1 Korintios 3:18 - Northern Tepehuan Bible

^18-19 Gin aaduñi, kïïga abïr gïn tïgito nïida dai bhïiyi go tïgibudagai ix makïdï ïr Diuxi tïgibudadï kaxkïdï tudu gobai kïïga ïr buaboi. Kaxi abïr mai oijada ïïgi gïn tïgibudaga tudu kaxkïdï tudu odami tïgibudadï gia yaatagïi. Ix saitudakami ïrhiada aapimï ïïgi gïn tïgibudaga ka bhïiyi aapimï ïmo yaatagi. Daiñi, mos ïr ïï buirudagai Diuxi bïïtarï go tïgibudagai ix makïdï óídakami saitudakami ïrhidi. Kaxkïdï gï aagai ix ïmadukai gïn tïtïgitoagi odami ix makïdï kïïga mamaatïkami gïn ïrhidi ïïgi oiditai tïgibudadï óídakami. Ïgai gï aagai ix ïma dukai gïn tïtïgitoagi dai buiyagi Diuxi tïgibudadï bhaiyoma tomaxi óídakami bupuirugami dukai nïijadamu gokiïrï. Ix bhïiyagi ïgai Diuxi tïgibudadï aidï gia sastudakami dukai biimu ïgai Diuxi bïïtarï. Daiñi, Diuxi ojadïrï ikaiti sai, Diuxi daadagitodai go odami sai bhaiyoma gïn bupuirumadaiña ïïgi go ix makïdï mamaatïkami gïn ïrhidi ïïgi.

Tepehuan Northern: Diuusi ñiooquidʌ utuducami oodamicʌdʌ

^18-19 Tomali ʌmaadutai maitʌaagai isʌʌgi gʌnvupuiirumadadagi. Isʌmaadutai poʌliadagi isaliʌ saituduga aliʌsi gʌaagai istʌtʌgitodagi sai Diuusi vupuiirugami duucai nʌidi ʌoodami sastuduacʌdʌ. Sioomʌ ʌrcʌʌgai siaa oodami pocaitiadagi saidʌ ʌrvupuiirugami dai Diuusi vʌʌtarʌ gia sastuduga ʌgai. Diuusi ñiooquidʌrʌ pocaiti: “Ʌgai ismaacʌdʌ poʌlidi issastuduga, Diuusi dadagitoi sai ʌjʌʌgi gʌnvupuiirumadaiña”.

1 Korintios 3:18 Iomraidhean Croise

Mataibo 13:22

—Dai go ïxtokai ix makïdï basoi sïïxidakami saagida surhi ïr ïpïan dukami go odami ix makïdï kaïkana Diuxi ñokidï dïï mos apia maaxi óídaga dai buaboidaradï mai kabakaturïiña. Kabami buamï gïn ïrhidi ïgai gaagaitai tuminxi dai gaagaitai bhai ïrhiaradï ixtumaxiïrï oidaga tami idi oidigi daama. Dai kaxkïdï ïgai bïïtarï ka maiti ibuayi soiñi go ñoki ïpï ix makïdï kaïkana ïgai—.

Mataibo 18:4

—Dai aanï aagai sai odami ix makïdï ïpïan tutiakagi idi arhi odami mai tïtïanïdami gïn ïrhiditai, ïgai ïr ix makïdï bamioma ïr namïakami Diuxi bïïtarï xïïxkadï gatïanïdagi ïgai— itïtïdai.

Markos 10:15

Daiñi aanï aagai sai ix makïdï mai aarhi maa tutuigakagi mai baakimu xako tïanïi Diuxi. Aarhi bïïtarï mai xijaiga buaboitudagi Diuxi di— itïtïdai Suxi.

Lukas 18:17

Go arhi otoma buaboitudai tudu mai gïgïrdukïdï gïn ïrhiditai. Dai kaxkïdï kïïga gïn daadagitoi ïgai sai Diuxi tïanïna. Dai aanï aagai sai xorai mai pomaaxi tutiakagi mai biakamu oigaragai xi Diuxi tïanïdagi— itïtïdai.

Lukas 21:8

Dai Suxi potïtïdai, —Mui dadimu kia jaa ix makïdï pokaitadamu sai bia gin sïïrhikamiga. Pokaitadamu ïgai saidi ïr Diuxi otosadï gabhaitïkïakami tudu. Dïï aapimï gï agai xi gïn nukadakagi sai maiti gïn bupuirumadagi ïgai. Jaa pokaitadamu sai ka aijimi Diuxi otosadï ïpï dïï maiti abïr buaboitudada ïgai.

Romanos 11:25

Gin aaduñi, ipïrhidi aanï xi maatïkagi aapimï ïmo maatïtuldaragai Diuxiañdïrï ï ix makïdï ïki abhiadïrï ïxtokikana. Dai aidï gia toma lïïchi mai gïgïrdukïdï gïn ïrhiadamu aapimï kaïkai idi maatïtuldaragai ix makïdï gïn aagidamu aanï. Daiñi, mai xu bïïxkïrï kaapakami ka agai iibhïadï go judidiu maiti ipïrhiditai xi buaboitudagi. Kapakamu ïgai mosïkaxi asta xïïxkadï aiyagi ix xïïkiduka agai buaboitudadami ix makïdï maiti ïr judidiu.

Romanos 12:16

Ïmadugan dukai abïr tïgito nïida gïn aaduñi aipakoga ix maaxi daraja. Dai maiti abïr gïgïrdukami gïn ïrhiada ïïgi aapimï pobai gïn ïrhiditai xi bamioma maatï aapimï xi bhai jaa. Kïïga abïr nïijada ix makïdï ïr soititigami ïpï.

1 Korintios 15:33

Maiti abïr gïn dagito tudu ix gïn bupuirumadagi ix makïdï pomaaxi ñokai. Kïïga maatï aapimï sai xorai urabagi pupuirugami gï sarabidamu ïgai go soimaaxi tïgibudagai tomax xïï kïïgadukatadai ïgai tïgibudadï mai kia gaurabakai.

1 Korintios 3:17

Diuxi ka ïkobai gïn darai aapimï ix makïdï ïr bakidï dukai. Ïkobai gïn darai ïgai saidi ïr ïïgi ïgai bïïtarïkana aapimï tudu. Kaxkïdï Diuxi gïgïbitulda agai xorai soi gïn buidadagi Diuxi tuidadïkatai aapimï.

1 Korintios 4:10

Daiñi, aapimï pupuirugami dukai gïr nïidi aagaitai aatïmï Suxi Kristo dai sastudakami gïn ïrhidi ïïgi aapimï. Soi dukai gïr nïidiña aapimï. Dai pobïnïrhidi aapimï sai ïr gïgïrdukami aapimï jaa bïïtarï. Kïïga gïn xadutudai odami tudu dïï aatïmï gia maiti gïr xadutudai ïgai.

1 Korintios 6:9

Gï aagai ix kïï sïïrhi gïn tïgitokagi aapimï maatïkatai sai soimaaxi buadami mai biaka agai oigaragai ix Diuxi tïanïdagi. Daiñi, odami ix makïdï aipakoga boopoiña jaa ïmadï mai biaka agai oigaragai ix Diuxi tïanïdagi. Dai podukai ïpï ix makïdï buaboitudai uubixi, dai ix makïdï abhana boyiña oñigadï ïmai, dai ix makïdï ïïgi gïn ïmadï boopoiña kïkïïrhi dai oki ïpï,

Galatas 6:3

Daiñi, aanï aagai sai ïïgi gï buirumadai ïmoko ix pokaitadagi sai mai bia xi soikïdagi jaa xïïxkadï mai kïï ibuadagi ïgai. Ix mai soiña ïrhiada ïmoko jaa gobai itïiya ïrhidi sai ïmo gïdukïdï gï ïrhidi ïïgi dai gobai maiti ïr buaboi xi ïr gïdukïdï. Xorai mai soiña ïrhiada jaa maiti ïr ïmo gïdukïdï toma lïïchi tudu mos ïïgi po gï ïrhidi ïgai.

Galatas 6:7

Dai xi pobuadagi aapimï aidï gia gokiïrï kïïga buimu aapimï gïn maitïki. Gin aagidamu aanï ïmo maaxidaragai gokïdï. Daiñi, xi ïmo odami gaïïxiagi ixtumaxi kïïgadukami aidï gia gokiïrï yoobamu ïgai ix tumaxi kïïgadukami ïi ïgai. Dïï gia xi soimaaxkami gaïxiagi ïgai aidï gia soimaaxkami yoobamu ïgai ïpï gokiïrï. Mai bhaiga ïmoko xi buirumadagi Diuxi tudu. Ïgai bïïxkïrï anoraidi odami ixtumaxi ajïakagi nïiditai ixtumaxi idui ïgai tudu.

Efesios 5:6

Maiti abïr gïn dagito tudu xi gïn buirumadagi jaa potïkai ïgai sai maiti ïr soimaaxi gobai ix makïdï gïn aagidi aanï xibiki. Daiñi, Diuxi gïgïbitulda agai bïïxi ix makïdï pomaaxi buayi.

2 Timoteo 3:13

Dai xibi bhaitiakoga apia bamioma xigarhi bujidamu go galtutuigakami ix makïdï bupuirumada agai óídakami. Ïgai apia tïtïïgiadamu ñoki go jaa yaatagikïdï dai podukai bupuirumadamu ïgai mui. Dai go ix makïdï ïr bupuirumadami jaa ïïgi kuga iimimu kaïkatai aatagi ix makïdï maiti ïr buaboi ïpï. Dai podukai apia bamioma kuga iimimu ïgai.

Tito 3:3

Daiñi, maiti gï agai xi soi dukai nïijada aatïmï go jaa ix makïdï mai buaboitudai. Aatïmï ïpï maiti ïr buaboitudadamikana ïkioma tudu dai ïpïan tutiakana aatïmï ïgai dai ïpïamaaxi ibuadana. Aidï mai ïïgidiña aatïmï Diuxi dai buaboitudaiña aatïmï ixtumaxi ïr yaatagi. Mai bhaigakana aatïmï xi dagitoagi go soimaaxkami ix makïdï ibuada ïrhidiña aatïmï gaagaitai ïmo bhai ïrhiaragai. Aidï ïjïgakoitïrïkana aatïmï dai gïr kïïdaiña aatïmï aipakoga. Pomaaxi tutiakana aatïmï mai kia buaboitudakai tudu.

Santiago 1:22

Gï agai sai ïïgiada aapimï Diuxi ñokidï tudu dai mai xu mosïkaxi kaïka aapimï. Jaa gia mosïkaxi kaïkana Diuxi ñokidï dai mai kïïga tïgitokana ix kaiti dai mai ïïgidiña. Ïïgi gïn bupuirumadaiña ïgai pobuadatai tudu. Maiti gï agai ix po buadagi aapimï gin aaduñi.

Santiago 1:26

Gï agai ix ïïgiada aatïmï gïr buaboidaraga tudu. ¿Ïma dukai dukatai gïr soiñana gïr buaboidaraga ix mai ïïgiadagi aatïmï? Dukami, ix pokaitadagi ïmo odami sai kïïga oidi buaboidaradï dïï gia ix mai buamï ïrhiditai aagaiña ïgai soimaaxi ñoki, podukai ïïgi gï buirumadai ïgai. Gï maaxitudai ïgai sai maiti ïr soiñi buaboidaradï tudu.

1 Juan 1:8

Daiñi, ïïgi gïr bupuirumadai aatïmï xi pokaitadagi aatïmï sai mai soimaaxi ibuayi aatïmï tomarhi ïmo imidagai. Yaatagi gobai tudu.