Efesios 6:12 - Northern Tepehuan Bible

¹² Daiñi, gïr buidïrï bïïtïkami maiti ïr odami. Aatïmï kokodai jaa ix makïdï ïr diabora tïtïañikarudï soimaaxi iibhïdagami dai ix makïdï mai nïidi aatïmï. Ïgai ïr gupudagai bipiakami dai tïtïanïdami tami oidigi daama dai maigobai tïbagiana ïpï. Gupuka ïgai dai tïanïi ïgai tanai oidigi daama óídakami. Kaxkïdï tukamugan dukai kaatï oidigi xibi gatïanïitai ïgai.

Tepehuan Northern: Diuusi ñiooquidʌ utuducami oodamicʌdʌ

¹² Ismaacʌdʌ gʌrvuidʌrʌ vʌʌtʌ maitʌroodami. Ʌgai ʌrDiaavora ʌʌmadu tʌtʌaañicarudʌ. Ʌgai aliʌ soimaasi ivueeyi dai oidi daami ajioopai siaaco gatʌaanʌi ʌgai moomoyi dai dudunucami duucai. Ʌgai tʌaanʌi ismaacʌdʌ maivaavoitudai Diuusi.

Efesios 6:12 Iomraidhean Croise

Mataibo 16:17

Daidi Suxi potïtïdai, —Agia bia aapi ïmo gïdukami bhai ïrhiaragai aapi Ximuñi aapi ix makïdï ïr maradï Jonas. Diuxi gin Oga ix makïdï tïbagiana daja ïgai dai gï tïtïgidi xorai aanï, kaxkïdï. Mai xu xi odami gï tïtïgidi gobai tudu.

Markos 4:19

dïï mos arhiï tïtïitoi ïgai ixdukatai oidaka agai tami oidigi daama. Ïgai gïn bupuirutudai adaimïitai go tuminxi. Naana maaxi biaka ïrhidi ïgai dai go ñoki ix makïdï kaï ïgai ka mai soikïi.

Lukas 13:24

—Go kïïgakïrï bubaidaragai ïr ïmo kuuparagai arhidukami gajiakoga duu xako gï agai xi bapakiagi odami ïmo kiiyïrï dai go tuidakami go kii ïr Diuxi. Kabami abïr gïn aaga dai bapaki ami xako mai gïdu gajiakoga tudu. Kaxkïdï tudu ayimu ixtuigako tuidakami go kii kuupa agai go kuuparagai dai aidï ka mai bhaigakamu óídakami ix bapakiagi. Muidutai aapimï kidigamadïrï bimu aidï dai gaagamu ixdukatai bapakiagi dai ka mai ixtutuidimu. Aidï gataañimu aapimï baakigai dai potïdamu aapimï Diuxi, —Aapi Tïanïdami, kupiokañi go kuuparagai xi bapakia aatïmï— itïimu aapimï aidï. Dïï gia Diuxi pobai gïn tïdamu, —Maita an maatï xajadïrï óídakami aapimï— itïimu ïgai.

Lukas 22:53

Bïïx tasai gïn ïmadï dakana aanï go gïï kiupiana di. Kïï bhaigakatadai aapimï xi ami gin bhïiyagi tudu— itïtïdai. —Dïï maiti gin taata aapimï ami. Dai xibi gia ka ayi xuduku xi gïn maa oigaragai Diuxi xi gin bhïiyagi. Dai ka maa ïgai ïpï go diabora oigaragai ix makïdï tukapi dukai gatïanïi— itïtïdai.

VUAANA 12:31

—Xibi Diuxi daituda agai go gïgïbidaragai ix makïdï ajïga oidigi dama óídakami. Dai xibi ïpï gamaitï agai Diuxi gobai ix makïdï gatïanïi tanai oidigi daama, gamaitï agai ïgai go diabora tudu— itïtïdai.

VUAANA 14:30

Ka mai xii tïbïpi aatagadamu aanï gïn ïmadï xibi tudu. Ka karhioga dibia go Diabora ix makïdï gatïanïi tami oidigi daama. Ïgai mai bia gubukarhigai ix gin tïanïdagi

VUAANA 16:11

Dai Diuxi Ibhïgadï maatïtulda agai óídakami ïpï sai Diuxi maakia agai gïgïbidaragai bïïxi soimaaxi buadami. Ka aagai Diuxi ix gïgïbitulda agai go Diabora ix makïdï gatïanïi tami oidigi daama tudu. Dai kaxkïdï gï maatï sai Diuxi gïgïbitulda agai bïïxi soimaaxi buadami ïpï oiditai ïgai go Diabora— itïtïdai.

Hechos 26:18

Dai tïïgidamu aapi ixtumaxi ïr buaboi bai ïgai dagitona go soimaaxkïdï tïgibudagai tukamukïdï dai oijadana go kïïgadukïdï tïgibudagai ix makïdï ïr kudagi tudu. Sai ka maiti gïn tïanïna go diabora dai Diuxi gïn tïanïna bhaiyoma. Daidi oigïrhixikami bimu soimaaxkamigadï gin buaboitudaitai ïgai dai uraba bimu ïgai Diuxi ïko bubaidadï— gin tïtïdai Suxi— itïtïdai Pabora.

Romanos 8:38

Kïïga maatï aanï sai mai tipu ixtumaxi sobhidagi bai ka maiti gïr oigïdadagi Diuxi. Tomaxi koi aatïmï xiïpï xi apia óídakagi aatïmï modukai mai sobhidamu gobai. Tomarhi Diuxi tïtïañikarudï dai tomarhi go diabora tïtïañikarudï, xiïpï go gubukadagai bipiakami tïbagiïrï óídakami mai sobhidamu. Tomarhi ix tumaxi oidaga xibi dai tomarhi ix tumaxi oidaka agai gokiïrioma,

1 Korintios 15:50

Gin susukurhi, ipïrhidi aanï ix maatïkagi aapimï sai mai bhaiga aatïmï ix bapakïdagi tïbagiana xako gatïanïi Diuxi biakatai kia idi tukuga ix makïdï bia aatïmï xibi. Mai tïbïpi kabaka gïr tukuga kaxkïdï. Xadïrï bhaigakana idi gïr tukuga ix oidakagi bïïxkïrï bïïtarï tudu.

2 Korintios 11:14

Gin aaduñi, kïïga maatiga maaxi ix tuixi podukai buirumada ïrhidiña ïgai óídakami. Go diabora ïgai daidi ïr tïanïdamigadï kaxkïdï. Dai kïï maatï aatïmï sai go diabora ïmo tïañikarudï Diuxi dukai gï dadasai buirumada ïrhiditai ïgai go óídakami.

2 Korintios 4:4

Go diabora ïgai dai gatïanïi tami idi oidigi daama tudu. Dai maatiga maaxi sai buirumadai ïgai go óídakami ix makïdï mai maatï kaïkagi gïr aatagi mai buaboitudaitai ïgai ixtumaxi ïr buaboi. Maiti ipïrhidi go diabora ix óídakami maatï kaïkagi go bhai ïrhiaragai aatagi aagaitai Suxi Kristo tudu. Maiti ipïrhidi ïgai ix maatïkagi óídakami xïï kïï tuiga dai xïï gubuka Suxi Kristo Gïr Nukadakami. Suxi ïmadï Diuxi kïïga ïmadugan maaxi dai ïmadugan tutuiga tudu.

Galatas 1:16

maaxiturhi ïgai Suxi Kristo gin buitapi sai maatïkana aanï kïïga xorai ïgai. Podukai idui Diuxi ipïrhiditai sai aituldana aanï aatagi go ix makïdï maiti ïr judidiu aagaitai Suxi Kristo. Podukai gin maa ïgai go bhai ïrhiaragai aatagi tudu. Dai bhodïrï mai tïkakai aanï tomarhi ïmo odami ix dukatai iduñagi aanï dai bhaiyoma mos gin aaga aanï aagaitai go aatagi ix duu gin maatadai Diuxi gobai. Kaxkïdï gï maatï sai mai ïmo odamiañdïrï bhïiyi aanï go aatagi.

Efesios 1:21

Daiñi, Diuxi dáí go Suxi Kristo sai ïgai bamioma gatïanïna xi bhai bïïxi aïkatai gupudagai bipiakami ix makïdï oidaga tïbagiana. Bïïxkïrï bïïtarï Suxi Kristo bamioma ïr gatïanïdami ix toma xorai. Tipukamu aidï tomarhi ïmo ixtumaxi tomarhi ïmo oidakami ix makïdï ïpïan ïxi gatïanïdagi ix xïïxi tïanïi Suxi Kristo.

Efesios 1:3

Gï agai xi oigïda ñokadagi aatïmï Diuxi bïïtarï. Ïgai ïr Diuxigadï Suxi Kristo Gïr Nukadakami dai ïr Ogadï ïpï. Diuxi gïr maa bïïxi aïkatai bhai ïrhiaragai ix makïdï oidaga tïbagiana gïr ibhïdaga bïïtarï. Diuxi gïr maa idi bhai ïrhiaragai mos bïïnakai aatïmï Suxi Kristo.

Efesios 2:2

Aidïpïrï adaimïiña aapimï go odami tïgibudadï dai ïïgidiña aapimï go diabora pobuadatai. Go diabora ïgai dai tïanïi go soimaaxi iibïdagami ix makïdï mos ïbïltapi ajiopai. Dai xibi aatabuayi ïgai iibhïadïrï odami ix makïdï mai ïïgidi Diuxi ïpï.

Efesios 3:10

Dïï gia xibi ipïrhidi Diuxi xi tïtïañikarudï maatïkana xïï saitudaga Diuxi tïgibudadï. Sai tïtïañikarudï ix makïdï ïr gupudagai bipiakami dukai tïbagiana maatïkana tudu. Kaxkïdï xibi aatïmï buaboitudadamikïdï aatabuayi Diuxi dai aatïmïkïdï gatïtïïgidimi ïgai xïï kabami saitudaga tïgibudadï.

Kolosenses 1:13

Diuxi ïgai dai kïïgakïrï gïr bubaitu abhiadïrï xako tukamugan duu gatïanïitai go diabora ami dai gïr daibuintu ïgai xako gatïanïi Diuxi Maradï ix makïdï Diuxi oigïdai. Xibi ka kudagiïrï dukai óídaga aatïmï tudu gïr tïanïitai ïgai.

Kolosenses 2:15

Ami kuruxiana maitï ïgai go diabora tudu ïmadï go tïtïañikarudï ix makïdï gatïanïiña tami oidigi daama. Maitï ïgai dai kïïga mamaaxidi ïgai bïïxi go óídakami buitapi sai maiti ixtutuidikïi go diabora ïgai bui.

2 Timoteo 2:5

Dai gï agai xi ïpïan buadagi aapi xïïxkadï tïtïïbiïrï mïradagi ïmoko biakatai sayudï. Ïgai bia xi mïradagi ix dukai darai go ibuadami go tïtïïbigai ¿aba? Ïmadukai xadïrï maitïna ïgai ixtumaxi.

Hebreos 12:1

Gin aaduñi Diuxi amadïrï, kaxi gïn aagidi aanï sai muidukana go óídakami ix makïdï kïïga buaboitudai Diuxi ïïki abhiadïrï. Gïr xikorhi gukakan duu ïgai gïr aagiditai sai mai ugutai buaboitudada aatïmï Diuxi tudu. Kaxkïdï ïpï tï tai aatïmï kabami gïr aga dai kïïga buaboitudaitai óídaka ïpï. Tï kabami gïr aga ïpïan dukai ïmo mïmïradami ix makïdï maigobai dadasai bïïxi ixtumaxi sobhikïdagi ix mïradagi ïgai. Tï maigobai dasa bïïxi ixtumaxi gïr sobhikïdagi saidi kïïga buaboidaitai óídakagi aatïmï tudu. Tï gajiadïrï bia bïïxi go soimaaxkami ix makïdï dudatai gïr sobhikïi. Gï agai tudu xi mai ojodatai oijadagi aatïmï go oidakaragai ix makïdï gïr maa Diuxi.

Hebreos 12:4

Gïn tïgitobïrai ïpï sai Suxi Kristo gï muatu buidïrï kïkibakai ïgai go soimaaxkami. Go soimaaxkami ix makïdï oidaga ïr gïr buidïrï kaatïkami duu tudu. Dai tomaxi buidïrï gugukimi aapimï go soimaaxkami bïïxkïrï mai kia taata aapimï go mukigami buidïrï gugukatai gobai.

1 Pedro 3:22

Dai xibi Suxi Kristo bia ïmo gïdukami sïïrhikami sïïrhixapadïrï dakatai ïgai Diuxi amïka tïbagiana. Dai ami gatïanïi ïgai bïïxi go tïtïañikarudï Diuxi dai bïïxi go gubukadagai bipiakami ix makïdï ami tïbagiana daraka.