Galatas 4:6 - Northern Tepehuan Bible

⁶ Dai kïï maatiga maaxi saidi ïr Diuxi maamaradï aapimï xibi. Daiñi, Diuxi gïn maa ïïgi Ibhïadï dai xadïrï gïn maakimudai Ibhïadï ix maiti ïr maamaradïkagi aapimï. Ïgai ïr ï galbaaxi Diuxi Ibhïadï ix makïdï Diuxi Maradï biakana ïpï. Dai xibi gïr maakai ïgai ïmo kïïgadukami ïmadaragai Diuxi ïmadï gïr ïrana dakatai. Gïr maakai ïmadaragai sai gïgïr ñokaiña aatïmï aatagaitai Diuxi dai sai —gïr Maama— dai —gïr Oga— aagaiña aatïmï Diuxi.

Tepehuan Northern: Diuusi ñiooquidʌ utuducami oodamicʌdʌ

⁶ Dai cascʌdʌ Diuusi ootoi gʌibʌdaga sai gʌrʌʌmadu daacana cascʌdʌ aatʌmʌ gʌrooga aagaiña.

Galatas 4:6 Iomraidhean Croise

Markos 14:36

Daidi potïtïdai ïgai Diuxi, —Gin oga, aapi bïïxi aïkatai ixtutuidikïi xi duñagi di. Kaxkïdï xibi maiti dagito xi soimaaxi taata aanï— itïtïdai. —Dïï aanï bhai aagai xi gin duiñdagi ixdukatai aapi ipïrhidi dai mai xu ixdukatai aanï ipïrhidi tomaxi kabami soi taadakagi— itïtïdai.

Lukas 11:13

Daiñi, aapimï mamaakai ixtumaxi ïr kïïga gïn maamara tomaxi ïr soimaaxi ibuadami aapimï. Dai Diuxi gïïpi bamioma kïï tuiga xi bhai aapimï xi kaxkïdï gï maatï sai ïgai mamaakai ixtumaxi ïr kïïga maamaradï bïïtarï taanïkai ïgai. Dai kïïga maakimu ïgai Diuxi Ibhïadï xorai taañiagi ïpï— astïdai.

Lukas 11:2

Daidi Suxi potïtïdai, —Xïïxkadï daanïdagi aapimï Diuxi bïrai adukai itïda, —Gïr Oga, gï daanïi aatïmï sai kïïgakïrï gï xadutuadagi odami dai sai aapi kïïgakïrï gatïanïdagi reykatai aapi.

VUAANA 14:16

Dai aanï daañimu gin Oga ix ïgai gïn otosdamu ïmai soikïdami ix makïdï gïn ïmadï dakamu bïïxkïrï bïïtarï— itïtïdai.

VUAANA 15:26

Daiñi— itïtïdai Suxi. —Gokiïrioma dibiagai ïgai ix makïdï Ga Soikïdami tïgidu. Aanï otosamu ïgai mïkadïrï xako daja Diuxi gïr Oga. Ïgai ïr Diuxi Ibhïgadïkamu dai ïgai gamamaatïtulda agai ixtumaxi ïr buaboi. Ïgai maakimu ñoki go óídakami gin aagaitai aanï.

VUAANA 16:7

Dïï mai tipu soi ïrhiaragai dai bhaiyoma aanï aagai sai xioma ïr kïïga aapimï gïn bïïtarï ix imïdagi aanï. Gï agai tudu ix imïdagi aanï sai bhodïrï mïkadïrï otosda aanï Diuxi Ibhïadï ix makïdï Soikïdami tïgidu sai gïn ïmadï dakana. Gï agai tudu ix imïdagi aanï. Ïma dukai mai dibiamu Diuxi Ibhïadï gïn abhana— itïtïdai.

VUAANA 3:34

Diuxi aagidi Maradï ix tuma ñoki aituldana ïgai óídakami dai mïkadïrï otoi maakakai bïïxi Diuxi Ibhïgadï gubukarhigadï. Dai Diuxi Maradï mai aagaiña ïma maaxi, mosïkaxi gobai ix makïdï Diuxi aagidi. Kaxkïdï gï maatï saidi ïr buaboi ñokidï aagaitai ïgai go baaxi ñoki ix makïdï Diuxi aagidi.

VUAANA 7:39

Dai Suxi agaitadai go Diuxi Ibhïgadï gubukarhigadï ix ïr go sudagi gï dukami dai sai busi agai gobai odami iibhïadïañdïrï ïpïan dukai ix go sudagi busanïi ïmo babikiañdïrï. Dai go Diuxi Ibhïgadï ïr ix makïdï dibiagai odami iibhïadïana buaboitudakai ïgai. Dïï aidïpïrï ix pokaiti Suxi mai kia otoitadai ïgai Diuxi Ibhïgadï. Gï agaitadai kia ix imiagi Suxi tïbagiamu xako oidaka agai ïmo gïdukami xadutudaragai ïgai bïïtarï. Dai ka imïkai aidï gia otosa agaitadai ïgai Diuxi Ibhïgadï.

Hechos 16:7

Dai bhodïrï ayi ïgai miadïrï xako Misiana tïgidu dai oijada agaitadai gïn imidagai Bhitiniamakoga dïï mos Suxi Ibhïadï mai dagito ix gamo iimia ïgai ïpï.

Romanos 5:5

Dai xi buaboidaitai nïnïrakagi aatïmï xi Diuxi kïïgakïrï gïr bubiadagi aidï gia mai soi gïr ïrhiadamu aatïmï. Dai ïkobïrakoga Diuxi gïr maa Diuxi Ibhïadï dai ïgai gïr maatïturhimi gïr iibïdagïrï ix xïï kïïga gïr oigïdai Diuxi.

Romanos 8:9

Dïï gia ix gïn ïmadï daja Diuxi Ibhïadï aidï gia ka maiti gïn tïanïi gïn tïgibudaga ïkidadï. Bhaiyoma xibi Diuxi Ibhïadï ïgai dai gïn tïanïi. Xorai mai biakagi Diuxi Ibhïadï ix makïdï Suxi Kristo gïr otoxi, ïgai gia maiti ïr aaduñdï Suxi Kristo.

1 Korintios 15:45

Daiñi, Diuxi ñokidï pokaiti sai, Ibhïiba kïkiba go Adán, dai duakakami bii tukugadï sai oidakaiña ïgai tami oidigi daama. Dïï gia oidaga ïmai ix makïdï mai ïpïamaaxi go Adán. Ïgai ïr Suxi Kristo ix makïdï go kugatïrï Adán aagaiña odami. Ïgai mai mosïkaxi biatu gubukarhigai ix tami oidigi daama oidakagi. Ïgai bhaiyoma gamaakai gubukarhigai sai kïïgakïrï oidakana óídakami bïïxkïrï bïïtarï.

2 Korintios 1:22

dai gïr maa Ibhïadï ïpï dai ïgaikïdï gïr tïpaltu ïgai. Dai Diuxi ibhïadï ix makïdï gïr ïmadï daja ïr ïmo maaxidaragai dukai sai aatïmï ïr ïko bubaidadï Diuxi. Diuxi gïr maa Ibhïadï tudu dai kaxkïdï xadïrï maiti gïr maakana ïgai bïïxi go gaa ixtumaxi ix makïdï ka bhai duñixikami bia ïgai gïr bïïtarï ïpï.

2 Korintios 3:17

Diuxi Ibhïadï ïgai ix makïdï aagai aanï dai ïr Gïr Nukadakami tudu. Dai xibi ka mai kuupidikan duu gïr tïgibudaga gïr ïmadï dakatai Diuxi Ibhïadï.

Efesios 1:13

Xibi aapimï ix makïdï maiti ïr judidiu kaxi kaïkana ix makïdï ïr buaboi. Kaïkana aapimï go bhai ïrhiaragai aatagi tudu. Dai xibi ka buaboitudai aapimï Suxi Kristo ïpï dai ka kïïgakïrï bubuaka aapimï. Xibi buaboitudakai aapimï gïn tïpaltu Diuxi gïn maakakai Diuxi Ibhïadï gïn abhana. Ka ïkiaxdïrï podukai agaitadai Diuxi ix otosa agaitadai Ibhïadï dai kaxkïdï otoi ïgai.

Efesios 2:18

Tomax dukai, xi ïr judiukagi aatïmï xi maiti ïr judiukagi ïpï, tomax dukai Suxi Kristo gïr maa baakigai xi urabana aatïmï gïr Oga. Xibi Diuxi Ibhïadïkïdï bhaiga aatïmï xi aatagiadagi ïgai tudu.

Efesios 4:30

Maiti abïr soi ïrhiatuldada Diuxi Ibhïadï gïn oidakaragakïdï tudu. Diuxi Ibhïadï ïr Diuxi tïpakarudï dukai ix makïdï gïn daxi Diuxi bai gï maatïkana kïïga xi ayimu ixtuigako buiya ragai bïïxi ixtumaxi gïr aagidi Diuxi sai gïr maaki agai kïïgakïrï bubuakïkai aatïmï. Kaxkïdï abïr mai soi ïrhiatulda ïgai.

Efesios 6:18

Bïïxi aïkatai ix makïdï ibuadagi aapimï abïr aatagada Diuxi ïmadï, Diuxi Ibhïadï gubukarhigadïkïdï. Bïïxkïrï abïr bhai gïn duka dai daanïda Diuxi bïïxi buaboitudadami bïïtarï ix makïdï aipako óídaga.

Filipenses 1:19

Maatï saidi daanïiña aapimï Diuxi gin bïïtarï tudu. Bhai gin ïrhidi aanï maatïkatai ïpï sai Suxi Kristo Ibhïadï kïïga gin soikïiña sai kïïgakïrï oidakagi aanï tomaxi naana dukai soimaaxi taataimi aanï xibi.

1Tesalonicenses 4:8

Daiñi, mai xu xi ïr ïïgi gïr tïgibudaga idi ñoki sai mosïkaxi Diuxi bïïtarï óídakana aatïmï ïkobai darakatai soimaaxkamiañdïrï. Dai bhaiyoma Diuxi ïgai dai gïr maa Diuxi Ibhïgadï ix makïdï kïï buañixi dai gïr tïanïi sai buañixikami duakai óídakana aatïmï. Kaxkïdï ix oidakagi xorai mai ïïgiada ïrhiada idi ñoki, ïgai mai xu ix mosïkaxi aatïmï maiti gïr ïïgidi. Dai bhaiyoma mai ïïgidi ïgai Diuxi Ibhïadï. Kaxkïdï tudu Diuxi Ibhïadïañdïrï dibia idi ñoki.

1 Pedro 1:11

Suxi Kristo Ibhïadï ka ïkiaxdïrï maatïturhitadai go ñiñokituldiadamigadï saidi Suxi Kristo soimaaxi taata agai dai sai gokiïrï oidaka agai naana maaxi bhai ïrhiaragai. Dai go ñiñokituldiadamigadï Diuxi maatïka ïrhiditadai ix tuigako daibuña agai bïïxi gobai dai xorai bïïtarïka agai gobai ïpï.

Udaxi 1:20

Gïn ïjïkobalda ïrhidi ïgai tudu. Dïï gia maiti abïr gïn dagitoda. Daiñi, kïïga maatï aapimï sai gïn oigïdai aanï gin aaduñi dai aanï aagai sai gï agai bhaiyoma ix gïn gupurtudagi aapimï aipakoga dai gïn soikïdagi aipakoga saidi bamioma gubuakami dukai buaboitudadagi aapimï. Sai kïïgioma oijadagi aapimï go buaboidaragai ix makïdï gïr maa Diuxi tudu. Dai daanïdabïrai Diuxi ïpï. Dai xïxkadï daanïdagi aapimï abïr ïïgiada Diuxi Ibhïadï saidi podukai ïgai gïn tïïgidana ix dukatai daanïdagi aapimï.

Apokalipsis 19:10

Pobai in tïtïdai ïgai antai totonakïdï kïkiba ïkasodï sonoana xadutuda iñagaitai Diuxi dukai. Dïï mos ïgai pobai in tïtïdai aidï, —Maiti pobuada. Aanï ïpï mos ïr pioñigadï Diuxi ïpïan dukai aapi ïmadï bïïxi go gaa ix makïdï aipakoga aagaiña Suxi Kristo ñokidï. Daiñi, Diuxi ñokituldiadamigadï aatïmï tudu xïïxkadï aagagi aatïmï Suxi Kristo ñokidï. Kaxkïdï gï agai xi mosïkaxi Diuxi xadutuada aatïmï dai maiti gï agai xi Diuxi dukai gin nïijada aapi— in tïtïdai ïgai.