Exodo 3:18 - Northern Tepehuan Bible

¹⁸ —Go bhaitï gukakamigadï Israelitas gï ïïgida kaimu. Dai bhodïrï oidamu aapi go bhaitï gukakami daidi mïï Ejiptuïrï Rey buidïrï kïkibamu aapi dai atagidamu. Daidi tïdamu aapi go Rey sai, —Diuxi Gïr Nukadakami ix makïdï aatïmï Israelitas buaboitudai ïgai daidi gïr buidïrï gï maaxitu dai gïr aagidi sai mïï oidigana daaxida aatïmï buxtaki. Ïgai gin otoi naidi gï tanïna aanï oigaragai xi dagitoagi aapi gin aaduñi xi baidakagi aanï baika tasai imidagai oidigamu. Mïï koditulda ïragai aatïmï buxtaki Diuxi Gïr Nukadakami. Potïdamu aapi go Rey— itïtïdai Diuxi go Moises.

Exodo 3:18 Iomraidhean Croise

Genesis 12:1

Ïki oidakatadai ïmo kïïrhi Abram tïgidukami dai ïmo imidagai Gïr Nukadakami aataga ïmadï daidi potïtïdai, —Abram. Dagitoñi gï kii dai gï aaduñi dai aanï gï tïïgidamu ïmai dïbïrai xibhïako pai ami oidaka aapi.

Genesis 17:1

Ïmo imidagai aidïxi ka biakatadai Abram maakokobhai dan bhaibuxtama dan tuxtama umigi sai gï maaxitu Gïr Nukadakami buidïrï ïgai daidi potïtïdai, —Aanï ïr Diuxi. Dai aanï ïgai dai bïïxi adama ïr gubuakami. Gï agai ix gin ïïgiadagi aapi dai kïï buañixikan dukai oidakagi— itïtïdai.

Exodo 17:5

Daidi Gïr Nukadakami potïtïdai go Moises, —Abïnakidañi go bhaitï gukakamigadï dai bhaitï imïda aapimï go Israelitas dai bïïxkatai abïr oijada gïn imidagai. Bhïkañi ïpï gï uxiaraga ixtukïdï gïïgï aapi go aki Ejipituana— itïtïdai.

Exodo 19:1

Kaxi pogïduitadai baika masadai xi bubuaka go Israelitas abhiadïrï Ejiptuañdïrï. Dai bhodïrï Refidimandïrï bubuaka ïgai dai ayi ïgai xako gïï kaatï oidigi Sinaí tïgidukïdï xako mai tipu óídakami. Ami gïn urhi ïgai buidïrï go tubidaki ix makïdï ïr Sinaí tïgidukïdï ïpï.

Exodo 25:22

Go Xadutudikami Kajoñi biakami go sïïrhikami gobai iñaparadï dama dai go tïtïañikaru ïrana, abhaipïrï gï buidïrï ayimu aanï dai aagidamu aanï bïïxi ixtumaxi ix makïdï tïanïdamu aanï go Israelitas— itïtïdai Gïr Nukadakami Moises.

Exodo 3:12

Daidi Diuxi itïtïdai, —Gï ïmadï daakamu aanï. Daiñi, ayimu ixtuigako gin xadutuadamu aapi tami idi tubidakïrï ïmadï gï aaduñi ka bubuakïkai aapimï Ejiptuañdïrï. Aidï gia maatïkamu aapi xi aanï ïgai daidi gï otoi— itïtïdai.

Exodo 3:16

Daidi Diuxi Gïr Nukadakami kia aatagaimi ïmadï Moises daidi itïtïdai, —Ïmpaidamu aapi go Israelitas bhaitï gukakamigadï aïkai aapi Ejipituana daidi aagidamu aapi xi gï buidïrï maaxitu aanï ix makïdï gïn piipixara buaboitudaiña ïïki. Ix makïdï Abraam dai Isaak dai Jakobo buaboitudaiña tudu. Aagidamu aapi xi gï buidïrï gin maaxitu aanï dai xi aanï gï aagidi xi nïidi aanï xïï soi dukai gïn aaduintuldimi go Ejiptuïrï óídakami— tïdamu aapi go Israelitas bhaitï gukamigadï.

Exodo 4:1

Diuxi aagidi go Moises sai bubaidana ïgai go Israelitas Ejiptuañdïrï. Dïï mos go Moises itïtïdai Diuxi, —Xadïrï gin buaboitudaiña go Israelitas. Maiti gin ïïgiadamu ïgai ïrhi aanï. Bhaiyoma potïimu ïgai xi maiti ïr buaboi xi gin buidïrï gï maaxitu aapi Gïr Nukadakami— itïtïdai Moises.

Exodo 4:23

—Tomaxi aanï aagidagi go Rey xi dagitona ïgai gin aaduñi xi iimiagi bïïxkïrï ïgai maiti ipïldamu. Kaxkïdï aapi Moises adukai tïdamu go Rey, —Aapi Rey ka mai dagito aapi maradï Gïr Nukadakami sai imiagi dai mïï koditudagi buxtaki dai daxdagi. Kaxkïdï Gïr Nukadakami mua agai aapi gï maara gïdukïdioma tïdamu aapi. Podukai aituldamu aapi gin ñoki go Rey buidïrï— itïtïdai Gïr Nukadakami go Moises. Potïtïdai Diuxi go Moises Ejiptuamajako imïdamikatai ïgai tudu.

Exodo 4:24

Dai bhodïrï boiyamu jii Moises ïmadï aduñdï dai maradï. Dai go Moises mai kia circuncidotadai maradï tukugadï aidï. Mai kia ikitïtadai lïïchi maradï ogidï uruxidï kugadïana tudu. Dai ayi ïgai xako gïn urhiña agaitadai ïmo tukagi dai ami ayi Diuxi go Moises buidïrï dai mua agaitadai mai kia circuncidadokatai tukugadï maradï.

Exodo 4:31

Daidi go Israelitas kïïga buaboida kaï ñokidï Aaron ïmadï Moises. Kïïga maatï kaï ïgai xi Gïr Nukadakami tïgito nïiditadai go Ejipituana óídakami xïï kabami soi duiñturhimi ïgai go Israelitas. Dai maatï kaï ïgai ïpï sai Gïr Nukadakami soiña agai. Xi kaxkïdï kuiki ïgai dai xaduturhi ïgai Diuxi kïïga buaboitudaitai.

Exodo 5:1

Bhodïrï go Moises ïmadï Aaron amïï dibiji Rey Ejipituana daidi itïtïdai, —Kaïkañi ix kaiti Diuxi Gïr Nukadakami ix makïdï aatïmï Israelitas buaboitudai. Ïgai ikaiti sai dagitona aapi gin aadundï bai iimïna ïgai oidigamu dai amïïka bagimitudagi ïgai dai xadutuadagi,— ikaiti Gïr Nukadakami itïtïdai Moises ïmadï Aaron go Rey.

Exodo 8:20

Bhodïrï Gïr Nukadakami itïtïdai go Moises, —Baañiñi xoroko ïïki dai mïï nïida go Ejiptuïrï Rey. Mïï gïï akiana tïïgimu aapi gï baïtïbïitai ïgai. Dai ka tïïgakai aagidañi sai, —Pokaiti Gïr Nukadakami, dagitona pïsa aaduñdï saidi oidigana kodagi buxtaki dai daxdagi daxdakaruïrï.