Galatas 5:1 - Northern Tepehuan Bible

¹ Ka aagai aanï sai aatïmï maiti ïr maamaradï duu go oki ix makïdï ïr pioñikatadai. Ka kïïgakïrï gïr bubaitu Suxi Kristo tudu dai ka maiti ïr go sïïrhikami pipioñigadï duu aatïmï dai ka mai bia aatïmï xi ïïgiadagi gobai. Kaxkïdï abïr mai ïpamu bhïiyi go tïgibudagai ix makïdï ikaiti sai bia aapimï xi ïïgiadagi go sïïrhikami sai kïïgakïrï gïn nïijadagi Diuxi. Ix pobuadagi aapimï aidï gia pipioñi duu bimu aapimï ïpamu di.

Tepehuan Northern: Diuusi ñiooquidʌ utuducami oodamicʌdʌ

¹ Suusi Cristo cʌʌgacʌrʌ gʌrvuvaitu tʌsai camaitivuaadana vʌʌsi istumaasi aagai Moseesacaru sʌʌlicamigadʌrʌ. Aliʌsʌ gʌaagai isapiavaavoitudada aapimʌ Suusi Cristo dai maisiu ʌpamu ʌʌgiadagi vʌʌsi Moseesacaru sʌʌlicamigʌdʌ. Aliʌ sijaiga iscʌʌga ʌʌgiadagi Moseesacaru sʌʌlicamigadʌ.

Galatas 5:1 Iomraidhean Croise

Mataibo 23:4

Go tïtïïgiadami sïïrhikami ïmadï go fariseos pokaitiña sai bia óídakami xi ïïgiadagi naana maaxi sïïrhikami tudu dai bïïtï gobai. Ïpïan dukami gobai ïmo kusubi kabami bïïtïkami. Dai gatïanïiña saidi kusukana óídakami go kusubi dïï gia mos gatïanïi ïgai dai mai soiña kusukai ïgai toma lachi. Mai soikïi ïgai óídakami sai ïïgiada ïgai go naana maaxi sïïrhikami ix makïdï gatïtïïgidi ïgai. Ïïgi ïgai mai ïïgidi ixtumaxi tïanïiña ïgai jaa tudu— itïtïdai Suxi.

Lukas 5:38

Go bino utudui gï susudadai utudui baigakaruana bhaiyoma.

Hechos 15:10

Dai Piduru oi gï aatagi dai kabami ñokidi go gaa daidi ikaiti, —¿Nïida mïxi ïrhidi ïpï sa bhai bhamutudana aapimï Diuxi?— ikaiti. —Maitï agai xi soi buadagi aapimï go buaboitudadami ix makïdï maiti ïr judidiu. Maitï agai tudu tïanïdagi ïgai xi ïgiada gïr bituldaraga. Mos sobhidamu aapimï Diuxi aaduindadï xi pobuadagi aapimï di. Tomarhi aatïmï dai tomarhi gïr aaduñi ïkidadï mai ñako xi ïgiada gobai di.

Romanos 6:14

Podukai go soimaaxkami ka mai biakamu ix dukatai gïn tïanïdagi. Xibi ka mai bia aapimï sïïrhikami xi ïïgiadagi go sïïrhikami. Xibi bhaiyoma ïïgida ïrhidi aapimï Diuxi mos ïï kïï tuigakatai ïgai gïn bïïtarï.

Romanos 6:18

Xibi ka kïïgakïrï bubuaka aapimï dai ka maiti ïr pipioñigadï go soimaaxkami. Xibi ïr pipioñigadï aapimï Diuxi dai ibuayi ixtumaxi ïr sïïrhi. Kaxkïdï sïïrhikïdï bhai gin ïrhidi aanï Diuxikïdï.

Romanos 7:3

Dïï gia xi ïmadï boiyagi ïgai ïmai kïïrhi kia oidakatai aduñdï aidï gia soimaaxi ibuayi ïgai. Ka mai xadutudai ïgai go sïïrhikami pobuadatai. Dïï gia xi ugitiagi aduñdï aidï gia mai soimaaxi ibuayi ïgai tomaxi ïmadï bii ïmai.

Romanos 7:6

Ïkioma maamaixapikami dukai gïr biakana go sïïrhikami gïr tïanïitai gobai dïï xibi ka kïïgakïrï bubuaka aatïmï. Koidadï dukami aatïmï go sïïrhikami bïïtarï kaxkïdï. Xibi ïma dukai óídaga aatïmï. Ka mai óídaga aatïmï gïr tïanïitai go sïïrhikami. Xibi utudui gïr oidakaraga. Xibi kïïgakïrï óídaga aatïmï gïr tïanïitai Diuxi Ibhïadï.

Romanos 8:15

Daiñi, Diuxi Ibhïadï ka ayi gïr ïrana. Dai ïgai maiti gïr maakai duadimudagai ix dukai biakana aatïmï ïkioma aidïxi mos ïr pipioñi dukamikana aatïmï. Xibi Diuxi Ibhïadï gïr maa sïïrhikami xi ïr Diuxi maamaradïkana aapimï. Kaxkïdï gïr oga aagai aatïmï Diuxi.

Romanos 8:2

Xibi Diuxi Ibhïadï ïgai dai gïn tïanïi dai gïn maakai gubukarhigai sai kïïgakïrï óídakana aapimï. Ka bïïnakami aapimï Suxi Kristo kaxkïdï. Dai kaxkïdï ïpï go soimaaxkami ka maiti gïn tïanïi dai go mukigami ka maiti gïn ajïi ïpï.

1 Korintios 15:58

Kaxkïdï gin susukurhi abïr mai dagitokai buaboitudada. Daidi abïr kabami gïn aaga iduñi aaduindadï Gïr Nukadakami bïïxi gïn bhai ïrhiarakïdï. Kïïga maatï aapimï tudu sai duduakamu aapimï ïpamu bïïna darakatai aapimï Gïr Nukadakami dai kaxkïdï ïpï kïï maatï aapimï sai mai mos ïïgikïdï ibuayi aapimï gïn aaduindaga.

1 Korintios 16:13

Kïïga abïr nïnïasïrhigan dukai óídaka kïïga buaboidaitai. Maiti abïr ïbhiada tomarhi ïmo ixtumaxi tudu daidi abïr gupurtuda gïn buaboidaraga.

1 Korintios 7:22

Pomaaxi buaboitudadami ibhïgadïkïdï ïpï. Daiñi, ix makïdï ïr pipioñikatadai dai buaboitu gïr Bhaitï Kïakamiga ka kïïgakïrï bubuakïi sai ka mai tïanïna go diabora. Dai podukai ïpï ix makïdï maiti ïr pipioñikatadai dai buaboitu gïr Bhaitï Kïakamiga ka pipioñigadï bii Suxi Kristo dai Suxi Kristo bia sïïrhikami ix tïanïdagi xibi.

2 Korintios 11:20

Daiñi, aapimï kïïga mai ojodatai kaïkana jaa tomaxi gïn bui ñokaiña ïgai dai tomaxi kabami gïn tïanïiña ïgai pipioñigadï dukai dai asta gïn kaitïskïiña ïgai gïn buibasana. Dai bïïxi gobai mai buamï ïrhidiña aapimï dai bhaiyoma bhai ïrhiarakïdï kaïkana aatagidï. Gïn bupuirumadaiña ïgai tudu dai gïn popoidiña gïn buxtuidaga dai bhodïrï abhiadïrï gïn buxtuidagañdïrï óídakaiña ïgai. Gïgïrdukïdï gïn ïrhidiña ïgai tudu dai kabami gïn bhagaidiña kabami gïn tïanïda ïrhiditai.

2 Korintios 3:17

Diuxi Ibhïadï ïgai ix makïdï aagai aanï dai ïr Gïr Nukadakami tudu. Dai xibi ka mai kuupidikan duu gïr tïgibudaga gïr ïmadï dakatai Diuxi Ibhïadï.

Galatas 2:4

Maiti gï circuncido go Tito tudu tomaxi go odami ix makïdï buaboitudadami gïn aagaiña ïïgi dai maiti ïr buaboitudadami, ïgai gia pokaititadai sai gï agaitadai ix gï circuncidandoagi ïgai. Go odami ïgai kajiomatadai ïmo aatagi aatïmïkïdï ix makïdï bïïna daraja Suxi Kristo. Kajioma ïgai sai ka mai gubuakïdï bia aatïmï xi ïïgiadagi go Moises sïïrhikamigadï tudu. Dai mai bhai ïrhidi ïgai gokïdï. Ami ayitadai ïgai gïr saagida dai ïxto dukai nïida ïrhiditadai ix dukatai ibuadana aatïmï. Ipïrhiditadai ïgai xi gubuakïdï ïïgiadagi aatïmï go sïïrhikami ïpamu dai xi gïr circuncidandoagi aatïmï.

Galatas 3:25

Xibi gia ka máí aatïmï sai ka kïïgakïrï bubuaka aatïmï buaboitudaitai xi kaxkïdï ka maiti gïr tïanïi go sïïrhikami xibi.

Galatas 4:26

Dïï gia aatïmï ix makïdï buaboitudai maiti ïr maamaradï dukami aatïmï go Hagar. Maamaradï aatïmï go Sara bhaiyoma ix makïdï maiti ïr pioñikatadai. Dai go Sara ïr ïmo maaxidaragai bïïtarï go tïbagiañdïrï Jerusalen. Ami tudu óídakami bïïxkatai aatïmï ix makïdï ka kïïgakïrï bubuaka dai ka maiti ïr pipioñi dukai aatïmï.

Galatas 4:31

Dai aatïmï gïr ayi go bhai ïrhiaragai ix makïdï Diuxi aagidi go Abraam xi kaxkïdï maatiga maaxi sai aatïmï maiti ïr maamaradï go pioñi. Maamaradï duu aatïmï ix makïdï maiti ïr pioñikatadai bhaiyoma.

Galatas 4:9

Dïï xibi gia kïïga maatï aapimï Diuxi, xiïpï bamioma kïïgadu ix tïiyagi aanï sai Diuxi ïgai dai kïïga gïn maatï bhaiyoma. Kaxkïdï ¿ix tuixidï ïpamu buaboituda ïrhidi aapimï sai bamioma kïïga gïn nïijadamu Diuxi ïïgiditai aapimï naana maaxi sïïrhikami dai ïïgiditai naana maaxi tïgibudagai ïkidadï ix makïdï maiti ïr soiñi?

Galatas 5:13

Daiñi gin aaduñi, Diuxi gïn báí mïsai kïïgakïrï óídakana aapimï. Gïn báí ïgai sai ka mai biakagi aapimï xi pipioñi dukai ïïgiadagi ïmo sïïrhikami tudu kabami gïn tïanïitai gobai. Ka kïïgakïrï gïn bubaitu ïgai tudu. Kaxkïdï kabami soi gin ïrhidiña aanï gïn aagiditai jaa sai bia aapimï xi ïïgiadagi go sïïrhikami. Maiti ïr podukai di. Daiñi, kïïga ïr buaboi tudu sai mai gubuakïdï bia aapimï xi ïïgiadagi go sïïrhikami sai podukai kïï biïna Diuxi ïmadï. Dïï gia maiti abïr po gïn ïrhiada ïpï sai bhaiga aapimï xi ibuadagi ïïgi ixtumaxi iduña ïrhiada aapimï oiditai ïïgi gïn tïgibudaga. Gï agai bhaiyoma xi aipakoga gïn soikïdagi aapimï gïn oigïdatai aipakoga.

Efesios 6:14

Gukabïrai tudu dai gïn abhana bhïka ixtumaxi ïr buaboi dai gïn aada gobai ïmo gïn gibura dukai. Tïgitobïrai ïpï sai kïï buañixi aapimï Diuxi buitapi. Xudu gïn tïgitoagi sai kïï buañixi aapimï gobai ïr ïmo taagiana nagiakarui dukai gïn bïïtarï ixtukïdï mai bapakïi ujuyi.

Filipenses 1:27

Dïï gia gïn aagidamu aanï ixtumaxi bamioma gï agai. Bamioma gï agai xi kïïga bhai dukai óídakagi aapimï ixdukatai aagai go bhai ïrhiaragai aatagi. Go aatagi aagaitai Suxi Kristo tudu. Ix apia ïïgiada aapimï go bhai ïrhiaragai aatagi aidï gia kïïgakïrï óídakamu aapimï. Dai aidï gia tomax dukai ix gïn dibidagi aanï xiïpï ix mos kajiomakagi aanï ix maaxi daraka aapimï mïkaxi dakatai aanï tomax dukai maatïkamu aanï sai mo ïxi kïïgakïrï óídaga aapimï mos ïmo tïgibudagai biakatai aapimï bïïxkatai. Dai maatïkamu aanï sai mai duadikoi aapimï ix makïdï gïn buidïrï bïïtï ïpï. Dai maatïkamu aanï ïpï sai maiti gïn daadagitoi aapimï xi gïn maitiagi go naana maaxi aatagi ix makïdï maiti ïr go bhai ïrhiaragai aatagi kïïgakïrï. Podukai mai duduadikuitai maaxituldamu aapimï ïgai ix makïdï gïn buidïrï bïïtï sai ïgai mai kïïgakïrï bubuaki agai dai aapimï gia. Diuxi tudu ïgai dai ibuayi bïïxi ixtumaxi gïn aagidimi aanï.

1Tesalonicenses 3:8

Bamioma kïïga abïnakiadan taadatu aatïmï tudu maatïkatai sai apia gupukami dukai buaboitudai aapimï Suxi Kristo.

2 Tesalonicenses 2:15

Kaxkïdï abïr kïïga kabakami dukai buaboitudada maatïkatai sai gïn ajiagai go bhai ïrhiaragai dai xadutudaragai ix makïdï bia Suxi Kristo. Dai abïr tïgito ajiopada go maatïtuldaragai ix makïdï gïn biturhi aatïmï. Ïïmo maatïtuldaragai gïn aagidiña aatïmï aatagikïdï dai jaa ojaikïdï. Bïïxi gobai abïr mai gajiadïrï bia.

Hebreos 10:23

Gin aaduñi, gï agai xi apia dukai kïïga buaboitudada aatïmï sai bhïiya ragai ixtumaxi gïr aagidi Diuxi sai gïr maaki agai. Diuxi bïïxkïrï ibuayi bïïxi ixtumaxi aagadagi ïgai kaxkïdï. Dai gobai ix makïdï Diuxi bia gïr bïïtarï gobai ïr gïr nïnïraraga ix makïdï aagidiña aatïmï óídakami xibi. Gï agai tudu xi apia kïïga buaboitudada aatïmï sai Diuxi gïr maakimu gobai.

Hebreos 3:14

Gï agai xi gïr mamaakadagi aatïmï ñoki aipakoga dai xi gïr abïnakiadagi ix apia buaboitudada aatïmï tudu. Kaxkïdï tudu kïïga maatï aatïmï sai gï agai xi apia kïïga buaboitudada aatïmï asta xïïxkadï ukami óídakagi aatïmï. Gï agai xi mo ïxi buaboitudada aatïmï ix duu buaboitu aatïmï tukamïrï tudu sai podukai kïïga biakana aatïmï ïmo urabaragai Suxi Kristo ïmadï.

Hebreos 4:14

Dïï gia Suxi Kristo ïr gabhaitïkïakami dadaxdadami gïr bïïtarï, ïgai tudu ix makïdï ïr Diuxi Maradï. Dai ka ayi ïgai amïka buidïrï Diuxi dai ami bhai dui gïr bïïtarï mai kïï ibuadatai aatïmï. Kaxkïdï gï agai xi mai ugutai aagada aatïmï gïr buaboidaraga aipakoga.

1 Pedro 2:16

Ïkioma go soimaaxkami ïr gïn tïanïdamigakatadai dïï gia xibi ka kïïgakïrï gïn bubaitu Diuxi dai xibi Diuxi ïgai daidi ïr gïn tïanïdamiga. Pipioñigadï aapimï Diuxi tudu. Kaxkïdï bhaiga bïnïrhiada aapimï maatïkatai sai ka kïïgakïrï bubuaka aapimï. Dïï gia maiti abïr pokaitada sai mai xudu ix soimaaxi ibuadagi aapimï ka kïïgakïrï bubuakïkai aapimï. Diuxi pipioñigadï aapimï xibi di.

2 Pedro 2:19

Go tïtïïgiadami yaatagi ïgai potïtïdaiña odami sai ix oijadagi ïgai aatagidï sai podukai bhaigakamu xi ibuadagi ïïgi ixtumaxi ipïrhiadagi ïgai mai biakatai ïmo tïanïdami. Dïï gia ïïgi go tïtïïgiadami yaatagi mai tïtïïgai ix dukatai dagitoagi go soimaaxkami ix makïdï ibuadana ïgai. Ïïgidiña ïgai go soimaaxkami tudu dai ka pipioñigadï dukai bipiïyi ïgai go soimaaxkami. Xibi go soimaaxkami ïr tïanïdamigadï dukai tudu. Dai kïïga gï maatï sai odami ix makïdï mai tïtïïgai ix dukatai dagitoagi go soimaaxkami kaxi ïr pipioñigadï dukai gobai. Go soimaaxkami ka aaduinturhimi tudu dai ka mai bhaigakana ïgai xi dagitoagi daidi iduñagi ixtumaxi buaboikïdï iduña ïrhidiña.

Udaxi 1:3

Kïïga gïn oigïdai aanï aapimï gin aaduñi. Dai kaxkïdï sïïrhikïdï ipïrhidiña aanï xi gïn ojidagi aagaitai go utudui oidakaragai ix makïdï bia aatïmï kïïgakïrï gïr bubaidakai Suxi Kristo. Gobai gïn ojida in ïrhidiña aanï tudu. Dïï gia xibi ka máí aanï sai oidaga tïtïïgiadami yaatagi gïn saagida ix makïdï ïr buidïrï bïïtïkami gïr buaboidaraga. Diuxi gïr tïïgi go buaboikïdï buaboidaragai aatïmï ix makïdï ïr ïko bubaidadï tudu dai bïïxkïrï bïïtarïka agai gobai. Kaxkïdï gï agai sai kïï sïïrhi gïn ojidagi aanï idi ojiïrï dai gïn abïnakiadagi saidi kabami gïn aajagïdagi aapimï dai kïïga nukatika go buaboidaragai ix makïdï gïn tïïgi Suxi Kristo. Maiti abïr gïn dagito ix gïn maitiagi go buidïrï bïïtïkamigadï go buaboikïdï buaboidaragai. Daiñi, oidaga tïtïïgiadami yaatagi ix makïdï mai ïïgidi Diuxi tudu dai gïn saagida daraka. Gïn bupuirumagi ïgai dai podukai bapai gïn saagida tudu. Pokaitiña ïgai sai odami bia oigaragai xi ïïgi gïn tïanïdagi daidi iduñagi ïïgi ixtumaxi iduña ïrhiadagi dai asta soimaaxi ibuadagi. Pokaitiña ïgai sai mai tipu buamï ïrhiaragai gokïdï mos ïï kïï tuigakatai Diuxi gïr bïïtarï. Maiti ipïrhidi ïgai xi ïïgiadagi Suxi Kristo Gïr Nukadakami kaxkïdï. Dïï gia ka ïki abhiadïrï ka podukai aagai Diuxi saidi toma xorai ix makïdï podukai gatïtïïgiadagi ñoki sai ïgai ïr gïpiïrï bïïtïkami dai taata agai gïgïbidaragai. Mai tipu ïmai xorai ïr Gïr Nukadakamikagi mosïkaxi Suxi Kristo tudu.

Apokalipsis 2:25

Daiñi, mosïkaxi gïn tïanïi aanï mïsai oijada aapimï go buaboikïdï buaboidaragai ix makïdï ka bia aapimï. Gobai abïr oijada aapimï tudu asta xïxkadï ukami dibiagi aanï ïpamu.

Apokalipsis 3:3

Ïma dukai abïr gïn tïtïgito tudu dai gïn tïgitobïrai Diuxi aatagidï ix makïdï kaï aapimï baasïkioma dai abïr ïïgiada gobai. Dai ix mai pobuadagi aapimï, aidï gia ix dukai daibïi ïïxibogami xuduku mai nïnïrakagi óídakami podukai dibiamu aanï todian dukai dai gïn maakimu gïgïbidaragai.