Yohana 6:51 - Eriiraghano Eriihë

⁵¹ Eni n‑ekiinyakurë kino gheghwika koru Mwishaaro, kino ghekobhaha abhaato obhuhöru. Omooto wowoose uno akurë ekiinyakurë kiyo, naakubha no obhuhöru bho miishe ghyose. Ekiinyakurë kiyo n‑omobhere waane uno nekoworuusi gho ghiri e bhaato bhoose, kubha bhabhe no obhuhöru bho miishe ghyose.”

Yohana 6:51 Iomraidhean Croise

Mataayo 20:28

Gho nchëra iyo iyo, eni uno neenyi Omoona o Mooto ntiichiri kuhökëru, amare niichiri nebhahökëri abhaato na koruusi obhuhöru bhoone kubha nebhatingori abhaato bhaaru.”

Ruuka 22:19

Yesu akiimoki omughaate, aghiitabheri Eryobha, akawosuura, akabhaha abhatomu bhaache, arabhugha, [“Uno niwe omobhere waane, uno okoruusibhu gho ghiri yaanyu. Mubhe moraköra hangʼu, gho kohiita eni!”

Yohana 1:14

Angʼana iyo ekabha omooto, aghiikara ghateghate yiito. Itu bhoose tokabhorighi obhokumi bhooche obhokoro, obhokumi bhooche obhokoro iwe uno anyi Omoona omwene chiri o Taata, niichwire aghareeya no obhuhëënë.

Yohana 1:29

Atabhoori yaache, Yohana akamorighi Yesu araacha ghokooche. Akabhabhoorera abhaato bhano ꞉bhaare hayo akabhugha, “Mööhi, uyo n‑Omoona o Ngʼöndu o Ryobha, uno akoruusi amasari gha bhaato bhoose!

Yohana 11:26

Wowoose uno anyi muhöru ino arankumi eni, taaghoku naabha. Kana, noghoghakumi ghayo?”

Yohana 3:13

Taanyi‑ho omooto wowoose uno ꞉atoriri ghuye Mwishaaro, nanyinga eni, uno neenyi Omoona o Mooto, niwe ꞉niichiri koru Mwishaaro.

Yohana 3:14

“Hano Abhiisiraeri ꞉bhaare mwibhara, Musa ꞉naaköriri asanaamu e nchöka ino ꞉iköruru gho shabha na koyetiiri a‑mote, kubha abhatoori. Hangʼu hangʼu eni Omoona o Mooto nekuucha ghotiiribhu,

Yohana 3:16

Mbe, gho kubha Eryobha ꞉ndeebhasiighiri abhaato bhoose bha mo‑se ino, koru rekamoruusi Omoona waache omwene chiri, kubha omooto wowoose uno akomokumi atarumëëra, amare abhe no obhuhöru bho miishe ghyose.

Yohana 3:36

Omooto wowoose uno akomokumi Omoona o Ryobha naanyi no obhuhöru bho miishe ghyose. Amare omooto wowoose uno akomwanga taanyi no obhuhöru, gho kubha ghukarara kwo Waryobha ngokwëndërëra kubha ighoro yaache.

Yohana 5:24

“Mahëënë ˆnekabhabhoorera, abhaato bhoose bhano bhaghoghooghu amangʼana ghaane na korekumi Eryobha rino rentomiri mbaanyi no obhuhöru bho miishe ghyose. Bhataaghoteneru ekiina kwo masari ghaabho, amare mbatëënyiri koru mo‑roko na ghusöha mo‑bhuhöru bho miishe ghyose.

Yohana 6:33

Ekiinyakurë ke Ryobha n‑uno ikiri koru Mwishaaro, kubha abhahë abhaato bhoose bha mo‑se obhuhöru.”

Yohana 6:35

Yesu akabhagharokeri akabhugha, “Eni neeni ekiinyakurë kino ghekobhaha abhaato obhuhöru. Omooto wowoose uno akuucha ghokoone, taakooghu anchëra inkongʼorimu, wiiki uno aghonkumi taakooghu anyööta naabha.

Yohana 6:41

Mbe, Abhayahuuti bhaghasëëma kwingʼunyerangʼunyera gho kubha Yesu ꞉niighambiri kubha, “Eni n‑ekiinyakurë kino ghiikiri koru Mwishaaro.”

Yohana 6:47

“Mahëënë ˆnekabhabhoorera, omooto wowoose uno aghonkumi eni, naanyi no obhuhöru bho miishe ghyose.

Yohana 6:48

Eni neeni ekiinyakurë kino ghekobhaha abhaato obhuhöru.

Yohana 6:50

Amare hano nkeenyi‑ho ekiinyakurë kino gheghwika koru Mwishaaro. Aribha omooto ariire ekiinyakurë kiyo, taaghoku naabha.

Yohana 7:38

Amandëkö Amatööbhiyu ngakobhabhoorera abhaato kubha omooto wowoose uno aghonkumi eni, naakubha ne ebherika bhe manche gha bhuhöru moose yaache.”

2 Abhakorinto 5:19

Niko kobhugha, gho kohetera gho Kirisito, Eryobha ꞉ndiitëmëëriini abhaato na ryo, na retabhabhariire abhaato obhobhe bhoobho. Wiiki Eryobha ndetoheere emeremo ghe kobhabhoorera abhaato amangʼana gha bhoghwani bhuyo.

2 Abhakorinto 5:21

Kirisito taare na amasari ghoghoose, amare Eryobha ꞉ndeemubhariire amasari gho ghiri yiito, kubha itu tubhareru obhuhëënë ambërë e Ryobha gho kohetera ghokooche.

Abhaebheeso 5:2

Mumanye eriimanya re bhosiighi, kinya bhuure Kirisito ꞉atosiighiri itu, akiiruusi aghaku gho ghiri yiito, akabha kinya eriruusi re keneeso ghichömu kino ghekoretegheri Eryobha.

Abhaebheeso 5:25

Na niinyu abhasubhe, mubhe morabhasiigha abhakari bhaanyu, kinya Kirisito ꞉aresiighiri eriikanisa, akiiruusi omwene gho ghiri e riikanisa.

Tiito 2:14

꞉Niiruusiri gho ghiri yiito, kubha atotoori koru mo‑mabhe ghoose. ꞉Nëëndiri ghotomusa, kubha hëënë tubhe abhaato bhaache, bhano bhiiruusiri ghuköra amachömu.

Abheebhuraaniya 10:20

Gho nchëra e roko rooche, iwe natwighoriire anchëra ahë e bhuhöru, kubha totore ghwishuka ambërë e Ryobha. N‑kinya koheta mo‑mwando uno oteniini na ghusöha Ahaghiro Ahatööbhiyu ha Hatööbhiyu.

1 Bheetero 2:4

Momutambane uno anyi eriibhohe erihöru re kwabhëkëra. Eriibhohe riyo, abhaato ꞉mbaaryangiri, amare Eryobha ꞉ndeeryahwire, wiiki n‑de riighori ikoro mo‑miisho ghaache.

1 Yohana 2:2

Iwe niwe amaruusi gha ghosinchu na gho nchëra iyo, naruusiri amasari ghiito na ghotutëmëërani ne Eryobha. Wiiki ghataanyi amasari ghiito agheene, amare na amasari gha bhaato bhoose bha mo‑se ino.

1 Yohana 4:10

Bhuno nibho obhosiighi, taanyi kubha niitu ꞉tooresiighiri Eryobha, amare iryo niryo ꞉reetosiighiri itu. Nikyo ꞉reemotomiri Omoona waache, abhe amaruusi gha ghosinchu kubha aruusi amasari ghiito na ghotutëmëërani ne Eryobha.

1 Yohana 4:14

Itu ntorooche na ntokobhabhoorera obhuhëënë kubha, Taata Waryobha ꞉naamotomiri Omoona waache mo‑se ino, kubha abhe Omotoori o bhaato bhoose.