1 Pedro 2:12 - Northern Tepehuan Bible

¹² Gïn tïgitobïrai sai go óídakami ix makïdï mai buaboitudai gïn tïgito nïidiña ix dukatai óídaga aapimï. Kaxkïdï abïr kïïga ibuada bïïxi aïkatïrï. Podukai tomaxi gïpiïrï gïn bupada ïrhiadagi jaa mai tïïgimu ïgai ixtukïdï. Dai xïïxkadï aagagi Diuxi ix bhai kïï idui óídakami aidï gia go ix makïdï gïpiïrï gïn bupaitadai biakamu xi aagadagi sai kïï idui aapimï. Dai aidï gia kïïga ñokadamu ïgai Diuxi bïïtarï ïpï nïiditai xïï kïïga ibuadana aapimï gïn soikïitai Diuxi.

Tepehuan Northern: Diuusi ñiooquidʌ utuducami oodamicʌdʌ

¹² Cʌʌgacʌrʌ avʌroidaca aapimʌ ʌgai saagida ismaacʌdʌ maivaavoitudai Diuusi vai siʌʌscadʌ gʌnvui ñioocada ʌgai ducami siʌrsoimaasi ivuaadamica aapimʌ vʌʌscʌrʌ nʌijadamu ʌgai isaliʌ cʌʌgacʌrʌ oidaga aapimʌ dai poduucai siʌʌscadʌ diviagi Diuusi dai nʌida agadagi ismaacʌdʌ ʌrcʌʌga ivuaadami dai ismaacʌdʌ ʌrmaicʌʌga ivuaadami ʌgai siaa duutuadamu Diuusi.

1 Pedro 2:12 Iomraidhean Croise

Mataibo 10:25

Dai aanï ïr gïn tïanïdamiga dai ïr gïn tïtïgiadami ñoki ïpï. Kaxkïdï gï agai xi ipïrhiadagi aapimï xi gin ïpïan tutiakagi aapimï dai taatagi ixtumaxi taatamaiña aanï. Daiñi, kïïga maatï aapimï sai gin kïdaiña óídakami dai asta Beelsebú gin aagaiña ïgai. Diabora gin aagaiña ïgai tudu gin kïdaitai. Kaxkïdï kïïga gï maatï sai asta bamioma gïn kïïdadamu ïgai aapimï gin aaduñikatai aapimï. Soimaaxi ñoki gïn aagidamu ïgai ïpï gin mamaatïrdamigakatai aapimï tudu— itïtïdai.

Mataibo 5:11

—Kïïga bia aapimï bhai ïrhiaragai tomaxi óídakami gïn parunadagi dai soi gïn buidadagi gin oiditai aapimï tudu. Bia aapimï bhai ïrhiaragai tomaxi yaatagïdagi óídakami dai naana maaxikïdï gïpiïrï gïn bupadagi ïgai jaa buitapi ïpï gin oiditai aapimï.

Mataibo 5:16

Ïmo kudakarui dukai aapimï tudu buitapi óídakami. Dai kaxkïdï aanï aagai sai gï agai sai kïïga maaxiko dukai óídakagi aapimï ibuadatai ixtumaxi ïr kïïga óídakami buitapi. Podukai go óídakami gïn tïgito nïijadamu ix dukatai óídaga aapimï. Dai maatï nïijadamu ïgai sai Diuxi gïr Oga ix makïdï tïbagiana daja ïgai dai gïn soikïi sai podukai óídakagi aapimï dai kïïga ñokadamu óídakami Diuxi bïïtarï nïiditai gobai— itïtïdai.

Mataibo 9:8

Dai bïïxkatai go odami nïidi dai ka mai tïtïgaitadai ix dukatai gïn tïtïïgitoagi daidi ikaitimi, —Xïïxi ïr gïïdukami Diuxi dai gïr otoxi ïmo kïïrhi kïïga biakami gubukarhigai— ikaitimi go odami.

Lukas 1:68

—Agia gï agai aatïmï Israelitas xi aagadagi bïïxkatai aatïmï xïïxi ïr gïdukami gïr Diuxiga. Kaxi gïr dibiji ïgai tudu dai bhai dui kïïgakïrï bubaidaragai gïr bïïtarï aaduñdïkatai aatïmï ïgai— ikaiti.

Lukas 6:22

—Gin aaduñi, kïïga bia aapimï ixtukïdï bhai gïn ïrhiadagi xïïxkadï gïn kïïdadagi odami gin urabakatai aapimï— itïtïdai. —Daiñi, odami maiti ipïldamu tomarhi xi gïn ñokiadagi dai gïn bhagaidadamu dai asta ïmo soimaaxi ñoki duu kaïkamu ïgai gïn tïtiaraga gin urabakatai aapimï.

VUAANA 13:31

Dai ka imïkai go Udaxi sai Suxi potïtïdai go gaa mamaatïrdamigadï, —Gin aaduñi, ipïrhidi aanï ix odami maatïkagi xïïxi ïr gïdukami Diuxi. Dai ïgai ipïrhidi ix gï maatïkagi xïïxi ïr gïdukami aanï ïpï. Daiñi, aanï ïr ix makïdï kïïgakïrï odami busai. Dai xibi ka ayi ix daibuñagi ïmo ixtumaxi aanïkïdï ix ïgaikïdï maatïkamu odami xïïxi ïr gïdukami aanï. Dai odami sïïrhikïdï gïdukami dukai nïijadamu Diuxi ïpï nïiditai gobai ix makïdï daibuña agai aanïkïdï.

Hechos 15:14

Kïïga gïr aagidi go Ximuñi Piduru ix dukatai ïpï dui aidïxi Diuxi tukamidïrï gï tïgito nïidi go ix makïdï maiti ïr judidiu. Aidïpïrï Diuxi ïko bubaitu ïïmoko ïgai saidi ïr maamaradïkana.

Hechos 24:13

Dai Pabora itïtïdai go dunukami ïpï sai, —Idi odami maiti ixtutuidikïi ix busaidagi tomarhi ïmo ixtumaxi ixtukïdï gï tïïgidagi xi ïr buaboi gobai ixtukïdï gïpiïrï gin bupaimi ïgai.

Hechos 25:7

Daidi mos baa go Pabora baidi go judidiu ix makïdï dadatadai Jerusalenañdïrï bïï xikorhi gukiba. Dai kabami ñokimi ïgai dai gïpiïrï bupaimi tomaxi mai biakatadai ïgai ixdukatai maaxitudagi ix ïr buaboi ix duu aagai ïgai.

Hechos 28:22

Dïï gia kïï maatï aatïmï sai odami toma xakoga bui ñokaiña idi buaboidaragai utudukïdï ix makïdï urabaka aapi. Kaxkïdï ïmo imidagai gï kaïka rïrhidi pïx tumaxi gïr aagidagi— itïtïdai go bhaitï gukakami judidiu.

Romanos 12:17

Maiti abïr aa noraida soimaaxkamikïdï ix makïdï soi gïn buidadagi. Gaagabïrai ix dukatai ibuadagi ixtumaxi ïr sïïrhi xi jaa óídakami maatïkagi sai kïïga ibuayi aapimï.

Romanos 13:13

Tïtai kïïga bhai maaxkami dukai óídaka aidï, tonorakïrï dukai. Xibi ka maiti gï agai xi nabaakorïdagi aatïmï. Maiti gï agai xi okimïrhiakagi, gï agai xi dagitoagi gobai. Dai maiti gï agai xi ïgamotïrakagi aatïmï ïpï tomarhi xi omarhigakagi

Romanos 14:18

Xorai podukai oidakagi Suxi Kristo bïïtarï maakimu bhai ïrhiaraga Diuxi dai odami kïï tuigakami dukai nïijadamu ïpï.

Romanos 15:9

Suxi dibia saidi odami ix makïdï maiti ïr judidiu xadutuadana Diuxi ïpï maatïkatai sai Diuxi soi gï ïrhidi gïr nïiditai. Podukai tudu ojixi Diuxi ñokidïrï. Ami ikaiti sai, Gin kaï odami ix makïdï maiti ïr judidiu kaxkïdï oigïda ñokadamu aanï aapi Diuxi gï bui. Dai kaxkïdï ganïyimu aanï ïpï gï xadutudaitai, ikaiti go ojai.

1 Korintios 14:25

Kïïga maaxi buajamu aapimï ïgai tïgibudadï ix makïdï ïxtoki biakana ïgai dai maatï nïidamu ïgai sai gïn ïmadï daja Diuxi aagaitai aapimï ïmo ñoki Diuxiañdïrï. Aidï gia totonakïdï gugukadamu ïgai xadutudaitai Diuxi.

2 Korintios 1:12

Gin aaduñi, aanï ïmadï Timoteo kïïga maatï gïr ibhïdagïrï sai tomarhi ïmo imidagai mai yaatagidi aatïmï go óídakami dai mai buirumagi aatïmï. Kïïga ibhïxtakan taadaga gïr iibhïdaga kïï sïïrhi ibuadatai aatïmï óídakami bïïtarï tudu gïr soikïitai Diuxi. Dai asta bamioma kïïga ibuadana aatïmï aapimï gïn bïïtarï gïr aaduñikatai aapimï Diuxi amadïrï. Kïïga sïïrhi ibuadana aatïmï tudu oiditai Diuxi tïgibudadï dai mai xu xi oidiña aatïmï go oidigi daama óídakami tïgibudadï. Dai pokaiti aatïmï sai gobai gia kïïga namïga, sïïrhi ibuadatai aatïmï tudu.

2 Korintios 13:7

Gin aaduñi, gïn daanturhiña aatïmï ipïrhiditai ix gïn soiñana Diuxi sai mai soimaaxi ibuadagi aapimï. Ipïrhidi aatïmï sai mai soimaaxi ibuada aapimï saidi kïïgakïrï óídakana aapimï tudu dai mai xu xi ipïrhidi aanï sai kïïga ñokada jaa gïr bïïtarï kïïga ibuadatai aapimï. Mosïkaxi ipïrhidi aatïmï sai kïïga ibuada aapimï tudu dai mai buamï rïrhiditai ix kaitiadagi jaa gïr bïïtarï. Ix kïïga ibuadagi aapimï aidï gia mai xudu aatïmï gïr bïïtarï tomaxi pokaitadagi jaa sai mai kïïga ibuayi aatïmï gïr aaduindaga tudu.

2 Korintios 8:21

Ipïrhidi aatïmï sai nïijadagi Diuxi sai kïï sïïrhi ibuayi aatïmï gïr aaduindaga tudu dai sai go odami nïijadagi ïpï.

Efesios 2:3

Bïïxkatai aatïmï buaboitudadami pomaaxi óídakaiña ïkioma ïpï. Ïïgidiña aatïmï ïïgi gïr tïgibudaga soimaaxkïdï. Mos ibuadana aatïmï bïïxi go soimaaxkami ix makïdï bhai ïrhidiña gïr tukuga ïmadï gïr tïgibudaga ïkidadï. Ïïgi pomaaxkatadai aatïmï tudu. Ajïakamikatadai aatïmï xi gïr bui bhamukagi Diuxi dai xi taatagi aatïmï gïgïbidaragai ïmadï bïïxi go gaa óídakami.

Efesios 4:22

Kaxkïdï abïr maigobai dasa go ïkidadï gïn tïgibudaga ïmadï ïkidadï gïn oidakaraga. Gobai mos ïr ïï soimaaxkamikana dai gïn bupuirumadaiña gobai gïn maakaitai tïgibudagai xi iduña ïrhiadagi aapimï ix makïdï maiti ïr soiñi.

Filipenses 1:27

Dïï gia gïn aagidamu aanï ixtumaxi bamioma gï agai. Bamioma gï agai xi kïïga bhai dukai óídakagi aapimï ixdukatai aagai go bhai ïrhiaragai aatagi. Go aatagi aagaitai Suxi Kristo tudu. Ix apia ïïgiada aapimï go bhai ïrhiaragai aatagi aidï gia kïïgakïrï óídakamu aapimï. Dai aidï gia tomax dukai ix gïn dibidagi aanï xiïpï ix mos kajiomakagi aanï ix maaxi daraka aapimï mïkaxi dakatai aanï tomax dukai maatïkamu aanï sai mo ïxi kïïgakïrï óídaga aapimï mos ïmo tïgibudagai biakatai aapimï bïïxkatai. Dai maatïkamu aanï sai mai duadikoi aapimï ix makïdï gïn buidïrï bïïtï ïpï. Dai maatïkamu aanï ïpï sai maiti gïn daadagitoi aapimï xi gïn maitiagi go naana maaxi aatagi ix makïdï maiti ïr go bhai ïrhiaragai aatagi kïïgakïrï. Podukai mai duduadikuitai maaxituldamu aapimï ïgai ix makïdï gïn buidïrï bïïtï sai ïgai mai kïïgakïrï bubuaki agai dai aapimï gia. Diuxi tudu ïgai dai ibuayi bïïxi ixtumaxi gïn aagidimi aanï.

Filipenses 4:8

Ïpï ïmo ixtumaxi gïn aagida in ïrhidi aanï aapimï gïn aaduñi Diuxi amadïrï. Daiñi, gïn aagidamu aanï ixtumaxi gï agai xi tïgito ajiopadagi aapimï. Tïgitodabïrai ixtumaxi ïr buaboi tudu dai ixtumaxi ïr kïï sïïrhi dai ixtumaxi ïr buañixi dai ixtumaxi xigiamaaxi. Gïn tïtïgitodabïrai ixtumaxi ïr kïï bhai maaxkami tudu.

1Tesalonicenses 4:12

Podukai tudu jaa ix makïdï mai buaboitudai gïn tïgito nïijadamu kïï bhai maaxkami dukai óídakatai aapimï. Dai podukai ïpï maiti gï aagadamu ix gïn maakiagi ïgai soiñi. Maiti gïn biïgakamu soiñi tudu Ïïgi gamaitïmu aapimï ïïgi aatabuadatai bhaiyoma.

1 Tomoteo 2:2

Daidi abïr daanturhiada go gïgïr dudunukami dai bïïxi go gaa gupudagai bipiakami ïpï. Abïr daanïda ïgai bïïtarï bai kïïga aatabuadagi ïgai. Gï agai gobai sai podukai xioma óídakana aatïmï bïïxkatai xadutudaitai Diuxi dai kïïga gïr xadutudaitai aipakoga ïpï.

1 Tomoteo 4:12

Maiti gï dagito ïpï xi jaa soi dukai gï nïijadagi utudukatai aapi kia dai bhaiyoma kïïga ibuada aapi dai kïïga ñokada dai kïïga buaboitudada dai kïïga oigïdada aapi jaa. Kïïga buañixikami dukai oidaka tudu dai podukai tïïgida go gaa buaboitudadami ix dukatai gï agai ix oidakagi ïgai.

1 Tomoteo 5:10

Gï agai xi jaa kïïgakïrï nïijadagi ïpï nïiditai ixtumaxi ibuayi ixtumaxi ïr kïïga. Gï agai xi tïgito nïida aapi ix bhai kïïga gïïrhidi maamaradï dai ix bhai kïïga miadïgidiña ïgai go buaboitudadami xibhïadïrï óídakami. Gï agai ïpï ix mai tiodiantuigakagi soikïitai go buaboitudadami tomax tuma aaduindagïrï. Gï tïgito nïida ïpï sa bhai gamaakaiña ïgai soiñi xorai soimaaxi taatamaiña. Ix makïdï gïn ojagi ami gï agai xi ïr bipiudukagi ix makïdï kaxi ibuadana naana maaxi aaduindagai kïïgadukami tudu. Ix pomaaxkagi ïgai aidï gia bhaiga ïgai xi gïn ojagi ami paperhiïrï xako ojixi budami soiñi.

Hebreos 13:18

Gin aaduñi, aanï ïmadï ix makïdï tami gin ïmadï daraka bïïxkatai kïï maatï gïr iibhïdagïrï sai maiti ibuadana aatïmï soimaaxi ixtukïdï gïpiïrï gïr bupadagi jaa. Dai ipïrhidi aatïmï xi apia bïïx tasai ibuadagi aatïmï ixtumaxi ïr kïïga tomax daibuñagi gïr ïmadï. Kaxkïdï abïr daanïda Diuxi gïr bïïtarï.

Hebreos 13:5

Dai maiti abïr adaimuada go tuminxi ïpï poïrhiditai sai gobai ïr gïn bhai ïrhiaraga. Gï agai bhaiyoma xi bhai gïn ïrhiadagi ixtumaxikïdï ka bia aapimï. Daiñi, ka ojixi Diuxi ojadïrï sai, Aanï Diuxi maiti gïn dagitomu tomarhi ïmo imidagai, ikaiti Diuxi ojadïrï.

Santiago 3:13

Gin aaduñi, ¿Po gïn ïrhidi mïxi sai kïïgadu gïn tïgibudaga dai sai maatï aapimï ix dukatai kïïga óídakagi? Aidï gia ix kïïgadukagi gïn tïgibudaga abïr ibuada ixtumaxi ïr kïïga dai podukai maaxituda saidi ïr buaboi sai kïïgadu gïn tïgibudaga. Kïïga abïr ibuada tudu dai maiti abïr gïgïrdukïdï gïn ïrhiada aapimï. Podukai ibuayi odami ix makïdï mai kïïgadu tïgibudadï kaxkïdï.

1 Pedro 2:15

Gin aaduñi, Diuxi ipïrhidi sai kïïga xadutudaitai óídakagi aapimï. Ipïrhidi ïgai sai go óídakami ix makïdï ïr buidïrï bïïtïkamigadï Diuxi ka mai biakagi ixtukïdï ñokadagi tudu. Podukai dodorhituda ïrhidi ïgai go ix makïdï gïn ñokidiña aagaitai naana maaxi buirudagai.

1 Pedro 3:16

Gïn nukadabïrai dai maiti ibuada tomarhi ïmo ixtumaxi ix makïdï soimaaxkami ïrhidi aapimï sai podukai mai gïpiïrï gïn bupadan buadagi ïïgi gïn tïgibudaga gokiïrï. Dai podukai ïpï xi gïpiïrï gïn bupada ïrhiadagi jaa xaïradamu ïgai nïiditai xïï sïïrhi ibuayi aapimï oiditai Suxi Kristo.

1 Pedro 4:11

Dukami, ix makïdï gatïtïïgiadagi ñoki gï agai sai kïïga ñokadagi ñokiturhikatai ïgai Diuxi. Dai ix makïdï soikïdagi jaa gï agai sai kabami gï aajagïdagi soikïitai bïïxi go gubukarhigaikïdï ix makïdï gamamaakai Diuxi. Bïïxi ixtumaxi ibuadagi aapimï abïr Diuxi gubukarhigadïkïdï ibuada saidi jaa xadutuadana Diuxi nïiditai ixtumaxi ibuayi aapimï gïn soikïitai Suxi Kristo. Suxi Kristo ïgai dai bïïxi adaama gï xadutuada agai bïïxkïrï bïïtarï tudu dai bïïxi adaama gatïanïda agai ïgai ïpï. Gobai gia ïr buaboi.

2 Pedro 3:11

Ugida agai bïïxi aïkatai ixtumaxi nïidi aatïmï tudu. Kaxkïdï maatiga maaxi sai gï agai sai kïïga buañixikami dukai óídakagi aatïmï kïïga ïïgiditai aatïmï Diuxi.