Efesios 1:18 - Northern Tepehuan Bible

¹⁸ Daanïi aanï Diuxi sai kïïga gïn maatïtuldana gïn iibhïdagïrï tudu. Aidï gia maatïkamu aapimï xïïxi ïr gïdukami go bhai ïrhiaragai ix makïdï bia Diuxi gïr bïïtarï, aatïmï gïr bïïtarï tudu ix makïdï ïr bapaidarxigadï. Diuxi gïr báí xi gïïpi bhai ïrhiarakïdï nïnïrakana aatïmï gobai ix makïdï bia ïgai gïr bïïtarï.

Efesios 1:18 Iomraidhean Croise

Isa 11:2

Gïr Nukadakami Ibhïadï ïmadï dakamu go Rey ïgai tomax tuigako. Kïï sïïrhiñika agai tïgibudadï go Rey dai maatï nïijadamu ïgai aaduindadï. Gïr Nukadakami tïgibudadïkïdï gamaakimu ñoki go Rey. Dai ïgai tïgibudagaikïdï bhïimu gubukadagai dai xadutuadamu ïgai Gïr Nukadakami.

Mataibo 13:15

Sïïrhikïdï kapaka iibhïadï idi odami kaxkïdï. Kuukupidi ïgai naanakadï maiti gin kaïka ïrhiditai tudu. Dai iñapidi ïgai bupuidï ïpï mai kïïga nïida ïrhiditai ixtumaxi buayi aanï. Ix mai pomaaxkamudai ïgai aidï gia maatï kaïkamudai ïgai gin ñoki. Dai maatï nïijadamudai ix tuma buayi aanï ïpï. Aidï gia gin buaboitudamudai ïgai dai aanï kïïgakïrï bubaidamudai. podukai oja go Isaias ïïki tudu— itïtïdai Suxi.

Markos 10:17

Bhodïrï boiyamu imïi go Suxi ïpamu tai ïmo kïïrhi mïï dai buidïrï ayi. Gï totonakïdï kïkiba go kïïrhi Suxi buitapi daidi potïtïdai, —Aapi maatïtuldiadami gia kïï tuiga kaxkïdï ipïrhidi aanï pïxi gin aagidagi, ¿Ix dukatai duna aanï dai aiyagi Diuxi ïmadï xako kïïgakïrï oidakana ïmoko tomaxtuigako?— itïtïdai go kïïrhi.

Hechos 16:14

Ïmoko Lidia tïgidukatadai. Ïgai ïr Tiatirïrï oidakami daidi ïr gaagaradami ikuxi moraduakami. Idi oki kïïga xadutudai Diuxi. Dai kaïkatadai ïgai aatagidï Pabora dai Diuxi maa tïgibudagai xi ïïgida kaïkana.

Hechos 26:18

Dai tïïgidamu aapi ixtumaxi ïr buaboi bai ïgai dagitona go soimaaxkïdï tïgibudagai tukamukïdï dai oijadana go kïïgadukïdï tïgibudagai ix makïdï ïr kudagi tudu. Sai ka maiti gïn tïanïna go diabora dai Diuxi gïn tïanïna bhaiyoma. Daidi oigïrhixikami bimu soimaaxkamigadï gin buaboitudaitai ïgai dai uraba bimu ïgai Diuxi ïko bubaidadï— gin tïtïdai Suxi— itïtïdai Pabora.

Romanos 11:29

Xadïrï ïma dukai gï tïgitona Diuxi kaxi maakakai ïmo oidaragai. Dai xadïrï ïma dukai gï tïgitona ïgai kaxi ïko bubaidakai óídakami ïpï. Bïïxkïrï ibuayi ïgai ixdukatai aagadagi.

Romanos 2:4

Diuxi gia kïï tuiga. Mai otoma bhamukui ïgai gïn bui tudu dai tomarhi mai otoma daitudai gïgïbidaragai gïn abhana tomaxi gïn ajïakatadai xi taatagi gïgïbidaragai. Dïï aapimï tomarhi mai buamï gïn ïrhidi. Bhaiyoma soi dukai nïidi aapimï Diuxi poïrhiditai sai ïgai mai oton gïgïbitulda agai. Buabi tudu sai kïï tuiga ïgai gïn bïïtarï. Ipïrhidi ïgai sai ïma dukai gïn tïtïgitokagi aapimï kaxkïdï mai oton gïgïbituldai ïgai.

2 Korintios 4:4

Go diabora ïgai dai gatïanïi tami idi oidigi daama tudu. Dai maatiga maaxi sai buirumadai ïgai go óídakami ix makïdï mai maatï kaïkagi gïr aatagi mai buaboitudaitai ïgai ixtumaxi ïr buaboi. Maiti ipïrhidi go diabora ix óídakami maatï kaïkagi go bhai ïrhiaragai aatagi aagaitai Suxi Kristo tudu. Maiti ipïrhidi ïgai ix maatïkagi óídakami xïï kïï tuiga dai xïï gubuka Suxi Kristo Gïr Nukadakami. Suxi ïmadï Diuxi kïïga ïmadugan maaxi dai ïmadugan tutuiga tudu.

2 Korintios 4:6

Daiñi, Diuxi ño ïïki aidïxi kia tukamukatadai oidigi daidi itïi ïgai, Ipïrhidi aanï sai oidakana kudagi, itïi ïgai. Dai ka oidatu kudagi dai ka kudidikami bii oidigi. Dai xibi ka kudidakan dukai bia ïgai gïr iibhïdaga ïpï gïr tïtïïgiditai ïgai ixtumaxi ïr buaboi. Po dui ïgai sai ka maatïkana aatïmï xïïxi ïr gïdukami ïgai dai xïï xigian tuiga. Gïr tïgito nïiditai aatïmï Suxi Kristo podukai kïïga mamaatïrïi aatïmï xïïxi ïr gïdukami Diuxi dai xïï xigian tuiga ïgai tudu.

Galatas 5:5

Dïï gia aatïmï ix makïdï bia Diuxi Ibhïadï dai ïgai gubukarhigadïkïdï óídaga mai podukai ibuayi. Mai gajiadïrï biayi aatïmï Suxi Kristo tudu. Aatïmï gia kïï maatï sai buañixikami gïr aagai Diuxi dai kïïgakïrï gïr nïidi. Dai bhai ïrhiarakïdï nïnïraka aatïmï xi gïr ajiagi ixtumaxi kïïgadukami buañixikatai aatïmï.

Efesios 1:11

Ïkobai gïr bubaitu Diuxi bïïnakai aatïmï Suxi Kristo tudu. Tukamidïrï abhiadïrï ïïgi podukai gï tïgitokatadai Diuxi xi aatïmï ix makïdï bïïna daraja Suxi Kristo ïr ïko bubaidadïkana. Podukai dáí ïgai saidi ïpï gï duna ixdukatai ïgai ipïrhidi. Bïïxkïrï ibuayi ïgai ixdukatai gï tïgitokagi kaxkïdï.

Efesios 1:7

Suxi Kristo aaxi ïïgi ïradï gïr bïïtarï tudu. Kaxkïdï kïïgakïrï bubuaka aatïmï dai oigïrhikami bii aatïmï gïr soimaaxkamigakïdï bïïnakai aatïmï Suxi Kristo. ¡Xïï kïï tuiga Diuxi aidï!

Efesios 2:12

Tïgitobïrai ïpï sai aidï maiti gïn ajïakatadai xi gïn soikïdagi Suxi Kristo dai mai biakatadai aapimï urabaragai ïmadï go Israelitas. Diuxi bhai dui ñoki go Israelitas ïmadï dai aagidi saidi iduñagai naana maaxi ixtumaxi ïgai bïïtarï dïï aapimï maiti ïr gïn bïïtarïkatadai gobai. Aapimï mai biakatadai soiñi aidï dai mos óídakaiña mai maatïkatai Diuxi.

Efesios 3:16

Kïïga maatï aanï sai Diuxi kabami ïr gïdukami kaxkïdï daanïi aanï saidi Ibhïadïkïdï gïn maakana ïgai gubukarhigai gïn ibïgaïrï.

Efesios 3:8

Daiñi, tomaxi aanï ïr ïmo buaboitudadami bamioma mai namïakïdï, bïïxkïrï Diuxi gin maakai idi gïdukami bhai ïrhiaragai. Gin maa ïgai xi aagidagi aanï go ix makïdï maiti ïr judidiu xïï kïï tuiga Suxi Kristo gïr bïïtarï bïïnakai aatïmï ïgai. Odami tïgibudadï mai ajïi ix maatiagi xïïxi ïr namïakami Suxi Kristo gïr bïïtarï tudu.

Efesios 4:1

Aanï gin maixatu mos ïïgiditai aanï Suxi Kristo. Dai aanï xibi bïïxi gin ibhïdagakïdï gïn abïnakida in ïrhidi xi kïï bhai maaxkami dukai óídakana aapimï. Gï agai xi kïï bhai maaxkami dukai óídakagi aapimï aidï dai podukai maaxitudagi sai gia ïr buaboi sai Diuxi ka ïkobai gïn bubaitu.

Efesios 4:4

Ïmo aadunumï aatïmï tudu bïïxkatai ix makïdï bia Diuxi Ibhïadï dai ïgai mos arhi ïmaduga. Dai ïmaduga ïpï go gïï bhai ïrhiaragai ix makïdï nïnïrakatai ajiopai aatïmï bïïxkatai.

Efesios 5:8

Ïkioma aapimï mos ïr ïï tukamudagaikana dïï xibi gia ïr kudagi aapimï buaboidakai Gïr Nukadakami. Kaxkïdï abïr bhai maaxkami dukai óídaka dai kïïga maaxituda xi gia ïr kudagiïrï óídakami aapimï xibi.

Filipenses 3:14

Diuxi gin báí saidi bhïna aanï ïmo gïdukami maitïki. Dai kaxkïdï kabami gin aajagïi aanï bhïiya iñagaitai go maitïki ix makïdï ïr go tïbagiïrï oidakaragai ix makïdï bia aanï bïïnakami dakatai aanï Suxi Kristo.

Kolosenses 1:12

aagidiña aapimï Diuxi sai kïïga bhai gïn ïrhidi ïgaikïdï. Sai bhai gïn ïrhidiña aapimï tudu Diuxikïdï maatïkatai sai ïgai ka bhai gïr dui sai biakana aatïmï bïïxi ixtumaxi bia Diuxi gïr bïïtarï. Aatïmï gïr bïïtarï tudu ix makïdï kaxi ïr maamaradï. Aatïmï ix makïdï kudagiïrï dukai óídaga ïïgiditai ixtumaxi ïr buaboi tudu.

Kolosenses 1:23

Dïï gia tomaxi ïr buaboi sai Suxi Kristo ka bhai dui gïn bïïtarï bïïxkïrï gï agai xi apia buaboitudada aapimï ixtumaxi ïr buaboi. Kabami abïr gugukada tudu kïïga buaboidaitai ixtumaxi ïr buaboi. Daiñi, aidï abhiadïrï xi tukamïrï kaï aapimï go bhai ïrhiaragai aatagi kïïga bhai gïn ïrhidiña aapimï. Bhai gïn ïrhidiña nïnïrakatai go naana maaxi kïkïïgadukami ix makïdï bia Diuxi gïn bïïtarï. Apia abïr buaboidaitai nïnïraka gobai tudu. Dai maiti abïr gïn dagito xi gin maitiagi ïma maaxi tïgibudagai. Maiti abïr gïn dagito xi tomarhi ïmo ixtumaxi gïn popoidagi gïn bhai ïrhiaraga tudu ix makïdï bhïiyi aapimï xudu tukamidïrï buaboitu aapimï. Daiñi, ix makïdï buaboitu aapimï ïr go galbaaxi bhai ïrhiaragai aatagi ix makïdï gï aiturhi bïïxi go gaa oidigi daama óídakami. Dai Diuxi gin maa sïïrhikami saidi aipakoga aagaiña aanï go galbaaxi bhai ïrhiaragai aatagi ïpï.

Kolosenses 1:5

Kïïga maatï aapimï tudu sai bia aapimï ïmo kïïgadukami nïnïraragai mïï tïbagiana. Dai gobai ix makïdï bia aapimï tïbagiana gïn abïnakiadan buayi sai apia kïïga buaboitudada aapimï dai sai kïïga oigïdada aapimï bïïxi go gaa buaboitudadami. Máí aapimï sai bia aapimï ïmo kïïgadukami nïnïraragai aidïxi kaï aapimï go buaboikïdï aatagi. Aidïxi kaï aapimï go bhai ïrhiaragai aatagi tudu.

Kolosenses 2:2

Kabami ipïrhidi aanï tudu sai aapimï ïmadï bïïxkatai ïgai kïïga abïnakian taadakagi dai sai kïïga gïn urabakagi gïn oigïdaitai aipakoga. Kabami ipïrhidi aanï sai biakana aapimï ïmo ixtumaxi kïïga namïakami. Ipïrhidi aanï sai gïn ibhïxtakan taadakagi aapimï kïïga maatïkatai aapimï Suxi Kristo tudu. Daiñi, go óídakami ïïki mai maatïkatadai sai oidaka agai ïmo kïïgakïrï bubiadami ix makïdï odami ïrana oidaka agai. Diuxi mai maaxiturhi ïgai kaxkïdï. Dïï gia ipïrhidi aanï sai aapimï gia kïïga maatïkana.

Kolosenses 3:15

Gin aaduñi, Diuxi gïr báí tïsaidi ïmo tukugai dukamikagi aatïmï ïmo aadunumïkatai aatïmï. Kaxkïdï kïïga abïr gïn tïgito nïijada ixtumaxi ibuadagi aapimï. Oijadabïrai tudu go ibhïxtaragai dai urabaragai ix makïdï gïr maa Suxi Kristo. Sai gobai ïgai dai gïr tïanïna tudu. Dai dudatai abïr aagiada Diuxi sai bhai gïn ïrhidi aapimï ïgaikïdï ïpï.

1Tesalonicenses 5:8

Dïï mai podukai óídaga aatïmï. Tasïrï dukai óídaga aatïmï bhaiyoma. Kaxkïdï gï agai xi kïï sïïrhi gïr tïgitokagi aatïmï biakatai gïr buidïrï kaatïkami ix makïdï ïr go diabora. Gï agai ix apia buaboitudada aatïmï Suxi Kristo dai ix oigïdada ïgai ïmadï jaa ïpï. Gobai gïr soiñamu go diabora bui ïpïan dukai xi ïmo baiñomi nagiakarui soikïi ïmo sandaru kokodiïrï. Dai gï agai ïpï xi kïïga buaboidaitai nïnïrakagi aatïmï maatïkatai sai Suxi Kristo kïïgakïrï gïr bubiadamu. Kaxkïdï tudu gïr nïnïraragai ix makïdï bia aatïmï maatïkatai sai kïïgakïrï bubuakimu aatïmï gïr soiñamu sai mai soi gïr buidadagi go diabora. Gïr soiñamu gobai ïpïandukai xi ïmo kasko soikïi ïmo sandaru kokodiïrï.

2 Tesalonicenses 1:11

Gïr susukurhi, dudatai daanïiña aatïmï Diuxi saidi kïï bhai dukai óídakana aapimï gubukarhigadïkïdï Diuxi bai podukai oidakana gïïpi xadutudaragai Suxi bïïtarï. Diuxi gïn báí tudu sai kïïga urabana aapimï ïgai. Dai kaxkïdï daanïi aatïmï Diuxi sai ibuadana ïgai aaduindagai aapimïrï saidi kïïgakïrï óídakaiña aapimï ixdukatai gï agai ix óídakagi uurapïkïdami Diuxi. Ix podukai óídakagi aapimï aidï gia kïïga oidakamu xadutudaragai Suxi bïïtarï. Kïïga buaboitudai aapimï tudu ix kaxkïdï naana maaxi kïïgadukami ibuada ïrhidiña aapimï. Dai daanïi aatïmï Diuxi saidi ïgai gubukarhigadïkïdï ïpïbuadagi bïïxi gobai ix makïdï ibuada ïrhidi aapimï, ix makïdï ïr kïïgadukami tudu. Dai pogïdunakai gobai aidï mui óídakami nïijadamu dai xadutuadamu Suxi Gïr Nukadakami nïiditai xïï naana maaxi idui ïgai aapimïkïdï. Daidi Suxi kïïga ñokadamu aapimï gïn bïïtarï aidï ïpï. Kïï tuiga Suxi Kristo gïr Diuxiga dai Gïr Nukadakami tudu ix kaxkïdï po gï duñimu bïïxi gobai ix makïdï gïn aagidi aanï.

2 Tesalonicenses 2:16

Gïr susukurhi, gïn daanturhiña aatïmï sai gïn abïnakidiña Diuxi dai sai gupurtudana ïgai gïn buaboidaraga. Dai kïï gubuakatai gïn buaboidaraga aidï gia bïïxi ixtumaxi aagidagi aapimï jaa kïïga ibuadamu soiñi dai bïïxi ixtumaxi ibuadagi aapimï jaa bïïtarï kïïga ibuadamu soiñi ïpï. Suxi Kristo Gïr Nukadakami ïmadï Diuxi gïr Oga ïgai dai kïï tutuiga gïr bïïtarï tudu dai gïr oigïdai dai gïr maakai ibhïxtaragai ix makïdï mai ugiatïkïi dai gïr maakai ïmo nïnïraragai kïïgadukami ïpï.

1 Tomoteo 6:12

Bïïxi gï gubukarhigakïdï ibui kïkiba aapi ixtumaxi xia duada ïrhiada gïr buaboidaraga tudu. Daiñi, ka kïïga maaxiko aa aapi buitapi mui odami sai buaboitudai aapi Suxi Kristo dai aidïpïrï Diuxi gï báí pïsai kïïgakïrï oidakana bïïxkïrï bïïtarï. Diuxi gï urhiñdi go kïïgakïrï oidakaragai bïïxkïrï bïïtarï tudu. Kaxkïdï gï agai xi kïïgakïrï oidaka aapi sai maatï taatana aapi ix taadaga xibi go bïïxkïrï oidakaragai. Gobai ïr gï maitïki oiditai aapi gïr buaboidaraga tudu.

Tito 2:13

Podukai gïr maatïturhimi Diuxi ix dukatai óídakana aatïmï xibi kia nïnïrakatai aatïmï xi aiyagi gïr bhai ïrhiaraga. Nïnïraka aatïmï xi dibiagi Suxi Kristo tudu ix makïdï ïr gïr Diuxiga. Aidï dibiakai ïgai gï maaxitudamu xïïxi ïr gïdukami.

Tito 3:7

Aidï ïr soimaaxi ibuadamikana aatïmï dai maiti ïr gïr ajïakamikatadai xi kïï tuigakagi Diuxi gïr bïïtarï dïï bïïxkïrï buañixikami gïr aa ïgai. Podui ïgai saidi ïr maamaradïkana aatïmï dai sai bhïna aatïmï ixtumaxi bia ïgai gïr bïïtarï. Dai xibi nïnïraka aatïmï ixtumaxi bia ïgai gïr bïïtarï maatïkatai sai bïïxkïrï bïïtarï óídaka ragai.

Hebreos 10:32

Gin aaduñi, gïn tïgitobïrai ix dukatai óídakatadai aapimï aidïxi tukamïrï máí aapimï ixtumaxi ïr buaboi. Aidï gia maiti gïn daadagitoiña aapimï xi gïn maitiagi go soi ïrhiaragai tomaxi naana dukai soimaaxi taatamaiña aapimï.

Hebreos 6:4

Gï agai xi apia bhaitiakoga oijada aatïmï gïr aatagi tudu. Tadu ka aa surhi ïmadutai aapimï dai dagito buaboidaradï. Kaxkïdï tudu odami ix makïdï ka máítadai ixtumaxi ïr buaboi dai aa surhiagi dai dagitoagi go buaboidaragai, ïgai ka mai bhaigakamu ix tomarhi ïmadutai ïmadukai gïn tïgituldagi ïpamu. Ka taata ïgai ixtumaxi kïïgadukami gïr maakai Diuxi tïbagiañdïrï tudu dai ka biatu Diuxi Ibhïadï abhana.

1 Pedro 1:3

Gin aaduñi, gï agai sai kïïga ñokada aatïmï Diuxi bïïtarï. Gï agai sai kïïga ñokada aatïmï bïïtarï ïgai ix makïdï ïr Diuxigadï Gïr Nukadakami Suxi Kristo tudu. Soi ïlda gïr tïï ïgai kaxkïdï daidi gïr maa ïmo utudui oidakaragai. Gï duakatu Suxi Kristo ïpamu tudu gokiïrï xi mutadai ïgai dai kaxkïdï bia aatïmï ïmo kïïgadukami nïnïraragai xibi. Dai kïïga gupuka antaadakana aatïmï gïr utudui oidakaragai bïïtarï maatïkatai sai bia aatïmï go kïïgadukami nïnïraragai gobai.

1 Pedro 3:9

Xïxkadï soimaaxi gïn buidadagi jaa maiti abïr aadïrï soimaaxi ibuada ïpï. Ix soimaaxi ñoki gïn aagidagi ïmai maiti abïr aa noraida soimaaxi ñoki dai bhaiyoma abïr aagiada ïmo bhai ïrhiaragai ñoki. Pomaaxi bïïtarï kïïgakïrï gïn bubaitu Diuxi tudu saidi kïïga buidadagi aapimï jaa. Dai Diuxi gïn maakimu naana maaxi bhai ïrhiaragai ix pobuadagi aapimï.

1 Pedro 5:10

Kïï tuiga Diuxi gïn bïïtarï tudu dai gïn báí ïgai saidi aapimï ïpï gïn ajiagi go gïdukami xadutudaragai ix makïdï biakamu ïgai bïïxkïrï bïïtarï. Aapimï gïn aji agai go xadutudaragai gobai bïïnakatai aapimï Suxi Kristo tudu. Dïï gia gï agai sai soimaaxi taatamadagi aapimï kia dïï gia mai xii tïbïragaka agai go soimaaxi taataragai. Dai gokiïrï bhai gïn buadamu Diuxi sai maiti gïn biïgakagi tomarhi ïmo ixtumaxi gïn ibhïdagïrï. Kïïga gïn gupurtuda agai ïgai aidï gïn ibhïdagïrï saidi mai tipukagi ixtukïdï dagitoagi aapimï gïn buaboidaraga. Po duñimu Diuxi kïï tuigakatai ïgai gïn bïïtarï tudu.