Exodo 24:12 - Northern Tepehuan Bible

¹² Bhodïrï Gïr Nukadakami aataga ïmadï Moises daidi itïtïdai, —Tïsaidañi bhaigobakoga tubidakiamu xako daja aanï. Bhaigobioma miadïrïioma kïkiba tami tubidakïrï daidi gin nïnïraka naidi aanï gï maakana ojodai kaakaparakami xako oja aanï maatïtuldaragai ïmadï sïïrhikami. Gokïdï maakimu aapi ñoki go odami— itïtïdai Gïr Nukadakami Moises.

Exodo 24:12 Iomraidhean Croise

Exodo 19:3

Ami tubidakïrï tïsai Moises dai aataga agai ïmadï Diuxi. Dai Gïr Nukadakami nobai tubidakiañdïrï ñokidi Moises daidi itïtïdai, —Idi ñoki aagida aapi go Jakobo piipixaradï, go Israelitas tudu. Aagidañi xi adukai aagai aanï sai,

Exodo 24:15

Dai bhodïrï tïsai Moises go tubidakiamu. Dïï gia mai kia ayi ïgai tubidakana kugïrï. Dai go tubidaki bïï iñapikan kaatï kubhuxi dai Gïr Nukadakami tïbai tubidakïrï kugïrï. Dai kabami kudidikami maaxi Gïr Nukadakami kudaigadï kubhuxi saagida ami dakatai ïgai. Dai go Israelitas mïï taandïrïï tïï Diuxi kudaigadï ix makïdï ïpïamaaxi ïmo gïï táí. Dai ka máí ïgai sai Diuxi ami dajatadai Moises ïmadï nïiditai go kudagi. Ami daiba Gïr Nukadakami naadami tasai kubhuxi saagida. Dai xadiko báí ïgai go Moises sai tïsadïna tubidaki kugïrï ukami xako daja ïgai.

Exodo 24:18

Dai Moises tïsai kubhuxi saagida sïïrhi dai ayi tubidaki kugïrï. Ami bii ïgai gokobhai tasai dai gokobhai tukagi.

Exodo 31:18

Gïr Nukadakami ïïgi ïkadïkïdï oja go sïïrhikami goka ojodai kaakaparakamiana dai tïïgi ïgai go Moises. Dai gokïdï ka kugaitu atagidï ami Sinaí tubidakïrï ix dukai aagidi ïgai go Moises.

Exodo 32:1

Kaxi pogïduitadai gokobhai tasai abhiadïrï xi jii go Moises tubidakiamu. Dai go Israelitas gïn ïmpagi ïmadï go Aaron daidi potïtïdai, —Ka mai dibian tïi go Moises— ikaiti ïgai. —Ka arhiï tïbïpi daja ïgai tubidakana— ikaiti. —Gïr bubaitu go Moises Ejiptuañdïrï dai xibi ka mai maatï aatïmï xi gï dui ïgai. Tïgito aatïmï xi aapi Aaron gïr duiñdagi ïmo ixtumaxi sai ïgai ïr diuxikagi aatïmï gïr bïïtarï. Aidï gia ix makïdï iduña agai aapi gïr tïïgidamu boi xako sïïrhi iimiagi aatïmï— itïtïdai go Israelitas.

Exodo 34:1

Dai Gïr Nukadakami aataga ïmadï Moises dai itïtïdai, —Duñiñi goka ojodai kaakaparakami ix maaxkatadai ix makïdï taatapai aapi. Nai ami ojagi aanï ïpamu go baa ñoki ix makïdï ojixikatadai tukamïrï ojodai kaakaparakamiïrï— itïtïdai.

Mataibo 5:19

—Daiñi, oidaka antaada ïmoko xorai po gï ïrhiadagi sai mai xii namïga ïmo ñoki Diuxi sïïrhikamigadïrï. Dïï gia xi gajiadïrï biagi ïgai go ñoki dai abïnakiada ïgai jaa sai gajiadïrï biagi ïpï, aanï aagai sai xorai pobuadagi ïr go bamioma mai namïakamika agai Diuxi bïïtarï gatïanïitai ïgai— itïtïdai. —Dïï gia xorai ïïgiadagi sïïrhikamigadï Diuxi dai abïnakiadagi jaa sai ïïgiadagi ïpï, ïgai gia ïr ïmo namïakamika agai Diuxi bïïtarï dai biakamu oigaragai saidi tïanïna Diuxi— itïtïdai.

2 Korintios 3:3

Daiñi, Suxi Kristo ipïrhidi sai bïïxi óídakami maatïkagi sai go aaduindagai ix makïdï idui aatïmï gïn saagida kïïga idui soiñi aapimï gïn bïïtarï. Mai aagai aatïmï ïmo paperhi xiïpï ïmo odai kaparakami xako ojixikagi lapixikïdï sai namïga gïr aaduindagai tudu. Dai bhaiyoma xibi Diuxi Ibhïadï gïn soi gïn iibhïdagïrï sai ïma dukai óídakana aapimï dai gobai ïgai dai maaxitudai sai namïga gïr aaduindaga. Diuxi Ibhïadï idui ïmo aaduindagai gïn iibhïdagïrï gïn nukadakatai aatïmï dai gïn tïtïgiditai aatïmï ñoki tudu. Ka ïma dukai óídatu aapimï dai kaxkïdï kïïga maatiga maaxi sai Suxi Kristo idui ïmo kïïgadukami aaduindagai aapimïrï kaïkatai aapimï gïr ñoki. Dai gobai ïr ïmo maaxidaragai saidi ïr ojotosadï aatïmï Suxi Kristo dai sai namïga gïr aaduindagai.

2 Korintios 3:7

Gin aaduñi, gïn tïgitobïrai xïïxi xigian dui aidïxi Diuxi maa go ïïkidadï sïïrhikami ojodiana ojixikami go Moises. Kïïga totoarïitadai buibasodï go Moises gubukadadïkïdï Diuxi aidïxi tïïgi ïgai go sïïrhikami go Israelitas tudu. Dai go Israelitas mai bhaigakatadai xi sïïrhi buijako nïñiadagi go Moises mos ïï kabami totoarïitai buibasodï gubukadadïkïdï Diuxi. Mai bhaigakatadai ïgai xi sïïrhi buijako nïñiadagi tomaxi kïï dukai otïrhioma totoarïitadai buibasodï go Moises. Dai go óídakami ix makïdï biakatadai go ïïkidadï sïïrhikami ka mos gïpiïrï surhigïiña mai ïïgiditai gobai. Kïïga gubuakami dukai dui go ïïkidadï sïïrhikami tudu.

Hebreos 9:4

Ami go tukabiïrï ix makïdï bïïxi adaama xadutudikïdï tïgidu ami dakatadai go daxdakarui kubhimadarhi dai go kajoñi ix makïdï sïïrhikami kiidï tïgidu. Go kajoñi bïï sudakami gï tïkimagi oro. Dai ïrana dakatadai ïmo ayi orokïdï duñixikami dai biakatadai maná. Dai ami kajoñiïrï kaatïkatadai uxiaradï go Aaron ïpï ix makïdï iipoi ïïki. Dai ami bïïtïkatadai go ojodai kaakaparakami ix makïdï ami ojixikatadai go sïïrhikamigadï go Moises ïpï.