Yoane 3:16 - Le Nouveau Testament en Kikwango 1950

¹⁶ Kadi Nzambi luta kuzola bantu ya nsi, yandi pesaka Mwana ya yandi mosi kaka, na konsonani kwikila yandi takufwa ve, kansi yandi ikele na moyo mvu ya mvu. Lom. 5:8; 1 Yoa. 4:9

Yoane 3:16 Iomraidhean Croise

Matai 9:13

Kansi kwenda kulonguka yai ikele mpila nki: Mono zola nkenda, kansi nkailu ya zikwa ve, kadi mono kwizaka ve kubinga balunungu kansi bankwa masumu.

Malako 12:6

Mosi bikaka na yandi, mwana ya yandi mosi ya zolwa. Yandi fidisaka yandi nanima kwa bau, kutuba: Bau tapesa mwana ya mono luzitu.

Luka 2:14

Nkembo kwa Nzambi mu zulu ya zulu, ye yenge va ntoto nakati na bantu ya yangidisa yandi. Yes. 57:19; Ef. 2:17; Luk. 19:38

Yoane 1:14

Diambu kitukaka nsuni, yo vandaka nakati ya beto, beto monaka nkembo ya yandi, bonso nkembo ya Mwana mosi kaka ya Tata, fuluka na nlemvo ye kieleka. Mat. 1:16, 18; Luk. 1:31; Mat. 17:2; Kolo. 1:19; 2:3, 9; Eb. 2:14

Yoane 1:18

Muntu imene kumona Nzambi ve ta mbala mosi; Mwana mosi kaka ya vandaka na ntulu ya Tata, yandi imene kuzaisa yandi. Mat. 11:27; Luk. 10:22; Yoa. 6:46; 1 Tim. 6:16

Yoane 1:29

Kilumbu ya landa, Yoane monaka Yesu kwiza kwa yandi, yandi tubaka: Tala, Mwana Dimeme ya Nzambi ya ikele kukatula masumu ya nsi. 1 Pet. 1:19

Yoane 10:28

Mono pesa bau moyo mvu ya mvu, bau tavila ve mvu ya mvu, ye muntu takatula bau mu diboko ya mono ve.

Yoane 3:15

kadi konsonani ya kwikila mu yandi, ikele na moyo mvu ya mvu. Luk. 19:10; Yoa. 6:40, 54

Yoane 3:18

Yandi ya kwikila yandi, ikele kufundiswa ve; yandi ya konda kukwikila yandi imene kufundiswa, sambu na yandi kwikila ve, mu nkumbu ya Mwana mosi kaka ya Nzambi. Yoa. 5:24; 6:40; Bis. 4:12

Yoane 3:36

Konso ya kwikila Mwana ikele na moyo mvu ya mvu, kansi ya kwikila Mwana ve tamona moyo ve, kansi makasi ya Nzambi ikele kuvanda va yandi. Yoa. 5:24; 6:47; 1 Yoa. 5:11; 1 Kol. 4:7; Yak. 1:17

Yoane 6:40

Kadi yai ikele luzolo ya Tata, konsomuntu ya mona Mwana ye kwikila yandi, tavanda na moyo mvu ya mvu. Yoa. 3:15

Loma 5:10

Kadi kana bu beto vandaka bambeni beto vutukaka kwa Nzambi mu lufwa ya Mwana ya yandi, buna beto imene kuvutuka kieleka kwwa Nzambi, beto tavuluswa mu moyo ya yandi;

Loma 5:8

Kansi Nzambi songaka zola ya yandi kwa beto, kadi bu beto vandaka bankwa masumu Klisto fwilaka beto.

Loma 8:32

Yandi ya buyaka ve Mwana mosi ya yandi, kansi pesaka yandi sambu na beto yonso, yandi lenda ve mu yandi kupesa beto mpe bima yonso ya matabisi ? Yoa. 3:16; Lom. 4:25; 5:6, 9

Efeso 2:4

Kansi Nzambi ya ikele kimvwama mu nkenda, sambu na zola ya yandi ya nene, ya yandi zolaka beto.

2 Tesalonika 2:16

Yandi kibeni, Mfumu ya beto Yesu Klisto, ye Nzambi Tata ya beto, ya zolaka beto mu nlemvo, ye pesaka beto mbombolo ya mvu ya mvu ye vuvu ya mbote,

Tito 3:4

Kansi bu nkenda ya Nzambi Mvulusi ya beto, ye zola ya yandi kwa bantu monikaka.

Ebeleo 2:9

Kansi beto ikele kumona yandi ya salwa nansi ya banjo ntangu fioti, yandi ikele Yesu, yandi monaka mpasi ye lufwa, yandi tulwa koloa ya nkembo ye ya nzitusu, yandi salaka yai na yandi mekaka mpasi ya lufwa sambu na bantu yonso, mu nlemvo ya Nzambi.

1 Yoane 3:1

Tala, zola ya nene ya Tata zolaka beto, na beto bingwa bana ya Nzambi, ye beto ikele yina mpe, sambu na yai nsi zaba beto ve, kadi yo zabaka yandi ve. Yoa. 1:12; 16:3

1 Yoane 4:19

Beto zola, sambu na Nzambi zolaka beto ntete.

Nzaikulu 1:5

ye tuka Yesu Klisto, ntemo ya kwikama, ya ntete ya fulukiswa tuka bafwa ye yandi ikele nyadi ya bamfumu ya ntoto. Kwa yandi ya zolaka beto ye sukulaka masumu ya beto mu menga ya yandi. Nk. 89:27; 51:2; 1 Kol. 15:20; Kolo. 1:18; Eb. 9:12, 14; 1 Pet. 1:18; 1 Yoa. 1:7, 9; Nzai. 3:14