1 Pedro 3:8 - Northern Tepehuan Bible

⁸ Gïn maakimu aanï ïpï ïmo ñoki gin aaduñi. Gï agai sai kïï xioma gïn urapïkïda aapimï aipakoga ïmo tïgibudagai biakatai aapimï bïïxkatai. Soigabïr gïn ïrhiada ïmadï gïn aaduñi Diuxi amadïrï xïïxkadï soi gïn ïrhiadagi ïgai. Gïn oigïadabïrai aipakoga tudu ïmo xixïgïmï dukai. Dai kïïga abïr tutiaka jaa bïïtarï mai gïgïrdukïdï gïn ïrhiditai aapimï.

Tepehuan Northern: Diuusi ñiooquidʌ utuducami oodamicʌdʌ

⁸ Maitavʌr gʌncocoada. Dai soigavʌr gʌnʌliada gʌnaaduñicʌdʌ dai aipaco gʌnoigʌada ʌmo siʌʌgʌmʌ duucai. Cʌʌgavʌr tuutiaca vʌʌscatai vui dai maigʌgʌrducʌdʌ gʌnʌliada.

1 Pedro 3:8 Iomraidhean Croise

Mataibo 18:33

—¿Dukatai mai soi gïrhi aapi gï aduñi bïïtarï ïpï?— itïtïdai.

Lukas 10:33

—Dai gokiïrï ami ayi ïmo Samarhiïrï oidakami dai daama daitugai ïgai ïmo axñitu. Dai tomaxi ïr Samarhiïrï oidakami bïïxkïrï soi gï ïlda tïï ïgai go boiyïrï kaatïkïdï.

Hechos 2:1

Bhodïrï ka aïkai go gïï tasai xadutudikïdï Pentekostes tïgidukïdï bai gïn ïmpagi bïïxi go buaboitudadami ïmo kiiyïrï.

Hechos 27:3

Xadiko Sidonïrï gïr urhi aatïmï. Dai Julio kïïgakïrï nïiditadai Pabora dai dagito sai mïï dibidana ïgai óídakami ix makïdï kïï ïmagi ïgai. Daidi ïgai bhai gïn ïrhiarakïdï miadïgi dai bhibhi.

Hechos 28:7

Dai mai xii mïkaxi abhiadïrï oidakatadai go tïanïdami ami Maltaïrï. Ïgai Publio tïgidu. Dai kïï bhai dukai gïr bapaidi ïgai xi gamo iimïna aatïmï dai xioma daraja aatïmï baika tasai ami kiidïrï ïgai.

Hechos 4:32

Dai ka muidukana buaboitudadami dai bïïxkatai biakatadai ïmo tïgibudagai aidï. —Ix makïdï bia aatïmï gïr buxtuidaga bïïxkatai gïr aaduñi ïr tuidadï gobai— gïn ïrhidiña ïgai.

Romanos 12:10

Aapimï ix makïdï buaboitudai Suxi Kristo gï agai xi gïn oigïdadagi ïmo gïn xïgïmï dukai. Kïïga abïr xadutuada tudu gïn xixïgi Diuxiïrï gaagaitai ïpïgioma ix makïdï ïr kïïga ïgai bïïtarï dai mai xu ïpïgioma ix makïdï ïr kïïga ïïgi aapimï gïn bïïtarï.

Romanos 15:5

Diuxi ïgai dai gïr maakai gubukarhigai tudu sai maiti gïr daadagitoagi aatïmï xi gïr maitagi soi ïrhiaragai dai sai bhai ïrhiarakïdï nïnïrakagi aatïmï. Dai aanï daanïi Diuxi gïn bïïtarï sai kïïga gïn abïnakiadan taadakagi aapimï bïïxkatai oiditai Suxi Kristo dai biakatai mos ïmo tïgibudagai bïïxkatai.

1 Korintios 1:10

Xibi kïïga abïr gïn tïgito kaïka aapimï gin aaduñi. Daiñi, Suxi Kristo ïgai ix makïdï gin maa ïmo sïïrhikami ix kaxkïdï gïn maakai aanï ñoki. Dai aanï aagai sai sïïrhikïdï gï agai ix ïmo aadunumïka aapimï bïïxkatai. Maiti gï aagai ix ïjïkobai biakagi aapimï gïn tïgibudaga chïchïkiatai tudu. Gï aagai xi ïmo tïgibudagai biaka aapimï bhaiyoma dai ix kïïgakïrï gïn nïijada bïïxkatai aipakoga.

1 Korintios 12:26

Pomaaxi ïpï xïxkadï kokoakagi lïïchi tukugadï ïmo odami. Mai bhai taadakana bïïxi tukugadï aidï. Dai ix lïïchi gïr tukuga biakagi ïmo bhai ïrhiaragai maaxi aidï gia bïïxi gïr tukuga bhai gï ïrhidi. ¿Maiti ix ïr buaboi gobai?

Efesios 4:2

Maiti abïr gïgïrdukïdï gïn ïrhiada ïïgi aapimï toma lachi dai kïïga abïr tutiaka jaa bïïtarï. Gupurtudabїrai gïn iibhïdaga daidi abïr mai ojodada go gaa buaboitudadami. Bhaiyoma abïr gïn oigïada aipakoga tomax dukai.

Efesios 4:31

Gï agai sai ka mai bhakoitïrakagi aapimï tomarhi xi gakokodadagi. Abïr mai soimaaxi ñokada jaa bui daidi abïr mai yaatagïda ïpï dai mai kïïdada jaa ïpï.

Efesios 4:32

Daiñi, Suxi Kristo bhai dui gïr bïïtarï kaxkïdï Diuxi soi gï ïrhidi gïr nïiditai dai gïr oigïrhi. Xibi aapimï abïr kïï tutiaka jaa bïïtarï ïpï daidi abïr soi gïn ïrhiada nïiditai. Daidi abïr oigïrhiada ïpï ïpïan dukai xi Diuxi gïr oigïrhi.

Filipenses 2:3

Maiti abïr ibuada tomarhi ïmo ixtumaxi ïïgi gïn bïïtarï mosïkaxi ïïgi gïn bïïtarï buamï gïn ïrhiditai aapimï. Dai maiti abïr ibuada tomarhi ïmo ixtumaxi ipïrhiditai ix namïakami bubuakiagi aapimï jaa bïïtarï. Abïr bhaiyoma mai namïakami dukai gïn nïijada ïïgi aapimï. Dai bamioma namïakami dukai abïr nïijada aapimï jaa.

Filipenses 3:16

Dïï gia gï agai xi apia maiti gïr dagitokai ibuadaiña aatïmï bïïxi ixtumaxi ix makïdï gïr tïtïgidi Diuxi.

Kolosenses 3:12

Daiñi, xibi aapimï buaboitudadami kaxi ïr ïko bubaidadï Diuxi. Ïkobai darasaka aapimï Diuxi bïïtarï tudu dai gïn oigïdai ïgai. Kaxkïdï abïr soi gïn ïrhiada nïiditai jaa ix makïdï soimaaxi taatamadagi daidi abïr kïï tutiaka buidïrï jaa odami ïpï. Maiti abïr gïgïrdukïdï gïn ïrhiada daidi abïr kïï bhai maaxkami buidadagi jaa mai omarhigakatai buidïrï. Maiti abïr otoma ojodada go jaa xïïxkadï mai kïï ibuadagi ïgai.

Hebreos 13:1

Gin aaduñi, ïmo aadunumï aapimï buaboitudadami dai gï agai xi mai ugutai gïn oigïdada aapimï aipakoga.

Santiago 2:13

Diuxi aagada agai ix bhai kïïga idui aatïmï tudu. Dai gïn maakimu ïgai gïgïbidaragai ix mai soi ïlda nïijadagi aapimï jaa dai mai oigïldagi aapimï. Dïï gia ix soi ïlda nïijadagi aapimï jaa dai oigïldagi aapimï aidï gia mai biakamu aapimï ixtukïdï duduadikudagi xïïxkadï aagagi Diuxi ix bhai kïïga dui aapimï. Soi ïlda gïn nïijadamu ïgai aapimï ïpï tudu dai gïn oigïldamu.

Santiago 3:17

Go tïgibudagai ix makïdï gamamaakai Diuxi gia mai pomaaxi. Go Diuxiañdïrï tïgibudagai gia kïïga buañixi dai odami ix makïdï oijadagi gobai gaagaiña ix dukatai xioma urabakatai óídakagi jaa ïmadï. Mai oomarhigakana ïgai dai bhaiyoma kïï tutiakana ïgai dai kïïga abokan dukai óídakana. Soi gïn ïrhidiña ïgai jaa bïïtarï xïïxkadï soimaaxi taatamadagi ïgai dai kïïga buididiña. Ïmadugan dukai nïidiña ïgai bïïxi óídakami ïpï. Dai mai yaatagïiña ïgai dai bhaiyoma bïïxi ixtumaxi aagadagi ïgai gobai ibuadana. Po maaxi go tïgibudagai ix makïdï gamamaakai Diuxi tudu.

Santiago 5:11

Pokaitiña aatïmï sai Diuxi kïïgakïrï nïidi bïïxi ïgai ix makïdï kïïga gïn kabakadagi go soi ïrhiaragai buidïrï tudu. Daiñi, kïï maatï aatïmï sai go Job tomaxi kabami soimaaxi taata ïgai ïïki bïïxkïrï apia buaboitu ïgai dai kïïga gï kabakagi go soi ïrhiaragai buidïrï. Dai maatï aatïmï ïpï sai Gïr Nukadakami kïï tuigakatadai go Job bïïtarï dai soi ïlda tïï dai maa naana maaxi bhai ïrhiaragai gokiïrï. Gïr Nukadakami bïïxkïrï soi ïlda nïidiña bïïxi odami tudu kaxkïdï.

1 Pedro 1:22

Daiñi gin aaduñi, aapimï ka ïïgidi go buaboi aatagi dai ka buañixikami bii gïn ibhïdaga. Kaxkïdï gï agai sai kïïgakïrï gïn oigïdada aapimï aipakoga bïïxi gïn ibhïdagakïdï.

1 Pedro 2:17

Kaxkïdï abïr xadutuada bïïxi óídakami daidi abïr oigïdada bïïxi go buaboitudadami. Gïn tïgitobïrai xïïxi ïr gïdukami Diuxi daidi abïr xadutuada ïgai. Dai xadutuadabïrai go gïï dunukami romano ïpï.

1 Pedro 5:5

Dai aapimï uutu iimïdami, gï agai sai ïïgiada dai xadutuada aapimï go bhaitï gukakamigadï go buaboitudadami ïpï. Gï agai sai mai tïtïanïdami dukai gïn ïrhiadagi aapimï toma lïïchi dai bhaiyoma gï agai sai gïn soikïdagi aapimï aipakoga. Diuxi ojadï ikaiti sai, Buidïrï kaatï Diuxi go odami ix makïdï gïgïrdukïdï gïn ïrhiadagi. Dïï gia soikïi ïgai odami ix makïdï mai gïgïrdukïdï gïn ïrhidi, ikaiti Diuxi ojadï.

2 Pedro 1:7

Dai bhodïrï ka kïïga ïïgiditai aapimï Diuxi gï agai ïpï mïx kïïga oigïdadagi aapimï gïn aaduñi Diuxi amadïrï ïmo gïn xïgïmï dukai. Dai bhodïrï gï agai sai oigïdada aapimï bïïxi go gaa óídakami ïpï. Podukai abïr óídaka tudu maatïkatai ixtumaxi idui Diuxi gïr bïïtarï.

1 Juan 3:14

Daiñi, kïïga maatï aatïmï sai ka mai koidadï gïr duu gïr iibhïdaga xibi. Kïïga maatiga maaxi gobai, gïr oigïdai aatïmï aipakoga kaxkïdï. Gobai ïr ïmo maaxidaragai ix ka duduakatu gïr ibhïdaga tudu. Dïï gia odami ix makïdï mai oigïdadagi jaa ïgai gia apia kia ïr koidadï dukai iibhïadï.