Apokalipsis 13:16 - Northern Tepehuan Bible

^16-17 Dai go kïixi ix makïdï dïbïrai utamajadïrï busai gatïjai ïpï tïpaltudagi bïïxi óídakami kokobadïrï xiïpï ïïkadïrï. Tïpaltu ïgai tïtiaradïkïdï go kïixi ix makïdï sudagiañdïrï busai. Tïtiaradïkïdï go kïixi ix makïdï duayitadai tudu xiïpï numerogadïkïdï. Tïpaltu ïgai bïïxi óídakami tudu, modukai arhi dai gïïgïr óídakami dai soititigami ïmadï gïn bipidakami. Tïpaltu ïgai bïïxkatai. Dai gatïjai ïgai sai mosïkaxi gïn tïpaltudakai óídakami biakagi oigaragai ix gasabïadagi xiïpï xi gagaagarïdagi ixtumaxi. Gï agaitadai xi gïn tïpaltudagi ïgai tïtiaradïkïdï go gïï kïixi tudu xiïpï numerogadïkïdï.

Tepehuan Northern: Diuusi ñiooquidʌ utuducami oodamicʌdʌ

¹⁶ Dai gatʌjai ʌʌpʌ tʌtʌparagai ʌoodami noonoviʌrʌ sʌʌlisa padʌrʌ siʌʌpʌ coocovadʌrʌ. Vʌʌsi aali dai gʌgʌrducami, dai riricugami dai soituutuigami dai tʌtʌaanʌdami dai pipiooñi.

Apokalipsis 13:16 Iomraidhean Croise

Hechos 26:22

Dïï Diuxi kïïga gin soi. Kaxkïdï tami kïïka aanï xibi. Daiñi aanï mos apia ïxi aagidiña bïïxi odami toma xorai ïgai. Gin aatagi mos ïr ïgai baaxi aatagi ix makïdï aagaiña go Moiseskaru ïmadï go gaa aagadami Diuxi ñokidï ïïki. Aagidiña aanï óídakami sai gï agaitadai xi gï muatudagi Kristo ix duu aagai go Moiseskaru. Dai sai Kristo ïr ïpïgadadï ka agai go ix makïdï duaka agai. Dai sai ka duakakai sai bhodïrï aitulda agaitadai go bhai ïrhiaragai ñoki bïïxi óídakami ix makïdï ïr judidiu dai ix makïdï maiti ïr judidiu ïpï. Go bhai ïrhiaragai ñoki ïr ïmo kudaidakaru dukai bïïxi óídakami bïïtarï— itïtïdai Pabora.

1 Korintios 12:13

Aidïxi uraba gïr darai Diuxi Ibhïadï go buaboitudadami amaxi ïmo aadunumï bii aatïmï tudu tomaxi ïr judidiukagi aatïmï ix maiti ïr judidiukagi ïpï. Ïmo aadunumï bii aatïmï ix ïr soigaxikami dukai pipioñi aatïmï ix maiti ïr pipioñi ïpï. Tomax dukai bïïxkatai aatïmï bia Diuxi Ibhïadï dai kaxkïdï ïr ïmo aadunumï aatïmï.

Galatas 3:28

Pomaaxi bïïxkatai aapimï ix makïdï ka buaboitudai. Xibi ïmadugan dukai gïn nïidi Diuxi bïïxkatai aapimï. Mai xudu xi ïr judiukagi ïmoko xiïpï xi maiti ïr judiukagi ïpï, xi ïr ïmo soigaxikami dukai pioñikagi ïgai xiïpï xi maiti ïr pioñikagi ïpï, xi ïr kïïrhikagi ïgai xi ïr okikagi ïpï. Mai xudu, tomax dukai ka ïmo odami dukai bii aapimï bïïxkatai bïïna darakatai Suxi Kristo.

Galatas 6:17

Xibi mosïkaxi ïpï ïmo ñoki gïn aagida in ïrhidi. Daiñi, oidaga ïïmoko aapimï buaboitudadami gïn saagida ix makïdï gin bui ñokaiña pokaititai sai maiti ïr buaboi gin aatagi. Dïï gia kïïga maaxi gin tukugïrï xako sasarai jaa ibuadatai aanï Suxi Kristo aaduindadï. Kaxkïdï xibi bhaitiakoga ka maiti gï agai xi gin bui ñokadagi tomarhi ïmadutai gin aatagikïdï ix makïdï gatïtïïgidi aanï.

Efesios 6:8

Kïïga maatï aatïmï saidi Suxi Kristo Gïr Nukadakami gïr aa namïidamu go kïïgadukami aaduindagai ix makïdï ibuadagi aatïmï. Ïgai gïr aa namïidamu bïïxkatai xi ïr sabïdixikami pipioñikagi aatïmï, xi maiti ïr sabïdixikami pipioñikagi aatïmï ïpï.

Kolosenses 3:11

Dai xibi ka utudukatai aatïmï buaboitudadami ka mai xudu xi ïr judidiu aapimï xi ïpï ix maiti ïr judidiu. Xiïpï xi circuncidaduga aatïmï ix mai circuncidaduga ïpï. Mai xudu ix ïr mïkaxdïrï oidakamikagi ïmoko xiïpï asta xi ïr oidigana oidakamikagi ïpï. Xibi bïïxi gobai ka maiti ïr ixtumaxi gïr bïïtarï ix makïdï ïr buaboitudadami. Ka utudui bubuaka aatïmï dai ka mai buamï rïrhidi aatïmï xoraitadai aatïmï. Xibi Suxi Kristo gïr ïmadï daja bïïxkatai aatïmï buaboitudadami kaxkïdï. Dai mosïkaxi Suxi Kristo ïgai dai namïga gïr bïïtarï xibi.

2 Timoteo 3:8

Dai go kïkïïrhi ix makïdï buirumadai odami podukai arhiï soimaaxi tïgibudadï dai mai buaboikïdï buaboitudai. Ïgai bui bïïtïkana ixtumaxi ïr buaboi ïpïan dukai go Janes dai go Jambres ix makïdï bui bïïtïkana go Moises ïïki buirumadatai ïgai odami.

Apokalipsis 11:18

Go odami ix makïdï gï buidïrï bïïtïkana bhakoikana gï bui aapi Diuxi. Dïï gia xibi ka ayi xi aapi gïgïbituldagi bhamukatai aapi ïgai bui. Xibi aagamu aapi ix tumaxi ajiagai koidadï. Dai xibi ka ayi xi naato kodagi aapi bïïxkatai ïgai ix makïdï soi buadana óídakami oidigi daama dai kodaiña. Dai xibi maakimu aapi ïmo kïïgadukami maitïki gï ñiñokituldiadamiga gï pipioñigakatai ïgai. Dai podukai ïpï maakimu aapi ïmo kïïgadukami maitïki bïïxi go buaboitudadami ix makïdï gï xadutudai. Bïïxkatai ïgai maakimu aapi maitïkidï mai xudu ix maiti ïr gatïanïdamikagi ïgai xi gïgïrï gatïanïdamikagi ïpï bïïxkatai tomax dukai buimu maitïkidï. Kaxkïdï bhai gïr ïrhidi aatïmï aapikïdï gïr Diuxiga— ikaitiña go bhaitï gukakami ami tïbagiana.

Apokalipsis 15:2

Gïn aagidamu aanï ix maaxi ami tïbagiana. Ami tïï aanï ïmo gïï bidrio maaxkami ixtumaxi kaparakami. Ïpïamaaxi ïmo gïï sudagi. Dai ami go bidrio ïrana mïjïda maaxi táí. Dai ami go gïï kaparakami bidrio daama gukatadai mui odami dai Diuxi maatadai ïgai arpas xi gaiibagi ïgai. Ïgai ïr go odami ix makïdï maiti gïn dagitokatadai ix gïn tïpaltudagi tïtiaradïkïdï go gïï kïixi dai tomarhi numerogadïkïdï. Maitïtadai ïgai go gïï kïixi bui tudu.

Apokalipsis 19:18

Ami kuadagiïrï gaugimu aapimï bhabhiadï mui kapitañi dai mui tïtïanïdami. Ga ugimu aapimï bhabhiadï kapayo ïmadï modukai ix makïdï daama daitugaitadai ïpï. Bïïxi gaugimu aapimï ix makïdï ïr pipioñikatadai dai ix makïdï maiti ïr pipioñikatadai. Ga ugimu aapimï tïtïanïdami dai ix makïdï mai tïanïiña ïpï— ikaiti.

Apokalipsis 19:20

Dai ami kokodiïrï gï bhïitu go gïï kïixi modukai ïmadï go gïmai ix makïdï Diuxi ñokituldiadamigadï gï aagaiña ïïgi dai maiti ïr buaboi. Ïgai tudu ïgai dai ibuadana naana maaxi maaxidaragai soikïitai go kïïxi sai odami buaboitudaiña. Podukai bupuirumadaiña ïgai mui óídakami. Bupuirumadaiña ïgai ix makïdï gïn dagito ix gïn tïpaltudagi tïtiaradïkïdï go kïïxi tudu dai ix makïdï xadutudaiña go kïixi maaxkami ubixi. Gï bhïitu tudu go gïï kïixi ïmadï modukai go gïmai bupuirumadami óídakami dai apia dukai duduakakami gïn surhitu ïgai go gïï taiyïrï xako asufrekïdï mïmïjïi táí.

Apokalipsis 19:5

Dai bhodïrï ami xako daja Diuxi daikaruana sai ño ixtumaxi dai ikaiti, —Bïïxi Diuxi maamaradï gï agai xi oigïda ñokada Diuxi bïïtarï dai aagadagi xïïxi ïr gïdukami ïgai. Bïïxkatai ix makïdï xadutudai ïgai tudu mai xudu xi ïr gatïanïdamikagi ïgai xi maiti ïr gatïanïdamikagi ïpï— ikaiti.

Apokalipsis 20:12

Dai bhodïrï nïidi aanï xi ami go gïï daikarui tojakami buidïrï gukatadai bïïxi koidadï. Ami gukatadai ix makïdï ïr gatïtïanïdamikatadai dai modukai ix makïdï mai gatïanïitadai toma lïïchi ïpï. Bïïxi koidadï ami gukatadai tudu. Ami gukatadai asta ix makïdï go gïï sudagiïrï koitadai ïmadï bïïxkatai ix makïdï Hadeana darakatadai xako bipiïyi bïïxi koidadï. Ami gukatadai ïgai go gïï daikarui buidïrï. Mïtai kupioka go lilibro xakoga ojixi ix tuma dui óídakami dai kupioka ïgai ïmai libro ïpï xako ojixi odami ix makïdï kïïgakïrï ïr duduakakami dai bïïxkïrï bïïtarï óídaka agai. Dai Diuxi aa bïïxi go koidadï bïïtarï ixtumaxi ajiagai ïïmoko nïiditai go lilibroïrï xako ojixi ixtuma dui ïgai.

Apokalipsis 20:4

Dai bhodïrï nïidi aanï gïgïrï daraikarui dai daama daraja ix makïdï ïr Suxi Kristo darasadï dudunukami. Dai tïï aanï ïpï xi duduakatu mui koidadï. Gobai ix makïdï tïï aanï ïr go ïpïgadï duakaragai agaikïdï. Dai aidïpïrï duduakatu koidadï ix makïdï gïn guikomatu kuxibodï aagaitai ïgai Suxi ñokidï dai Diuxi ñokidï. Duduaka ix makïdï mai xadutugi go kïixi dai tomarhi mai xadutugi ubixigadï dai maiti gïn dagito ix gïn tïpaltudagi kokobadïrï xiïpï ïïkadïrï. Ïgai tudu duduakatu ïpamu dai bhïiyi sïïrhikami dai gatïanïda agai Suxi Kristo ïmadï ïmo mirhi umigi.

Apokalipsis 6:15

Dai bïïxi oidigi daama óídakami gïn ïjïxto tïtïjobiana dai baapaburhi uta, modukai gïgïrï dudunukami dai jaa tïtïanïdami dai ix makïdï kïïga gin bipidaka dai sandadaru tïtïanïdamigadï dai jaa gubukadagai bipiakami dai bïïxi go odami ix makïdï ïr pipioñi dai modukai ix makïdï maiti ïr pipioñi ïpï.

Apokalipsis 7:3

potïtïdai ïgai, —Maiti abïr xia buada oidigi tomarhi go gïï sudagi tomarhi go uxi kia. Gï agai xi kokobadïrï tïpaltuda aatïmï Diuxi pipioñigadï kia— itïtïdai.