Apokalipsis 3:5 - Northern Tepehuan Bible

⁵ Xorai maitiagi go soimaaxkami bui gï aadatika agai yukuxi totoakami tudu. Dai mai maigobai dasamu aanï tïtiaradï go libroañdïrï xako ojixi go odami ix makïdï kïïgakïrï óídaka agai bïïxkïrï bïïtarï ïpï. Dai bhaiyoma mïï gin Oga buitapi dai tïtïañikarudï buitapi ïpï aagamu aanï sai ix makïdï maitï go soimaaxkami bui kïïgakïrï ïr gin aaduñi.

Tepehuan Northern: Diuusi ñiooquidʌ utuducami oodamicʌdʌ

⁵ Sioorʌ maisoimaasi ivuaadagi siʌʌscadʌ ʌDiaavora soimaasi iduiñtulda ʌliadagi ʌgai gia gʌnaadamu yuucusi tootoacami tʌvaagiʌrʌ. Dai aanʌ maisiaa duaadamu tʌʌtʌaragadʌ ʌgai ʌliivruaiñdʌrʌ siaaco oojisi. Ʌliivruʌrʌ oojisi ʌtʌʌtʌaragadʌ ʌgai ismaacʌdʌ viaa iibʌdagai utudui. Dai aagidamu aanʌ giñooga ʌʌmadʌ giñooga tʌtʌaañicarudʌ isʌgai ʌrgiñaaduñi.

Apokalipsis 3:5 Iomraidhean Croise

Mataibo 10:32

—Kïïga maatï aapimï sai Diuxi gïn nukadai tudu dai kaxkïdï gï agai sai mai duduadikuitai aagada aapimï óídakami buitapi sai gin urabaka aapimï. Ayimu ixtuigako aagada agai Diuxi gin Oga xorai biaka agai gïgïbidaragai dai xorai mai biaka agai tudu. Dai aidïpïrï aagidamu aanï gin Oga xorai ïgai daidi ïr gin aaduñi. Aagidamu aanï sai xorai maaxiko aagaiña saidi gin buaboitudai saidi ïgai ïr gin aaduñi tudu.

Lukas 10:20

dïï gia maiti gï agai xi gobai ïr gïn bhai ïrhiaragakagi. Gï agai bhaiyoma xi bhai gïn ïrhiadagi ka ojixikatai gïn tïtiaraga tïbagiana— itïtïdai Suxi ojotosadï.

Lukas 12:8

Daidi Suxi oi aatagidï dai potïtïdai ïgai mamaatïrdamigadï, —Daiñi— itïtïdai. —Aanï ïr otosadï Diuxi ix makïdï ïmo kïïrhi busai dai aanï pokaiti sai xorai maaxiko aagadagi jaa buitapi ix gin buaboitudai, aanï ïpï maaxiko aagadamu Diuxi tïtïañikarudï buitapi xi ïgai gin buaboitudai.

Filipenses 4:3

Dai aapi kïïrhi ix makïdï kïïgakïrï gin soikïiña aaduindagïrï, aapi kïï maatï xorai aapi. Ipïrhidi aanï sai soiñana aapi go Eubodia ïmadï go Síntike sai gïn oigïdada ïgai ïpamu. Ïgai bïï gokatai ïr maamaradï Diuxi tudu dai gin ïmadï gaatabuadaiña ïpï aipakoga gaaiturhitai go bhai ïrhiaragai aatagi. Uurapïkïiña ïgai go Klemente ïmadï go gaa buaboitudadami ïpï ix makïdï gin soikïiña. Ga soikïiña ix makïdï tïtiaradï ojixi go libroana xako ojixi ix makïdï bïïxkïrï bïïtarï óídaka agai. Ipïrhidi aanï sai aapi kïïrhi soiñana sai bhai buada ïgai ñoki tudu saidi gïn oigïdada ïgai ïpamu.

Udaxi 1:24

Gïn aaduñi, mosïka arhi ïmaduga Diuxi dai ïgai bhai dui go kïïgakïrï bubaidaragai gïr bïïtarï Suxi Kristokïdï ix makïdï ïr Gïr Nukadakami. Kïïga ixtutuidikïi Diuxi ix gïn nukadakagi dai gïn soikïdagi sai mai dagitoagi aapimï gïn buaboidaraga sai podukai mai gïpiïrï surhigiagi aapimï. Dai kïï bhaiga ïgai sai bhai gïn buadagi saidi kïïga bhai ïrhiarakïdï gukakagi aapimï ami xako kabami totoarïi buitapi Diuxi. Kabami totoarïi Diuxi tudu mos ïï kïïga xigiamaaxkatai ïgai dai mos ïï kabami gubuakatai ïgai ïpï. Kïïga ixtutuidikïi ïgai ix bhai gïn duñagi sai mai biakagi aapimï toma lïïchi soimaaxkami gïn abhana dai bhodïrï baan gïn tutusamu ïgai ami buitapi ïgai ka kïïga bhai gïn dunakai ïgai.

Apokalipsis 13:8

Dai bhaitoma bïïxi oidigi daama óídakami xadutuada agai go kïixi Diuxi dukai. Dïï gia go odami ix makïdï ojixi go libroïrï ix makïdï bia go Arhi Kañiru ïgai gia mai xadutuada agai go gïï kïixi. Go Arhi Kañiru ïgai makïdï gï muatu dai bia ïmo libro xako ojixi odami ix makïdï bïïxkïrï bïïtarï óídaka agai. Aidï abhiadïrï xi mai kia kïkibatadai oidigi biakana ïgai go libro tudu. Dai odami ix makïdï ojixi ami libroïrï gia mai xadutuada agai go gïï kïixi.

Apokalipsis 17:8

—Daiñi— in tïtïdai. —Go kïixi ïr ïgai ix makïdï oidakatadai ïkioma dai xibi ka mai oidaga. Dïï gia xibi bhai otoma duakatumu ïgai ïpamu dai busaimu abhiadïrï xako bii ïgai mukukai. Busaimu ïgai go gïï tukabakami dïgaiñdïrï tudu. Dai busaikai ïgai go odami mai buaboitudadami mai tïïgimu ixtumaxi gïn tïtïgitoagi nïiditai ix duakatu go kïixi ïpamu. Go odami tudu ix makïdï mai ojixi go Arhi Kañiru librogadïrï. Mai ojixikana ïgai ïïki abhiadïrï aidïxi abhiadïrï xi kïkiba oidigi tudu. Dai busaimu go kïixi abhiadïrï go gïï dïgaiñdïrï dïï xibi gia imimu ïgai xako Diuxi gïgïbitulda agai bïïxkïrï bïïtarï— in tïtïdai go Diuxi tïañikarudï.

Apokalipsis 19:8

Diuxi maa oigaragai go nobia xi gï aadagi yukuxi tojakami dai kïï finuakami. Xi kaxkïdï kaxi gï ayi ïgai gobai dai ka mos totoarïi mos ïï tojakatai yukuxidï— ikaiti go gïgïrï ñokadami. Dai go nobia tudu ïr ïmo maaxidaragai aagaitai go buaboitudadami dai go yukuxi tojakïdï aagai xïï buañixikami aatadui go buaboitudadami.

Apokalipsis 2:11

Idi ïr go ñoki ix makïdï gamaakai Diuxi Ibhïadï go buaboitudadami bïïxi aipakoga ïmpaiñdadami. Kïïga abïr gïn tïgito kaïka gobai tudu. Daiñi, xorai gamaitiagi soimaaxkami bui tomaxi gï muatudagi ïgai mai taata agai mukigami ibhïgadï bïïtarï— ikaiti Diuxi Ibhïadï.

Apokalipsis 2:7

Idi ïr go ñoki ix makïdï gamaakai Diuxi Ibhïadï go buaboitudadami bïïxi aipakoga ïmpaiñdadami. Kïïga abïr gïn tïgito kaïka gobai tudu. Ïgai ikaiti, Daiñi, maakimu aanï oigaragai xorai gamaitiagi soimaaxkami bui sai ugana ibhiadï go uxi ixtukïdï kïïgakïrï oidakana odami bïïxkïrï bïïtarï dai ix makïdï Diuxi ïxikamigadïana kïïka tïbagiana. Po tudu ikaiti Diuxi Ibhïadï—.

Apokalipsis 20:12

Dai bhodïrï nïidi aanï xi ami go gïï daikarui tojakami buidïrï gukatadai bïïxi koidadï. Ami gukatadai ix makïdï ïr gatïtïanïdamikatadai dai modukai ix makïdï mai gatïanïitadai toma lïïchi ïpï. Bïïxi koidadï ami gukatadai tudu. Ami gukatadai asta ix makïdï go gïï sudagiïrï koitadai ïmadï bïïxkatai ix makïdï Hadeana darakatadai xako bipiïyi bïïxi koidadï. Ami gukatadai ïgai go gïï daikarui buidïrï. Mïtai kupioka go lilibro xakoga ojixi ix tuma dui óídakami dai kupioka ïgai ïmai libro ïpï xako ojixi odami ix makïdï kïïgakïrï ïr duduakakami dai bïïxkïrï bïïtarï óídaka agai. Dai Diuxi aa bïïxi go koidadï bïïtarï ixtumaxi ajiagai ïïmoko nïiditai go lilibroïrï xako ojixi ixtuma dui ïgai.

Apokalipsis 21:27

Dïï gia mai bakimu ami tomarhi ïmo ixtumaxi soimaaxkami dai tomarhi ïmo odami ix makïdï tukurhimagi ibhïadï soimaaxi ibuadatai xiïpï yaatagïitai. Ïgai tomarhi ïmo imidagai mai bapakimu ami. Mosïkaxi odami ix makïdï ojixi librogadïrï go Arhi Kañiru tïgidukïdï xako ojixi xorai bïïxkïrï bïïtarï óídaka agai. Ïgai gia bia oigaragai ix bapakïdagi ami.

Apokalipsis 22:19

Dai podukai ïpï ix ïmadutai maigobai darasagi ñoki idi libroañdïrï ix makïdï Diuxi ojiturhi odami aidï gia Diuxi mai maakimu oigaragai ïgai xi kukumiagi go uxi ibhiadï ixtukïdï kïïgakïrï oidaga odami. Dai mai maakimu oigaragai xi baakiagi go gïï kiikiïrï ïpï ix makïdï ojixi idi libroïrï.

Apokalipsis 3:12

Daiñi, xorai maitiagi go soimaaxi bui bïïxkïrï bïïtarï óídaka agai kiidïrï gin Diuxiga. Ka mai maigobai iimimu ïgai abhiadïrï. Ix xïïxi kabakami guka sasarakami kiidïrï Diuxi pokaxi kabakami gukakamu ami odami ix makïdï maitiagi soimaaxi bui ïpï. Ami Diuxi kiidïrï tutusamu aanï odami ix makïdï maitiagi soimaaxkami bui tudu sai ka mai tipukana ixdukatai bubaidagi abhiadïrï. Dai kokobadïrï ojamu aanï tïtiaradï gin Diuxiga dai tïtiaradï go gïï kiiki xako oidakami Diuxi ïpï. Gobai ïr go utudui Jerusalen ix makïdï tïbañimu tïbagiañdïrï. Dai ojamu aanï go utudui tïtiaragai ix makïdï biakamu aanï aidï ïpï.

Apokalipsis 3:4

Dïï gia oidaga ïïmoko ami Sardixiana ix makïdï mai uurapïkïi go soimaaxkami dai ibhïadï ïpïan maaxi odami ix makïdï kïï buañixi yukuxidï. Dai ïgai bia sïïrhikami xi gïn aadagi yukuxi kïïga totoakami dai xi gin urabagi toma xakoga imïdagi aanï. Poduñimu ïgai tudu buañixikatai ïgai.

Apokalipsis 6:11

Dai ïmadutai ix makïdï ami dajatadai maa yukuxi totoakami go buaboitudadami iibhïadï dai potïtïdai, —Diuxi maatï xïïkiduka agai ix makïdï gïn kodituda agai ïpïan dukai aapimï buaboidaitai ïgai dai aagaitai ixtumaxi ïr buaboi dai mai kia ayi go kaaki— itïtïdai. —Kaxkïdï gï agai xi nïnïrakagi aapimï ïpï chïki tasai kia dai gïn iibhïxtagi asta xïxkadï gïr buidïrï bïïtïkamiga kodagi go kaaki buaboitudami— itïtïdai.