1 Pedro 1:8 - Northern Tepehuan Bible

⁸ Gin aaduñi, kïïga oigïdai aapimï go Suxi Kristo, tomaxi mai nïidi aapimï. Apia buaboitudai aapimï tomaxi mai nïidi aapimï kia tudu. Dai mai tipu ñoki ixdukatai aagagi xïï kabami bhai gïn ïrhidi aapimï buaboitudatai aapimï Suxi.

Tepehuan Northern: Diuusi ñiooquidʌ utuducami oodamicʌdʌ

^8-9 Aapimʌ mainʌiditai Suusi Cristo vʌʌscʌrʌ siaa duutudai dai oigʌdai, tomasi maiquiaa nʌidi aapimʌ ʌgai vʌʌscʌrʌ vaavoitudai vai poduucai cʌʌgacʌrʌ gʌnvuvaidana. Dai cascʌdʌ vaavoitudai aapimʌ sai ʌgai cʌʌgacʌrʌ gʌnvuvaidana. Dai cascʌdʌ aliʌ baigʌnʌlidi aapimʌ dai maitʌtʌgai ñiooqui isducatai aagidagi aa, mʌsaliʌ baigʌnʌlidi.

1 Pedro 1:8 Iomraidhean Croise

Mataibo 10:37

—Muidutai gïn aaduñi bhakoikamu gin buaboitudatai aapimï tudu. Dai aanï aagai sai xorai gin dagitoagi ipïrhiditai sai mai bhakoikagi dïïdïdï, ïgai ka maiti ïr ajïakami xi gin urabakagi. Dai podukai ïpï xorai gin dagitoagi ipïrhiditai sai maamaradï mai bhakoikagi, ïgai ka maiti ïr ajïakami xi gin urabakagi ïpï— itïtïdai.

VUAANA 14:15

Dai Suxi apia oi go aatagi go mamaatïrdamigadï ïmadï dai potïtïdai, —Gin aaduñi, gin oigïdabïrai dai aidï gia gin ïïgiadamu aapimï bïïxi aïkatïrï kïïga gin oigïdaitai.

VUAANA 14:21

—Gin aaduñi, gï agai odami ix kïïga gin ïïgiadagi. Podukai maaxitudamu ïgai ix gin oigïdai dai aidï gia aanï ïmadï gïn gin Oga oigïdadamu ïgai ïpï dai aanï kïïga tïtïgidamu ix tuiga aanï ipïrhiditai ix kïïga gin maatïkagi ïgai— itïtïdai.

VUAANA 16:22

Pomaaxi aapimïkïdï ïpï. Xibi soi gïn ïrhidi aapimï maatïkatai ix imi agai aanï, dïï gia gokiïrï gïn tïïgimu aanï ïpamu dai aidï gia bhai gïn ïrhiadamu aapimï. Dai mai tipukamu xorai gïn bopoidagi gïn bhai ïrhiaraga aidï.

VUAANA 20:29

Daidi go Suxi itïtïdai go Tomás, —Xibi gia gin buaboitudai aapi gin nïiditai. Dïï gia gïïpi bamioma bia bhai ïrhiaragai go odami ix makïdï gin buaboitudai mai kia gin nïiditai— itïtïdai.

VUAANA 8:42

Daidi Suxi itïtïdai, —Cho daiñi— itïtïdai. —Ix buaboikïdï ïr Diuxi maamaradïkamudai aidï gia gin oigïadamudai aapimï. ¡Diuxiañdïrï dibia aanï di! Dai mai xu ix ïïgi gin bhai ïrhiarakïdï— itïtïdai. —Diuxi ïgai ix makïdï bhaigobai gin otoi tudu.

Hechos 16:34

Dai gokiïrï baidakai ïgai go Pabora ïmadï Silas gï kiiyamu dai bhibhi. Dai kïï bhai gï ïldatu go kïïrhi buaboitudakai dai aaduñdï ïpï kïï bhai gïn ïjïrhi ïpï.

Romanos 14:17

Daiñi, Diuxi tïanïi odami mai xu mos ipïrhiditai xi odami dagitoagi ïïmo kuadagai xiïpï ïïmo iidagai. Diuxi ipïrhidi xi sïïrhi óídakagi odami Diuxi buitapi dai sai iibhïxtakan taadakagi odami dai sai ïïgiditai Diuxi Ibhïadï biakana ïgai gïn bhai ïrhiaraga. Go maaxi bïïtarï tïanïi Diuxi odami tudu.

Romanos 15:13

Diuxi ïgai dai gïr maakai gubukarhigai xi aatïmï bhai ïrhiarakïdï nïnïrakana ixtumaxi bia ïgai gïr bïïtarï. Kaxkïdï daanïi aanï sai ïgai kabami gïn bhai ïrhiatudana dai sai gïn maakana ïmo kïïgadukami ibhïxtaragai. Aidï gia Diuxi Ibhïadï gubukarhigakïdï kïïga bhai gin ïrhiadamu aapimï nïnïrakatai ixtuma kïïgadukami bia Diuxi gïn bïïtarï.

1 Korintios 16:22

Dai aanï aagai sai xorai mai oigïdadagi Suxi Kristo sai ïkobai biïna ïgai Diuxiañdïrï. Gin susukurhi, nïnïraka aanï sai otoma dibiagi Suxi Kristo ïpamu.

2 Korintios 1:22

dai gïr maa Ibhïadï ïpï dai ïgaikïdï gïr tïpaltu ïgai. Dai Diuxi ibhïadï ix makïdï gïr ïmadï daja ïr ïmo maaxidaragai dukai sai aatïmï ïr ïko bubaidadï Diuxi. Diuxi gïr maa Ibhïadï tudu dai kaxkïdï xadïrï maiti gïr maakana ïgai bïïxi go gaa ixtumaxi ix makïdï ka bhai duñixikami bia ïgai gïr bïïtarï ïpï.

2 Korintios 4:18

Kaxkïdï mai buamï rïrhidi aatïmï ixtumaxikïdï ix makïdï nïidi aatïmï, ix makïdï kïïga maaxi gïr bïïtarï tudu. Ka otoma ugiti agai bïïxi gobai tudu. Bhaiyoma tïtïitoi aatïmï ixtumaxi mai maaxi ix makïdï bïïxkïrï bïïtarï kabaka agai.

2 Korintios 5:7

Xibi apia oidiña aatïmï ixtumaxi buaboitudai aatïmï, tomaxi mai maaxi gïr bupuji bïïtarï. Podukai óídaga aatïmï xibi dai mai xu xi oidiña aatïmï mosïkaxi ixtumaxi maaxkagi gïr bupuji bïïtarï.

2 Korintios 9:15

Kïïga gï maatï tudu sai Diuxi otoi go Suxi Kristo dai bhai dui go kïïgakïrï bubaidaragai gïr bïïtarï dai gobai ïr ïmo gïdukami oidaragai bïïxkatai aatïmï buaboitudadami gïr bïïtarï. Gïr tïgibudaga mai ajïi ix gïr tïgitokagi xïï kïï tuiga Diuxi tudu dai mai tïtïgai aatïmï ñoki ixdukatai aagada aatïmï xïï kïï tuiga ïgai ïpï.

Galatas 5:22

Dïï gia xïïxkadï ïïgiadagi aatïmï Diuxi Ibhïadï gïr ïrana aatabuayi ïgai dai bhai buayi naana maaxi kïïgadukami gïr ïrañdïrï. Ïïgiditai aatïmï Diuxi Ibhïadï oigïdaiña aatïmï jaa dai bhai gïr ïrhidiña dai gïr ibhïxtakan taadakana aatïmï gïr ibhïdagïrï. Kïïga gïr kabakadaiña aatïmï ïpï xïxkadï soimaaxi taatamadagi. Kïï tutiakana aatïmï jaa bïïtarï dai ibuadana ixtumaxi ïr kïïga. Bïïxkïrï ibuadana aatïmï ix tumaxi aagagi aatïmï ïpï.

Galatas 5:6

Ka bïïna daraka aatïmï Suxi Kristo tudu xi kaxkïdï mai xudu xi circuncidadugakagi ïmoko xiïpï xi mai circuncidadugakagi ïpï. Maiti ïr ixtumaxi gobai. Xibi mosïkaxi namïga xi buaboitudagi aatïmï Suxi Kristo dai xi gïr oigïdadagi aipakoga. Podukai tudu gïr oigïdaitai aipakoga maaxitudai aatïmï sai kïïgakïrï buaboitudai aatïmï.

Efesios 3:19

Daiñi, odami tïgibudadï mai ajïi xi maatï kaïkagi xïï kïïga gïr oigïdai Suxi Kristo. Dïï aanï daanïi Diuxi sai gïn soiñana xi kïïga maatïkagi aapimï xïïxi gïr oigïdai ïgai. Aidï gia Diuxiañdïrï biakamu aapimï bïïxi aïkatai ixtuma biïgakagi gïn iibhïdaga bïïtarï.

Efesios 6:24

Sai Diuxi gïn tïtïgidana xïï kïï tuiga ïgai aapimï gïn bïïtarï. Aapimï tudu ix makïdï kïïga oigïdai Suxi Kristo Gïr Nukadakami dai apia oigïada agai bïïxkïrï bïïtarï. Mosïkaxi.

Filipenses 1:25

Aanï kïïga maatï sai aapimï gin tïgito kia tudu dai kaxkïdï po in ïrhidi aanï sai gïn urabamu aanï kia dai gïn soikïdamu sai bamioma gubuakagi gïn buaboidaraga sai podukai bamioma bhai gïn ïrhiadana aapimï.

Filipenses 3:3

Dïï gia aatïmï ix makïdï kïïgakïrï xadutudai Diuxi gubukarhigadïkïdï Diuxi Ibhïadï, aatïmï gia kïïgakïrï ïr maamaradï Diuxi. Aatïmï tudu ix makïdï gïïpi bia bhai ïrhiaragai bïïna darakatai aatïmï Suxi Kristo. Aatïmï ix makïdï mai buaboitudai ixtumaxi ibuadagi aatïmï ïïgi gïr gubukarhigakïdï tudu.

Filipenses 4:4

Dai bïïxkatai aapimï, abïr bhai gïn ïrhiada bïïnakatai aapimï Suxi Kristo Gïr Nukadakami. Gïn aagidamu aanï ïpamu abïr bhai gïn ïrhiada aapimï.

Hebreos 11:1

Gin aaduñi, bïïxkatai ïgai ix makïdï buaboitudai Diuxi kïïga maatï sai biaka agai ixtumaxi nïnïraka ïgai Diuxiañdïrï. Dai kïïga maatï ïgai ïpï sai daibuña agai bïïxi ixtumaxi ix makïdï aagadagi Diuxi. Kïïga maatï ïgai tomaxi mai kia daibusai gobai dai tomaxi mai kia nïidi ïgai.

Hebreos 11:27

Go Moises dagito go Ejipto tudu oiditai buaboidaradï dai mai buamï ïrhidi tomaxi go rey Faraon bhamukatadai ïgai bïïtarï. Kïïga oiditadai ïgai Diuxi tudu. Kïïga ïïgiditadai ïgai dukami xi nïijadagi ïgai tomaxi Diuxi mai maaxi odami bïïtarï.

1 Pedro 1:6

Kïïga ïr buaboi tudu sai aatïmï buaboitudadami bhïiya ragai ïmo gïdukami bhai ïrhiaragai. Dai kaxkïdï aanï agai sai gï agai ix bhai gïn ïrhiadagi aapimï tomaxi gï agai xi naana maaxi soimaaxi taatamadagi aapimï xibi chïki umigi kia.

1 Pedro 2:7

Kaxkïdï pokaiti Diuxi ñokidïrï sai Suxi Kristo kïïga gïn soikïdamu, aapimï ix makïdï buaboitudai. Dïï gia Diuxi ñokidï aagai go odami ix makïdï mai buaboitudai ïpï daidi ikaiti ami sai, Diuxi bïïtarï Suxi Kristo ïr go bamioma kïïgadukïdï odai dukai kïsaragai bïïtarï bakidï dïï gia go odami gajiadïrï bia ïgai mai buaboitudaitai, ikaiti go ojai.

1 Pedro 5:4

Ix podukai nukadakagi aapimï gïn aaduñi Diuxi amadïrï aidï gia Diuxi gïn maakimu ïmo maitïki ix makïdï bïïxkïrï bïïtarï bhai ïrhiaragaka agai. Gïn maakimu ïgai gobai xïxkadï dibiagi Suxi Kristo ïpamu ix makïdï adama ïr gïr Paxturuga tudu.