Galatas 4:4 - Northern Tepehuan Bible

⁴ Dïï gia Diuxi maiti ipïrhidi xi pipioñi dukai óídakagi aatïmï tomarhi xi ïr arhi dukaikagi ïpï. Kaxi ïr maamaradï aatïmï kaxkïdï. Ipïrhidi ïgai xi gïgïr odamikagi aatïmï tudu bai gïr maakana ïgai bïïxi ixtumaxi gïr ajïga maamaradïkatai aatïmï. Kaxkïdï ka aïkai ixtuigako Diuxi ipïrhi aidï bhai dui ïgai gïr bïïtarï xi ka bhaigakana aatïmï xi ka biakagi ixtumaxi gïr ajïga. Otoi ïgai Maradï tami oidigi daama tudu dai ïgai ïmo kïïrhi busai. Dai biakatadai ïgai xi ïïgiadagi go sïïrhikami

Tepehuan Northern: Diuusi ñiooquidʌ utuducami oodamicʌdʌ

⁴ Aidʌsi caaayi istuigaco Diuusi ipʌlidi sai diviana Suusi Cristo tami oidigi daama ʌgai oodami duucai vuusai dai dʌʌdʌ ʌrjudíu cascʌdʌ Suusi ʌʌpʌ ʌʌgidiña judidíu sʌʌlicamigadʌ.

Galatas 4:4 Iomraidhean Croise

Genesis 3:15

—Dai gïn bupuidïrï gïn surhitudamu aanï aapi kooyi ïmadï go oki dai modukai gïn maamara xi gïn kïïdada agai aapimï aipakoga. Ïmoko go oki maamaradï kïixora agai gï moo pai aapi kïimu tïkabodï— itïtïdai Diuxi go kooyi.

Isa 7:14

Po tïtïdai ïgai sai, —Gïr Nukadakami gïn maaki agai aidï ïmo maaxidaragai ixtukïdï maatïkagi aapimï xi ïgai iduñi agai ix dukatai gïn aagidi ïgai ïïki. Gïn aagidamu aanï ix tumaxi ïgai daidi ïr maaxidaragai ka agai. Ïmo tïji ix makïdï mai kia abhana boo kïïrhi tïïgi agai ïmo arhi gïrhi abhana. Gobai ïgai dai maaxidaragai ka agai. Dai ka dibiakai ïgai Emanuel tïïtï agai— itïtïdai Isaias go Israelitas.

Mataibo 1:23

Gïr Nukadakami potïtïdaitadai ïgai aidï saidi, Nonoakami bii agai ïmo arhi oki ix makïdï mai kia ïmadï bii tomarhi ïmo kïïrhi dai marata agai ïmo arhi xïïñi dai Emanuel tïïtïmu ïgai. Gobai ïr go ñoki ix makïdï aiturhi go ñokituldiadamigadï Diuxi go óídakami ïïki tudu. Dai go tïtiaradï go Emanuel itïiya ïrhidi sai Diuxi gïr ïmadï daja.

Mataibo 3:15

Dai Suxi potïtïdai aidï, —Gï agai sai gin bakuandana aapi saidi podukai bïïxi pogïduna ix dukatai Diuxi ipïrhidi— itïtïdai. Dai aidï gia bhai aa go Juan dai bakoi ïgai go Suxi.

Mataibo 5:17

Dai Suxi oi aatagidï daidi potïtïdai ïgai mamaatïrdamigadï sai, —Gï agai xi maatïkana aapimï ix tuma bïïtarï dibia aanï— itïtïdai. —Maiti gï agai tudu xi po gïn ïrhiada sai dibia aanï maigobai dasa iñagaitai go sïïrhikami ix makïdï oja go Moiseskaru. Tomarhi mai maigobai daituda iñagai ojadï go gaa ñiñokituldiadamigadï Diuxi ïpï. Bhaiyoma dibia aanï dai bïïxi naato iduña iñagai bïïxi ixtumaxi aagai go sïïrhikamiïrï.

Markos 1:15

—Kaxi ti ayi ixtuigako agaitadai Diuxi ïïki— ikaitimi ïgai. —Ka miadaimi ixtuigako Diuxi tïanïda agai. Xibi gï agai mïxi ïma dukai gïn tïtïgitokagi dai buaboida kaïkagi Diuxi ñokidï bhai ïrhiarakami— ikaitimi.

Lukas 1:31

Dai maratamu aapi ïmo arhi gïrhi dai Suxi tïïtïmu aapi— itïtïdai.

Lukas 1:35

Dai go tïañikarudï Diuxi potïtïdai aidï, —Gï dibidamu Diuxi Ibhïadï dai ïgaikïdï gï ayimu Diuxi gubukarhigadï gï abhana. Podukai nonoakami bimu aapi. Dai kaxkïdï kïïga buañixikamu gï maara ix makïdï buapamu aapi dai odami Diuxi Maradï aagadamu—.

Lukas 20:44

Ami go ojiïrï pokaiti go Dabidkaru sai Diuxi otosadï ïr Tïanïdamigadï. ¿Ix ïr Tïanïdamigadïka ïgai go Dabidkaru aidï gia dukatai ïr pipiixaradïkana ïgai ïpï?— itïtïdai Suxi go tïtïgiadami sïïrhikami.

VUAANA 1:14

Daidi go Diuxi Ñokidï tïgidukami ïmo odami busai dai biatu tukuga ïpïamaaxkami ix makïdï bia aatïmï dai bhodïrï óídakami saagida oidatu. Sïïrhikïdï kïï tuiga ïgai dai kïïga gïr maatïturhi ix tumaxi ïr buaboi. Dai aanï Juan ix makïdï ibuayi idi ojai ïmadï jaa mui kïïga nïidi ïgai ix makïdï Diuxi Ñokidï tïgidu. Dai aatïmï ïr nïijadami xïïxi ïr gïdukami ïgai dai xïï kïï tiodi ïgai Diuxi maradïkatai. Diuxi maradï ïmadugakïdï ïgai tudu.

VUAANA 10:36

¡Kaxkïdï maiti gï agai ix potïiyagi aapimï sai soimaaxi ñokai aanï potïkai sai aanï ïr Diuxi Maradï! Aanï ïr Diuxi otosadï ix makïdï ïgai ïïko busaitu di— itïtïdai Suxi.

VUAANA 3:16

—Diuxi sïïrhikïdï kïïga oigïdai bïïxi oidigi daama óídakami dai kaxkïdï gin otoi ïgai aanï ix makïdï ïr Maradï ïmadugakïdï. Gin otoi ïgai an sai mukuna bai mai kona ix makïdï gin buaboitudagi dai bhaiyoma bïïxkïrï bïïtarï óídakana.

VUAANA 6:38

Daiñi, aanï dibia tami oidigi daama iduña iñagaitai ixtumaxi Diuxi ipïrhidi dai mai xu xi ïïgi ixtumaxi aanï ipïrhidi. Diuxi otosadï aanï tudu kaxkïdï iduña iñagai ixtumaxi ïgai ipïrhidi dai Diuxi gin Oga ipïrhidi ansai mai dagitoagi ix kuga imiagi tomarhi ïmadutai go buaboitudadami ix makïdï gin maa ïgai. Go maa bïïtarï gin otoi ïgai tudu an sai kïïga nukadakana go ix makïdï gin buaboitudai asta aïkai go kugatïrï tasïrï ukami. Dai ka aïkai go kugatïrï tasïrï aanï duduakarhida iñagai bïïxkatai ix makïdï gin nukaturhi Diuxi.

VUAANA 8:42

Daidi Suxi itïtïdai, —Cho daiñi— itïtïdai. —Ix buaboikïdï ïr Diuxi maamaradïkamudai aidï gia gin oigïadamudai aapimï. ¡Diuxiañdïrï dibia aanï di! Dai mai xu ix ïïgi gin bhai ïrhiarakïdï— itïtïdai. —Diuxi ïgai ix makïdï bhaigobai gin otoi tudu.

Hechos 1:7

Taidi go Suxi itïtïdai, —Ïïgi Diuxi gin oga ïgai dai aagai xïïxkadï iduñagi aaduindadï. Aapimï maiti ïr gïn bïïtarï ix maatïkagi xïïxkadï pobïduñagi gobai— itïtïdai.

Romanos 1:3

Idi bhai ïrhiaragai aatagi aagai Suxi Kristo dai ïgai ïr Diuxi Maradï. Ïgai busai tami oidigi dama dai biakatadai ïradï go Dabidkaru.

Romanos 15:8

Daiñi, Suxi Kristo dibia soikïda ïrhiditai go judidiu. Bïïxi naatorhixikami bia ïgai go aaduindagai ix makïdï Diuxi aagiditadai go Abraamkaru dai Isaakaru dai Jakobokaru ïïki sai ïgai iduña agaitadai. Podukai Suxi Kristo gïr tïtïgidi sai Diuxi mai yaatagïi.

Romanos 5:6

Suxi Kristo muu gïr bïïtarï aidïxi kia ïr gïpiïrï bïïtïkamikana aatïmï dai mai biakana aatïmï soiñi. Diuxi podukai dáí sai aidïpïrï mukiagi ïgai aidïxi kia ïr gïpiïrï bïïtïkamikana aatïmï.

Romanos 8:3

Go sïïrhikami ojixikami maiti ixtui ix kïïgakïrï gïr bubaidagi. Mai bia gobai gubukarhigai ixtukïdï gïr soiñagi. Ïïgi sobhikïiña aatïmï adaimïitai gïr ïkidadï tïgibudagai kaxkïdï. Dïï Diuxi gia kïïgakïrï gïr bubaitu. Ïgai otoi maradï sai biakana ïmo tukugai ïpïamaaxkami ix makïdï bia aatïmï soimaaxi ibuadami. Dai gï muatu ïgai gïr soimaaxkamiga bïïtarï. Podukai Suxi tukugadïkïdï Diuxi gamaitï go soimaaxkami bui.

Romanos 9:5

Go gin aaduñi judidiu ïr piipixaradï go Abraamkaru dai Isaakaru dai Israelkaru. Dai Suxi Kristo Diuxi Otosadï ïr judiukatadai ïpï. Suxi Kristo ïr Diuxi dai bïïxi adaama ïr Tïanïdami ïgai. Kaxkïdï gï agai xi gï xadutuadagi ïgai bïïxkïrï bïïtarï.

Efesios 1:10

Dai Diuxi ka dáí ïmo tasai ixtuigako Suxi Kristo ïmapida agai bïïxi aïkatai ixtumaxi oidaga. Dai aïkai ïgai tasai Suxi Kristo kïïga ïmapida agai bïïxi gobai ix makïdï oidaga tïbagiïrï dai tami oidigi daama ïpï. Aidïpïrï bïïxi aïkatai ixtumaxi oidaga nïijadamu sai Suxi Kristo bïïxi adama ïr Tïanïdami.

Kolosenses 2:14

Ïkioma gïpiïrï bïïtïkamikatadai aatïmï. Dai go sïïrhikami gobai dai gïpiïrï gïr bupaiña. Maiti ixtutuidikïi aatïmï ix bïï sudakami ïïgiadagi go sïïrhikami tudu dai podukai gïr mamaaxidi gobai saidi ïr soimaaxi ibuadami aatïmï. Dïï gia Diuxi bhai dui gïr bïïtarï aidïxi kuruxiana gï xixatu Suxi Kristo. Aidï maigobai daitu ïgai go ojai xako pokaiti sai buaturhi aatïmï gïr soimaaxkamiga bïïtarï dai podukai ka kïïgakïrï bubuaka aatïmï.

1 Tomoteo 2:6

Ïïgi gï tïïgitu Suxi Kristo tudu sai muana jaa ïmo daxdaragai dukai. Podukai bhai dui ïgai bïïxi óídakami bïïtarï sai ïgaikïdï kïïgakïrï bubuakïna óídakami. Ïgai dibia tami oidigi daama ixtuigako Diuxi ipïrhi xi dibiana dai gïr maaxiturhi sai Diuxi ipïrhidi ix kïïgakïrï bubuakïna bïïxkatai óídakami.

1 Tomoteo 3:16

Kïïga maatï aatïmï sai namïga gïr buaboidaraga buaboidaitai aatïmï Suxi Kristo. Daiñi, ïkioma óídakami mai maatïkana ixtumaxi ïr buaboi dïï gia Diuxi gïr tïïgi ixtumaxi ïr buaboi dibiakai Suxi Kristo. Dai xibi naana maaxikïdï maatï aatïmï saidi ïr buaboi ixtumaxi aagai aatïmï aagaitai Suxi Kristo dai sai namïga gïr buaboidaraga. Daiñi, Suxi Kristo gïr aagidi dai gïr maaxiturhi xorai ïgai dibiakai tami oidigi daama. Dai Diuxi Ibhïadï ïpï kïïga aagaiña saidi ïr buaboi xorai gï aagaiña Suxi Kristo. Dai go Diuxi tïtïañikarudï bïïxi nïidiña go Suxi ïpï dai aipakoga óídakami ayi aatagi xorai ïgai. Dai gokiïrioma mui oidigi daama óídakami bhai aa saidi ïr buaboi ïpï dai buaboitu. Bhodïrï gï baidakatu go Suxi tïbagiamu xako oidakamu gïïpi xadutudaragai ïgai bïïtarï. Xadïrï po gï duñimudai bïïxi gobai ix maiti ïr buaboikamudai gïr buaboidaraga di.

Hebreos 2:14

Aatïmï tudu ïr maamaradï Diuxi ix makïdï aagai ïgai. Dai bia aatïmï gïr tukugadï dai mumukui aatïmï. Kaxkïdï gïr ïpïamaaxi tukuga bhïiyi Suxi. Biatu Suxi tukugadï ïpïan dukai aatïmï sai bhodïrï mukuna ïgai dai podukai popoidan dui ïgai gubukarhigadï go diabora ixtukïdï gïr buapidi ïgai go mukigami.

Hebreos 9:10

Go ïïkidadï sïïrhikami gïr tïanïiña saidi ibuada aatïmï naana maaxi xadutudaragai dïï mosïkaxi aagai gobai ixtumaxi ibuada aatïmï gïr tukugakïdï dai maiti gïr aagidi gobai ix tuma buadagi aatïmï gïr ibhïdagakïdï. Dukami, gïr daidi gobai ïïmo maaxi kuadagai gïr daidi ïïmo maaxi idagai ïpï. Pomaaxkatadai ïïkioma aidïxi kia namïakatadai go ïïkidadï sïïrhikami tudu dïï xibi ka mai pomaaxi gobai. Xibi namïaturhi Suxi Kristo ïmo utudui sïïrhikami kaxkïdï.

1 Juan 4:14

Dai aatïmï ïr nïijadami ix Diuxi gïr Oga otoi Maradï tami oidigi daama sai ïgai ïr kïïgakïrï bubaidadamikana bïïxi óídakami bïïtarï. Gobai aagidiña aatïmï óídakami tudu.

1 Juan 4:2

Gïn aagidamu aanï ix dukatai maatïkagi aapimï ix bhai Diuxi Ibhïadïkïdï ñokai ïgai. Daiñi, gï agai ix gatïtïïgiadagi ïgai goka ñoki. Gï agai ix gatïtïïgiadagi ïgai saidi Suxi Kristo ïr Diuxi otosadï, dai gï agai ix gatïtïïgiada ïgai ïpï sai kïïga gï tukugatu Suxi gïr ïpïan dukai. Ix podukai gatïtïïgiadagi ïgai aidï gia gï maatï sai Diuxi Ibhïadï podukai aagidi ix gatïtïïgiadagi ïgai.