr Nukadakami dai xibi Diuxi Ibhïadï ka gïn abhana ayi ix kaxkïdï ka buañixi aapimï dai kïïgakïrï gïn nïidi Diuxi dai xibi ka ïkobai darasadï aapimï Diuxi.

2 Korintios 4:6

Daiñi, Diuxi ño ïïki aidïxi kia tukamukatadai oidigi daidi itïi ïgai, Ipïrhidi aanï sai oidakana kudagi, itïi ïgai. Dai ka oidatu kudagi dai ka kudidikami bii oidigi. Dai xibi ka kudidakan dukai bia ïgai gïr iibhïdaga ïpï gïr tïtïïgiditai ïgai ixtumaxi ïr buaboi. Po dui ïgai sai ka maatïkana aatïmï xïïxi ïr gïdukami ïgai dai xïï xigian tuiga. Gïr tïgito nïiditai aatïmï Suxi Kristo podukai kïïga mamaatïrïi aatïmï xïïxi ïr gïdukami Diuxi dai xïï xigian tuiga ïgai tudu.

Galatas 4:19

Gin aaduñi Diuxi amadïrï, sïïrhikïdï buamï gïn ïrhidi aanï aapimï gïn bïïtarï. Gin maamara xixïñi dukai gïn nïidi aanï tudu gïn oigïdaitai aanï. Dai naana maaxi tïtïitoi aanï aapimïkïdï buamï iñïrhiditai. Asta ïpïan taadakana aanï xïïxkadï ïmo oki karhioga duadi agadagi ïmo aarhikïdï. Potadakana aanï buamï iñïrhiditai tudu. Dai mos apia potadakamu aanï asta xïïxkadï ïpïan tutiakagi aapimï Suxi Kristo ka kïïga gïrakai gïn buaboidaraga.

Hebreos 12:2

Gin aaduñi, ix dukai ïmo mïradami bia xi kïïga gï tïgito nïidagi xako mïmïrai ïgai dai bia xi sïïrhi bhaitiakoga nïijadagi. Podukai ïpï aatïmï ïpï apia kïïga oijada ïrhiada aatïmï gïr buaboidaraga gï agai xi tïgito ajiopada aatïmï Suxi Kristo ixdukatai idui ïgai dai podukai ibuadagi aatïmï ïpï. Gïn tïgitobïrai tudu sai ïgai kïïga buaboitudaiña sai Diuxi maaki agai ïmo gïdukami bhai ïrhiaragai dai kaxkïdï gï kabakatu ïgai kuruxiana nagiïkatai. Kïïga maatïkatadai ïgai sai go kuruxi ïr ïmo gïgïbidaragai soimaaxi ibuadami bïïtarï tudu. Dïï bïïxkïrï mai buamï ïrhidi ïgai tomaxi xaïraraga xi óídakami podukai ïmo soimaaxi buadami dukai gïgïbituldagi xixakai kuruxiana. Dai xibi ka bhïiyi ïgai ïmo gïdukami xadutudaragai sïïrhixapadïrï daibakai ïgai Diuxi amïka xakoga dakatai gatïanïi Diuxi. Podukai go bïïxi adama gatïanïdami bii Suxi tudu.

Hebreos 9:28

Dai podukai ïpï Suxi Kristo ïïgi gï dáí mosïkaxi ïmo imidagai ïmo daxdaragai dukai. Podui ïgai bhai buadatai mui óídakami bïïtarï soimaaxi ibuadamikatai óídakami. Dai gobai ix makïdï idui ïgai, gï dasakai ïgai mos arhi ïmo imidagai ïmo daxdaragai dukai óídakami bïïtarï, gobai bïïxkïrï bïïtarï namïaka agai. Dai gokiïrï ïpamu dibiagai ïgai dïï mai daamioma ïpamu bhai buada agaitai gïr soimaaxkamiga bïïtarï. Bhaiyoma dibiagai ïgai dai kïïgakïrï bubaida aagai bïïxkatai ix makïdï bhai ïrhiarakïdï nïnïraka ix dibiagi ïgai ïpamu. Ka bhai dui ïgai kïïgakïrï bubaidaragai bïïxkïrï bïïtarï tudu.

1 Pedro 2:24

Aatïmï gïr ajïakatadai gïgïbidaragai soimaaxi ibuadamikatai aatïmï tudu dïï gia Suxi taata go gïgïbidaragai gïr bïïtarï mukukai kuruxiana. Po dui ïgai saidi ka maiti gïr tïanïdagi go soimaaxkami. Ïpïan dukami gïr bia ïgai ïmo mukiadï ix makïdï ka mai bhaiga xi ïïgiadagi go soimaaxkami tudu. Ka mai bia aatïmï xi ïïgiadagi go soimaaxkami tudu ka koidadï dukai biïkai aatïmï go soimaaxkami bïïtarï. Po dui ïgai sai ka ïma dukai óídakagi aatïmï ibuadatai ixtumaxi ipïrhidi Diuxi. Gï muragitu ïgai saidi kïïgakïrï bubuakïna aatïmï tudu.

1 Pedro 3:18

Asta Suxi Kristo soimaaxi taata kïïga ibuadatai ïgai tudu. Muu ïgai bhai buadatai gïr soimaaxkamiga bïïtarï. Dai podukai bhai dui ïgai gïr bïïtarï bïïxkïrï bïïtarï dai ka mai biïga bamioma daxdaragai xibi. Kïïga buañixikami ïgai tudu dai muu ïgai aatïmï soimaaxi ibuadami gïr bïïtarï sai kïï biïna aatïmï Diuxi ïmadï. Gï muatu tukugadï tudu dïï gia gï duakaturhi ïpamu Ibhïadï.

2 Pedro 3:18

Kïïga abïr óídaka bhaiyoma saidi podukai bïïx tasai bamioma maatï taatana aapimï xïï kïï tuiga Suxi Kristo Gïr Nukadakami gïn bïïtarï. Gïr kïïgakïrï bubiadamiga ïgai tudu dai gï agai sai bïïx tasai bamioma kïïga maatïkagi aapimï ïgai. Podukai bamioma kabakatudamu gïn buaboidaraga gin aaduñi. Ipïrhidi aanï sai bïïxi óídakami xadutuadana Suxi Kristo dai kïïga ñokadana ïgai bui bïïxkïrï bïïtarï. Sai pogïduna gobai tudu. Mosïkaxi.

1 Juan 2:1

Aapimï gin maamara Diuxi amadïrï, gïn soiña in ïrhidi aanï sai mai soimaaxi ibuada aapimï dai kaxkïdï gïn otoxdi aanï idi ojai. Dïï gia xïduñada soimaaxi ibuadagi ïmadutai aatïmï, aidï gia kïïga maatï aatïmï sai bia aatïmï xorai gïr soiñagi dai gïr ñokituldagi Diuxi buitapi. Ïgai ïr Suxi Kristo ix makïdï kïïga buañixi ibhïadï.

2 Juan 1:1

Aanï ïr Juan dai gïn otoxdi idi ojai ïmo bhaitï kïakamigadïkatai aanï bïïxkatai go buaboitudadami. Ïmo biatuldaragai gïn bïïtarï bïïxkatai aapimï buaboitudadami ix makïdï gïn ïmapaidi dai xadutudai Diuxi ami xako daraka aapimï. Ïko bubaidadï aapimï Diuxi aapimï gin aaduñi. Ïmo aadunumï dukai aatïmï, aanï ïmadï aapimï tudu, buaboitudaitai aatïmï ixtumaxi ïr buaboi. Kaxkïdï kïïga gïn oigïdai aanï dai gïn ojidi. Dai bïïxi go gaa buaboitudadami aipakoga óídakami gïn oigïdai ïpï.

2 Juan 1:3

Gin aaduñi, Diuxi gïr Oga dai Suxi Kristo ix makïdï ïr Diuxi Maradï kïï tutuiga gïr bïïtarï dai apia kïï tutiaka agai gïr bïïtarï dai oigïda gïr nïijada agai bïïxkïrï bïïtarï. Kaxkïdï bïïxkïrï ibhïxtakan taadaka agai gïr iibhïdaga kïïga buaboitudaitai aatïmï dai gïr oigïdatai aatïmï aipakoga.