Hechos 16:1 - Northern Tepehuan Bible

¹ Daidi go Pabora ayi xako Derbiïrï dai Listrana tïtïïgidu kiiki. Ami tïï ïgai ïmo buaboitudadami Timoteo tïgidukami. Ïgai ïr maradïkatadai ïmo oki judiu buaboitudadami ïpï dai ogadï ïr griego ñokadami dai maiti ïr judiu.

Tepehuan Northern: Diuusi ñiooquidʌ utuducami oodamicʌdʌ

¹ Paavora ʌʌmadu Siilasi Derviʌrʌ aayi dai Listirʌrʌ. Dai ami tʌʌ ʌmo vaavoitudadami Timoteo tʌʌgiducami. Ʌgai ʌrmaradʌcatadai ʌmo ooqui judíu daidʌ ʌrvaavoitudadami ʌʌpʌ daidʌ ʌoogadʌ ʌrgiliego.

Hechos 16:1 Iomraidhean Croise

Hechos 14:1

Daidi go Pabora ïmadï Bernabe baapa judidiu kiupaigadïrï aïkai ïgai Ikoniïrï. Arhiïxi kïïga ñiño ïgai bai mui odami buaboitu, modukai judidiu ïmadï ix makïdï maiti ïr judidiu.

Hechos 14:21

Ami Derbiïrï aagidi Pabora go bhai ïrhiaragai aatagi. Dai mui odami buaboitu bai ïgai gamaatïturhi ixdukatai oijadagi Diuxi. Bhodïrï aa surhi go Pabora ïmadï Bernabe dai ayi Listrana dai abhiadïrï iji Ikoniamu dai gokiïrï ayi Antiokiïrï ïpamu.

Hechos 14:6

Dïï máí Pabora ïmadï Bernabe dai dïgabuna boopoi dai ayi ïmo oidigïrï xako Likoniana tïgidu dai ami ayi ïgai kiiki xako Listrana dai Derbiana tïtïgidu. Dai ayi ïgai jaa kiikiïrï ïpï nobai Likoniana ïpï.

Hechos 17:14

Dadi go buaboitudadami otoma otoi go Pabora maigobai kostamu. Dïï go Silas ïmadï Timoteo anaaxi bii Bereana.

Hechos 18:5

Daidi gokiïrï go Silas ïmadï Timoteo ayi Masedoniañdïrï. Dai Pabora dagito somaragai ikuxi bhaabhaki dai mos aagidiña óídakami ix kaiti Diuxi ñokidï. Sïïrhi aagidiña ïgai go judidiu sai Suxi ïr Diuxi Otosadï Gïr Bhaitï Kïakamiga.

Hechos 19:22

Dai bhodïrï Masedoniamu otoi ïgai goka gï aaduñi. Timoteo dai Erasto tïtïgidukana ïgai daidi ïr soikïdakamikana aaduindadïrï. Dai Pabora anaaxi bii bhai tïbïpi xako Asiana tïgidu oidigi.

Romanos 16:21

Diuxkïdï gïn biaturhi go Timoteo gin soikïdamiga. Dai gin susukurhi Jason dai Lucio dai Sosipatro gïn biaturhi ïpï. Ïgai bïï baikatai ïr aanï gin aaduñi ïpï.

1 Korintios 16:10

Gin susukurhi, go Timoteo imi agai gamoko dai kïïga gïn ïbhiada antaada ïgai mïï dibiakai. Kïï po ïrhiada antaada ïgai sai aapimï soi dukai nïidi. Kaxkïdï abïr kïïga miadïgida kïïga xadutudaitai sai mai duadimukagi ïgai. Gin ïpïan dukai ibuayi ïgai Diuxi aaduindadï tudu.

1 Korintios 4:17

Pomaaxi bïïtarï gïn otoxi aanï go Timoteo tudu. Ïgai gïn soiñamu ix gin ïpïan dukai óídakagi aapimï. Go Timoteo ïr gin maara Diuxiïrï ïpï dai kïïga oigïdai aanï. Ïgai kïïga aatabuayi ibuadatai aaduindadï Gïr Nukadakami. Dai gïn tïgitotuldamu ïgai ix dukatai oidaga aanï bïïna dakatai aanï Suxi Kristo. Dai mai xu ix ïma dukai aagai aanï ñoki dai ïma dukai ibuayi. Cho. Bhaiyoma ibuayi aanï ix dukai aagidiña aanï buaboitudadami ïmpaiñdaradïrï dai mai xu ix ïma dukai ibuayi aanï.

1 Korintios 7:14

Kaxkïdï tudu ïmo kïïrhi ix makïdï mai buaboitudai kaxi ïr ïkobai dasadï Diuxi ïmadï dakatai ïgai ïmo oki buaboitudadami. Dai podukai ïpï ïmo oki ix makïdï mai buaboitudai kaxi ïr ïko dasadï Diuxi ïmadï dakatai ïmo kïïrhi buaboitudadami ïpï. Ix maiti ïr buaboikamudai podukai aidï gia Diuxi mai kïïgakïrï nïijadamudai maamaradï. Dai kïïga maatï aatïmï sai maamaradï ïmo buaboitudadami ïr ïko bubaidadï Diuxi ïpï dai Diuxi kïïgakïrï nïidi.

2 Korintios 1:1

Aanï ïr Pabora dai gïn otoxdi aanï idi ojai otosadïkatai aanï Suxi Kristo. Aanï ïr ïmo sïïrhikami biakami otosadïkatai Suxi Kristo tudu. Diuxi podukai ipïrhi kaxkïdï. Dai tami gin ïmadï daja Timoteo ix makïdï ïr gïr sukurhi Diuxi amadïrï ïpï dai gin soikïi gobai ibuadatai aanï idi ojai. Idi ojai ïr bïïtarï bïïxkatai aapimï buaboitudadami ix makïdï gïn ïmpaidiña ami Korintoïrï dai bïïxkatai go gaa buaboitudadami bïïtarï ix makïdï bïïxi aipako óídaga amïka Gresiïrï ïpï. Idi ojai ïr bïïxkatai aapimï gïn bïitarï ix makïdï ïr ïko bubaidadï Diuxi tudu. Ïmo biatuldaragai bïïxkatai aapimï gïn bïïtarï.

2 Korintios 1:19

Daiñi, aanï ïmadï go Silbano dai go Timoteo ïr oijadami Suxi Kristo. Dai Suxi Kristo mai ïma dukai gï tïtïitoi xïïxkadï pokaitadagi saidi iduña agai ixtumaxi. Bïïxkïrï ibuayi ïgai ixtumaxi aagadagi tudu. Mai yaatagïi ïgai. Kaxkïdï gï maatï sai aatïmï mai yaatagïi ïpï gïn tïtïgiditai aatïmï ñoki aagaitai Suxi Kristo. Oijadami aatïmï Suxi Kristo kaxkïdï. Ïpïan buayi aatïmï ïgai tudu dai ïgai mai yaatagïi.

Filipenses 1:1

Bhaiga aapimï buaboitudadami Filipoïrï óídakami. Aanï ïr Pabora ïmadï Timoteo ix makïdï gïn otoxdi idi ojai pipioñigadïkatai aatïmï Diuxi. Idi ojai ïr bïïxkatai aapimï gïn bïïtarï ix makïdï ïr buaboitudadami dai bïïtarï go nunukadami buaboitudadami ami ïpï ïmadï soikïdadami buaboitudadami ïpï. Idi ojai ïr bïïxkatai aapimï gïn bïïtarï tudu ix makïdï bïïnaka Suxi Kristo dai ïr ïko bubaidadï Diuxi.

Filipenses 2:19

Gin aaduñi Diuxi amadïrï, kïïga buaboitudai aanï sai gin soiñamu Suxi Gïr Nukadakami. Gin soiñamu ïgai sai otoma otosana aanï go Timoteo gamoko sai gïn dibidana tudu. Dai buaboitudai aanï ïpï sai bhai gïn ïrhiadamu aapimï gïn dibidakai ïgai. Dai po in ïrhidi aanï sai aanï ïpï bhai gin ïrhiadamu gokiïrï dibiakai ïgai ïpamu dai gin aagidakai ïgai ix dukatai daraka aapimï amïka.

Kolosenses 1:1

Aapimï gin aaduñi Diuxi amadïrï Kolosiïrï óídakami, aanï ïr Pabora dai gïn ojidi idi ojai. Gïn ojidi aanï aapimï tudu ix makïdï bïïnaka daraka Suxi Kristo dai ix makïdï mai dagitokatai buaboitudai Diuxi. Dai tami gin ïmadï daja gïr aduñi Timoteo ïpï ibuadatai aanï idi ojai. Gï agai sai maatïkagi aapimï sai bia aanï ïmo sïïrhikami otosadïkatai aanï Suxi Kristo Gïr Nukadakami. Diuxi ïgai dai ipïrhi sai biakana aanï gin sïïrhikamiga tudu. Dai aanï ïmadï Timoteo ipïrhidi sai maatï taatana aapimï xïï kïï tuiga Diuxi gïr Oga gïn bïïtarï. Dai ipïrhidi aatïmï sai gïn maakana ïgai ibhïxtaragai gïn ibhïdagïrï.

1Tesalonicenses 1:1

Bhaiga aapimï buaboitudadami ix makïdï gïn ïmpaidiña ami Tesalonikïrï. Aanï Pabora ïmadï go Silbano dai go Timoteo gïn otoxdi idi ojai. Gin susukurhi, kïïga maatï aatïmï sai aapimï buaboitudadami uraba daraka Diuxi gïr Oga ïmadï Suxi Kristo Gïr Nukadakami. Dai ipïrhidi aatïmï sai maatï taatana aapimï xïï kïï tuiga ïgai gïn buidïrï dai sai gïn maakana ïgai ibhïxtaragai gïn ibhïdagïrï.

1Tesalonicenses 3:6

Dïï gia ka dibia go Timoteo amïkadïrï ïpamu dai gïr aagidi sai apia ïxi kïïga buaboitudai aapimï go Suxi dai sai oigïdai aapimï jaa aipakoga ïpï. Dai pobai gïr tïtïdai ïpï mïsai gïr tïïtïitoiña aapimï gïr oigïdaitai dai sai ix xïïxi gïn nïijada ïrhidi aatïmï sai pokaxi aapimï gïr nïijada ïrhidi ïpï. Podukai gïr tïtïdai Timoteo dibiakai tudu.

2 Tesalonicenses 1:1

Aanï ïr Pabora daidi gïn otoxdi idi ojai aapimï buaboitudadami ix makïdï Tesalonikana gïn ïmpaidiña. Dai tanai gin ïmadï daraka go Silbano ïmadï go Timoteo ïpï. Gin susukurhi, aanï ïmadï go Silbano dai go Timoteo maatï sai aapimï kïïga urabaka Diuxi gïr Oga ïmadï Suxi Kristo Gïr Nukadakami.

1 Tomoteo 1:18

Aapi Timoteo, gin maara dukai gï nïidi aanï. Dai kïï maatï aanï sai baasïkioma ïmo Diuxi ñokituldiadamigadï aagai ixtuma duñi agai aapi oiditai go kïïgadukïdï buaboidaragai. Dai xibi gï tïanïi aanï pïsai apia ibuada aapi ixdukatai agaiña ïgai. Daiñi, mui oidaga odami ix makïdï bui bïïtï gïr buaboidaraga dïï aapi maiti gï agai xi gï dagitoagi dai bhaiyoma gï agai xi bui kïkibagi aapi kïïga oiditai gï buaboidaraga.

1 Tomoteo 1:2

Gï ojidi aanï aapi Timoteo ix makïdï ïr gin maara dukai Diuxi amadïrï. Aanï tudu ïgai dai gï aiturhi go aatagi ix makïdï buaboitudai aapi, kaxkïdï gin maara dukai gï nïidi aanï. Dai daanïi aanï Diuxi gïr Oga ïmadï Suxi Kristo Gïr Nukadakami sai maatï taatana aapi xïï kïï tutuiga ïgai gï bïïtarï gï oigïrhitai dai kïïga gï oigïdaitai ïpï dai sai gï maakana ïgai ibhïxtaragai gï ibhïdagïrï.

2 Timoteo 1:5

Maatï aanï sai kïïga buaboitudai aapi tudu ïpïandukai ix gï daada ïmadï gï urhi buaboidaiña ïpï.

2 Timoteo 3:11

Kïï maatï aapi sai mui imidagai soi gin buididiña jaa. Soi gin buididi óídakami Antiokiana tudu dai Ikoniana dai Listrana. Dïï gia Diuxi kïïgakïrï gin busaitu abhiadïrï.

Filemon 1:1

Bhaiga aapi Filemon. Aanï ïr Pabora dai gï otoxdi idi ojai tanai maixakaruana dakatai aanï. Gin maixatu aanï ïïgiditai aanï Suxi Kristo tudu. Dai tanai gin ïmadï daja go Timoteo ïpï. Kïïga gï oigïdai aatïmï aapi Filemon. Aapi ïr ïmo gïr aduñi Diuxiamadïrï tudu dai kïïga gïr ïmadï gaatabuayi aapi Diuxi aaduindadïrï. Kaxkïdï gï otoxdi aatïmï idi ojai aapi gï bïïtarï

Hebreos 13:23

Gï agai xi maatïkagi aapimï sai ka busai go Timoteo maixakaruañdïrï. Dai ix otoma aiyagi ïgai tami aidï gia gin oijadamu ïgai xïxkadï gïn dibidagi aanï gamoko.