1 Bheetero 5:10 - Eriiraghano Eriihë

¹⁰ Eryobha rino reenyi na aghareeya yoose, ndebhabherekiire ghusanga obhokumi bhooche obhokoro bho miishe ghyose, gho ghughöötana na Kirisito. Amare moramara kunyaaka kwo riibhagha ighuhe, iryo eryene ndekobhaköngʼi, ndekobhaha changuru, na kobhaköngʼëërëri.

1 Bheetero 5:10 Iomraidhean Croise

Ruuka 22:32

Amare, neghusabhiire kwo Waryobha, kubha otakindu mo‑bhokumi bhoocho. Na hano okubha ungarökiire, obhatoore changuru abhaghëndi bhaacho.”

Abharuumi 15:13

Eryobha niryo toghwitëngʼëra kubha ndeghuköra ghoose ghano ꞉reeturaghiri. Gho ghayo, nekobhasabhera kubha, rebhahë omurëmbë chwee na ghuchömëru kwaru hano mokwëndërëra korekumi. Hayo niho mookubha ne eriitëngʼërö ikoro, rino moonyi naryo gho changuru che Körö Ahörëëru.

Abharuumi 15:5

Eryobha niryo reghotusakeri ghoghumereri na ghotughambisani. Ibheere, neghusabha kubha, rebhatoori mubhe no obhumu ghate yaanyu, gho kubha moghutambana eghetuubhaani ghe Kirisito Yesu.

Abharuumi 16:25

Ibheere, ntokoreghongi Eryobha! Iryo ndeghotora kobhaköra mubhe moriiköngʼi mo‑bhokumi bhoonyu, kohetera mo‑Ngʼana Anchömu ighoro e Yesu Kirisito ino neere neraraghani ghokoonyu. Angʼana iyo neere ebhisuru korwera kare, amare ibheere, nehunyuuru,

Abharuumi 9:11

Amare, ebhisare bhiyo hano bheere bhekeere kwibhoru, na koru bhekeere ghuköra ghyokyose kibhe ghichömu hamu ekebhe, Eryobha rëkëërëki amënda ghaache gha kwahura,

Abharuumi 9:24

Mo‑bhaato bhayo nibho itu bhano rebherekiire. Retabherekiire Abhayahuuti abheene, amare koru abhaato bha matöngö.

1 Abhakorinto 1:10

Ibheere, bhahiiri bhaane, nekobhasasaama kwo riina re Mutëmi wiito Yesu Kirisito kubha, motabha moraheteerana mo‑maghamba. Motaanga kubha no obhoghwani ghate yaanyu, amare mubhe bhamu mo‑ghano mokwënda na mo‑ghano mokwihëëbha.

1 Abhakorinto 1:9

Eryobha ndeghuköra ghayo gho kubha n‑ihëënë. Iryo niryo rebhabherekiire inyu, mubhe no obhumu no Omoona waache Yesu Kirisito, Omutëmi wiito.

2 Abhakorinto 13:11

Ibheere, abhahiiri bhaane, masaraamu! Mubhe bhaghöröröku, na mwighambisani, na mubhe no obhumu, na mubhe no omurëmbë. Eryobha ryose rino reenyi no obhosiighi no omurëmbë ndeekubha haghirohamu na niinyu.

2 Abhakorinto 4:17

Neghosiikëra hangʼu, gho kubha anyaako yiito n‑ihoho na n‑e riibhagha ighuhe hangʼu. Wiiki, neghotusëëmëra obhokumi obhokoro bho miishe ghyose. Obhokumi obhokoro bhuyo m‑bhokoro chwee, mboghotuköra korighi anyaako ino, n‑egheghiro ghesuuhu hangʼu.

Abhabhiribhi 4:13

Neghotora ghuköra ghoose ghayo, gho kubha Kirisito niwe akuuha changuru.

Abhakorosaayi 2:7

Mwëndërërë ghosimi emerya muköngʼëri gho Kirisito, mubhe mwabhëkuru moose yaache, na kwimeerera muköngʼiiri mo‑bhokumi kinya bhuure mweghuru, na mubhe abhaato bha koriitabheri Eryobha eriibhagha ryose.

1 Abhatesaronike 2:12

kubha mubhe moratambana ghano Eryobha resiighiri. Eryobha niryo rekobhabherekera kubha, mubhe haase e bhukangati no obhokumi bhooche obhokoro.

2 Abhatesaronike 2:14

Eryobha ndebhabherekiire inyu, kubha mubhönë obhotoori bhuyo gho nchëra e Ngʼana Anchömu ino ꞉tuuraghiini bhowaanyu. Ndebhabherekiire kubha mubhönë obhokumi obhokoro bho Mutëmi wiito Yesu Kirisito.

2 Abhatesaronike 2:17

abhaghambisani emetema gheenyu na kobhaköngʼëërëri kwo mangʼana amachömu ghoose ghano moghosiikëra hamu ghuköra.

2 Abhatesaronike 3:3

Amare Omutëmi m‑muhëënë, iwe nakobhaköngʼëërëri inyu na kobhachonga no Omobhisa wuure.

1 Timotewo 6:12

Wiköngʼi kurööna eriihë ichömu re bhokumi bhwito, ughöötërërë obhuhöru bho miishe ghyose. Obhuhöru bhuyo, Eryobha ndebhabherekiire mobhubhönë, na moruusiri obhwibhateri bho mahëënë ambërë e bhiibhateri bhaaru kubha, moghwitëngʼëra kobhubhöna.

2 Timotewo 1:9

Iryo ꞉ndeetotooriri, reghatobherekera tubhe abhaana bhaache abhatööbhiyu. Retaaköriri hangʼu gho ghiri e maköri ghiito, amare ꞉ndiiköriri gho ghiri e miigha ghaache na aghareeya yaache. ꞉Ndeetoheere aghareeya iyo gho nchëra e Kirisito Yesu, koru ase ino ekeere ghutëëmu.

2 Timotewo 2:10

Gho ghayo, neghoghumereri ghoose gho ghiri e bhaato bhano bhaahwiru ne Eryobha bhabhe abhaato bhaache. Neghuköra hangʼu, kubha bhoose bhasongʼaane obhotoori kohetera Kirisito Yesu, na ghusanga obhokumi bhooche obhokoro bho emiishe ghyose.

Abheebhuraaniya 9:15

Gho ghayo, Yesu niwe akobhaghöötani abhaato ne Eryobha mo‑Riiraghano Eriihë kubha abhaato bhano Eryobha rebhahwire bhabhönë obhuhöru bho miishe ghyose bhuno ꞉riiraghiri kobhaha. Ghano ngaghotora ghuköru hangʼu gho kubha Yesu ꞉naakuure kubha abhatingori abhaato koru mo‑masari ghano ꞉bhaare bharaköra mo‑Riiraghano re Kare.

1 Bheetero 1:15

Eryobha rino ꞉reebhabherekiire, n‑itööbhiyu. Ibheere inyu bhoose mokwëndëru mubhe abhatööbhiyu mo‑ghoose ghano moghuköra,

1 Bheetero 4:10

Omooto woose nahaabhuru ekihaano keeche koru kwo Waryobha. Nekwëndëru ghokihökëri bhoheene gho ghiri e ghusakerani, kinya omwimeerereri omuhöriicho o ghareeya e Ryobha ino enyi e manga maaru.

1 Bheetero 4:11

Aribha omooto anyi na amangʼana gha ghosiikëra, asiikërë kinya n‑kwo Ryobha gharuure. Na aribha omooto aghusakeri abhaghëndi bhaache, abhasakeri kwo bhotoro bhuno bhookoru kwo Waryobha. Gho ghayo, Eryobha ndeghoghongibhu mo‑mangʼana ghoose, gho nchëra e Yesu Kirisito omwene uno anyi no obhokumi obhokoro no obhotoro emiishe ne emiishe. Hawubhaabha.

2 Bheetero 1:3

Eryobha kohetera mo‑bhotoro bhooche, ndetoheere amangʼana ghoose ghano tookwënda, kubha tubhe no obhuhöru, na tukörë ghano ghakwëndëru ambërë yaache. Ndetoheere ghayo gho nchëra e korimënya rino atobherekiire gho ghiri e bhokumi obhokoro no obhuhöriicho bhooche eryene.

1 Yohana 2:25

Rino aturaghiri Omoona o Ryobha niryo rino, kubha no obhuhöru bho miishe ghyose.

Yuuta 1:24

Eryobha niryo reenyi no obhotoro bho kobhachonga motaacha kobhora. Wiiki ndeenyi no obhotoro bho kobharëëta ambërë yaache mo‑bhokumi bhooche obhokoro, moonyi no oghuchömëru, motaanyi no obhobhe bhobhoose.