Obhohunyurëru 20:4 - Eriiraghano Eriihë

⁴ Niho nekarighi ebhetumbe bhe ghitëmi bhikariiru na bhano ꞉bhaare bhahaabhuru obhotoro bho ghotena ekiina. Bhayo, n‑chaakörö chiire che bhaato bhano ꞉bhaanunguru emitu gho koruusi obhwibhateri ighoro e Yesu na kuraghani amangʼana e Ryobha. Bhatasëngiire oghotyenyi ghuure koru asanaamu yaache. Bhatiisheriiri ghotooreru ekingʼöchö ghe ghotyenyi ghuyo mo‑masho ghaabho koru mo‑mabhökö ghaabho. Abhaato bhano ꞉bhaaryokiri, bhaghakangata haghirohamu na Kirisito emeeka egheku kimu.

Obhohunyurëru 20:4 Iomraidhean Croise

Mataayo 19:28

Yesu akabhagharokeri akabhugha, “Mahëënë ˆnekabhabhoorera, eriibhagha eni uno neenyi Omoona o Mooto neekubha niikeere eghitëmi mo‑ghetumbe keene ke bhokumi obhokoro mo‑se ahë, mbe, na niinyu bhano muntambiine, moghwikara mo‑bhetumbe ikomi na bhibhere ino moratenera ekiina amatöngö ikomi na abhere gha Bhiisiraeri.

Mataayo 24:10

Niho abhaato bhaaru bhano bhaghutambana bhaghontigha. Mbaakubha bhariigharurana na kurëghana abheene kwo bheene.

Maariko 6:16

Eriibhagha Herote Antibha oghwire amangʼana ghano, akabhugha kubha, “Uyo n‑Yohana, uno ꞉neenungiri omutu. Aryokiri koru mo‑bhaku!”

Maariko 6:27

Hayo hayo aghatoma omoshirikare aghi komonunga Yohana omutu. Omoshirikare aghaye mo‑riighërëcha, akamonunga Yohana omutu.

Maariko 9:11

Bhakamobhoori Yesu bhakabhugha, “Ibheere ngwake abheeghi bha meghiro bhahaabhugha kubha, nekwëndëru Eriya ache singa Kirisito akeere kuucha?”

Ruuka 1:17

Akörö yaache no obhotoro bhooche, mbookubha kebhuno bho murööti Eriya. Omoona uyo nakomukangata Omutëmi, gho ghiri amusëëmërë abhaato bha ghutëmëërana nawe. Naghutëmëërani abhaana na bhiishe, nakobhaköra abhaato bhano bhataanyi na asooko bhabhe na amiihëëbhö kinya bhaare bhaghosooka Eryobha.”

Ruuka 14:14

Neekubha ngʼoni ghokoocho, gho kubha, ibho bhataanyi ne egheghiro ghe ghokoreha. Eryobha niryo reghokoreha, eriibhagha re kobharyoki abhaato bhaache abhahëënë.”

Ruuka 22:30

ntookubha toraraaghëra ebhiinyakurë na kunyo haghirohamu mo‑bhutëmi bhoone. Na moghwikara mo‑bhetumbe bhe bhokumi obhokoro, moratenera ekiina amatöngö ikomi na abhere gha Bhiisiraeri.”

Yohana 14:19

Rekeere eriibhagha isuuhu abhaato bha mo‑se ino bhataakondighi wiiki. Amare inyu mokondighi, gho kubha eni m‑muhöru, na niinyu mookubha abhahöru.

Abharuumi 11:15

Mööhi, hano Eryobha rebhaangiri Abhiisiraeri, rekoghwana na abhaato bha matöngö. Gho ghayo, hano Eryobha rekobhiishereri Abhiisiraeri, neekubha kinya n‑abhaku bharyokiri!

Abharuumi 8:17

Mbe, aribha itu n‑abhaana bha Ryobha toonyi, ntubheere abhaghabhi bhaache. Ntoghosongʼaana aghabho yiito haghirohamu na Kirisito. Amare kino ghekwëndëru ghokwito ibheere n‑kubha, tusange anyaako haghirohamu na Kirisito, kubha na niitu tusange haghirohamu nawe mo‑bhokumi bhooche obhokoro.

2 Timotewo 2:12

Aribha toghoghumereri, ntoghutëmi haghirohamu nawe. Aribha toramwanga, woose naghotwanga.

Obhohunyurëru 1:2

Yohana aghasiikëra amangʼana ghoose ghano ꞉arooche. Ghayo nigho Eryobha ꞉reesiikiire na Yesu Kirisito aghaghasiikërëra.

Obhohunyurëru 1:9

Eni Yohana n‑omokumi omughëndi waanyu neenyi. Nighöötiine na niinyu ghoghumereri kunyaaka gho ghiri e Yesu Kirisito no obhutëmi bhooche. Neere nihööchëriiru mo‑gheghinga ke mo‑nyancha kino ghekobherekeru Bhaatimo. ꞉Niihööchëriiru iyo gho ghiri e kuraghani angʼana e Ryobha, na koruusi obhwibhateri ighoro e Yesu.

Obhohunyurëru 11:11

Hano chaasiko chiyo ishato ne eriiteneka chehetiri, Eryobha rekabhahuuteri omwika o bhuhöru, bhaakabha abhahöru, bhakiimeerera. Bhoose bhano ꞉bhaabharooche, bhaghatiina chwee.

Obhohunyurëru 11:15

Akamara, marayika o mohungate aghatëma antaara yaache. Nekamara nekooghu eriiraka ikoro iyo Mwishaaro rerabhugha, “Obhukangati bho se mbughööturu no Omutëmi Waryobha wiito, na Kirisito waache uno amwahwire ghotoori abhaato. Iryo ndeghukangata emiishe ne emiishe.”

Obhohunyurëru 11:3

Eni nekobhatoma abhiibhateri bhaane bhabhere, nekobhaha obhotoro bho koruusi obhurööti chaasiko egheku kimu na amaghana ebhere na miröngö esaasabhe (1,260), mbaakubha bhabheekiri changibho che maghönëra kwërëki amacheeche.” Chaasiko chiyo n‑kinya eriibhagha re myëri miröngö ene ne ebhere.

Obhohunyurëru 11:7

Hano bhakumara kuraghani angʼana e Ryobha, atyenyi inkoro yiire ino etiiriri koru mwirooma re mashambu, nekurööna nabho. Nekobhahicha na kobhiita.

Obhohunyurëru 12:11

Ibheere abhakumi bhaghëndi bhiito mbamohichiri kwo masaahë gha Moona o Ngʼöndu, na kwo ngʼana e bhwibhateri bhoobho, mbamohichiri. Bhatatereeriri eriimanya reebho, mbaare bhiisëëmiri ghoku gho ghiri e komokumi Omoona o Ngʼöndu.

Obhohunyurëru 14:11

Eryoki re mororo uyo uno okobhanyaaki, ndeghotiira ighoro emiishe ghyose. Abhaato bhayo bhataakubhöna obhuchömu obhotiko no omwishe, gho kubha ꞉mbaasëngiire oghotyenyi ghuure na asanaamu yaache na ghotooreru eriina reeche.”

Obhohunyurëru 15:2

Wiiki nekarighi egheghiro kino keere kinya anyancha e kiröri ino isangeriini no omororo. Wiiki rubhareka hayo, mbaare bhiimeeriire abhaato bhano ꞉bhaare bhakindiri oghotyenyi ghuure, na asanaamu yaache, haghirohamu no omubharo o riina reeche. Abhaato bhayo mbaare bhaghöötëriire amatingo ghano ꞉bhaare bhahaabhuru ne Eryobha kubha bhamusëngërërë.

Obhohunyurëru 17:8

Oghotyenyi ghuno orooche, ekimbërë ngoore ghuhöru amare ibheere ngokuure. Ibheere haghuhe ghoonyi koru mwirooma re mashambu, amare Eryobha ndeghoghosireekereri. Abhaato bhoose bha se bhano amariina ghaabho ghataandëkuru mo‑Ghitabhu ke Bhuhöru korwera ghutëëmu gho se, mbakoroghoora korighi oghotyenyi ghuyo gho kubha ngoore‑ho, ghokamara ghoghaku, amare ghoghagharuka wiiki.”

Obhohunyurëru 2:26

Omooto wowoose uno aghokinda amasaki na kwëndërëra ghuköra amiigha ghaane mbagha mo‑ntenero, “Nekomuha obhotoro bho ghukangata abhaato bha matöngö ghoose.

Obhohunyurëru 20:6

Kuno niko koryoka kwo bhaku o kumbërë. Ngʼoni bhano bhakoryokibhu hayo, ibho mbiitabhiiru chwee na m‑bhatööbhiyu. Oroko ro kabhere rotaakubha na changuru ighoro yaabho. Ibho mbaakubha abhachaama bha Ryobha na Kirisito, na mbaghukangata nawe eriibhagha riyo re meeka egheku kimu.

Obhohunyurëru 22:5

Mo‑moghya uyo, hataakubha no obhotiko wiiki. Abhaato bhataakubha bharëënda obhwero bho romore hamu bho mu, gho kubha Omutëmi Waryobha naakubha obhwero bhoobho. Nabho abhaato bhayo mbaghukangata emiishe ne emiishe.

Obhohunyurëru 3:21

Omooto wowoose uno aghokinda amasaki, nekomwisherereri ghwikara na neeni mo‑ghetumbe keene ghe ghitëmi, kinya bhuure na neeni ꞉neekindiri, neghiikara na Taata mo‑ghetumbe keeche ghe ghitëmi.

Obhohunyurëru 4:4

Mbeere‑ho ebhetumbe ebhende bhe ghitëmi miröngö ebhere na bhine bhiinaariiri eghetumbe kiire ghe ghitëmi. Mo‑bhetumbe bhiyo, mbaare bhiikeere abhagharuka miröngö ebhere na bhane. Mbaare bhabheekiri changibho cheero na chahuuru che sahaabhu mo‑mitu gheebho.

Obhohunyurëru 6:9

Mbe, Omoona o Ngʼöndu akanaanura omohuuri o nyaghame o ghataano, nekarighi chaakörö che bhaato cheenyi mwirungu re haghiro ha koruuseri amaruusi. Bhayo n‑chaakörö chiire che bhaato bhano ꞉bhaanunguru emitu gho kuraghani angʼana e Ryobha na koruusi obhwibhateri ighoro e Yesu.

Obhohunyurëru 7:3

akabhugha, “Mughanye! Motasari ase ayoomu, na anyancha hande emete, mbagha totoore omohuuri mo‑masho gha bhatamishi bhoose bha Ryobha riito.”